1 Ca tún tu múchʼtuba yaʼabach u palal Nefi tu baʼpach le templo yan teʼ tu luʼumil Yaʼab Yanoʼ; letiʼoʼobeʼ hach hakaʼan u yóloʼob tu batsiloʼob yétel tán u yeʼesic huntúl tiʼ ulʼakeʼ dzoʼoc u heʼlpahal yaʼab baʼaloʼob.

2 Tán xan u tsicbaloʼob tu yoʼolal le Jesucristoaʼ maʼx oʼolal dzaʼan le baʼaloʼobaʼ tu yoʼolal u químilaʼ.

3 Caʼaliquiʼl tún tán caʼach u tsicbaloʼob tu batsiloʼobeʼ ca tu yuʼubahoʼob humpʼél tʼan bey caʼan u taleʼ; ca hoʼopʼ u maʼn u pacatoʼob tulácal tuʼux, tumen maʼ tu naʼatoʼob le tʼan tu yuʼubahoʼoboʼ; maʼ humpʼél tʼan kaʼamiʼ mix keyahiliʼ baʼaleʼ quex tumen humpʼél tʼan maʼ kaʼamiʼ, h kuch tac u pucsiʼkaloʼob le maʼxoʼob tu yuʼubahoʼ, tiʼ beyiloʼ mix humpʼít tiʼ u wíncliloʼob h pʼát wá maʼ tán u quiʼquiʼlanquiʼl; bixmaʼiʼ, h oc tac tu yóloʼobeʼ ca tu betah u yélel u pucsiʼkaloʼob.

4 Ca tun tu caʼa yuʼubahoʼob le tʼanoʼ baʼaleʼ lailiʼ maʼ tu naʼatahoʼobiʼ.

5 Le ca tu yuʼubahoʼob le tʼan tu yóxténoʼ ca tu hach dzah u xiquiʼnoʼob yoʼolal u yuʼubicoʼob tu bel yétel tán u pacatoʼob tu tadz tuʼux cu tal le tʼanoʼ; tán xan u hach pacatoʼob caʼan, teʼ tuʼux cu tal le tʼanoʼ.

6 Heʼel túnaʼ tu yóxténeʼ ca tu naʼatahoʼob le tʼanoʼ cah aʼalaʼab tiʼoʼob;

7 Heʼel in Pal hach quiʼn yabiltiʼcaʼ, maʼx oʼolal cu quiʼmaʼctal in wól, maʼx oʼolal tiʼn nohochcunt in kabaʼ; uʼuyeʼex u tán.

8 Heʼebix tún u bin u naʼatiʼcoʼobeʼ cah pacatnahoʼob caʼan tu caʼatén, heʼel túnaʼ, ca tu yilahoʼob huntúl maʼc cu yémel teʼ caʼanoʼ; u búquiʼntmaʼh humpʼél chowác sac nok bey ipíleʼ, cu yémeleʼ cah anhi wáʼalacbal ichiloʼob; u yich tulácal le yaʼabach maʼcoʼoboʼ chén tiʼ yanoʼobiʼ, mixmaʼc cu yóltiʼc u hap u chiʼ, mix huntúl maʼc tiʼ ulak utiaʼal u kátiʼc baʼax u kát yaʼaleʼ, tumen tán u tucultiʼcoʼobeʼ huntúl angel le h chicpah tiʼoʼoboʼ.

9 Ca tún tu tiʼchah u kabeʼ ca tu yaʼalah tiʼ le cahoʼ:

10 Heʼel túnaʼ, ten Jesucristo, tu yoʼolal maʼx aʼalaʼan tumen le profetaoʼob ca tu yaʼalahoʼob bín talac wáy yokolcabaʼ.

11 Heʼel túnaʼ, ten u sásilil yétel u cuxtaliʼl yókolcab; dzoʼoc xan in wukic le kákah copa tu dzah ten le Tataoʼ, yétel dzoʼoc in nohochquiʼntiʼc le Tata yoʼolal in cuchic u keban le yókolcab tiʼn wókoloʼ, yétel leloʼ mukyahnaheʼn le baʼax cu cu yóltiʼc le Tataoʼ tulácal baʼal desde h cáhiʼ.

12 Le tún cah dzoʼoc yaʼalic Jesus le tʼanoʼobaʼ, tulácal le yaʼabach maʼcoʼoboʼ h lúboʼob luʼum; tumen kahaʼan tiʼoʼob aʼalaʼan caʼach ichiloʼob le profetaoʼoboʼ bín u yeʼesuba Cristo ichiloʼob le quen dzoʼococ u naʼacal teʼ caʼanoʼ.

