1 Na ɔbaa dɛ ber a Jesus kãa dɛm nsɛm yi kyerɛɛ Nephi nye hɔn a ɔfrɛɛ hɔn no, (nna hɔn a ɔafrɛ hɔn na hɔn nsa akã tum nye tumdzi dɛ wonuma no hɔn dodow yɛ ^aduebien) na hwɛ, ɔtseen ne nsa wɔ dɔmtutuw no do, na ɔtseaa mu see hɔn dɛ: ^bNhyira bɛkã hom sɛ hom tsie duebien yi a ^cmasan mu eyi hɔn dɛ wɔnkyerɛkyerɛ hom, na wɔnsom hom yi nsɛm a; na hɔn na mama hɔn tum dɛ wɔmfa nsu nnuma hom; na sɛ wɔdze nsu numa hom wie a, hwɛ, medze ogya nye Sunsum Krɔnkrɔn bonuma hom; dɛm ntsi nhyira akã hom sɛ hom bɛgye me edzi na woenuma hom, ber a hom ehu me na hom ehu dɛ me tse ase yi.

2 Na misi do bio, dɛ nhyira pii akã hɔn a ^awɔbɛgye hom nsɛm edzi osiandɛ hom bɛgye dase dɛ hom ehu me na hom nyim dɛ mowɔ hɔ. Nyew, nhyira akã hɔn a wɔbɛgye hom nsɛm edzi, na ^bwɔahɛn ahobrɛadze no bun mu ma woenuma hɔn na ^cwɔdze ogya nye Sunsum Krɔnkrɔn no bɛba abɛsera hɔn, na wobenya bɔnfakyɛ.

3 Nyew, nhyira akã ^asunsum mu abɔbɔfo a ^bwɔba mo hɔ, na hɔn na ɔsor ahenman no yɛ hɔndze.

4 Na bio nhyira akã hɔn a hɔn werɛ ahow, na hɔn na wɔbɛkyekye hɔn werɛ.

5 Na nhyira akã hɔn a ^awɔdwe, na hɔn na wobenya ^basaase no edzi.

6 Na nhyira akã hɔn a ^atsenenee ho ^bɔkɔm nye ^cnsukɔm dze hɔn, na wɔdze Sunsum Krɔnkrɔn no bɛmee hɔn.

7 Na nhyira akã ^ambɔbɔrhufo, na hɔn na wobohu hɔn mbɔbɔr.

8 Na nhyira akã hɔn a hɔn ^aakoma mu tsew, na hɔn na ^bwobohu Nyankopɔn.

9 Na nhyira akã ^aesiesiefo, na hɔn na wɔbɛfrɛ hɔn Nyankopɔn ^bmba.

10 Na nhyira akã hɔn a me dzin ntsi ^awɔtseetsee hɔn, na hɔn na ɔsor ahenman no yɛ hɔndze.

11 Na nhyira akã hom ber a wɔbɛkã nsɛm bɔn etsia hom, na wɔatseetsee hom, na wɔakã nsɛmbɔn nyina ato hom do akɔhwi mu, wɔ me ntsi;

12 Na hom ndzi dɛw, na hom nya enyigye mbordo, na hom ^aakatua sõ wɔ sor; na dɛmara na wɔhaaw nkɔnhyɛfo a wodzii hom kan no.

13 Nokwar, nokwar, mese hom dɛ, hom bɛyɛ asaase do ^ankyen; na sɛ nkyen no yew ne dɛw a, wɔdze ebɛnadze bɛhyɛ asaase no nkyen? Onnye mma hwee bio, na mbom dɛ wɔbɔtow egu ma nyimpa anan etsiatsia do.

14 Nokwar, nokwar, mese hom dɛ, mayɛ hom kan ama nkorɔfo yi. Kurow a ɔda koko do nntum nnsuma.

15 Hwɛ, ana nyimpa sɔ ^akandzea dze hyɛ kuruw ase? Oho, mbom wɔdze si kandzeadua do, ma ɔhyerɛn ma hɔn a wɔwɔ fie nyina.

16 Dɛm ntsi hom mma hom ^akan nhyerɛn wɔ nkorɔfo yi enyim, ama woeehu hom ndwuma pa na wɔahyɛ hom Egya a ɔwɔ sor enyimnyam.

17 Mma hom nndwen dɛ mebaa bɛsɛɛ mbra no anaa nkɔnhyɛfo no, mammbɛsɛɛ no, na mebɛhyɛɛ no mã;

18 Na nokwar mese hom dɛ sor nye asaase nnyae nntwaa mu yi iota kor anaadɛ nsensanee kor nnkefi ^ambra no mu etwa mu, mbom wɔ mo mu na ne nyinara hyɛ mã.

19 Na hwɛ, medze m’Egya ne mbra nye ne mbrasɛm no ama hom, dɛ hom ngye me ndzi, na dɛ hom nnu homho wɔ hom bɔn ho, na hom mfa ^aakoma a abobɔ nye sunsum a abotow mbra mo hɔ. Hwɛ hom wɔ mbrasɛm no da hom enyim, na ^bmbra no so ahyɛ mã.

20 Dɛm ntsi hom mbra mo hɔ na hom nya nkwa; na nokwar mese hom dɛ gyedɛ hom dzi me mbrasɛm a medze ama hom mber yi mu do, annyɛ dɛm a hom rennhɛn sor ahenman no mu da.

