1 K’ehomaq reetal, anajwan kik’ulman naq chirix naq li Jesus kixye li aatin a’in ki’ilok wi’chik chixsutam wan wi’ li ch’utch’uukil tenamit, ut kixye reheb’: K’ehomaq reetal, ^aak xwulak inhoonal.

2 Nink’e reetal naq q’un eemetz’ew, naq ink’a’ nekexru ^achixtawb’al ru chixjunil li waatin li taqlanb’ilin xb’aan li Yuwa’b’ej chixyeeb’al eere sa’ li kutan a’in.

3 Jo’kan ut, ayuqex sa’ lee rochoch, ut ^atz’ilomaq rix sa’ eech’ool li k’a’aq re ru kinye, ut tz’aamanqex chiru li Yuwa’b’ej, sa’ lin k’ab’a’, re texruuq chixtawb’al ru, ut ^bkawresihomaq eek’a’uxl choq’ re li kutan ^cwulaj, ut ninchal wi’chik eerik’in.

4 A’ut anajwan ^aninxik rik’in li Yuwa’b’ej, ut jo’kan ajwi’ ^bchixk’utb’al wib’ chiruheb’ lix ^cteepal laj Israel li sachenaqeb’, xb’aan naq moko sachenaqeb’ ta chiru li Yuwa’b’ej, xb’aan naq a’an naxnaw b’ar kixk’ameb’.

5 Ut kik’ulman naq chirix naq ki’aatinak chi jo’kan li Jesus, kixb’eresi wi’chik li rilob’aal chixsutam wan wi’ li ch’utch’uukil tenamit, ut kixk’e reetal naq yookeb’ xya’al ru, ut ke’xka’ya chanchan naq te’xtz’aama raj chiru naq taakanaaq chik junpaataq rik’ineb’.

6 Ut a’an kixye reheb’: K’ehomaq reetal, nujenaq xsa’ inch’ool rik’in ^axtoq’ob’ankil eeru.

7 Ma wan ani yaj sa’ eeyanq? K’amomaqeb’ chaq. Ma wan ani yeeq roq, malaj mutz’, malaj toch’ol roq, malaj po’b’il xxaqalil, malaj saqlep rix, malaj chaqi xtib’el, malaj tz’ap xik, malaj ani tawasinb’il chi yalaq chan ru? K’amomaqeb’ chaq, ut teb’ink’irtesi, xb’aan naq nintoq’ob’a eeru; nujenaq chi uxtaan xsa’ inch’ool.

8 Xb’aan naq nink’e reetal naq nekeraj naq tink’ut cheru li k’a’ru kinb’aanu reheb’ lee ras eeriitz’in aran Jerusalen, xb’aan naq nawil naq ^atz’aqal ^beepaab’aal re texink’irtesi.

9 Ut kik’ulman naq chirix naq ki’aatinak chi jo’kan, chixjunil li ch’utch’uukil tenamit sa’ junajil xkoheb’ rochb’eeneb’ lix yaj ut lix tawasinb’ileb’, ut lix yeeq roq, ut lix mutz’eb’, ut lix memeb’, ut rochb’een chixjunileb’ lix tawasinb’ileb’ chi yalaq chan ru; ut a’an ^akixk’irtesi chixjunjunqaleb’ naq ke’k’ame’ rik’in.

10 Ut chixjunileb’, li ani k’irtesinb’ileb’ ut li ani kaweb’ rib’, ke’xkub’si rib’ chiroq, ut ke’xloq’oni, ut jo’ k’ihaleb’ li ke’ru chi chalk xb’aan xnaab’alileb’ ^ake’xtz’ub’ li roq, jo’kan naq ke’ratisi li roq rik’in xya’aleb’ ru.

11 Ut kik’ulman naq kixtaqla naq te’k’ame’q chaq lix ^akok’aleb’.

12 Jo’kan naq ke’xk’ameb’ chaq lix kok’aleb’, ut ke’xk’ojob’eb’ sa’ li ch’och’ chixsutam, ut li Jesus kixaqli sa’ xyi; ut eb’ li ch’utch’uukil tenamit ke’xkanab’ xna’aj toj reetal naq ke’k’ame’ chaq chixjunil rik’in.

