1 Lawan, at ngeni milyari, a inyang asabi nalang Jesus ding amanung deni linawe yang pasibayu palibut karing keraklan at sinabi na karela: Lawan, ing oras ku dinatang na.

2 Akakit ku ing meina kayu, a e yu la aintindian ding eganaganang amanung inutus na kaku ning kakung Ibpa bang sabian ku kekayu ngening panaun a iti.

3 Anya pin, mamanuli kayu kareng pibale-bale yu, at isipan yu la ring bage sinabi ku, at aduan yu king Ibpa, king lagiu ku, bang kanita aintindian yu, at isadia yo ring isip yu para king aldo bukas, at datang kung pasibayu kekayu.

4 Dapot ngeni munta ku king Ibpa, at bang ipakit ku mu naman ing sarili ku karing mewalang tribu ning Israel, uling ela mewala king Ibpa, uling balu na nung nukarin nala dela.

5 At milyari a inyang mekapaniabi yang makanian i Jesus, linawe nong palibut pasibayu ding mata na karing keraklan, at ikit na ing manangis la, at makalawe la kea ing balamu aduan da kea ing manatili ya pang malambat pa karela.

6 At sinabi na karela: Lawan, ing kanakung pilubluban kakatmu yang lunus kekayu.

7 Atin waring masakit kekayu? Idala yu la keni. Atin kayung pile, o bulag, o lumpu, o ketongan, o melati, o maklak, o mangasakitan king nanumang sangkan? Idala yu la keni at pakayapan ku la, uling malulunus ku kekayu; ing pilubluban ku kakatmu ya king lunus.

8 Uling akakit ku ing pagnasan yu ing ipakit ku kekayu nung nanu ing depatan ku karing kapatad yu king Jerusalem, uling akakit ku ing kasalpantayanan yu sapat na para pakayapan da kayu.

9 At milyari a anyang mekapaniabi ne pin, ding anggang keraklan, abe-abe, linakad lang kayabe do reng karelang masakit at deng karelang misasakitan, at deng karelang lumpu, at deng karelang bulag, at deng karelang pipi, at ding eganaganang misasakitan king nanumang sangkan; at pepakayapan no ring balang metung karela a midala kea.

10 At gewa da ngan, ilang kinayap at dinuku karing bitis na, at simban de; at ding anggang malyaring lumapit karing keraklan inuma re bitis, angga king dinilu dala ding keang bitis karing karelang lua.

11 At milyari a inutus no ring karelang mangalating anak a dapat la namang midala.

12 Anya dela da la reng mangalati rang anak at dela no king gabun padurut kea, at i Jesus tinalakad ya king libutad, at ding keraklan miniye lang dalan kea angga ding eganagana midala la kea.

13 At milyari a anyang midala nala ngan kea, at i Jesus tinalakad ya king libutad, inutus na la ring keraklan a dapat lang siklaud king gabun.

14 At milyari a anyang makasiklaud no king gabun, i Jesus migdusa ya pilubluban, at sinabing: Ibpa, maliligalig ku uli ning karokan da ring tau king bale ning Israel.

15 At anyang asabi nala ding amanung deni, ya man siniklaud ya king gabun; at lawan menalangin ya king Ibpa, at ding bage penalangin na e la malyaring misulat, at ding keraklan migpatutu la kea a mekaramdam.

16 At king paralan a ini migpatutu la: Ding mata kapilanman era pa ikit, ni ing balugbug dimdam na, maragul at makapagmulalang bage a ikit mi at dimdam anyang i Jesus makipagsalita ya king Ibpa.

17 At alang dilang makapagsalita, ni makasulat ninu mang tau, ni ding pusu da ring tau makaintindi karing maragul at makapagmulalang bage a ikit ming pareu at dimdam sinabi nang Jesus; at alang ninumang makaintindi king tula a mengatmu kareng kekaming kaladua ketang oras a dimdam mi yang mengadi para kekami kang Ibpa.

18 At milyari a inyang i Jesus apupus na ne ing pangadi na king Ibpa, tinikdo ya; dapot maragul ing tula da ring keraklan anya medaig la.

19 At milyari a i Jesus migsalita ya karela, at inutus na ing talakad la.

20 At ila tinalakad lang ibat king gabun, at sinabi na karela: Nuan kayu uli ning kekayung kasalpantayanan. At ngeni lawan, mitmu ing kanakung tula.

21 At anyang asabi no rening amanu, menangis ya, at ding keraklan migpatutu la kaniti, at kinua na la ring anak da, tunggal tunggal, at binindisyunan na la at menalangin ya king Ibpa para karela.

22 At anyang agawa na ini menangis yang pasibayu;

23 At migsalita ya karing keraklan, at sinabi na karela: Lawan yo ding kekayung anak.

24 At kabang melikid la para magmasid linawe la king banua, at ikit dong mibuklat ding banua, at menakit lang anghel titipa palual king banua at balamu atiu la keng libutad ning api; at migbaba la at pepadurutan do ring mangalati, at ila mipadurutan lang api; at ding anghel sinuyu la karela.

25 At ding keraklan ikit da at dimdam at petutuanan, at balu da ing patutu da tutu uling ila ngan ikit da at dimdam, balang tau para king keang sarili; at ing karelang bilang ating aduang libu at limang dalan a katau; at atin lang kayabe lalaki, babai, at anak.