1 Tu hahil, tu hahiliʼ quiʼn wáʼalic teʼexeʼ, yan ten ulak h tamaʼnoʼob maʼ wáy tiʼ le luʼumiloʼobaʼ, mix tiʼ u luʼumil Jerusaleniʼ, mix tiʼ mix humpʼél tuʼux tiʼ le luʼum nadz teʼ tuʼux dzoʼoc in antal in meyahtiʼc maʼc.

2 Tumen tu yoʼolal le maʼxoʼob quiʼn tʼanoʼ letiʼoʼob le maʼ u yuʼubmoʼob in tʼanoʼ; mix huntén xan in weʼesmaʼhinba tiʼoʼob.

3 Baʼaleʼ dzoʼoc in kamic u tʼanil le Tataoʼ utiaʼal ca xiʼiquen tuʼux yanoʼob, tu yoʼolal u yuʼubicoʼob in tʼan yétel tu yoʼolal ca xoʼococoʼob ichil in h tamaʼnoʼob, tu yoʼolal u yantal hun múchʼ h tamaʼnoʼob yétel huntúl maʼx cu canántiʼc h tamaʼn; le betiʼqueʼ bín in caʼah in weʼesinba tiʼoʼob.

4 Quin wáʼalic tún teʼex ca a dzíbteʼex le tʼanoʼobaʼ le quen xiʼiquen, wá cu yúchul ich le maʼcoʼoboʼ teʼ Jerusalenoʼ, le maʼxoʼob in mehahtmaʼhoʼob tiʼn cuxtal wáy h luʼumeʼ, wá maʼ tu kátiʼcoʼob tiʼn kabaʼ tiʼ le Tataoʼ, yétel tu yoʼolal le Pixan cu tuxtiʼc Diosoʼ, ta woʼolaleʼex teʼex, heʼebix xan tu yoʼolal ulak tribuoʼoboʼ le mixbaʼal u yoheʼloʼob tu yoʼolaloʼoboʼ, beyoʼ le tʼanoʼob bín a dzíbteʼexoʼ bín taacaʼac yétel bín eʼesaʼac tiʼ le maʼ tu nahil Israel u taloʼoboʼ, beyoʼ tu yoʼolal u chuchaʼanil le maʼ tiʼ u nahil Israel u taloʼoboʼ, ca yanac u páhtal u moʼololoʼob le u yalab u palal in cahal Jerusalenoʼ, letiʼoʼob le bín kiʼikiʼtaacoʼob tu yókol le luʼumaʼ tu yoʼolal maʼ tu creertiʼcoʼobiʼ, wá u kát yaʼal xaneʼ ca kuchuc u yoheltoʼob tiʼn woʼolal ten, le maʼxen cu salvartiʼcoʼoboʼ.

5 Ten túneʼ bín in múchʼquiʼntoʼob tu nách tuʼuxiloʼob le luʼumaʼ; bey túnoʼ bín páhchac in betiʼc le promesa u betmaʼh le Tata tiʼ tulácal u maʼquiʼloʼob u nahil Israeloʼ.

6 Bendecirtaanoʼob le maʼxoʼob maʼ tiʼ u nahil Israel u taloʼoboʼ tu yoʼolal u feoʼob tiʼ ten tu yoʼolal u tʼanil le Pixan cu túxtiʼc Diosoʼ, letiʼeʼ cu yaʼalic u hahil tiʼn woʼolal yétel tu yoʼolal le Tataoʼ.

7 Heʼel túnaʼ tu yoʼolal u fe tiʼ teneʼ, cu yaʼalic le Tataoʼ, yétel tu yoʼolal maʼ ta creerteʼexeʼ, beyoʼ, u yotoch Israeleʼex, le hahoʼ bín kuchuc yicnal le maʼxoʼob maʼ tiʼ u yotoch Israel u taloʼoboʼ tiʼ le dzoʼoc kinoʼoboʼ, tu yoʼolal u yeʼesaʼal tiʼoʼob u hach chucaʼaniʼ tulácal le baʼaloʼobaʼ.

8 Baʼaleʼ ótsil le maʼxoʼob maʼ tiʼ u nahil Israel u taloʼob maʼ tán u creertiʼcoʼoboʼ, cu yaʼalic le Tataoʼ, tumen quex dzoʼoc u taloʼob wáy tiʼ le luʼumilaʼ, yétel dzoʼoc u kiʼikiʼtiʼc in cahal, le tu nahil Israel u taloʼoboʼ; dzoʼoc xan u pulucoʼob, ichiloʼobeʼ le in cahal tiʼ u nahil Israel u taloʼ, yétel dzoʼoc u yaʼacheʼtiʼcoʼob.