13 Ut kik’ulman naq chirix naq ke’k’ame’ chaq chixjunil, ut li Jesus xaqxo sa’ xyi, a’an kixtaqla li ch’utch’uukil tenamit naq ^ate’wiq’laaq chi ch’och’.

14 Ut kik’ulman naq chirix naq ke’wiq’la chi ch’och’, li Jesus ki’aakanak sa’ xch’ool, ut kixye: At inYuwa’, ^atawasinb’il ink’a’uxl xb’aan xmaa’usilaleb’ li ani wankeb’ sa’ lix junkab’al laj Israel.

15 Ut chirix naq kixye li aatin a’in, kiwiq’la ajwi’ a’an chi ch’och’; ut k’ehomaq reetal, kitijok chiru li Yuwa’b’ej, ut li k’a’ru kitijok wi’ ink’a’ naru natz’iib’aman, ut eb’ li ch’utch’uukil tenamit li ke’ab’ink re, ke’xch’olob’ xyaalal.

16 Ut jo’ka’in neke’xch’olob’ xyaalal: ^aMaajun wa rilom chaq xnaq’ uhej, chi moko rab’ihom chaq xikej, xkomon xnimal ru ut xsachb’a-ch’oolejil li na’leb’ kiqil ut kiqab’i li Jesus chixyeeb’al re li Yuwa’b’ej;

17 Ut maajun ^aru’uj aq’ej naru chixyeeb’al, chi moko naru natz’iib’aak xb’aan junaq chi winq, chi moko naru lix ch’ooleb’ li winq chixk’oxlankil xkomon xnimal ru ut xsachb’a-ch’oolejil li na’leb’ kiqil jo’ ajwi’ kiqab’i li Jesus chixyeeb’al; ut maajun naru chixk’oxlankil li sahilal li kinujak wi’ li qaam sa’ li hoonal naq kiqab’i a’an chi tijok choq’ qe chiru li Yuwa’b’ej.

18 Ut kik’ulman naq chirix naq li Jesus kixk’e xraqik tijok chiru li Yuwa’b’ej, kiwakli; a’b’anan k’a’jo’ xnimal ^axsahileb’ xch’ool li ch’utch’uukil tenamit jo’kan naq ke’lukta xb’aan.

19 Ut kik’ulman naq li Jesus kiraatinaheb’, ut kixye reheb’ naq te’wakliiq.

20 Ut ke’wakli chaq chi ch’och’, ut a’an kixye reheb’: Osob’tesinb’ilex xb’aan eepaab’aal. Anajwan ut k’ehomaq reetal, nujenaq xsahil inch’ool.

21 Ut chirix naq kixye li aatin a’in, ^akiyaab’ak, ut eb’ li ch’utch’uukil tenamit ke’xch’olob’ xyaalal, ut kixk’uleb’ lix kok’al chixjunjunqaleb’, ut ^bkirosob’tesiheb’, ut kitijok chiru li Yuwa’b’ej choq’ reheb’.

22 Ut chirix naq kixb’aanu a’in kiyaab’ak wi’chik;

23 Ut kiraatina li ch’utch’uukil tenamit, ut kixye reheb’: K’ehomaq reetal lee kok’al.

24 Ut naq ke’ilok re xk’eeb’al reetal ke’xb’eresi li rilob’aal sa’ xjayal li choxa, ut ke’ril chi teeliik li choxa, ut ke’rileb’ li anjel chi kub’eek chaq sa’ choxa chanchan sa’ xyi xam; ut ke’kub’e chaq ut ^ake’xsutiheb’ rix li kok’al a’an, ut sutsuukeb’ rix rik’in xam; ut eb’ li anjel ke’k’anjelak chiruheb’.

25 Ut eb’ li ch’utch’uukil tenamit ke’ilok ut ke’ab’in ut ke’xch’olob’ xyaalal, ut neke’xnaw naq yaal li ke’xch’olob’, xb’aan naq chixjunileb’ ke’ilok ut ke’ab’in, li junjunq chi winq xjunes rib’; ut wankeb’ na wiib’ mil rik’in oob’ cient rajlankileb’; ut wankeb’ winq, ixq, ut kok’al.