1 Ca tún úchiqueʼ tiʼ u haʼabil hókoc Lehieʼ dzoʼoc seiscientos haʼaboʼob Jerusalen; leloʼ u haʼabil úchil, Laconeoʼ le juez yétel nohchil tu yókol le luʼumoʼ.

2 Nefi u pal Helamaneʼ cah luʼ tu luʼumil Zaraheʼmlaeʼ yétel dzoʼoc u kubic tiʼ Nefi u maʼs nohchil paleʼ, le hahaytac laminaoʼoboʼ mentaan yétel bronceoʼ yétel tulácal le baʼaxoʼob dzíbtaan tiʼ le cahoʼ.

3 Ca tún hók tiʼ le cahoʼ mixmaʼc yoheʼl tuʼux h bini; Nefi u paleʼ tu dzíbtah le baʼaxoʼoboʼ tu cúchil; bey, le baʼaxoʼob dzíbtaan tiʼ le cahoʼ.

4 Ca tún anchah u yúchuleʼ le cah cáh le noventiʼdos haʼabeʼ, heʼeleʼ, ca hoʼopʼ u dzoʼocpahal hach tu bel baʼaxoʼob aʼalaʼan caʼachoʼ tumen le profetaoʼoboʼ tumen heʼah u yilaʼal maʼs nohoch baʼaxoʼob cu haʼakal yól le cahoʼ.

5 Baʼaleʼ dzeʼedzec tiʼ ichiloʼobeʼ hoʼopʼ u yaʼalicoʼobeʼ dzoʼoc bin u maʼn u kinil u betaal le tʼanoʼob aʼalaʼan tumen Samuel u palal Laman.

6 Ca tún hoʼopʼ u quiʼmaʼctal u yóloʼob yoʼolal u sucuʼunoʼob tán u yaʼalicoʼob: Heʼel túnaʼ dzoʼoc u maʼn u kinileʼ maʼ dzoʼoc u mentpahal u tʼanoʼob Samuel; le betiʼqueʼ a quiʼmaʼc ólaleʼex yétel a feeʼex tiʼ le baʼaloʼobaʼ, mixbaʼal quiʼmaʼc ólaleʼex yétel a feeʼex tiʼ le baʼaloʼobaʼ, mixbaʼal tiʼ.

7 Ca tún yanchah u betiʼcoʼob u yantal humpʼél nohoch baʼateltʼan tiʼ le luʼumaʼ; le tún le maʼxoʼob cu creertoʼobeʼ u hach yahtal yóloʼob, tumen sahacchahoʼoboʼ tán u tucultiʼcoʼob maʼ tu yúchul le baʼaxoʼob aʼalaʼan úcheʼ.

8 Baʼaleʼ heʼel túnaʼ chucaʼan u yóloʼob u paʼtiʼcoʼob u kuchul le kin yétel le ákaboʼ yétel ulak kin, leloʼ bey humpʼél kin minaʼan u yákabileʼ tu yoʼolal u yoheltiʼcoʼobeʼ u feoʼobeʼ, hah tu bel.

9 Le tún lel maʼxoʼob maʼ tán u creeroʼoboʼ ca anchah u yéyicoʼob humpʼél u kin utiaʼal u quínsicoʼob le maʼxoʼob creertoʼoboʼ wá maʼ tu yúchul le baʼaxoʼob aʼalaʼan tumen le profeta Samueloʼ, wá beyoʼ, maʼ tán u quínsicoʼobiʼ.

10 Úcheʼ, Nefi u pal Nefieʼ, hach yahchah u yól le ca tu yilaheʼ u sén kasaʼanil u cahal.

11 Ca tún yanchah u bineʼ cah xolah luʼumeʼ cah kát tiʼ Hahal Dios yétel tulácal yól u pucsiʼkal tu yoʼolal u cahal; beyoʼ, tulácal le maʼxoʼob hach taaytac u quínsaʼaloʼob caʼacheʼ tumen tu yoʼolal u feoʼob tiʼ baʼax aʼalaʼan tiʼ u tataoʼob.

