1 Na afei ɔbaa dɛ ber a Jesus fowee kɔr sor no, nyimpadodow no petsee, na ɔbarimba biara faa ne yer na ne mba na ɔsanee kɔr nankasa ne fie.

2 Na wɔbɔɔ no dawur ntsɛmara wɔ nkorɔfo no mu ansaana adze resa dɛ, nyimpadodow no ehu Jesus, na ɔasom hɔn, na n’adze kyee no so obeyi noho bio akyerɛ nyimpadodow no.

3 Nyew, na anafua no nyina mpo wɔbɔɔ Jesus ho dawur kyerɛɛ nkorɔfo pii, na wɔkɔr nyimpa a wɔdɔɔ sõ no hɔn hɔ nyew dɔm dodow ara yie dzii dwuma anafua no nyina, ama adze kye a woeetum aba bea a Jesus beyi noho akyerɛ nyimpadodow no do.

4 Na ɔbaa dɛ adze kyee no, ber a nyimpadodow no boaa hɔn ano no, hwɛ, Nephi nye no nuabanyin no a onyaan no fii ewufo mu no a ne dzin dze Timothy no nye ne ba so a ne dzin dze Jonas, nye Mathoni so, nye Mathonihah a ɔyɛ no nuabanyin no, nye Kumen, nye Kumenonhi, nye Jeremiah nye Shemnon, nye Jonas, nye Zedekiah, nye Isaiah—afei woyinom nye esuafo no a Jesus saan mu yii hɔn no—na ɔbaa dɛ wɔkɔr na wokegyinaa nyimpadodow no finimfin.

5 Na hwɛ, dɔm no sõ ara ma ɔmaa wɔkyekyɛɛ hɔn mu ekuw duebien.

6 Na duebien no kyerɛkyerɛɛ nyimpadodow no; na hwɛ, wɔsee nyimpadodow no dɛ wombu ntwɛr wɔ asaase n’enyi do na wɔmbɔ mpaa mma Egya no wɔ Jesus ne dzin mu.

7 Na esuafo no so bɔɔ mpaa maa Egya no wɔ Jesus ne dzin mu. Na ɔbaa dɛ wɔsoɛree na wɔkyerɛkyerɛe.

8 Na ber a wɔkãa nsɛm no ara a Jesus kãa kyerɛɛ hɔn no—wɔannsesa biribiara wɔ nsɛm a Jesus akã no mu—hwɛ, wɔkotoow bio na wɔbɔɔ mpaa maa Egya no wɔ Jesus ne dzin mu.

9 Na wɔbɔɔ mpaa bisaa dza wohia; na wɔserɛɛ dɛ wɔmfa Sunsum Krɔnkrɔn no mma hɔn.

10 Na ber a wɔbɔɔ dɛm mpaa yi wiei no wɔkɔr nsu no nkyɛn, na nyimpadodow no kãa hɔn do.

11 Na ɔbaa dɛ Nephi kɔr nsu no mu na wonumaa no.

12 Na ofii nsu no mu bae no, ɔhyɛɛ ase dɛ orunuma. Na onumaa hɔn a Jesus saan mu yii hɔn no nyinara.

13 Na ɔbaa dɛ ber a wonumaa hɔn nyinara na wofii nsu no mu bae no, Sunsum Krɔnkrɔn no baa hɔn do, na Sunsum Krɔnkrɔn no nye ogya hyɛɛ hɔn mã.

14 Na hwɛ, biribi twaa hɔnho hyiae a ɔtse dɛ ogya; na ofi sor bae, na nyimpadodow no hunii, na wɔgyee ho dase; na abɔfo fi sor sianee bɔsoom hɔn.

15 Na ɔbaa dɛ ber a abɔfo no rosom esuafo no, hwɛ, Jesus baa begyinaa hɔn finimfin na ɔsoom hɔn.

16 Na ɔbaa dɛ ɔkasaa kyerɛɛ nyimpadodow no, na ɔhyɛɛ hɔn dɛ wombu ntwɛr bio, na ɔsee n’esuafo no so dɛ wombu ntwɛr.

17 Na ɔbaa dɛ ber a hɔn nyina buu ntwɛr no, ɔhyɛɛ n’esuafo no dɛ wɔmbɔ mpaa.

18 Na hwɛ, wɔhyɛɛ ase bɔɔ mpaa; na wɔbɔɔ mpaa maa Jesus, na wɔfrɛɛ no hɔn Ewuradze nye hɔn Nyankopɔn.

19 Na ɔbaa dɛ Jesus fii hɔn finimfin na ɔtwee noho fii hɔn finimfin kɔr ekyir kakra na ɔbɔɔ no mu adze wɔ famu na ɔsee dɛ:

20 Egya, meda wo ase dɛ edze Sunsum Krɔnkrɔn no ama woyinom a m’asan mu eyi hɔn yi; na osian gyedzi a wɔwɔ no wɔ mo mu ntsi na meyi hɔn efi wiadze.