21 Hom atse dɛ wɔkãa kyerɛɛ tsetsemba, wɔ tsetseberdo, na wɔakyerɛw so ato hom enyim dɛ, mma hom ^anndzi ewu, na obiara a obedzi ewu no, obedzi fɔ wɔ Nyankopɔn n’atsɛmbu no mu;

22 Mbom mese hom dɛ, obiara a no bo fuw no nua no, obedzi fɔ wɔ n’atsɛmbu no mu. Na obiara a ɔbɛse no nua, Raca, obedzi fɔ wɔ mpanyimfo bagua mu; na obiara a ɔbɛse Ɔkwasea, obedzi fɔ wɔ hɛl ogya no mu.

23 Dɛm ntsi, sɛ erebɛba mo hɔ anaadɛ isusu dɛ ereba mo hɔ, na sɛ ekaa dɛ wo nua wɔ asɛm bi tsia wo a—

24 Dzi kan kɔ enye wo nua no ^ankɔbɔ mu, na afei fa akoma a odzi mu bra me nkyɛn, na mebɛgye wo.

25 Enye wo tamfo mbɔ mu ntsɛm ber a enye no wɔ kwan mu no; annyɛ dɛm a da bi ne nsa bɛkã wo ma wɔdze wo akɔto efiadze.

26 Nokwar, nokwar, mese wo dɛ, innkefi hɔ aba gyedɛ etua senine a aka ekyir no ana. Na ber a eda efiadze no, ana ibotum etua ^asenine kor mpo? Nokwar, nokwar, mese wo dɛ, Oho.

27 Hwɛ, wɔakyerɛw ato hɔ dɛ mma ^anntõ awar;

28 Mbom mese hom dɛ, obiara a ɔhwɛ ɔbaa dɛ no ^akɔn dɔ no no, ɔafa no dada wɔ n’akoma mu.

29 Hwɛ, me ma hom mbrasɛm dɛ mma hom mma kwan ma dɛm ndzɛmba yi mu biara nnhɛn hom ^aakoma mu;

30 Na obeye dɛ hom beyi homho efi dɛm ndzɛmba yi ho ber a hom bɛfa hom ^ambeamudua no, sen dɛ wɔbɔtow hom akyen hɛl.

31 Wɔakyerɛw so dɛ obiara a ɔbɔkõ ne yer no, ma ɔmma no ^aɔkõnwoma;

32 Nokwar, nokwar, mese hom dɛ, obiara a ^aɔbɔkõ ne yer, na sɛ nnyɛ ^bndwamanyɛ ntsi a, ɔma ^cɔtõ awar; na obiara a ɔbɔwar nyia wɔakõ no no, ɔtõ awar.

33 Bio, wɔakyerɛw dɛ, mma nnkã ntanhun, na hom nyɛ ^antam a hom akã ama Ewuradze;

34 Mbom nokwar, nokwar, mese hom dɛ, mma hom ^annkã ntam koraa; mma hom nnkã ɔsor osiandɛ ɔyɛ Nyankopɔn n’ahengua;

35 Mma hom nnkã asaase, osiandɛ ɔyɛ n’ananadzegua;

36 Eso mma nnkã wo tsir ntam, osiandɛ irunntum nnyɛ nhwi kor tuntum anaa fufuw;

37 Mbom hom mma hom kasaa nyɛ Nyew, nyew, Oho, oho; na biribiara a ɔkyɛn yinom no fi ɔbɔn no mu.

38 Na hwɛ, wɔakyerɛw dɛ, ^aenyiwa nsi enyiwa ananmu, na esẽ nsi esẽ ananmu;

39 Mbom mese hom dɛ, mma hom nnye ɔbɔn no ^andzi esi, na obiara a ɔbɛpaa w’aso nyimfa mu no, ^bdan kor no so ma no;

40 Na sɛ obi pɛ dɛ ɔnye wo dzi asɛm, na ɔgye w’asetar a, ma ɔmfa w’akatado no so;

41 Na obiara a ɔbɛhyɛ wo dɛ enye no nkɔ ɔkwansin kor no, enye no nkɔ ebien.

42 Nyia ɔserɛ wo no, ^ama no; nyia ɔpɛ dɛ ɔfɛm wɔ wo hɔ no, mma nndan woho mmfi noho.

43 Na hwɛ, wɔakyerɛw so dɛ, dɔ wo nyɛnko na tan wo tamfo;

44 Mbom hwɛ, mese hom dɛ, hom ndodɔ hom ^aatamfo, hom nhyira hɔn a wɔkã hom ndom, hom nyɛ papa mma hɔn a wɔtan hom, na hom ^bnsɔr mma hɔn a wobu hom enyimtsia na wɔtseetsee hom.

45 Ama hom aayɛ hom Egya a ɔwɔ sor no ne mba; na ɔma n’ewia fir wɔ nyimpa bɔn nye nyimpa pa do.

46 Dɛm ntsi ndzɛmba a tsetse no nna ɔhyɛ mbra no ase no, nyina ahyɛ mã wɔ mo mu.

47 ^aNdzɛmba dadaw no, woeyi hɔn akwa, na ndzɛmba nyina abɛyɛ fofor.

48 Dɛm ntsi mepɛ dɛ hom ^andzi mu, dɛ mbrɛ Emi, anaa hom sor Egya no dzi mu no.