9 Tu yoʼolal tún u chʼaʼic ótsilil le Tata tiʼ le maʼxoʼob maʼ tu nahil Israel u taloʼoboʼ heʼebix xan u juicioʼob le Tata yókol le cahaʼ, le tu nahil Israel u taloʼoboʼ, tu hahil, tu hahil quiʼn wáʼalic teʼexeʼ, le quen dzoʼococ tulácal le heʼeloʼ, yétel dzoʼoc in betiʼc u betaal kas tiʼn cahal le maʼx tiʼ u nahil Israel u taloʼoboʼ, yétel ca yahchac u yóloʼob, yétel ca puʼulucoʼob ichiloʼob ca pʼectaacoʼob, yétel ca aʼalaʼac tu yoʼolaloʼobeʼ sén chichan yóloʼob maʼ maʼalobosoʼobiʼ.

10 Le betiʼqueʼ le Tataoʼ cu yaʼalic ten ca in wáʼal teʼexeʼ; le kin bín u betoʼob keban tiʼn caʼansahil le maʼxoʼob maʼ tiʼ u nahil Israel u taloʼoboʼ yétel ca u yaʼalubaoʼobeʼ hach maʼalobosoʼob tu pucsiʼkaloʼobeʼ, hach maʼs tiʼ tulácal le nacionoʼob yétel tulácal le cahoʼob yokolcabaʼ, yétel cu chuʼupuloʼob yétel tulácal u heʼheʼlásil tusoʼob yétel kebanoʼob yétel caʼapʼél yich, cu quínsic maʼc, keban yétel coʼolel maʼ yataniʼ yétel kebanoʼob hach kastac tu tán Hahal Dios; wá tún ca u betoʼob tulácal le aʼaloʼob yétel maʼ u kamicoʼob tu chucaʼaniʼl in caʼansahiloʼ, heʼel túnaʼ, cu yaʼalic le Tataoʼ, bín in luks u chucaʼaniʼl in caʼansahiloʼ ichiloʼob.

11 Bey túnoʼ bín in kaʼahs le promesa in betmaʼh yétel in cahaloʼ, u yotoch Israel, yétel bín in tas in caʼansahil tiʼoʼob.

12 Bín in weʼes tech túneʼ, u yotoch Israel, le maʼxoʼob maʼ tiʼ u yotoch Israel u taloʼoboʼ maʼ bín yanac páhtalil tiʼoʼob ta wókoliʼ, tánileʼ yan u kaʼahal ten in promesa ta wétel, u yotoch Israel, yétel bín kuchuquech a kahólt u chucaʼaniʼl in caʼansahil.

13 Baʼaleʼ wá le maʼxoʼob maʼ tiʼ u yotoch Israel u taloʼoboʼ u kátoʼob u pʼat u kebanoʼob yétel ca sunacoʼob tiʼn wicnaloʼ, cu yaʼalic le Tataoʼ, heʼel túnaʼ bín xoʼococoʼob ichil in cahal, u nahil Israel.

14 Yételeʼ maʼ bín in chaʼ in cahal, maʼx tiʼ u yotoch Israel u taloʼoboʼ, ca maʼnac ichiloʼobeʼ, yétel ca yaʼachʼeʼtaacoʼob cu yaʼalic le Tataoʼ.

15 Baʼaleʼ wá maʼ tán u sutoʼob tiʼn wicnal ca u yuʼuboʼob in tʼaneʼ, bín in chaʼ u maʼn in cahal tiʼ letiʼoʼob, u yotoch Israel; bín yaʼachʼetaacoʼob, bín pʼátacoʼob bey heʼebix le taab cu xuʼulul u túntaaleʼ cu pʼátal túneʼ mixbaʼal utseʼ le oʼolaleʼ cu puʼululeʼ cu yaʼachʼeʼtaal tumen in cahal, u yotoch Israel.

16 Tu hahil, tu hahil quiʼn wáʼalic teʼexeʼ le Tataoʼ dzoʼoc u yaʼalic ten lelaʼ; ca in dza le luʼum heʼelaʼ tiʼ teʼex atiaʼalintbileʼex.

17 Bey túnoʼ bín dzoʼocsaʼac baʼax u yaʼalmaʼh profeta Isaias ca tu yaʼalah:

18 Le maʼxoʼob cu calántiʼcoʼoboʼ bín u líks u tʼanoʼob; quen mul kaynacoʼob tumen bín u yiloʼob yétel u yichoʼob le quen betaac u caʼa sut Sion tumen Yumtsil.

19 Awátneneʼex yétel quiʼmaʼc ólal; mul kayneneʼex u cúchileʼex Jerusalen tuʼux mixmaʼc cahaʼaniʼ; tumen Yumtsileʼ dzoʼoc u quiʼmaʼccuntiʼc u cahal, dzoʼoc u salvartiʼc Jerusalen.

20 Yumtsileʼ dzoʼoc u sílic u nokol u muk u kab tu tán u pacat tulácal nacionoʼob yétel tulácal u xulil yókolcab bín yiloʼob u salvacion Hahal Dios.