1 Uch tún, cu dzoʼocol u naʼacal Jesus teʼ caʼanoʼ le yaʼab maʼcoʼoboʼ cah binoʼob, huhuntúlil tu tanah u yatan yétel u palaleʼ cah sunahoʼob tu yotochoʼob.

2 Tu séblaquiʼl ohéltaab tiʼ le cahoʼ antes ákabchacoʼ, u tʼanil tuʼux cu yaʼalaʼal le yaʼabach maʼcoʼobo tu yilahoʼob Jesus, yétel letiʼeʼ dzoʼoc u meyahtiʼc tu yoʼolal le maʼcoʼoboʼ, tulak kin xaneʼ yan bin u caʼa chicpahal tiʼ le yaʼabach maʼcoʼoboʼ.

3 Bixmaʼiʼ, tac tulácal le ákaboʼ aʼalaʼab le tʼanoʼobaʼ tu yoʼolal Jesus, tiʼ hach aʼalaʼab ichil le cahoʼ, yaʼabeʼ, bixmaʼiʼ, hach táh yaʼab maʼcoʼobeʼ. H meyahnahoʼob tiʼ le ákaboʼ, tu yoʼolal beyoʼ le quen sáschahac tulak kineʼ, heʼel u páhtal u binoʼob teʼ cúchil tuʼux quen u yeʼesicuba Jesus tiʼ le yaʼabach maʼcoʼoboʼ.

4 Tulak kineʼ, le cah múchʼlah le yaʼabach maʼcoʼoboʼ, heʼel túnaʼ, Nefi yétel u sucuʼuneʼ, le maʼx tu líksah ichil le quiʼmenoʼobeʼ, u kabaʼeʼ Tiʼmoteo, beyxann u pal, maʼx cu kabaʼintiʼc Jonas, yétel Matoni yétel Matoniah u sucuʼun, yétel xan Cumen, Cumenoni, Jeremias, Sheʼmnon, Jonas, Zedequiʼas yétel Isaias, le heʼeloʼobaʼ letiʼ u kabaʼoʼob le maʼxoʼob h yéyaʼaboʼob tumen Jesusoʼ, ca tu nadzubaoʼobeʼ ca wáʼalahoʼob ichil le yaʼabach maʼcoʼoboʼ.

5 Heʼel túnaʼ hach yaʼab le maʼcoʼoboʼ cah betaab u binoʼob tiʼ doce tuʼuxoʼob.

6 Le tún le doceoʼoboʼ tu caʼansahoʼob le yaʼab maʼcoʼoboʼ; heʼel túnaʼ tu betahoʼob u xoltaloʼob teʼ luʼumoʼ cah orarnahoʼob tiʼ le Tataoʼ tu kabaʼ Jesus.

7 Beyxan le maʼxoʼob h binoʼob tu pach Jesusoʼ h orarnahoʼob xan tiʼ le Tataoʼtu kabaʼJesus. Ca tún anchah u líkiʼloʼobeʼ ca tu caʼansahoʼob le cahoʼ.

8 Cu dzoʼocol tún u yaʼalicoʼob hach le tʼanoʼob tiʼoʼoboʼ, heʼebix tu yaʼalahil Jesuseʼ (tu yaʼalahoʼob le tʼanoʼoboʼ hach heʼebix tu yaʼalah Jesusoʼ), heʼel túnaʼ, h xolahoʼob tu caʼaténeʼ cah orarnahoʼob tiʼ le Tataoʼ tu kabaʼ Jesus.

9 Ca tu kátahoʼob tiʼ hach le baʼax cu dzíboltiʼcoʼoboʼ; cu dzíboltiʼcoʼobeʼ u dzaʼabal tiʼoʼob le Hahil Pixanoʼ.

10 Le tún cah dzoʼoc u oraroʼob beyaʼ, cah émoʼob tu tsel le haʼoʼ cah bin xan le yaʼabach maʼcoʼob tu pachoʼoboʼ.

11 Ca tún h oc Nefi ichil le haʼoʼ cah dzaʼab tiʼ u yoc haʼ.

12 Cu hókol letiʼ ichil le haʼoʼ ca hoʼopʼ u dzaic oc haʼ, ca tún tu láh dzah u yoc haʼ le maʼxoʼob h yéyaʼaboʼob tumen Jesuseʼ.

