1 Ma o lenei sa oo ina sa i ai se motu o tagata e toatele, o le nuu o Nifae, sa faapotopoto faatasi faataamilo i le malumalu lea sa i le laueleele o Nuumau; ma sa latou maofa ma taufaiofo o le tasi i le isi, ma faaali atu e le tasi i le isi suiga tetele ma ofoofogia ia ua oo mai.

2 Ma sa latou fetautalatalaai foi e uiga i lenei Iesu Keriso, o le na faatatau i ai le faailoga na tuuina mai e uiga i lona maliu.

3 Ma sa oo ina ao faapea ona latou fetautalatalaai o le tasi i le isi, sa latou faalogoina se leo e peiseai ua sau mai le lagi; ma sa latou fevaavaaiai solo, ona sa latou le malamalama i le leo lea sa latou faalogoina; ma sa le o se leo saua, pe o se leo tele, ae ui i lea, ma e ui lava o se leo itiiti ae sa tuia ai le totonugalemu o i latou o e na faalogo i ai, sa oo ina leai se vaega o o latou tino sa lei gatete ai; ioe, sa ati lava i o latou agaga, na mafua ai ona mu o latou loto.

4 Ma sa oo ina latou toe faalogoina le leo, ma sa latou le malamalama i ai.

5 Ma sa latou toe faalogoina le leo i le taimi lona tolu, ma sa latou tatala atu o latou taliga e faalogo i ai; ma na faasaga atu o latou mata i le mea na sau ai lea leo; ma sa latou tetepa taulai faasaga atu i le lagi, i le mea na sau ai le leo.

6 Ma faauta, o le taimi lona tolu na latou malamalama ai i le leo lea na latou faalogoina; ma sa fetalai mai ia te i latou:

7 Faauta i lo’u Atalii Pele, o lē ua ou fiafia lava i ai, o lē ua ou faamamaluina ai lo’u igoa—ia outou faalogo ia te ia.

8 Ma sa oo ina ua latou malamalama sa latou toe tetepa ae o latou mata faasaga i le lagi; ma faauta, sa latou vaaia se Tagata ua afio ifo mai le lagi; ma sa laei o ia i se ofutalaloa paepae; ma sa afio ifo o ia ma tu i le totonugalemu o i latou; ma sa liliu atu mata o le motu atoa o tagata ia te ia, ma sa latou fefefe e tatala o latou gutu, e oo lava o le tasi i le isi, ma sa latou lē iloa le uiga o lenei mea, ona sa latou manatu o se agelu lea ua faaali mai ia te i latou.

9 Ma sa oo ina ia faaloaloa mai lona aao ma fetalai mai i tagata, ua faapea mai:

10 Faauta, o A’u o Iesu Keriso, o lē na molimau i ai perofeta o le a sau i le lalolagi.

11 Ma faauta, o A’u o le malamalama ma le ola o le lalolagi; ma ua ou inu i lena ipu oona lea na tuuina mai e le Tamā ia te au, ma ua ou faamamaluina le Tamā i lo’u tau aveina i o’u luga o agasala a le lalolagi, o se mea na ou tuuina atu ai i le finagalo o le Tamā i mea uma mai le amataga.

12 Ma sa oo ina ua uma ona fetalai mai e Iesu o ia upu sa pa’u’ū ifo le motu atoa o tagata i le eleele; ona ua latou manatua sa valoia mai ia te i latou o le a faaali mai e Keriso o ia lava ia te i latou pe a mavae lona afio a’e i le lagi.

13 Ma sa oo ina fetalai mai le Alii ia te i latou ua faapea mai:

14 Tutula’i ia ma o mai ia te a’u, ina ia outou tuu mai o outou lima i lo’u itu, ma ina ia outou tagotago foi i tulaga o fao o i o’u lima ma o’u vae, ina ia outou iloa ai o A’u o le Atua o Isaraelu, ma le Atua o le lalolagi uma, ma sa fasiotia mo agasala a le lalolagi.

15 Ma sa oo ina o atu le motu o tagata i luma, ma tuu atu o latou lima i lona itu, ma latou tagotago i tulaga o fao i ona lima ma ona vae; ma sa latou faia lenei mea, i le o atu i luma taitoatasi seia oo ina latou o atu uma, ma vaai i o latou mata ma tago atu i ai o latou lima, ma latou iloa mautinoa ai ma molimau ai, o ia lava lea, o lē na tusia e perofeta, o le a afio mai.

16 Ma ina ua uma ona latou o atu uma ma molimau mo i latou lava, sa latou alalaga faatasi, ua fai mai:

17 Osana! Ia faamanuina lava le suafa o le Atua Silisili Ese! Ma sa latou faapa’u’ū ifo i vae o Iesu, ma tapuai atu ia te ia.

18 Ma sa oo ina fetalai mai o ia ia Nifae (ona sa i ai Nifae i totonu o le motu o tagata) ma ia poloai mai ia te ia ia alu atu o ia i luma.

19 Ma sa tulai Nifae ma alu atu i luma, ma ifo atu o ia lava i luma o le Alii ma sogi atu i ona aao.

20 Ma sa poloai mai le Alii ia te ia ia tulai. Ma sa tulai o ia ma ua tu i ona luma.

21 Ma sa fetalai mai le Alii ia te ia: Ou te tuu atu ia te oe le mana e te papatiso ai nei tagata pe a ou toe alu a’e i le lagi.

