Ch’ol 23
Li Jesus naxxaqab’ xwankil li raatin laj Isaias—Naxtaqlaheb’ li tenamit chixtz’ilb’aleb’ rix li profeet—Li raatin laj Samuel aj Lamanita chirix li wakliik chi yo’yo na’oksiik sa’ lix tz’iib’anb’il esileb’. Wan na 34 chihab’ xyo’lajik li Kristo.
1 Ut anajwan, k’ehomaq reetal, ninye eere naq tento raj ateetz’il rix li k’a’aq re ru a’in. Relik chi yaal, jun intaqlahom nink’e eere naq teetz’il rix li k’a’aq re ru a’in chi yalb’il eeq’e, xb’aan naq nim ru li raatin laj bIsaias.
2 Xb’aan naq a’an ki’aatinak chi yaal chirix xyaalalil chixjunil li k’a’aq re ru chirix lin tenamit li wankeb’ sa’ lix junkab’al laj Israel; jo’kan ut, tento naq taa’aatinaq ajwi’ reheb’ laj Gentil.
3 Ut chixjunil li k’a’aq re ru li kixye, kiwan ut toj ataawanq, jo’ chanru ajwi’ li aatin li kixye.
4 Jo’kan ut k’ehomaq eexik chirix li waatin; tz’iib’ahomaq li k’a’aq re ru kinye eere; ut jo’ chanru xq’ehil ut rajom li Yuwa’b’ej taaxik reheb’ laj Gentil.
5 Ut yalaq ani taa’ab’inq chiru li waatin ut tixjal xk’a’uxl ut taakub’eeq xha’, a’an ajwi’ taakole’q. Tz’ilomaqeb’ rix li aprofeet, xb’aan naq naab’al wankeb’ li neke’ch’olob’an xyaalal li k’a’aq re ru a’in.
6 Anajwan ut kik’ulman naq chirix naq li Jesus kixye li aatin a’in kixye wi’chik reheb’, chirix naq kixch’olob’ chiruheb’ chixjunil li loq’laj hu li ak ke’xk’ul, kixye reheb’: K’ehomaq reetal, wan chik li loq’laj hu nawaj raj naq teetz’iib’a, li maak’a’ eerik’in.
7 Ut kik’ulman naq kixye re laj Nefi: K’am chaq li esil li ketz’iib’a.
8 Ut chirix naq laj Nefi kixk’am chaq li tz’iib’anb’il esil, ut kixk’ojob’ chiru, kixb’eresi li rilob’aal chirilb’al ut kixye:
9 Chi yaal ninye eere, kintaqla lin moos aj aSamuel, laj Lamanita, naq tixch’olob’ xyaalal chiru li tenamit a’in, naq sa’ li kutan a’an naq li Yuwa’b’ej tixnima xloq’al lix k’ab’a’ wik’in, naq te’wanq bnaab’al laj csantil paab’anel li dte’wakliiq chaq sa’ xyanqeb’ li kamenaq, ut te’xk’ut rib’ chiru naab’al, ut te’k’anjelaq chiruheb’. Ut kixye reheb’: Ma ink’a’ jo’kan kiwan?
10 Ut eb’ lix tzolom ke’chaq’ok chiru ut ke’xye: Yaal, Qaawa’, laj Samuel kixch’olob’ jo’ profeet jo’ chanru laa waatin, ut kitz’aqlok ru chixjunil.
11 Ut li Jesus kixye reheb’: Chan b’i’ ru naq ink’a’ xetz’iib’a li na’leb’ a’in, naq naab’aleb’ aj santil paab’anel ke’wakli ut ke’xk’ut rib’ chiru naab’al ut ke’k’anjelak chiruheb’?
12 Ut kik’ulman naq kijultiko’ re laj Nefi naq moko kitz’iib’aman ta li na’leb’ a’in.
13 Ut kik’ulman naq li Jesus kixtaqla naq taatz’iib’amanq; jo’kan naq kitz’iib’aman jo’ chanru naq kixtaqla.
14 Anajwan ut kik’ulman naq chirix naq li Jesus akixch’olob’ chaq chixjunileb’ li loq’laj hu sa’ junajil, li ke’xtz’iib’a chaq, kixtaqlaheb’ naq te’xk’ut li k’a’aq re ru kixch’olob’ chaq a’an chiruheb’.