1 At katutuan, katutuan, sasabian ku kekayu ing atin ku pang aliwang tupa a ala kening labuad a iti, ni king labuad na ning Jerusalem, ni nukaring dake na ning labuad a nung nukarin kaku nang apanibalan.

2 Uling ila a kanakung sasabian ila ding epa mekaramdam king kanakung siwala, ni eku pa pepakit karela ing kanakung sarili.

3 Dapot mekatanggap kung kautusan ibat king Ibpa a munta ku karela, at pakiramdaman da ing kanakung siwala, at mabilang la karing busal da ring kakung tupa, bang mika metung mung kawan at metung a pastul; nung makanian, munta ku bang ipakit ku ing sarili ku karela.

4 At iutus ku kekayu ing isulat yo dening amanung deni potang ala naku, bang kanita nung ding tau ku king Jerusalem, ilang menakit na kanaku at akayabe ku na king kanakung pamanibala, ela maniawad king Ibpa king kanakung lagiu, ba lang tanggap beluan agpang kekayu kapamilatan na ning Espiritu Santo, at makanian mu naman karing aliwang tribung era balu, a dening amanu a kekayung isulat misinup la at ipakit la karing Gentil, bang king kapamilatan na ning kabilugan da ring Gentil, ding mitagan karing karelang bini, a mikalat king lupa ning yatu uli na ning kelan dang kapaniwalan, mitipun la, o mitipun la king beluan agpang kanaku, a karelang Manatbus.

5 At kaibat tipunan ku la manibatan king apat a suluk na ning yatu; at kaibat tuparan ku ing pangaku a gewa ning Ibpa karing anggang tau king bale ning Israel.

6 At nuan la ding Gentil, uli ning karelang kapaniwalan kanaku at king Espiritu Santo, a yang migpatutu karela agpang kanaku at ing Ibpa.

7 Lawan, uli ning karelang kapaniwalan kanaku, sinabi ning Ibpa, at uli ning kelan kapaniwalan kekayu, O balen ning Israel, king tauling aldo datang ing katutuan karing Gentil, bang ing kabilugan da ring bage a reti mabalu karela.

8 Dapot kalulu la, sabi ning Ibpa, a alang kapaniwalan a Gentil — uling anggiyang ila dinatang la king babo ning labuad a ini, at kinalat da la ring kanakung tau a kayabe king bale ning Israel; at ding kakung tau a kayabe king bale ning Israel a mitabi la ibat king busal da, at mengadamusak la karela.

9 At uli na ning lunus ning Ibpa karing Gentil, at king kayatulan na mu naman ning Ibpa karing kanakung tau a kayabe king bale ning Israel, katutuan, katutuan, sasabian ku kekayu, a kaibat na ning eganaganang ini, at pepalyarian ku ding kakung tau a kayabe king bale ning Israel a panasakitan dala, at pasakitan, at paten, at itabi ibat king busal da, at pikasaman da la, at maging sitsit at pisasabian karela.

10 At inya pin inutus ning Ibpa a dapat kung sabian kekayu: King aldo ita potang ding Gentil mikasala la laban king kakung ebanghelio, at tanggian da ing kabilugan na ning kanakung ebanghelio, at magmaragul king karelang pusu ding anggang bansa, at king babo da ring anggang tau king kabilugang yatu, at kumatmu la king anggang klasi ning kalaraman, at ning pamanlinlang, at ning pamanloku, at ding anggang klasi ning pamagkunwari, at pamakamate, at e tutung pangasacerdote, at pamaglandi, at lihim a makasumami; at nung gawan da ing anggangbage a reta, at tanggian da ing kabilugan na ning kanakung ebanghelio, lawan, sinabi na ning Ibpa, idala ke ing kabilugan ning ebanghelio ku karela.

11 At kaibat ganakan ku ing pangakung gewa ku karing kakung tau, O bale ning Israel, at idala ke ing kakung ebanghelio karela.

12 At ipakit ku kekayu, O bale ning Israel, a ding Gentil ela mika upaya kekayu; dapot kanaku lang ganakan ding pangaku ku kekayu, O bale ning Israel, at tanggap kayung beluan king kabilugan na ning kakung ebanghelio.

13 Dapot nung ding Gentil sumisi la at mibalik kanaku, sabi ning Ibpa, tutu mibilang la busal ding kakung tau, O bale ning Israel.

14 At e ko paburen ding kanakung tau, a kayabe king bale ning Israel, miyabe la busal da, at dakurakan dala, sinabi ning Ibpa.

15 Dapot nung ela munta kanaku, at makiramdam king kanakung siwala, paburen ku la, wa, paburen ku la ding kanakung tau, O bale ning Israel, a makiyabe la king busal da, at dakurakan dala, at mangari lang antimong asin a milako kalat, a kanita ala nong ulaga dapot iugse, at dakurakan da ring kanakung tau, O bale ning Israel.

16 Katutuan, katutuan, sasabian ku kekayu, makanian na kung inutus ning Ibpa-a dapat kung ibiye karening taung deni iting labuad para karelang mana.

17 At kaibat ding amanu nang propetang Isaias matupad la, a sasabing:

18 Ding kekang magbante magtas lang siwala; at king siwala agnan-agnan lang magkanta, uling mikit lang mata king mata potang ing Guinu ibalik ne ing Zion.

19 Magpakaligaya, abe-abe kayung magkanta, ikayung melasak a lugal ning Jerusalem; uling ing Guinu pematulan nala ding keang tau, inatbus ne ing Jerusalem.

20 Ing Guinu pepakit na ne ing banal nang gamat karing mata da ring anggang bansa; at ding anggang sepu na ning yatu akit da ing pamagligtas na ning Dios.