13 Ca tún h tʼaʼanoʼob tumen Yumtsil, tán u yaʼalic:

14 Líkeneʼex ca taqueʼex tiʼn wicnal, tu yoʼolal u páhtal a maʼchic in chʼalaʼatel yétel ca a maʼcheʼex u holil le clavoʼob tiʼn kaboʼoboʼ yétel tiʼn woc, tu yoʼolal a wohéltiʼqueʼex ten u Hahal Dios Israel yétel u Hahal Dios tulácal le luʼumaʼ, yételeʼ ten h quím tu yoʼolal u kebanil yokolcab.

15 Le tún le yaʼabach maʼcoʼoboʼ ca tu nadzubaʼoʼob; ca xan tu maʼchah u chʼalaʼatel yétel u maʼchahoʼob u holil le clavoʼob tu kab yétel tu yocoʼ, bey tún tu betiʼloʼoboʼ, huhuntúlil tac cah láh kuchoʼobiʼ ca tu yilahoʼob tu yoʼolal u yichiloʼob yétel tu maʼchahoʼob tu yoʼolal tu kabiloʼob ca tu yoheltahoʼob hach tu hahil, le betiʼc tún tu yaʼalahoʼobeʼ letiʼeʼ tu hahil le maʼx dzíbtaan tumen le profetaoʼoboʼ tu yaʼalahoʼob bín talaqueʼ.

16 Le cah dzoʼoc u láh nádzaloʼob yicnal yétel u yilicoʼob tu yoʼolal u yichiloʼobeʼ, ca tu kaʼam aʼalahoʼob humpʼéliliʼ;

17 Quiʼquiʼtʼan tiʼ Dios! Bendecirtaac u kabaʼ le maʼs hach caʼanal Hahal Diosoʼ, ca tún xolahoʼob ca tu dzahoʼob u yóloʼob tiʼ.

18 Ca tun tu tʼanah Nefieʼ ca tu yaʼalah tiʼ ca u nadzuba.

19 Ca lík Nefieʼ ca tu nadzuba yicnal, cah xolah tu tán Yumtsileʼ ca tu dzuʼudzah u yoc.

20 Yumtsileʼ ca tu yaʼalah tiʼ ca likic, cah líkeʼ cah pʼát wáʼatal actán tiʼ letiʼ.

21 Ca tún h aʼalaʼab tiʼ tumen Yumtsil: quiʼn dzaic tech páhtalil utiaʼal a dzaic u yoc haʼ tu maʼquiʼloʼob le cahaʼ le quen dzoʼococ in naʼacal teʼ caʼan tu caʼaténoʼ.

22 Bey xaneʼ Yumtsileʼ tu tʼanah ulak maʼcoʼobeʼ ca tu yaʼalah tiʼoʼob xan beyoʼ, ca tu dzah páhtalil tiʼoʼob utiaʼal u dzaicoʼob oc haʼ. Ca tu yaʼalah tiʼoʼob; Bey quen a dzaileʼex oc haʼ yétel maʼ anac baʼatel tʼan ichileʼexeʼ;

23 Tu hahil quiʼn wáʼalic teʼexeʼ bey quen a dzaileʼex u yoc haʼ le maʼx cun pʼat u kebanoʼob, u kát u kamic oc haʼ tiʼn kabaʼ; heʼel túnaʼ bín xiʼiqueʼex yétel bín ocoqueʼex ichil le haʼoʼ ca a dzaeʼex u yoc haʼoʼob tiʼn kabaʼ.

24 Lelaʼ letiʼ le tʼanoʼob quen a wáʼaleʼex tán tʼaniqueʼex huhuntúlil tu kabaʼoʼobaʼ.

25 Yoʼolal dzabaʼan tiʼ ten u páhtalil tumen Jesucristoeʼ, teneʼ quiʼn dzic a woc haʼ tu kabaʼ le Tataoʼ, yétel le Paloʼ yétel le Pixan cu túxtiʼc Diosoʼ. Amen.

26 Ca búlquiʼntiʼqueʼex le maʼcoʼ ichil le haʼoʼ ca caʼa hóksiqueʼex.

27 Bey tún quen a dzaeʼex oc haʼ tiʼn kabaʼ, tumen heʼel túnaʼ, tu hahil quiʼn wáʼalic teʼexeʼ, le Tata, le Paloʼ yétel le Pixan cu túxtiʼc Diosoʼ huntúliliʼ. Yételeʼ teneʼ tiʼ yaneʼn tiʼ le Tataoʼ, le Tata xanoʼ tiʼ yan tiʼ teneʼ, ten yétel le Tataoʼ huntúliloʼon.

28 Heʼebix tún dzoʼoc in wáʼalic teʼexoʼ bey bín a dzaeʼex oc haʼ; yétel maʼ bín anac baʼatel tʼan ichileʼex heʼebix dzoʼoc u yantal ichileʼex tac behlaʼaʼ, mix bín anac mix humpʼél baʼatel tʼan ichileʼex tu yoʼolal in caʼansah heʼebix dzoʼoc u yantal ichileʼexaʼ.

