Kapitulu 23
I Jesus mamayun ya karing amanu nang Isaias — Ya utusan nala ding tau bang saliksikan dala ring propeta — Ding amanu nang Samuel ing Lamanite agpang king Pamanyubling Mie midagdag la karing karelang kasulatan.
1 At ngeni, makiramdam, sasabian ku kekayu, a dapat yulang saliksikan deting bage. Wa, metung a kautusang bibiye ku kekayu a masikap yulang saliksikan deting bage; uling dakila la ding amanu nang Isaias.
2 Uling siguradu migsalita ya tungkul karing anggang bage agpang karing kakung tau a ibat king bale ning Israel; nung makanian dapat yang magsalita mu naman karing Gentil.
3 At ding anggang bage a sinabi na milyari nala at malyari la pa, anggiyang agpang karing amanung keang sinabi.
4 Nung makanian makiramdam karing kakung amanu; isulat yula ding bage a sinabi ku kekayu; at agpang king panaun at king kaburian ning Guinu ila mipunta la karing Gentil.
5 At ninuman ing makiramdam karing kakung amanu at sinisi at mebiniag, miligtas ya. Saliksikan la ring propeta, uling ating dakal a magpatutu karing bage a reni.
6 At ngeni milyari a aniang i Jesus asabi na nala deting amanu sinabi na karelang pasibayu, kaibat nalang aisplika ding anggang banal a kasulatan karela a karelang atanggap, sinabi na karela: Lawan, ding aliwang banal a kasulatan a buri kung isulat yu, a e yupa sinulat.
7 At milyari a sinabi na kang Nephi: Dalan mu la keni ding kasulatan a kekang sininup.
8 At anyang i Nephi adala na nala ding kasulatan, at lidlad nala king arapan na, linawe nala karing keang mata at sinabi na:
9 Katutuan sasabian ku kekayu, inutus ke ing kakung talasuyu i Samuel, ing Lamanite, a dapat yang magpatutu karing taung deni, a king aldo a ing Ibpa dapat neng purian ing lagiu na kanaku a dakal lang santo ding mibangun ibat karing mete, at dapat pakit karing dakal, at dapat sumaup karela. At sinabi na karela: E wari makanian?
10 At ding keang alagad pekibatan de at sinabi da: Wa, Guinu, i Samuel menula ya agpang karing kekayung amanu, at ila ngan metupad la.
11 At i Jesus sinabi na karela: Makananu ing milyari a eyu asulat ing bage a ini, a dakal lang santo ding mibangun at pepakit karing dakal at sinaup karela?
12 At milyari a i Nephi aganaka na a ing bage a ini epa misulat.
13 At milyari a i Jesus inutus na a iti dapat yang misulat; uli na niti misulat ya agpang king keang kautusan.
14 At ngeni milyari a anyang i Jesus aisplika nala ngan ding kasulatan king metung, a karelang sinulat, inutus nala a dapat dalang ituru ding bage a keang aisplika karela.