1 At milyari a i Jesus inutus na kareng alagad na ing dapat lang magdalang tinape at alak kea.

2 At kabang kukua lang tinape at alak, inutusan na la ring keraklan a dapat lang lukluk king gabun.

3 At anyang ding alagad migbalik lang magdalang tinape at alak kinangua ya king tinape at pirasu ne at binindisyunan ne; at biniye ne kareng alagad na at inutus na a dapat deng kanan iti.

4 At kaibat dang mengan at kinabsi, inutus na ing mamiye la karing keraklan.

5 At kaibat dang mengan ding keraklan at kinabsi, sinabi na karing keang alagad: Makiramdam, ating metung kekayu a maordina, at kea bibiye ku ing upaya para mamirasu king tinape at bindisyunan na at ibiye karing tau na ning kakung pisamban, karetang anggang maniwala at magpabiniag king lagiu ku.

6 At iti dapat yung parating gagawan, anti ing kanakung agawa na, anti ing pamamirasu ku king tinape at pamamindisyun ku kanita at pamamiye ku kekayu.

7 At iti dapat yung gawan para ganakan ye ing katawan ku, a pepakit ku na kekayu. At iti maging patutu ya king Ibpa a ikayu parati yu kung gaganakan. At nung parati yu kung gaganakan ing Espiritu ku munta ya kekayu.

8 At milyari a anyang sinabi nala rening amanu, inutusan no ring keang alagad para mibili lang alak king saro at minum la karin, at dapat da la namang dinan detang keraklan ba lang minum kaniti.

9 At milyari a gewa da pin iti, at minum la at kinatmu la; at biniye da karing keraklan, at minum la at kinatmu la.

10 At anyang agawa da ring alagad iti, sinabi nang Jesus karela: Nuan kayu king bage gewa yung ini, uling iti pamanupad karing kanakung kautusan, at iti ing saksi king Ibpa ing ikayu kaburian yu ing mamintu ketang inutus ku.

11 At iti yang dapat yung gawan karetang sisisi at mebiniag king kanakung lagiu; at gawan yu iti king pamagganaka king kakung daya, a kakung pepatulu para kekayu, bang saksi kayu king Ibpa a aku parati yu kung gaganakan. At nung parati yu kung gaganakan, ing kanakung Espiritu parati yang atiu kekayu.

12 At bibiye ku kekayu ing metung a kautusan a gawan yu ing bage iti. At nung gawan yu la deng bage a reti nuan kayu, uling mitalakad kayu king kanakung batu.

13 Dapot ninuman kekayu ing gawang labis o kulang kesa kanini, ela mitalakad king kanakung batu, nung e mitalakad la king balas a pundasyun; at potang ing uran manabu, at ing albug datang, at ing angin titiup, at mipaspas karela, miragsa la at ing pasbul ning infierno makasadia la para tanggap karela.

14 Anya pin, nuan kayu nung pamintuan yu la ring kautusan ku, a inutus na kaku ning Ibpa a dapat kung ibiye kekayu.

15 Katutuan, katutuan, sasabian ku kekayu, dapat kayung mingat at manalangin parati, bang e kayu matuksu king demonyu, at atake na kayung alipan na.

16 At anti ing penalangin ku kekayu makanian mu naman ing manalangin kayu king pisamban ku, karing tau kung mamagsisi at mebiniag king lagiu ku. Tutu aku ing sulu; miniye kung metung a alimbawa para kekayu.

17 At milyari a anyang i Jesus asabi nala rening amanu kareng keang alagad, minarap yang pasibayu king keraklan at sinabi na karela:

18 Lawan, katutuan, katutuan, sasabian ku kekayu, dapat kayung mingat at manalangin parati bang e kayu matuksu; uling i Satanas pagnasan nang akua na kayu, at apikakawani na kayung anti mong trigu.