12 Búlkineʼ bey bet letiʼ tán u orar yétel tulácal u yól; heʼelaʼ ca tu yuʼubah u tʼan Yumtsil tán u yaʼalic tiʼ:

13 Líks a pól ca quiʼmaʼcchahac a wól tumen heʼeleʼ, tán u kuchul u kinil; tiʼ le ákab behlaʼ cun dzabil le baʼax aʼalaʼan caʼachoʼ, sámaʼl; yan in tal yókolcab tu yoʼolal in weʼesic tiʼ le yokolcaboʼ bín in láh bet tulácal baʼaxoʼob in betmaʼh u dzaʼabal aʼalbil tumen in nohoch profetaoʼob.

14 Uuye, quiʼn kuchul yicnal le maʼxoʼob intiʼaʼaloʼoboʼ tu yoʼolal in láh betiʼc tulácal le baʼaxoʼob in weʼesmaʼh tiʼ u palal maʼcoʼob desde cah cáh le yokolcabaʼ, yétel tu yoʼolal beyoʼ, in betiʼc baʼax cu yóltiʼc le Tataoʼbey heʼebix le Paloʼ; leloʼ le baʼax cu yóltiʼc le Tataoʼ tiʼn woʼolal ten, yétel le baʼax cu yóltiʼc le Paloʼ tu yoʼolal in bakel. Heʼel túnaʼ, tán u kuchul u kinil, tiʼ le ákab cu talaʼ heʼel u dzaʼabal le baʼax aʼalaʼan caʼachoʼ.

15 Ca tún yanchah u dzoʼocpahal le tʼanoʼob tu kamaʼh Nefioʼ, hach heʼebix aʼalaʼabiqueʼ; tumen, le cah bin kineʼ, maʼ ákabchahiʼ, le tún le cahoʼ ca hoʼopʼ u haʼakal yól tumen maʼ ákabchahiʼ le cah tʼúb le kinoʼ.

16 Yaʼab tiʼ le maʼxoʼob maʼ creernahoʼob le baʼax u yaʼalmaʼh le profetaoʼoboʼ h lúboʼob luʼumeʼ cah pʼátoʼob bey quiʼmenoʼobeʼ, tumen tu naʼatahoʼob h kaschah le baʼax tu tucultahoʼob le maʼxoʼob tu creertahoʼob le baʼax yaʼalmaʼh le profetaoʼoboʼ tumen tu yeʼesuba le baʼax aʼalaʼan caʼachoʼ.

17 Ca tún hoʼopʼ u yocol tu tuculoʼobeʼ sébaʼan cun chicpahal u Pal Hahal Dios; beyoʼ chén tiʼ humpʼél tʼaneʼ, tulácal le maʼxoʼob cahaʼanoʼob tulácal yokolcabeʼ, desde chikin tac lakineʼ, heʼebix xan tu luʼumil xamaʼn tac noholeʼ hach haʼak yóloʼobeʼ cah lúboʼob luʼum;

18 Tumen tu naʼatahoʼobeʼ, le profetaoʼoboʼ u yaʼalmaʼhoʼob tu hahil tu yoʼolal le baʼaloʼoboʼ ichil yaʼabach haʼaboʼob, yétel le baʼax u yaʼalmaʼh caʼachoʼ dzoʼocsaʼan, ca hoʼopʼ u sahactaloʼob tu yoʼolal u yétel u maʼ creertiʼcoʼobeʼ.

19 Ca tún anchah u yúchuleʼ maʼ ákabchah tiʼ le ákaboʼ, u sásil bey chúmaʼc kineʼ. Teʼ hadzcab kinoʼ túneʼ cah ók le kin tu caʼaten, heʼebix suquiʼleʼ; ca tún tu naʼatahoʼobeʼ leloʼ letiʼ le kin utiaʼal u síhil le Yumtsiloʼ tumen dzaʼan u yilaʼal le baʼax teʼ caʼanoʼ.

20 Tulácal baʼaleʼ dzoʼoc u yúchul tún, bixmaʼiʼ, mixbaʼal tu binetah, hach heʼebix u yaʼalmaʼhiloʼob le profetaoʼoboʼ bey úchic.

21 Ca tún chicpah xan humpʼél túmben estrella heʼebix u yaʼalmaʼhil le tʼanoʼ.

22 Desde tún leloʼ cah anchah u cáhal u kiʼitpahal tusoʼob Satanas ichil le cahoʼ, tu yoʼolal u chichcuntiʼc u pucsiʼkaloʼob tu yoʼolal maʼ u creertiʼcoʼob le baʼaxoʼob yilmaʼhoʼob yétel u haʼaksic yól yoʼolal le baʼax dzoʼoc u yilicoʼoboʼ; baʼax quex tumen le tusoʼobaʼ, u maʼs yaʼabil teʼ le maʼcoʼob teʼ cahoʼ tu creertoʼobeʼ cah dzaʼan u yóloʼob tiʼ Yumtsil.

