1 Anajwan ut kik’ulman naq jo’ chanru li esil tz’iib’anb’il qab’aan, ut naqanaw naq yaal li qatz’iib’anb’il esil, xb’aan naq k’ehomaq reetal, a’an tiikil winq li kitz’iib’ank re li esil—xb’aan naq a’an kixb’aanu chi yaal k’iila ^asachb’a-ch’oolej sa’ lix ^bk’ab’a’ li Jesus, ut maajun winq wan li kiru chixb’aanunkil junaq sachb’a-ch’oolej sa’ lix k’ab’a’ li Jesus, ka’ajwi’ wi ch’ajob’resinb’il chi tz’aqal tz’aqal chirix lix maa’usilal—

2 Anajwan ut kik’ulman, wi maajun sachk kixb’aanu li winq a’in sa’ rajlankil qakutan, ak numenaq chaq li ^aroxlaju xka’k’aal chihab’;

3 Ut eb’ li tenamit ke’ok chixsik’b’al rik’in xnimal x’anchalileb’ xk’a’uxl li eetalil li kik’ehe’ chaq xb’aan li profeet aj Samuel, laj Lamanita, relik chi yaal, li kutan taawanq wi’ ^aaak’ab’ chiru xnumik oxib’ kutan chiru lix b’een li ch’och’.

4 Ut ki’ok chi wank nimla wiib’ank ch’oolej ut wech’ok-ib’ sa’ xyanqeb’ li tenamit, us ta k’eeb’il chaq xk’ihal li ^aeetalil.

5 Ut kik’ulman sa’ li xkaalaju xka’k’aal chihab’, sa’ li xb’een po, sa’ kaahib’ xb’e li po, kiwakli jun li nimla hab’, li maajun wa chaq nawb’il xkomon a’an sa’ chixjunil li ch’och’.

6 Ut kiwan ajwi’ jun li nimla xuwajel kaq-sut-iq’, ut kiwan li xuwajel ^akaaq, jo’kan naq ^bkixchiq’le chixjunil li ch’och’ chanchan naq ok re chixjachb’al rib’ sa’ xyi.

7 Ut kiwan raq’ kaaq q’axal kaw, xkomon li maajun wa nawb’il chaq sa’ chixjunil li ch’och’.

8 Ut kixchap xxamlel li ^atenamit Tzarahemla.

9 Ut li tenamit Moroni kisub’e’ sa’ xchamal li palaw, ut li ani wankeb’ chi sa’ ke’ok chi ha’.

10 Ut kik’ame’ li ch’och’ sa’ xb’een li tenamit Moronihah, jo’kan naq sa’ xna’aj li tenamit kikana jun nimla tzuul.

11 Ut kiwan jun li nimla xuwajel sachok sa’ li ch’och’ sa’ xjayal lix tz’e li saq’e.

12 A’b’anan k’ehomaq reetal, kiwan jun li sachok q’axal wi’chik nim ut xuwajel sa’ li ch’och’ sa’ xjayal lix nim li saq’e; xb’aan naq k’ehomaq reetal, chixjunil lix b’een li ch’och’ kijalman ru, xb’aan li kaq-sut-iq’ ut li sut iq’, ut li kaaq ut li raq’ kaaq, ut li hiikank q’axal nim re chixjunil li ch’och’;

13 Ut ke’jore’ li ^aninqi b’e, ut eb’ li tach’tookil b’e ke’po’e’, ut naab’al li helhookil na’ajej ke’b’uq’uxo’ ru.

14 Ut ^ake’sub’e’ naab’al li tenamit ninq ut nawb’ileb’ ru, ut naab’al ke’k’ate’, ut naab’al ke’chiq’leek toj reetal naq t’anb’ileb’ chi ch’och’ li kab’l reheb’, ut li ani wankeb’ chi sa’ ke’kamsiik, ut ke’kana li na’ajej chi sachenaq.

15 Ut wankeb’ junjunq li tenamit li ke’kana; a’b’an numtajenaq nim li sachok ki’uxman chi sa’, ut wankeb’ naab’al li ke’wan chaq chi sa’ li ke’kamsiik.

