I Jesucristo pepakit ya karing tau nang Nephi, kabang ding keraklan mitipuntipun la king labuad ning Masagana, at pigsilbian nala; at king paralan a ini pepakit ya karela.
Bibilugan da ring kapitulu 11 anggang 26.
Kapitulu 11
Ing Ibpa magpatutu ya king keang Kaluguran a Anak — I Cristo pepakit ya at pepasiag na ing keang pamanatbus — Ding tau asasalat dala ding bakas ding sugat da ring keang gamat at bitis at tagiliran — Gugulisak lang Hosanna — Bibiye na ing paralan at gawi ning pamaminiag — Ing espiritu ning pamisalangsangan ken yang demonyu — Ing doktrina nang Cristo ya ing ding tau dapat lang maniwala at mabinyag at tanggap Espiritu Santo.
1 At ngeni milyari a ating maragul a keraklan a mitipuntipun, da ring tau nang Nephi, a makapadurut king templo a atiu king labuad ning Kasaganan; at magtaka la at mangapamulala king metung at metung, at mipapakit king metung at metung ing maragul at makapagmulalang pamagbayu a milyari.
2 At misasabi la mu naman tungkul kang Jesucristo, nung kaninu ya mibiye ing tanda tungkul king keang kamatayan.
3 At milyari a kabang misasabi la king metung at metung, mekaramdam lang siwala a balamu manibatan king banua; at linawe lang makapadurut, uling e de aintindian ing siwalang karelang dimdam; at iti eya garalgal a siwala, ni eya masikan a siwala; makanian man, at sumangid na ning metung yang malating siwala, ita linub ya karela a mekaramdam king libutad, anya alang parti na ning karelang katawan a e minugun; wa, iti linub ya king karelang pekakaladua, at migpalablab king karelang pusu.
4 At milyari a pasibayu dimdam de ing siwala, at ini e da aintindian.
5 At pasibayu king katlung besis dimdam de ing siwala, at biklat dala ding karelang balugbug ba dang damdaman iti; at ding karelang mata makalawe la king panibatan na ning siwala; at linawe lang mitmung katatagan king banua, nung nukarin manibatan ing siwala.
6 At kanita bigla,king katlung besis aintindian da ne ing siwalang dimdam da; at sinabi na karela:
7 Lawan, ing Kaluguran kung Anak, nung kaninu ku matula, nung kaninu miparangalan ing kanakung lagiu — pakiramdaman ye.
8 At milyari a anyang aintindian da ne pasibayu da lang linawe ding karelang mata king banua; at bigla, ikit de ing metung a Lalaking titipa manibatan king banua, at makamalan yang maputing balabal; at tinipa ya at tinalakad ya king busal da; at ding mata da ring keraklan makalawe la kea, at e da pignasan ing buklat da la ding karelang asbuk; anggiyang king metung at metung, at e da abalu ing kabaldugan na nini, uling ing isipan da metung yang anghel ing pepakit karela.
9 At milyari a lidlad nala ding keang gamat at migsalita ya karing tau, a sasabing:
10 Lawan, aku i Jesucristo, a petutuanan da ring propeta a datang king yatu.
11 At lawan, aku ing sala at ing bie na ning yatu, at minum ku ketang mapait a copa a pigkalub na ning Ibpa kanaku, at miparangalan ya ing Ibpa king pamagdala ku king kasalanan na ning yatu, a nung nukarin ku gewa ing kaburian na ning Ibpa king anggang bage ibat king mumuna.
12 At milyari a anyang i Jesus asabi na la ding amanung deni ing mabilug a keraklan sinakab ya king gabun; uling karelang aganaka a meula king busal da a i Cristo pakit ya karela kaibat nang minukiat king banua.
13 At milyari a ing Guinu migsalita ya karela a sasabing:
14 Talakad kayu at lumapit kanaku, ba yu lang abili ding kekayung gamat king kanakung tagiliran, at ba yu la namang asalat ding bakas da ring paku karing kanakung gamat at karing kanakung bitis, ba yung abalu a aku ing Dios ning Israel, at ing Dios na ning kabilugang yatu, at pete da para karing kasalanan na ning yatu.
15 At milyari a ding dakal linapit la, at binili da la ding karelang gamat king keang tagiliran, at selat dala ding bakas da ring paku karing keang gamat at karing keang bitis; at ini karela yang gewa, ing balang metung angga king ila ngan meyari la, at ikit da karing karelang mata at asalat karing karelang gamat, at abalu ra a ating kasiguraduan at magpatutu a iti yapin ya, nung ninu ing sinulat da ring propeta, a datang.