22 Ma sa toe valaauina isi e le Alii, ma faapea foi ona ia fetalai atu ia te i latou; ma sa ia tuu atu ia te i latou le mana e papatiso atu ai. Ma sa ia fetalai atu ia te i latou: O le ala lenei ia outou papatiso atu ai; ma o le a leai ai ni finauga i totonu ia te outou.

23 E moni ou te fai atu ia te outou, soo se tasi e salamo i ana agasala e ala i a outou upu, ma manao e papatiso i lo’u igoa, o le ala lenei ia outou papatisoina ai i latou—Faauta, ia outou o ifo ma tutulai i totonu o le vai, ma i lo’u igoa ia outou papatisoina ai i latou.

24 Ma o lenei faauta, o upu nei ia outou faia, ma ta’u i latou i o latou igoa, ma fai atu:

25 Ona ua tuuina mai ia te a’u le pule e Iesu Keriso, ou te papatiso ia te oe i le suafa o le Tamā, ma le Alo, ma le Agaga Paia. Amene.

26 Ma ona outou faatofu lea o i latou i totonu o le vai, ma toe faatulai a’e mai le vai.

27 Ma o le ala lenei ia outou papatiso atu ai i lo’u igoa; aua faauta, e moni ou te fai atu ia te outou, o le Tamā, ma le Alo, ma le Agaga Paia ua tasi; ma o a’u ua i totonu o le Tamā, ma o le Tamā ua i totonu o a’u, ma o le Tamā ma a’u ua tasi.

28 Ma ia faapea lava ona outou papatiso atu e pei ona ou poloaiina ai outou. Ma ia aua nei i ai ni finauga i totonu ia te outou, e pei ona sa i ai e oo mai i le taimi nei; pe i ai foi ni finauga i totonu ia te outou e uiga i matautu o la’u aoaoga faavae, e pei ona sa i ai e oo mai i le taimi nei.

29 Aua e moni, e moni ou te fai atu ia te outou, o lē e i ai le agaga o finauga ua lē mai ia te a’u o ia, ae ua mai le tiapolo ia, o lē o le tamā o finauga, ma ua faaoso e ia loto o tagata ia fefinauai ma le ita, o le tasi i le isi.

30 Faauta, e le o la’u aoaoga faavae lea, le faaoso o loto o tagata i le ita, o le tasi e faasaga i le isi; ae o la’u aoaoga faavae lenei, ia aveesea mea faapena.

31 Faauta, e moni, e moni, ou te fai atu ia te outou, o le a ou ta’u atu ia te outou la’u aoaoga faavae.

32 Ma o la’u aoaoga faavae lenei, ma o le aoaoga faavae lea na tuu mai e le Tamā ia te a’u; ma ou te molimau atu e uiga i le Tamā, ma e molimau mai le Tamā e uiga ia te a’u, ma o le Agaga Paia e molimau e uiga i le Tamā ma a’u; ma ou te molimau atu ua poloaiina e le Tamā tagata uma, i soo se mea o i ai, ia salamo ma talitonu mai ia te a’u.

33 Ma o soo se tasi e talitonu mai ia te a’u, ma papatisoina, o ia lava lea o le a faaolaina; ma o i latou ia o ē o le a mautofi i le malo o le Atua.

34 Ma o soo se tasi e lē talitonu mai ia te au, ma lē papatisoina, o le a faasalaina.

35 E moni, e moni, ou te fai atu ia te outou, o la’u aoaoga faavae lenei, ma ou te molimau atu ua mai le Tamā; ma o soo se tasi e talitonu mai ia te a’u ua talitonu foi i le Tamā; ma o ia o le a molimau i ai le Tamā e uiga ia te a’u, ona o le a asiasi mai o ia ia te ia i le afi ma le Agaga Paia.

36 Ma o le a faapea ona molimau mai o le Tamā e uiga ia te a’u, ma o le Agaga Paia o le a molimau mai ia te ia e uiga i le Tamā ma a’u; aua o le Tamā, ma a’u, ma le Agaga Paia ua tasi.

37 Ma ou te toe fai atu ia te outou, e ao ina outou salamo, ma avea e pei o se tamaitiiti, ma papatiso i lo’u igoa, a leai e lē mafai lava ona outou maua o nei mea.

38 Ma ou te toe fai atu ia te outou, e ao ina outou salamo, ma papatiso i lo’u igoa, ma avea e pei o se tamaitiiti, a leai e le mafai lava ona outou mautofi i le malo o le Atua.

39 E moni, e moni, ou te fai atu ia te outou, o la’u aoaoga faavae lenei, ma o soo se tasi e atiae i luga o lenei mataupu ua atiae i luga o la’u papa, ma o le a le manumalo faitotoa o seoli e faasaga ia te i latou.

40 Ma o soo se tasi na te tala’i atu e faapei o lenei, ma faatuina e faapea o la’u aoaoga faavae lea, o ia lava lea ua sau mai i le leaga, ma ua le atiae i luga o la’u papa; ae ua atiae i luga o se faavae oneone, ma o le a tutu matalatala mai faitotoa o seoli e talia i latou pe a oo mai lologa ma pesi mai matagi i luga o i latou.

41 O lea, ia outou o atu i lenei nuu, ma tala’i atu upu ua ou tautala atu ai, e oo atu i tuluiga o le lalolagi.