13 Le tún cah dzoʼoc u láh dzaʼabal u yoc haʼoʼobeʼ, cu hókoloʼob ichil le haʼoʼ, le Hahil Pixanoʼ h ém yókoloʼobeʼ, cah chuʼupoʼob yétel le Hahil Pixan yétel kák.

14 Heʼel túnaʼ cah baʼpachtaanoʼob bey kák cu yémel teʼ caʼanoʼ; le yaʼabach maʼcoʼoboʼ tu yilahoʼobeʼ ca tu dzahoʼob u hahil tʼanoʼob tu yoʼolaloʼ; cah ém angeloʼob teʼ caʼanoʼ ca tu meyahtoʼob tiʼoʼob.

15 Caʼaliquiʼl tún le angeloʼoboʼ tán u meyahtiʼcoʼob le maʼxoʼob yéyaʼanoʼob tumen Jesusoʼ, heʼel túnaʼ cu kuchul Jesuseʼ cah wáʼalah hach ichiloʼobeʼ ca tu meyahtoʼob.

16 Ca tún tu tʼanah le yaʼabach maʼcoʼoboʼ ca tu yaʼalah tiʼoʼob ca xolacoʼob tu caʼatén teʼ luʼumoʼ, ca tu yaʼalah tiʼ le maʼxoʼob h binoʼob tu pachoʼ ca xolacoʼob xan.

17 Cu dzoʼocol tún u láh xoltaloʼob teʼ luʼumoʼ ca tu yaʼalah tiʼ le maʼxoʼob u yéymaʼhoʼ ca orarnacoʼob.

18 Heʼel túnaʼ ca hoʼopʼ u oraroʼob; cah orarnahoʼob tiʼ Jesus tán yaʼalicoʼob u Yumtsiloʼob yétel u Hahal Diosoʼob.

19 Jesus túneʼ cah chan náchchah humpʼít tiʼ letiʼoʼobeʼ cah tu chinuba luʼumeʼ, ca tu yaʼalah:

20 In Tata, quiʼn dzaic tech diosboʼotiʼc tumen dzoʼoc a dzaic le Hahil Pixan tiʼ le tiʼn yéyahoʼobaʼ; yételeʼ tu yoʼolal u feoʼob tiʼ teneʼ tiʼn yéyahoʼob teʼ ichil le maʼxoʼob wáy yokolcabeʼ.

21 In Tata quiʼn kátiʼc tech ca a dza le Hahil Pixan tiʼ tulácal le cun creertoʼob tiʼ u tʼanoʼoboʼ.

22 In Tata, dzoʼoc in dzaic le Hahil Pixan tiʼoʼoboʼ tumen cu creertiʼcoʼob tiʼ ten; yételeʼ ca wilic cu creertiʼcoʼob tiʼ ten, tumen ca wuʼuyicoʼob letiʼoʼob cu oraroʼob tiʼ ten, cu oraroʼob tiʼ ten tumen tyaʼanen yételoʼob.

23 Behlaʼ túneʼ, in Tata quiʼn kátiʼc tiʼ tech tu yoʼolal letiʼoʼob beyxann tu yoʼolal tulácal le bín u creertoʼob yoʼolal u tʼanoʼoboʼ, tu yoʼolal u creertiʼcoʼob tiʼ ten, tu yoʼolal in wántal yételoʼob heʼebix techeʼ in Tata tiʼn wétel yaneʼch, tu yoʼolal c cuxtal bey huntúl.

24 Le tún cah dzoʼoc u orar Jesus bey tiʼ le Tataoʼ, ca tu nadzuba tiʼ le maʼxoʼob u yéymaʼhoʼ, heʼel túnaʼ, letiʼoʼobeʼ maʼ xuʼuluc u oraroʼobiʼ, maʼ tán u yaʼabcuntiʼc u tʼanoʼob tumen cu yeʼesaʼal tiʼoʼob baʼax u deber u kátiʼcoʼob, yételeʼ chupoʼob yétel le baʼaxoʼob cu dzíboltiʼcoʼoboʼ.

25 Ca tún h bendecirtaaboʼob tumen Jesus, caʼaliquiʼl tán u oraroʼob tiʼ letiʼ, ca saccheʼeh u yich yókoloʼobeʼ ca sásilchahoʼob yoʼolal u sásilil u yich, heʼel túnaʼ cah sacchahoʼob bey heʼebix u yich yétel u nok Jesusoʼ; heʼel túnaʼ hach maʼs u saquiʼl tiʼ tulácal baʼal sac, bixmaʼiʼ, minaʼan ulak baʼal maʼs sac heʼebix u saquiʼloʼ.

