1 Le cah dzoʼoc u yaʼalic Jesus le tʼanoʼob tiʼ Nefi yétel le maʼxoʼob tʼanaʼanoʼoboʼ (yéyaʼan doce htʼaʼanoʼoboʼ yétel h dzaʼab páhtalil tiʼoʼob utiaʼal u dzaicoʼob oc haʼ), heʼel túnaʼ ca tu tiʼchah u kab yókol le yaʼabach maʼcoʼoboʼ tán u yaʼalic tiʼoʼob: Quiʼmaʼc a wóleʼex wá ca wuʼuyiqueʼex baʼax cu yaʼalic le doce maʼcoʼob dzoʼoc in yéyic ichileʼex utiaʼal u meyahoʼob atiaʼaleʼex u yutsil yétel utiaʼal u meyahqueʼexoʼ, yétel dzoʼoc xan in dzaic páhtalil tiʼoʼob utiaʼal u dzaicoʼob a woc haʼeʼex tiʼ haʼeʼ, heʼel túnaʼ, bín in dza a woc haʼeʼex yétel kák yétel xan le Pixanoʼ cu tuxtiʼc Dios. Le betiʼc túneʼ, quiʼ maʼc a wóleʼex wá ca a creerteneʼex yétel ca oc haʼnaqueʼex, le quen dzoʼococ a wiliqueneʼex yétel a wohéltiʼqueʼexeʼ teneʼ cuxaʼanen.

2 Tu caʼatén, maʼs bendicion dzaʼan tiʼ le maʼxoʼob cun u creertoʼob tiʼ a tʼaneʼex, tumen a wáʼaliqueʼex a wilmaʼheʼneʼexoʼ yétel a woheʼleʼexeʼ teneʼ cuxaʼanen. Bixmaʼiʼ, cu kamicoʼob bendicion le maʼxoʼob cun u creertoʼob tiʼ a tʼaneʼexoʼ yétel ca u hach humillartiʼcubaoʼob ca oc haʼnacoʼobeʼ, tumen bín xímbataacoʼob yétel kák, yétel xan le Pixan cu túxtiʼc Dios yétel bín perdonartaac u kebanoʼob.

3 Bixmaʼiʼ bendicion cu dzaʼabal tiʼ le ótsil u yóloʼob cu taloʼob tiʼn wicnaloʼ tumen utiaʼaloʼob u reinoil le caʼanoʼ.

4 Ulak xaneʼ bendicion cu dzaʼabal tiʼ le maʼxoʼob cu yokoloʼoboʼ tumen bín quiʼmaʼccunsaʼac yóloʼob.

5 Bendicion cu dzaʼabal tiʼ le maʼxoʼob bey meheʼn palaloʼoboʼ tumen bín utiaʼalintoʼob le luʼumaʼ.

6 Bendicion cu dzaʼabal tiʼ le maʼxoʼob wiʼihoʼob yétel ukahoʼob tiʼ le baʼax tohoʼ tumen letiʼoʼobeʼ bín chuʼupucoʼob yétel le Pixanoʼ cu túxtiʼc Dios.

7 Bendicion cu dzaʼabal tiʼ le maʼxoʼob cu chʼaʼ ótsililoʼoboʼ tumen letiʼoʼobeʼ bín chʼaʼabac ótsilil tiʼoʼob xan.

8 Bendicion cu dzaʼabal tiʼ le maʼxoʼob purotac u pucsiʼkaloʼoboʼ tumen letiʼoʼobeʼ bín u yiloʼob Hahal Dios.

9 Bendicion cu dzaʼabal tiʼ le maʼxoʼob cu meyahoʼob ca anac paz ich maʼcoʼob tumen letiʼoʼobeʼ bín aʼalaʼac tu yoʼolaloʼobeʼ letiʼoʼobeʼ palaloʼob Hahal Dios.

10 Bendicion cu dzaʼabal tiʼ le maʼxoʼob cu chʼaʼapachtaaloʼob tu yoʼolal in kabaʼoʼ tumen letiʼoʼobeʼ bín utiaʼalintoʼob u reinoil le caʼanoʼ.

11 Bendicion cu dzaʼabal teʼex wá ca aʼalaʼac teʼex baʼax kas yétel le quen chʼaʼapachtaaqueʼex, quen aʼalaʼac baʼaloʼob kastac ta contraeʼex tiʼn woʼolal, tán u tusoʼobeʼ.

12 Tumen bín anac teʼex nohoch quiʼmaʼc ólal yétel bín quiʼmaʼcchahac a wóleʼex hach yaʼab tumen nohoch a boʼolileʼex cun dzaʼabil teʼex teʼ caʼanoʼ; tumen bey úchic u chʼaʼapachtaal le profetaoʼob h taloʼob tánil tiʼ teʼexoʼ.