16 At anyang ila ngan meyari la at ikit da king karelang sarili, ginulisak lang mikakasundu, a sasabing:
17 Hosanna! Purian ya ing lagiu na ning Pekamatas a Dios! at sinakab la king kabitisan nang Jesus, at simban de.
18 At milyari a migsalita ya kang Nephi (uling i Nephi metung ya karing dakal) at inutusan ne a dapat yang lumapit.
19 At i Nephi tinikdo ya at linapit, at diku ne ing keang sarili king arapan na ning Guinu at inuma nala ding bitis na.
20 At ing Guinu inutus na kea a tikdo ya. At tinikdo ya at tinalakad ya king arapan na.
21 At ing Guinu sinabi na kea: Bibiye ku keka ing upaya a maminiag karening tau potang minukiat na kung pasibayu banua.
22 At pasibayu ing Guinu inaus nala ding aliwa pa, at sinabi na naman ita karela: at dininan na lang upaya para maminiag. At sinabi na karela: Kening paralan a ini maminiag kayu; at e mika pamisalangsangan king busal yu.
23 Katutuan sasabian ku kekayu, a ninuman ing sumisi king keang kasalanan king kapamilatan da ring kekayung amanu, at magnasang mabinyag king kakung lagiu, king paralan a ini biniagan yu la — Makiramdam, kuldas kayu at talakad king danum, at king kakung lagiu biniagan yu la.
24 At ngeni makiramdam, deni ring amanung kekayung sabian, ausan yu la king lagiu, a sasabing:
25 King autoridad a pigkalub na kakung Jesucristo, bibiniagan da ka king lagiu na ning Ibpa, at ning Anak, at ning Espiritu Santo. Amen.
26 At kaibat ipalbug mu la king danum, at isaka mu lang pasibayu ibat king danum.
27 At king paralan a ini mabinyag kayu king lagiu ku; uling lawan, katutuan sasabian ku kekayu, ing Ibpa, at ing Anak, at ing Espiritu Santo metung la mu; at aku atiu ku king Ibpa, at ing Ibpa atiu kanaku, at ing Ibpa at aku metung ya mu.
28 At agpang king inutus ku kekayu makanian kayung maminiag. At e mika pamisalangsangan busal yu, kalupa na kanita; ni mika pamisalangsangan agpang king puntu na ning kakung doktrina, kalupa na pin kanita.
29 Uling katutuan, katutuan sasabian ku kekayu, ya a ating Espiritu na ning pamipate e ya kanaku, dapot ken yang demonyu, a tata na ning pamipate, at amuyutan nala ding pusu da ring tau bang makipate a ating mua, king metung at metung.
30 Lawan, aliwa ini ing kakung doktrina, para amuyutan la ring pusu da ring tau bang mimua, ing metung laban king metung; dapot ini ing kakung doktrina, a ing makanian a bage e dapat gawan.
31 Lawan, katutuan, katutuan, sasabian ku kekayu, ipasiag ke kekayu ing kakung doktrina.
32 At ini ing kakung doktrina, at iti yang doktrinang biniye na kanaku ning Ibpa; at magpatutu ku king Ibpa; at ing Ibpa magpatutu ya kaku, at ing Espiritu Santo magpatutu ya king Ibpa at kaku; at magpatutu ku a utusan nala ning Ibpa ding anggang tau, nukarin la man, para sumisi la at maniwala kanaku.
33 At ninumang maniwala kanaku, at mebiniag, miligtas ya; at ila ring magmana king kayarian ning Dios.
34 At ninumang e maniwala kaku, at e mebiniag, misumpa ya.
35 Katutuan, katutuan, sasabian ku kekayu, a ini ing kakung doktrina, at magpatutu ku kaniti ibat king Ibpa; at ninuman ing maniwala kaku maniwala ya naman kang Ibpa; at kea ing Ibpa magpatutu ya kaku, uling puntalan ne king api at king Espiritu Santo.
36 At anya pin magpatutu ya ing Ibpa kaku, at ing Espiritu Santo magpatutu ya kea kang Ibpa at kaku, uling ing Ibpa, at aku, at ing Espiritu Santo metung la mu.
37 At pasibayu sasabian ku kekayu, dapat kayung sumisi, at maging kalupa ning metung a malating anak, at pabiniag king kakung lagiu, o king nanu mang paralan e yu la malyaring tanggapan dening bage a reni.
38 At pasibayu sasabian ku kekayu, dapat kayung sumisi, at mabinyag king lagiu ku, at maging kalupa ning metung a malating anak, o e yu malyaring manan ing kayarian ning Dios.
39 Katutuan, katutuan, sasabian ku kekayu, a ini ing kanakung doktrina, at ninumang mitalakad king babo na nini mitalakad ya king babo na ning kakung batu, at ding pasbul ning infierno ere daigan.
40 At ninumang mipasiag dakal o ditak kesa kanini, at italakad ne iti para king kakung doktrina, ita marok ya, at e mitalakad king babo ning kakung batu; dapot mitalakad ya babo ning pitatalakarang balas, at ding pasbul na ning infierno makabuklat la para tanggapan ding makanian a tau potang dinatang ing albug at ing angin maspas ya karela.
41 Nung makanian, puntalan yu la ding taung deni, at sabian la ring amanu a kakung sinabi, angga karing sepu na ning yatu.