1 Tu hahil, tu hahil quiʼn wáʼalic teʼexeʼ hach in kát ca a dzaeʼex le baʼax kabét tiʼ le ótsiloʼoboʼ; baʼaleʼ ilawil a mentiʼqueʼex maʼ tu tán maʼcoʼob ca ilaʼacaʼ. Tumen wá maʼeʼ mix humpʼél boʼolil cun dzaʼabac teʼex tumen a Tataeʼex yan teʼ caʼanil.

2 Le betiʼqueʼ le quen a dzaeʼex baʼaloʼob utiaʼal le ótsiloʼoboʼ maʼ a beti queʼex u paʼaxal trómpeta ta tánileʼex heʼebix u betiʼc le maʼx caʼapʼél yichoʼob teʼ sinagogaoʼob yétel teʼ behoʼoboʼ, tu yoʼolal u yaʼalicoʼob maʼcoʼobeʼ hach maʼalob letiʼoʼob. Tu hahil quiʼn wáʼalic teʼexeʼ dzoʼoc u kamicoʼob u boʼolil.

3 Baʼaleʼ le quen a dzaeʼex humpʼél baʼax tiʼ wá maʼxe, ilawileʼex a xdzíc kabeʼ maʼ u yoheltiʼc baʼax cu betiʼc a xnoʼoh kab.

4 Tu yoʼolal beyoʼ mixmaʼc yoheʼl tán dziqueʼ wá beyoʼ a tataeʼex cu pactiʼqueʼex mixmaʼc yohlel bín u dza a boʼolileʼex utiaʼal ca ilaʼac tumen tulácal maʼc.

5 Le quen orarnaqueʼexeʼ maʼ a beytaleʼex heʼebix le maʼxoʼob maʼ tu betiʼcoʼob yétel tulácal yól le baʼax cu caʼansicoʼoboʼ caʼapʼél yichoʼobeʼ, tumen letiʼoʼobeʼ uts tu tʼanoʼob u oraroʼob wáʼalacbaloʼob teʼ sinagogaoʼobeʼ yétel teʼ behoʼoboʼ, tu yoʼolal u yilaʼaloʼob tumen ulak maʼcoʼob. Tu hahil quiʼn wáʼalic teʼexeʼ, dzoʼoc u kamic u boʼoliloʼob.

6 Baʼaleʼ techeʼ le quen orarnaquecheʼ, oquen ta wotoch, le cu dzoʼocol a kalic u honahileʼ kát tiʼ a Tata cu pactiʼquech mixmaʼc yoheʼleʼ yétel le a Tata cu pactiʼquech mixmaʼc yoheʼloʼ bín u dza a boʼolil utiaʼal ca ilaʼac tumen tulácal maʼc.

7 Le quen orarnaqueʼexeʼ maʼ a caʼa aʼaliqueʼex yaʼab tʼanoʼob, heʼebix u betiʼc le maʼcoʼob maʼ creernahaʼanoʼoboʼ, tumen letiʼoʼobeʼ cu tucultiʼcoʼobeʼ tu yoʼolal u sén tʼanoʼobeʼ bín uʼuyaʼacoʼob.

8 Le betiʼqueʼ maʼ a beytaleʼex heʼebix letiʼoʼoboʼ; tumen a Tataeʼexeʼ u yoheʼl baʼax kabét teʼex antes a káteʼex tiʼeʼ.

9 Teʼexeʼ bey oraneneʼexeʼ: C Tata yaneʼch teʼ caʼanoʼ, sagradochahac a kabaʼ.

10 Mentchahac le baʼax ca wóltiʼcoʼ teʼ luʼumaʼ bey heʼebix u mentaal teʼ caʼanoʼ.

11 Tuʼubs c pʼaxoʼob heʼebix toʼon c tuʼubsic u pʼaxoʼob le maʼxoʼob u pʼaxmaʼhoʼonoʼoboʼ.

12 Maʼ a chaʼic c lúbul tiʼ kas tuculeʼ, baʼaleʼ líksoʼon tiʼ le kasoʼ.

13 Tumen atiaʼal le reinooʼ, le u páhtaliloʼ yétel ca nohochchahac a kabaʼ utiaʼal tulácal kinoʼob minaʼan u xuloʼob. Amen.

14 Tumen wá ca tuʼubsiqueʼex u kebanoʼob le maʼcoʼob tiʼ teʼexoʼ, a Tataeʼex bín xan u tuʼubs a kebaneʼexeʼ.

15 Baʼaleʼ wá maʼ tán a tuʼubsaqueʼex u kebanoʼob le maʼcoʼob tiʼ teʼexoʼ, a Tataeʼexeʼ maʼ bín xan u tuʼubs a kebaneʼexiʼ.

16 Ulak xaneʼ le quen a suʼukintabaeʼexeʼ, maʼ a beytaleʼex heʼebix le maʼxoʼob maʼ tu betiʼcoʼob yétel tulácal yól le baʼax cu caʼansicoʼoboʼ caʼapʼél yichoʼobeʼ, triste u yichoʼob, tumen cu kexic u yichoʼob tu yoʼolal u yeʼesicoʼob tiʼ ulak maʼcoʼobeʼ tán u suʼukintiʼcubaoʼob. Tu hahil quiʼn wáʼalic teʼexeʼ dzoʼoc u kamicoʼob u boʼolil.