13 Tu hahil, tu hahil quiʼn wáʼalic teʼexeʼ, teʼex in kát ca a betabaeʼex u taabil yókolcab; baʼaleʼ wá le taaboʼ maʼ tu yuʼubaʼal le can túntaaqueʼ, bix bín dzaʼabac taab teʼ luʼumaʼ? Le taab túnoʼ cu pʼátal mixbaʼal uts cu betiʼqueʼ cu puʼulul táncab utiaʼal u yaʼachʼeʼtaal tumen le maʼcoʼoboʼ.

14 Tu hahil, tu hahil quiʼn wáʼalic teʼexeʼ, in kát ca a betabaeʼex u sásilil le cahaʼ. Humpʼél nohoch cah cu dzaʼabal yókol caʼanal luʼumeʼ maʼ tu páhtal u taacaʼal.

15 Heʼel túnaʼ cu tʼaʼabal wá humpʼél quiʼb tumen maʼcoʼob ca u dzaoʼob yánal humpʼél chʼoy? Maʼatech, baʼaleʼ cu dzaʼabal tiʼ humpʼél baʼax caʼanal; bey túnoʼ cu sásilcuntiʼc tulácal le maʼxoʼob yanoʼob ichnahoʼ.

16 Bey tún a beteʼex u sásiltal a sásilileʼex actán tiʼ le cahaʼ, tu yoʼolal u yilicoʼob le maʼalob baʼaloʼob ca mentiʼqueʼexoʼ, yétel yoʼolal a dzaiqueʼex quiʼmaʼc ólal tiʼ a tataeʼex yan teʼ caʼanoʼ.

17 Maʼ a tucultiʼqueʼexeʼ wá h talen in xul le leyoʼ yétel le tʼanoʼob aʼalaʼan caʼachoʼ tumen le profetaoʼoboʼ. Maʼ h talen in xuliquiʼ baʼaleʼ h talen in dzoʼocsic.

18 Tumen tu hahil quiʼn wáʼalic teʼexeʼ, hach mix humpʼít baʼal dzoʼoc u luʼsaʼal tiʼ le leyoʼ tiʼ teneʼ láh dzoʼoquiʼ.

19 Heʼel túnaʼ dzoʼoc in dzaic teʼex u ley yétel u tʼan u yaʼalmaʼh in tata tu yoʼolal ca a creerteʼex tiʼ ten, ca a pʼateʼex a kebaneʼex yétel ca taqueʼex tiʼn wicnal yétel a pucsiʼkaleʼex tún kiʼinam beyxann a pixaneʼex a facil cu caʼansaʼaloʼob. Heʼel túnaʼ actán tiʼ teʼex yan le tʼan u yaʼalmaʼh Hahal Diosoʼ yételeʼ le leyoʼ dzoʼoc u dzoʼocsaʼal.

20 Le betiʼc túneʼ coʼoteneʼex tiʼn wicnal ca salvartaaqueʼex; tumen tu hahil quiʼn wáʼalic teʼexeʼ wá maʼ tán a betiʼqueʼex le tʼan in wáʼalmaʼhoʼ tiʼn dzah teʼex beʼoraeʼ maʼ bín ocoqueʼex tu reinoil caʼanil.

21 A wuʼuymaʼheʼex u yaʼalaʼal tumen le úchben maʼcoʼoboʼ yétel dzíbtaan xan actán tiʼ teʼex; maʼ bín a quíns maʼquiʼ, le maʼx cu quíneʼ bín dzaʼabac tu juicioil Hahal Dios.

22 Baʼaleʼ teneʼ quiʼn wáʼalic teʼexeʼ le maʼx kuxilnahaʼan yétel u sucuʼuneʼ mín wáleʼ bín juzgartaac tumen letiʼ. Le maʼx cu yaʼalic Raca tiʼ u sucuʼuneʼ mín yan u bisaʼal tu tánil concilio; le maʼx xan quen u yaʼal minaʼan u tucul u sucuʼuneʼ mín yan u puʼulul ichil u kákil u tuʼuxil kasiʼl baʼal.

23 Le betiʼqueʼ wá ca talaquech tiʼn wicnal, wá a kát tal tiʼn wicnal ca kaʼahac tech yan wábaʼax u betmaʼh a sucuʼun ta contraeʼ.

24 Xen tuʼux yan a sucuʼun ca wutsquiʼntiʼc le baʼaloʼ yétel, le cu dzoʼocoleʼ, coʼoten tún tiʼn wicnal yétel tulácal a wól chup yétel sásil a pucsiʼkal, ten tún bín in kamech.

25 Séb betaba de acuerdooʼ yétel a enemigo caʼaliquiʼl yaneʼch tu yétel teʼ behoʼ, wá maʼeʼ heʼebaʼalac horaeʼ cu maʼchiquecheʼ cu bisiquech u kaleʼch teʼ carceloʼ.

26 Tu hahil, tu hahil quiʼn wáʼalic techeʼ, teʼeloʼ maʼ bín hókoquech wá maʼ a láh boʼotiʼc baʼax a pʼaxmaʼhoʼ. Yételeʼ caʼaliquiʼl teʼ yaneʼch teʼ carceloʼ heʼ wá u páhtal a boʼotiʼc quex humpʼél céntavoeʼ? Tu hahil, tu hahil quiʼn wáʼalic techeʼ maʼ.