23 Ca tún anchah u yúchuleʼ, Nefi yétel yaʼabach maʼcoʼob tiʼ ichil le cahoʼ, hókoʼobeʼ ca hoʼopʼ u dzaicoʼob oc haʼ utiaʼal tu yoʼolal u palal maʼc u kebanoʼobeʼ, bey anchah u perdonartaal yaʼab kebanoob. Bey túnoʼle cahoʼ ca hoʼopʼ u yantal quiʼmaʼc ól tiʼoʼob yétel paz tiʼ le cahoʼ.

24 Maʼ tún anchah baʼatel tʼanoʼobiʼ, chén wá haytúl h cáh u dzicubaoʼob u caʼansicoʼob tiʼ le úchben dzíboʼoboʼ, maʼ kabét u betaal baʼax cu yaʼalic u ley Moisesiʼ. Tiʼ lelaʼ tu betahoʼob baʼal maʼ tu beliʼ. Tumen maʼ tu naʼatahoʼob le úchben dzíboʼoboʼ.

25 Baʼaleʼ maʼ xánchah u pʼatiʼcoʼob le u tuculoʼob maʼ tu beloʼoboʼ cah oc tu tuculoʼob u kasiʼl le caʼansah tumen h aʼalaʼab tiʼoʼobeʼ le leyoʼ maʼ dzoʼocsaʼac le baʼax cu yaʼalicoʼ, yételeʼ kabét, ca dzoʼocsaʼac chucaʼan, bey, h tal le tʼan tiʼoʼobeʼ hach kabét ca dzoʼocsaʼac, hach mix hun xétʼ cun h pʼátal wá maʼ yan u láh dzoʼocsaʼaliʼ; le betiʼqueʼ tiʼ le haʼabaʼ h betaab u yilicoʼobeʼ maʼ tu bel le caʼansahoʼ, ca tu yaʼalahoʼob tiʼ le maʼcoʼobo maʼ tu bel u caʼansahiʼ.

26 Bey tún dzoʼoquiʼc u haʼabil noventiʼdos, tán u tasic u tʼanil quiʼmaʼc ólal tiʼ le cah tu yoʼolal le baʼaxoʼob eʼesaʼanoʼobeʼ, heʼebix tu yaʼalahoʼob le nohoch profetaoʼoboʼ.

27 Ca tún anchah yúchuleʼ le xan le haʼab noventiʼtres h maʼn xan minaʼan baʼatel, hach chén le bandidoʼob Gadiantoniloʼoboʼ, letiʼoʼobeʼ tumen cahacbaloʼob tiʼ hach caʼanal muloʼob yétel hach cu pʼuʼuhsicoʼob maʼc tiʼ le luʼumoʼ, tiʼ hach maʼalobiʼl tuʼux u taacmaʼhubaoʼobeʼ maʼ páhchah u xuʼulsaʼaloʼob tumen le cahoʼ; le betiʼqueʼ, táh yaʼab maʼc tu quínsahoʼob yaʼab maʼcoʼob teʼ cahoʼ.

28 Ca anchah u yúchul tiʼ le haʼab noventiʼcuatro ca hoʼopʼ u yaʼabtaloʼob tumen yaʼab tiʼ u palal Nefi hókoʼoboʼ cah binoʼob ichiloob, lelaʼ hach yahchah tu yóloʼob u palal Nefi h pʼátoʼob teʼ cahoʼ.

29 Lelaʼ tu sén yahchah xan yóloʼob u palal Laman, tumen heʼel túnaʼ, yan caʼach u palaloʼob nohochchahoʼob yétel u yaʼabtal u haʼabiloʼob, dzoʼoc tac u chuquiʼc u nohoch muquiʼloʼobeʼ, tu chaʼah u bisaʼaloʼob tumen u kas tʼan yétel u tusil u palal Zoram tac kuchic u binoʼob u xímbaloʼob yétel le u bandidoiloʼob Gadianton.

30 Bey úchic u yahtal yól xan u palal Laman ca hoʼopʼ u minaʼantal u feoʼob yétel u toh cuxtaloʼob tu yoʼolal u keban u palal tán u nohochtaloʼoboʼ.