19 Anya pin dapat kayung manalangin parati kang Ibpa keng lagiu ku;

20 At nanuman ing aduan yu king Ibpa king lagiu ku, a mayap, maniwala kayung tanggapan ye, tutu iti mibiye ya kekayu.

21 Manalangin kayung mipapamilia kang Ibpa, parati king lagiu ku bang kanita ding asawa yu at anak mipanuanan la.

22 At lawan, mitipuntipun kayung madalas; at e yo babawal ding ninumang tau a makiyabe kekayu potang mitipuntipun kayu, dapot paburen yu lang makiyabe kekayu at eyu la babawal;

23 Dapot manalangin kayu para karela, at e yu la tatabing palual; at nung malyari ing makiyabe la kekayung madalas, manalangin kayu para karela kang Ibpa king lagiu ku.

24 Anya pin, itas yo ring sulu yu balang sunlag king yatu. Lawan, aku ing sulung tatas yu — ita a ikit yu nang gewa ku. Lawan ikit yu ing menalangin ku kang Ibpa, at ikayu ngan asaksian yu.

25 At ikit yu a inutus ku ing alang metung man kekayu ing mamako, nung e inutus ku kekayu ing dapat kayung lumapit kanaku, ba yung damdaman at akit; anti mu naman ing gawan yu king yatu; at ninuman ing labag kening kautusan a ini papaburen na ing sarili na a mitake king tuksu.

26 At ngeni milyari a anyang i Jesus asabi no rening amanu, linawe yang pasibayu kareng keang alagad a keang pinili, at sinabi na karela:

27 Lawan katutuan, katutuan, sasabian ku kekayu, bibiye ku kekayu ining metung pang kautusan, at kaibat dapat kung munta king kanakung Ibpa ba kung makatupad aliwa pang kautusan a biniye na kanaku.

28 At ngeni lawan, yapin ini ing kautusan a ibiye ku kekayu, a eye paburen ing ninuman a makibalu king e pangakarapatdapat para mangan at minum king kanakung katawan at daya, potang panibalan yu iti;

29 Uling ninuman ing mangan at minum king kakung katawan at daya king e karapatdapat mamangan at miminum yang makarok king keang kaladua; nung makanian nung balu yu a ing metung a tau eya karapatdapat mangan at minum king kakung katawan at daya ibawal ye.

30 Makanian man, eye tatabing palual ibat king busal yu, dapot saupan ye at manalangin para kea king Ibpa, king kakung lagiu; at nung sumisi ya at mabinyag king lagiu ku kanita tanggapan ye, at ibiye ye kea ing kakung katawan at daya.

31 Dapot nung eya sumisi eya miyabe karing kakung tau, bang e nala asira ding kakung tau, uling tutu balu kula ding kakung tupa at makatatak la.

32 Makanian man, eye tatabing palual karing kekayung sinagogas, o karing kekayung lugal pisasamban, uling deta ilang dapat yung isundung saupan; uling eyu balu nung mibalik la at sumisi, at munta la kakung matapat, at pakayapan kula; at ikayu ing maging dalan ning pamagdalang kaligtasan karela.

33 Anya pin, tuparan yula dening kesabian a kakung inutus kekayu bang kanita e kayu misumpa; uling makalunus ya ing isumpa ning Ibpa.

34 At bibiye kula kekayu deting kautusan uli ding pamisalangsangan a atiu busal yu. At nuan kayu nung alang pamisalangsangan busal yu.

35 At ngeni munta ku king Ibpa, uling maulagang munta ku king Ibpa king uli yu.

36 At milyari a aniang i Jesus ayari nala deting kesabian, tigkil nala karing keang gamat ding alagad a keang pinili, tunggal tunggal, angga king atagkil na nala ngan, at migsalita ya karela kabang tatagkilan nala.

37 At ding keraklan eda dimdam ding amanung keang sinabi, anya pin ela migpatutu; dapot ding alagad migpatutu la a dininan nalang upaya para ibiye de ing Espiritu Santo. At ipakit ku kekayu kelambatan a ini tutu ya.

38 At milyari a aniang i Jesus atagkil na nala ngan, mika ulap at tinakap karing keraklan bang ede akit i Jesus.

39 At kabang makatakap ing ulap karela, meko ya at minukiat ya banua. At ding alagad ikit da at migpatutu lang ya minukiat yang pasibayu king banua.