26 Ca tún h aʼalaʼab tiʼoʼob tumen Jesus: Maʼ a xuʼuls a orareʼex; baʼaleʼ maʼ h xuʼul u oraroʼobiʼ.

27 Cu dzoʼocoleʼ cah caʼa lúk ichiloʼob cah tu chinuba luʼum; cah orarnah tu caʼatén tiʼ le Tataoʼ tán u yaʼalic:

28 In Tata quiʼn dzaic tech diosboʼotiʼc tumen dzoʼoc a saccuntiʼc le maʼxoʼob tiʼn yéyah yoʼolal u feoʼoboʼ; quiʼn kátiʼc tech yoʼolal letiʼoʼob yétel xan le maʼxoʼob cun u creertoʼob yoʼolal u tʼanoʼoboʼ; yoʼolal u sactaloʼob tiʼ ten yétel u feoʼob tiʼ u tʼanoʼob, heʼebix xan sactaloʼob tiʼ tenoʼ.

29 In Tata, maʼ tán in kátiʼc tech yoʼolal le yokolcabaʼ baʼaleʼ yoʼolal le maʼxoʼob wáy yokolcab ta dzah ten tu yoʼolal u feoʼoboʼ, tu yoʼolal u sactaloʼob tiʼ ten, tu yoʼolal in yantal tiʼ letiʼoʼob, heʼebix techeʼ, in Tata, tiʼ ten yaneʼch, tu yoʼolal ca anacoʼon bey huntúl yétel ca dzaʼabac ten quiʼmaʼc ólal tu yoʼolaloʼob.

30 Le tún cah dzoʼoc yaʼalic Jesus le tʼanoʼobaʼ, ca sunah tu caʼatén actán tiʼ le u yéymoʼoboʼ, heʼel túnaʼ letiʼoʼobeʼ tán u oraroʼob tiʼ letiʼ yétel tulácal yóloʼob yétel maʼ tu xuʼululiʼ; cah caʼa saccheʼeh u yich yókoloʼob tu caʼaténeʼ; heʼel túnaʼ, letiʼoʼobeʼ sacoʼob heʼebix Jesusoʼ.

31 Cah náchchah tu caʼatén tiʼ le maʼxoʼob u yéymaʼhoʼ, cah orarnah tiʼ le Tataoʼ;

32 U yak maʼqueʼ maʼ tan u páhtal u yaʼalic le tʼanoʼob tu yaʼalah cah orarnahoʼ, mix tán u páhtal u dzíbtaal tumen mixmaʼc le tʼanoʼob tu yaʼalah ichil u oracionoʼ.

33 Le yaʼabach maʼcoʼoboʼ tu yuʼubahoʼob yétel cu dzaicoʼob u tʼanoʼob tu yoʼolaleʼ; cah heʼekabpah le pucsiʼkaloʼoboʼ, ca tu naʼatahoʼob tu pucsiʼkaloʼobeʼ le tʼanoʼob tu yaʼalah ichil u oracionoʼ.

34 Chén baʼaleʼ tiʼ hach nuctac yétel hach hadzutstac le tʼanoʼob tu yaʼalah ichil u oracionoʼ, mix tán u páhtal u dzíbtaal mix tán u páhtal u yaʼalaʼal tumen maʼcoʼob.

35 Le tún cah dzoʼoc u mentiʼc u oracion Jesuseʼ cah sunah tu yicnal le maʼxoʼob u yéymaʼhoʼ ca tu yaʼalah tiʼoʼob: Mix huntén in wil hach nohoch fe ichil le Judioʼoboʼ; le betiʼqueʼ, maʼ páhchah in weʼesic tiʼoʼob le baʼax bey hach cu haʼaksic yóloʼobaʼ, tu yoʼolal maʼ tu creertoʼobiʼ.

36 Tu hahil quiʼn wáʼalic tiʼ teʼex minaʼan mix huntul maʼx dzoʼoc u yilic baʼal táh nucuch bey teʼexeʼ, mix xan dzoʼoc u yuʼubic táh nucuch baʼal bey teʼex a wuʼuymileʼexeʼ.