29 Tumen tu hahil tu hahil quiʼn wáʼalic teʼexeʼ le maʼx yan u pixanil baʼatel tiʼeʼ maʼ intiʼaʼaliʼ, baʼaleʼ utiaʼal u kasiʼl baʼal maʼx letiʼ u tata le baʼateloʼ yétel cu pʼuʼuhsic u pucsiʼkal maʼcoʼob tu yoʼolal ca baʼatelnac huntúl yétel ulak.

30 Heʼel túnaʼ maʼ in caʼansah in pʼuʼuhsic yétel kuxil u pucsiʼkal maʼcoʼob, huntúl yétel ulʼakiʼ; baʼaleʼ heʼel tún in caʼansahaʼ; tulácal le baʼaloʼoboʼ xuʼuluc.

31 Heʼel túnaʼ tu hahil, tu hahil quiʼn wáʼalic teʼexeʼ bín in wáʼal teʼex in caʼansah.

32 Lelaʼ letiʼ in caʼansahilaʼ, letiʼ xan le caʼansah u dzamaʼh ten le Tataoʼ; teneʼ quiʼn wáʼalic u hahil yoʼolal le Tataoʼ, le Tata xanoʼ cu yaʼalic u hahil tiʼn woʼolal yételeʼ le Pixan cu túxtiʼc Diosoʼ, teneʼ quiʼn wáʼalic tu halileʼ le Tataoʼ cu yaʼalic tiʼ tulácal maʼc tiʼ tulácal cúchileʼ ca u pʼatoʼob u kebanoʼob yétel ca u creertoʼob tiʼ ten.

33 Le maʼx cu creertiʼc tiʼ ten ca oc haʼnaqueʼ bin salvartaac le heʼeloʼobaʼ letiʼoʼob le bín utiaʼalintoʼob u reinoil Hahal Diosoʼ.

34 Le maʼx maʼ tún u creertiʼc tiʼ ten mix tán kamic u yoc haʼeʼ bín condenartaac.

35 Tu hahil, tu hahil quiʼn wáʼalic teʼexeʼ letiʼ in caʼansahilaʼ, yétel quiʼn wáʼalic de que hah cu tal tiʼ le Tataoʼ; le maʼx cu creertiʼc tiʼ teneʼ cu creertiʼc xan tiʼ le Tataoʼ, le Tataoʼ letiʼ cun u yaʼal u hahil tiʼn woʼolal, tumen bín u xímbat le maʼxoʼ yétel kák yétel xan le Pixan cu túxtiʼcoʼ.

36 Bey tún quen u yaʼal tu hahil le Tata tiʼn woʼolaloʼ, le xan le Pixan ca tuxtiʼcoʼ letiʼ bín u yaʼal tu hahil yoʼolal le Tataoʼ yétel tiʼn woʼolal, tumen le Tata yétel ten, yétel xan le Pixan cu túxtiʼc Diosoʼ huntúliloʼon.

37 Quin wáʼalic xan teʼexeʼ kabét ca a pʼateʼex a kebaneʼex, ca beychaqueʼex bey meheʼn palaleʼ, yétel a kamiqueʼex oc haʼ tiʼn kabaʼ, wá maʼeʼ maʼ bín a kameʼex le baʼaloʼoba.

38 Quin caʼa aʼalic tún teʼexeʼ kabét ca a pʼateʼex a kebaneʼex yétel ca oc haʼnaqueʼex tiʼn kabaʼeʼ ca beychaqueʼex hach bey meheʼn palaleʼ wá maʼeʼ maʼ bín páhchac atiaʼalintiʼqueʼex u reinoil Hahal Diosiʼ.

39 Tu hahil, tu hahil quiʼn wáʼalic teʼexeʼ lelaʼ letiʼ in caʼansahilaʼ; le maʼxoʼob cu betiʼcoʼob nah yókol le nohoch tunichaʼ, u honahiloʼob u tuʼuxil quiʼsin maʼ bín anac páhtalil yókoliʼ.

40 Le maʼxoʼob cun u caʼansoʼob maʼs wá maʼ tulácal tiʼ le baʼaloʼobaʼ yétel ca u caʼansoʼob bey in caʼansahileʼ, leloʼoboʼ tiʼ kas u taloʼob yétel maʼ yókol in tunichil dzaʼanoʼobiʼ, baʼaleʼ yókol u chunil árena yanoʼob, u honahiloʼob u tuʼuxil Satanas heʼekaboʼob utiaʼal u kamicoʼob le quen talac le kaʼam chácoʼob yétel le ikoʼoboʼ.

41 Le betiʼqueʼ xeneʼex tiʼ le cahaʼ ca a wáʼaleʼex tac tu xul luʼumeʼ le tʼanoʼob dzoʼoc in wáʼalic teʼexaʼ.