21 Egya, meserɛ wo ma edze Sunsum Krɔnkrɔn no ama obiara a ɔbɛgye hɔn nsɛm edzi.

22 Egya, ɔwo edze Sunsum Krɔnkrɔn no ama hɔn osiandɛ wɔgye me dzi; na ihu dɛ wɔgye me dzi osiandɛ etse dɛ wɔrobɔ mpaa ma me; na wɔbɔ mpaa ma me osiandɛ mowɔ hɔn nkyɛn.

23 Na afei Egya, mobɔ mpaa ma wo dze ma hɔn, nye hɔn so a wɔbɛgye hɔn nsɛm edzi, ama wɔaagye me edzi, ama maatsena hɔn mu dɛ mbrɛ ɔwo, Egya, etse mo mu, ama yɛaayɛ kor.

24 Na ɔbaa dɛ ber a Jesus bɔɔ dɛm mpaa yi maa Egya no wiei no, ɔbaa n’esuafo no nkyɛn, na hwɛ, nna wɔda ho robɔ mpaa; na wɔronntoa nsɛm pii, osiandɛ wɔakyerɛ hɔn mpaa a ɔsɛ dɛ wɔbɔ; na woenya pɛ mbordo.

25 Na ɔbaa dɛ Jesus hyiraa hɔn ber a wɔrobɔ mpaa ma no no; na ɔyerɛɛw n’ano kyerɛɛ hɔn, na kan a ɔwɔ n’enyim no hyerɛɛn hɔn do, na hwɛ wɔyɛɛ fitaa dɛ mbrɛ Jesus n’enyim tse na dɛ mbrɛ n’atar ne hyerɛn so tse; na hwɛ wɔhyerɛnee kyɛn adze fitaa biara, nyew, na biribiara nnyi asaase so do a ɔyɛ fitaa dɛ mbrɛ hɔ hyerɛnee yɛe.

26 Na Jesus see hɔn dɛ: Hom nkɔ do mbɔ mpaa; dɛm ntsi woenngyaa mpaa bɔ.

27 Na ofii hɔn nkyɛn bio na ɔkɔr ekyir kakra na ɔbɔɔ no mu adze wɔ famu; na ɔbɔɔ mpaa bio maa Egya no see dɛ:

28 Egya, meda wo ase dɛ atsew hɔn a m’asan mu eyi hɔn yi hɔnho, osian hɔn gyedzi ntsi, na mobɔ mpaa dze ma hɔn, nye hɔn so a wɔbɛgye hɔn nsɛm edzi, ama ɔnam gyedzi a ɔwɔ hɔn nsɛm mu no ntsi wɔaatsew hɔnho wɔ mo mu, dɛ mbrɛ hɔn so hɔnho atsew wɔ mo mu no.

29 Egya, mommbɔ mpaa mma wiadzemba, na mbom mobɔ mpaa ma hɔn a eyi hɔn efi wiadze yi mu dze hɔn ama me no, osian hɔn gyedzi ntsi ama hɔnho aatsew wɔ mo mu, ama maatsena hɔn mu, dɛ mbrɛ ɔwo, Egya, etse mo mu, ama yɛaayɛ kor, ama wɔaahyɛ me enyimnyam wɔ hɔn mu.

30 Na ber a Jesus kãa dɛm nsɛm yi wiei no, ɔbaa n’esuafo no nkyɛn bio; na hwɛ wɔkɔr do bɔɔ mpaa enyiberdo maa no; na ɔyerɛɛw n’ano kyerɛɛ hɔn bio; na hwɛ wɔyɛɛ fitaa dɛ Jesus ankasa mpo.

31 Na ɔbaa dɛ ɔkɔr ekyir kakra bio na ɔbɔɔ mpaa maa Egya no;

32 Na tɛkyerɛma runntum nnkã nsɛm a ɔbɔɔ mpaa kãe no, nna ɔdasanyi so runntum nnkyerɛw nsɛm a ɔbɔɔ mpaa kãe no.

33 Na nyimpadodow no tsee na wɔgyee ho dase; na hɔn akoma mu buei ma wɔtsee nsɛm a ɔbɔɔ mpaa kãe no ase wɔ hɔn akoma mu.

34 Naaso nsɛm a ɔbɔɔ mpaa kãe no mu dɔ na ɔyɛ nwanwa kɛse araa ma worunntum nnkyerɛw, eso ɔdasanyi runntum mmfa n’ano nnkã.

35 Na ɔbaa dɛ ber a Jesus wiee mpaa bɔ no, ɔbaa n’esuafo no nkyɛn bio bɛsee hɔn dɛ: Gyedzi kɛse a ɔtse dɛm yi munnhun bi da wɔ Jewfo nyinara mu pɛn; osian hɔn ekyingye ntsi menntum annyɛ etumdze akɛse annkyerɛ hɔn.

36 Nokwar mese hom dɛ, hɔn mu biara nnyi hɔ a ohun dɛm ndzɛmba akɛse yi a hom ehu yi; eso wɔanntse nsɛm akɛse a hom atse yi.