17 Baʼaleʼ techeʼ, le quen a suʼukintabaeʼexeʼ dza aceite tiʼ a pól yétel pʼoʼ a wich.

18 Tu yoʼolal maʼ u chicpahal tu tán le maʼcoʼoboʼ tán suʼukintcabaeʼ. Baʼaleʼ tiʼ a Tata le maʼx mixmaʼc yoheʼl tuʼux yaniʼ; a Tata cu yilic le baʼax maʼ tu yilaʼal u betaaleʼ bín u dza a boʼolil utiaʼal ca ilaʼac tumen tulácal maʼc.

19 Maʼ a taaquiʼqueʼex ayikaliloʼob wáy yokolcabaʼ, tumen teʼelaʼ cu yocol yétel cu kastal, cu yoclaʼal xan tumen ocoloʼob.

20 Taʼaqueʼex tesoroob teʼ caʼanoʼ tumen teʼeloʼ maʼ tán u kastaleʼ yétel le ocoloʼoboʼ maʼ tán u páhtal u yocoltiʼcoʼob.

21 Tumen le tuʼux yan a ayikalileʼexeʼ tiʼ bín yanac a pucsiʼkaleʼexiʼ.

22 U sásil a wínclileʼ a wich; le betiʼqueʼ wá a wich tán u pactiʼc u baʼaliloʼob Hahal Dioseʼ, tulácal a wínclileʼ bín sásilcuntaac.

23 Baʼaleʼ wá kasaʼan a wicheʼ, tulácal a wínclil cu yekhochʼeʼental. Le betiʼqueʼ, wá cu yekhochʼeʼental le sásil yan techoʼ, hach nohoch le eʼhochʼeʼeniloʼ!

24 Mix huntúl maʼc cu páhtal u meyahtiʼc caʼatúl dzul, tumen wá cu pʼectiʼc huntúleʼ cu yabiltiʼc ulak, wá cu nadzicuba yicnal huntúleʼ cu pʼectiʼc ulak. Maʼ tán u páhtal a meyahtiʼqueʼex Hahal Dios yétel ayikaliloʼob.

25 Ca tún anchah u yúchuleʼ, cu dzoʼocol u yaʼalic Jesus le tʼanoʼobaʼ ca tu pactah le doce u yéymaʼhoʼobeʼ ca tu yaʼalah tiʼoʼob: Kaʼahac teʼex le baʼaxoʼob in wáʼalmaʼh teʼexeʼ. Tumen heʼel túnaʼ, teʼex le in yéymaʼh utiaʼal a meyahtiʼqueʼex le cahaʼ. Quin wáʼalic teʼexeʼ; maʼ a sén tucultiʼqueʼex a cuxtal, tu yoʼolal baʼax quen a hanteʼex, wá baʼax quen a wukeʼex, mix tu yoʼolal a wínclileʼex baʼax utiaʼal a búquiʼntiʼqueʼex. Maʼ wá maʼs kabét le cuxtal tiʼ le hanaloʼ, yételeʼ maʼ wá maʼs kabét le wínclil tiʼ le nok utiaʼal búquiʼntbiloʼ?

26 Ilawileʼex le chʼichoʼob cu maʼn u xiknaloʼoboʼ, maʼatech u pakaloʼob mixtech u hochoʼob, mix tán u taaquiʼcoʼob baʼax utiaʼal hantbil; le cu dzoʼocoleʼ, a Tataeʼexeʼ letiʼ tséntiʼcoʼob. Maʼ wá maʼs caʼanoʼ maʼalobeʼex tiʼ letiʼoʼobiʼ?

27 Máx tiʼ ichileʼex, cu páhtal u maʼs caʼanalcuntiʼcuba tu yoʼolal u sén tucultiʼc yaniʼleʼ?

28 Yétel tu yoʼolal le nokoʼ, baʼaxtén ca sén tucultiʼqueʼex? Ilawileʼex le loloʼoboʼ cu nuctal teʼ káxoʼ; maʼatech u meyahoʼob mixtech u kuchoʼob.

29 Baʼaleʼ quiʼn wáʼalic teʼexeʼ, mix Salomon yétel tulácal u ayikaliloʼob, tu búquiʼnt heʼebix letiʼoʼoboʼ.

30 Le betiʼqueʼ wá Hahal Dios cu búquiʼntiʼc le xíwoʼob teʼ káxoʼ, behlaʼ wáy yaneʼ sámaʼleʼ cu puʼulul kákeʼ, bey bín u búquiʼnteʼexeʼ, bixmaʼiʼ, teʼexeʼ chén humpʼít a feeʼex.

31 Maʼ tún a sén tucultiʼqueʼex tán a wáʼaliqueʼexeʼ: Baʼax bín c hanteʼ, wá baʼax bín c ukeʼ, wá baʼax yétel bín c búquiʼntcba?

32 Tumen a Tataeʼex teʼ caʼanoʼ yoheʼl de que kabét teʼex tulácal le baʼaloʼobaʼ.

33 Le betiʼqueʼ yáxeʼ caxteʼex u yutsil u reinoil Hahal Dioseʼ, beyoʼ tulácal le baʼaloʼobaʼ bín dzaʼabac teʼex.

34 Bey túnoʼ maʼ ta tucliqueʼex tiʼ le baʼax bín kabétchahac teʼex sámaʼleʼ tumen sámaʼleʼ bín tuculnac tu yoʼolal le baʼax kabét tiʼoʼ. Cada kineʼ yan u yaʼabil kasiʼl tiʼ.