27 Heʼel túnaʼ, h dzíbtaab tumen le úchben maʼcoʼoboʼ; maʼ ta chiltal yétel ulak coʼolel wá maʼ a wátaniʼ.

28 Baʼaleʼ teneʼ quiʼn wáʼalic teʼexeʼ le maʼx cu pactiʼc huntúl coʼolel ca u sen dzíbolteʼ dzoʼoc u chiltal tu yétel tu pucsiʼkal.

29 Heʼel túnaʼ quiʼn dzaic teʼex humpʼél tʼan utiaʼal a betaneʼexeʼ maʼ ta chaʼiqueʼex u yocol mix humpʼél tiʼ le baʼaloʼobaʼ ta pucsiʼkaleʼexiʼ.

30 Tumen maʼs maʼalob maʼ a betiʼqueʼex le baʼaloʼobaʼ tán chʼaʼic a cruzeʼexaʼ, que ca puʼuluqueʼex ichil u tuʼuxil kasiʼl baʼal.

31 Dzíbtaaneʼ, le maʼx cu pʼatiʼc yataneʼ u dza u huʼunil divorcio tiʼ.

32 Tu hahil, tu hahil quiʼn wáʼalic teʼexeʼ, le maʼx cu pʼatiʼc u yataneʼ wáʼ maʼ tu yoʼolal u bin yétel ulak xíbeʼ, cu betiʼc u bín yétel ulak xíb, le maʼx xan cun dzoʼocol u bel yétel le coʼolel u divorciarmaʼhubaoʼ cu betiʼc nohoch keban.

33 Ulak baʼal xan dzíbtaaneʼ; maʼ bín a jurar ta woʼolal sino ca jurar tu yoʼolal Hahal Dios;

34 Baʼaleʼ tu hahil, tu hahil quiʼn wáʼalic teʼexeʼ; maʼ ta jurar tiʼ mixbaʼaliʼ; mix yoʼolal le caʼanal tumen u tronoil utiaʼal culucbal Hahal Dios;

35 Mix yoʼolal luʼum tumen u cúchil tuʼux cu heʼesic u yoc.

36 Mix xan a jurar yoʼolal a pol tumen maʼ tu páhtal a betiʼc humpʼél dzoʼodzel sac wá box.

37 Baʼaleʼ quen tʼanaqueʼexeʼ aʼaleʼex: Heʼeleʼ, heʼeleʼ; Maʼ, maʼ; tumen ulak baʼal wá maʼs tiʼ lelaʼ kas.

38 Heʼel túnaʼ dzíbtaaneʼ; ich yoʼolal ich, yétel coh yoʼolal coh.

39 Baʼaleʼ teneʼ quiʼn wáʼalic teʼexeʼ maʼ ta betiʼc lob tiʼ kas, le maʼx cu loxic a pʼuʼuc ta xnoʼoheʼ, sut ulak huntsel tiʼoʼ.

40 Wá xan yan wá maʼx cu bisiquech tu tánil ley, ca u chʼaʼic tech a chowác nokeʼ, pʼat tac a capa tiʼ.

41 Le maʼx cu betiʼc a bin yétel humpʼél kilometroeʼ, xen caʼa kilometros yétel.

42 Le maʼx cu kátiʼc tech wábaʼaxeʼ, dzá tiʼ; le maʼx cu kátiʼc tech wá baʼax maʼhantbileʼ, maʼ a wáʼalic maʼ tiʼ.

43 Heʼel túnaʼ dzíbtaan xaniʼ, Yabilt a ámigo baʼaleʼ pʼect a énemigo.

44 Baʼaleʼ heʼel túnaʼ, teneʼ quiʼn wáʼalic teʼexeʼ yabilt a énemigoeʼex, bendecirteʼex le maʼxoʼob cu yaʼalic kas ta woʼolaleʼex, menteʼex uts tiʼ le maʼxoʼob u pʼectiʼqueʼexoʼoboʼ yétel orarneneʼex tu yoʼolal le maʼxoʼob maʼ tu kamiqueʼex yétel cu chʼaʼapachtiʼqueʼexoʼ.

45 Tu yoʼolal a betiʼcabaeʼex u palaleʼex a Tataeʼex yan teʼ caʼanoʼ; letiʼeʼ cu betiʼc u hókol u kin yókol maʼxoʼob utsoʼob yétel maʼxoʼob kasoʼob.

46 Le betiʼqueʼ le baʼaloʼob anchah caʼach úchilaʼ, le cu betaal caʼach yánal le leyoʼ dzoʼoc u dzoʼocsaʼal tulácal tiʼn woʼolal.

47 Tulácal le úchben baʼaloʼoboʼ dzoʼoc u maʼnoʼob yétel tulácal dzoʼoc u túmbenchahal.

48 Le betiʼqueʼ hach in kát ca anaqueʼex hach perfectoeʼex heʼebix teneʼ, wá heʼebix a Tataeʼex yan teʼ caʼanoʼ hach perfecto letiʼoʼ.