16 Ut wankeb’ junjunq li ke’k’ame’ sa’ li sut iq’; ut toj b’ar xkoheb’ maajun winq nanawok re, ka’ajwi’ naq ke’k’ame’.

17 Ut chi jo’kan lix b’een chixjunil li ch’och’ kijalaxiik ru, xb’aaneb’ li kaq-sut-iq’, ut li kaaq, ut li raq’ kaaq, ut li hiikank re li ch’och’.

18 Ut k’ehomaq reetal, li ^apek ke’jache’ sa’ xyi; ke’joriik sa’ lix b’een chixjunil li ch’och’, jo’kan naq ke’tawe’ chi jorol, ut chi jachal ut chi itz’il chiru chixjunil lix b’een li ch’och’.

19 Ut kik’ulman naq chirix naq kiraqe’ li kaaq, ut li raq’ kaaq, ut li kawil hab’, ut li kaq-sut-iq’, ut li hiikank re li ch’och’—xb’aan naq k’ehomaq reetal, kikana a’an chiru tana’ xnumik ^aoxib’ hoonal; ut wankeb’ li ke’yehok re naq najt wi’chik kikana; a’b’anan chixjunil li ninqi xuwajel k’a’aq re ru kib’aanuman chiru tana’ xnumik oxib’ hoonal—toja’ ut naq k’ehomaq reetal, kiwan q’ojyin chiru lix b’een li ch’och’.

20 Ut kik’ulman naq kiwan chamal aak’ab’ chiru chixjunil lix b’een li ch’och’, jo’kan naq eb’ li ani wankeb’ aran li ink’a’ ke’t’ane’ chaq ke’ru ^achireek’ankil ^bxb’ook li aak’ab’;

21 Ut maajun saqen kiru chi wank, xb’aan li aak’ab’, chi moko li xam, chi moko lochb’il chaj; chi moko kiru chi lochmank xam rik’in lix chaab’il si’eb’ li q’axal chaqi, jo’kan naq maajunaq saqen kiru chi wank;

22 Ut moko kiwan ta k’a’ruhaq chi saqen na’ilman, chi moko xam, chi moko li nalememnak, chi moko li saq’e, chi moko li po, chi moko eb’ li chahim, xb’aan naq q’axal nim li aak’ab’il choql li kiwan chiru lix b’een li ch’och’.

23 Ut kik’ulman naq kikana chiru xnumik ^aoxib’ kutan, naq maajun saqen ki’ilman; ut kiwan nimla raho’k ch’oolej ut ayaynak ut yaab’ak rajlal sa’ xyanqeb’ li tenamit; relik chi yaal, nim lix tz’uyileb’ li tenamit, xb’aan li aak’ab’ ut li nimla sachok li kichal chaq sa’ xb’eeneb’.

24 Ut sa’ jun li na’ajej ke’ab’iik chixjapb’al re, ut chixyeeb’al: Aay, kiqajal taxaq raj qak’a’uxl rub’elaj chaq li nimla xuwajel kutan a’in, toja’ ut naq ke’kole’ raj xyu’ameb’ li qas qiitz’in, ut ink’a’ raj ke’k’ate’ sa’ li nimla tenamit ^aTzarahemla.

25 Ut sa’ jun chik na’ajej ke’ab’iik chixjapb’al re ut chi yaab’ak, ut chixyeeb’al: Aay, kiqajal raj taxaq qak’a’uxl rub’elaj chaq li nimla xuwajel kutan a’in, ut ink’a’ taxaq raj kiqakamsiheb’ ut kiqakutiheb’ chi pek li profeet, chi moko raj kiqisiheb’ chaq; toja’ ut naq eb’ li qana’ ut li qachaq’al ru rab’in, ut eb’ li qakok’al ke’kole’ raj xyu’ameb’, ut ink’a’ raj ke’muqe’ sa’ li nimla tenamit Moronihah. Ut chi jo’kan nim ut xuwajel li ayaynak re li tenamit.