1 Anajwan kik’ulman naq ak numenaq lix junlaju ro’k’aal chihab’ ut ak ^awaqib’ cient chihab’ relik chaq laj Lehi Jerusalen, ut kiwan sa’ li chihab’ kiwan wi’ laj Lajoneus choq’ xb’eenil aj raqol aatin ut aj jolominel sa’ xb’een li ch’och’.

2 Ut laj Nefi, ralal laj Helaman, ak ki’el chaq sa’ li ch’och’ Tzarahemla, ut kixk’e xchaq’rab’inkil laj ^aNefi li ralal, a’an ralal asb’ej, chirixeb’ li ^bperel ch’iich’ bronce, ut chixjunil li tz’iib’anb’il esil li k’uulanb’il, ut chixjunil li k’a’aq re ru a’an li k’uulanb’ileb’ chaq xloq’al chalen chaq relik laj Lehi Jerusalen.

3 Toja’ naq ki’el chaq sa’ li ch’och’, ut toj ^ab’ar xko’o maajun winq nanawok re; ut laj Nefi li ralal kixk’am li tz’iib’anb’il esil sa’ xna’aj a’an, relik chi yaal, li esil tz’iib’anb’il chirix li tenamit a’in.

4 Ut kik’ulman naq sa’ xtiklajik li xkab’laju ro’k’aal chihab’, k’ehomaq reetal, k’a’jo’ wi’chik numtajenaq naq ki’ok chi tz’aqlok ru lix profeetil aatineb’ li profeet, xb’aan naq k’a’jo’ wi’chik xnimal li eetalil ut k’a’jo’ wi’chik xnimal li sachb’a-ch’oolej ki’ok chi k’anjelamank sa’ xyanq li tenamit.

5 A’b’anan ke’wan junjunq li ke’ok chi yehok re naq ak numenaq li kutan re taatz’aqloq ru li aatin, li ^ayeeb’il xb’aan laj Samuel, aj Lamanita.

6 Ut ke’ok chi saho’k xch’ool sa’ xb’eeneb’ li ras riitz’in, ut ke’xye: K’ehomaq reetal, ak numenaq li kutan, ut moko tz’aqlojenaq ta ru li raatin laj Samuel; jo’kan naq maak’a’ xyaalal lix sahil eech’ool ut lee paab’aal chirix li na’leb’ a’in.

7 Ut kik’ulman naq ke’xwaklesi nimla choqink chiru li ch’och’; ut eb’ li ani neke’paab’an k’a’jo’ naq ke’ok chi raho’k xch’ool, maare anchal chan ru naq ink’a’ taak’ulmanq li k’a’aq re ru yeeb’il chaq.

8 A’b’an k’ehomaq reetal, xaqxookeb’ junelik chiroyb’eninkil li jun kutan ut jun q’ojyin ut jun kutan chik li te’wanq jo’ jun kutan ajwi’ chanchan naq maak’a’ q’ojyin, re taaruuq te’xnaw naq moko kiwan ta chi maak’a’ xyaalal lix paab’aaleb’.

9 Anajwan kik’ulman naq kiwan jun kutan xaqab’anb’il xb’aaneb’ li ink’a’ neke’paab’an, naq chixjunileb’ li neke’paab’ank re li na’leb’ a’an ^ate’k’ehe’q chi kamk wi ink’a’ taak’ulmanq li eetalil, li kik’ehe’ chaq xb’aan laj Samuel li profeet.

10 Anajwan naq laj Nefi, ralal laj Nefi, kiril li maa’usilal a’in re lix tenamit, kik’ulman naq kiraho’ xch’ool chi numtajenaq.

11 Ut kik’ulman naq xko’o ut kixkub’si rib’ chi ch’och’, ut ki’elajin chi anchal xmetz’ew chiru li Dios choq’ re lix tenamit, relik chi yaal, eb’ li okeb’ re chi sachmanq sa’ xk’ab’a’ lix paab’aaleb’ chirix li na’leb’ kanab’anb’il chaq xb’aaneb’ lix yuwa’.

12 Ut kik’ulman naq chiru ^achixjunil li kutan a’an ki’elajin chi anchal xmetz’ew chiru li Qaawa’; ut k’ehomaq reetal, kichal lix yaab’ xkux li Qaawa’ rik’in, ut kixye:

13 Taqsi aajolom ut chiwanq xsahil aach’ool, xb’aan naq k’e reetal, xwulak li hoonal, ut sa’ li q’ojyin a’in taak’eemanq li eetalil, ut sa’ li kutan ^awulaj ninchal sa’ li ruchich’och’, re xk’utb’al chiru li ruchich’och’ naq tintz’aqob’resi ru chixjunil li xintaqla chi ^byeemank rik’in xtz’uumaleb’ re lin santil profeet.

14 K’e reetal, ^aninchal rik’ineb’ li we, re ^bxtz’aqob’resinkil ru chixjunil li k’a’aq re ru kink’e chixnaweb’ li ralal xk’ajoleb’ li winq chalen chaq sa’ ^cxk’ojlajik li ruchich’och’, ut re xb’aanunkil li rajom ^dli Yuwa’b’ej jo’ ajwi’ li K’ajolb’ej—re li Yuwa’b’ej sa’ ink’ab’a’ laa’in, ut re li K’ajolb’ej, sa’ xk’ab’a’ intib’el. Ut k’e reetal, xwulak li hoonal, ut sa’ li q’ojyin a’in taak’eemanq li eetalil.

15 Ut kik’ulman naq kitz’aqlok ru li aatin li kichal rik’in laj Nefi, jo’ chanru ajwi’ naq yeeb’il chaq; xb’aan naq k’ehomaq reetal, sa’ rokik li saq’e ^amoko kiwan ta aak’ab’; ut eb’ li tenamit ke’ok chi sachk xch’ool xb’aan naq maajun aak’ab’ kiwan naq ki’ok q’ojyin.

16 Ut ke’wan naab’al li ink’a’ ke’paab’ank chaq re li raatineb’ li profeet, li ^ake’t’ane’ chi ch’och’ ut ke’ok chanchan naq kamenaqeb’, xb’aan naq ke’xnaw naq kisache’ xwankil li nimla ^bna’leb’ ke’xk’uub’ chaq re xsachb’aleb’ li ke’paab’ank chaq re li raatineb’ li profeet; xb’aan naq ak k’utk’u li eetalil li kik’eeman chaq.

17 Ut ke’ok chixnawb’al naq li Ralal li Dios tento taak’utunq sa’ junpaat; relik chi yaal ut, chixjunileb’ li tenamit sa’ xb’een chixjunil li ch’och’ chalen sa’ rokeb’ li saq’e toj sa’ releb’, sa’ li ch’och’ sa’ xnim li saq’e jo’ ajwi’ sa’ li ch’och’ sa’ xtz’e, q’axal numtajenaq xsachikeb’ xch’ool jo’kan naq ke’t’ane’ chi ch’och’.

18 Xb’aan naq ke’xnaw naq eb’ li profeet ke’xch’olob’ chaq xyaalal li k’a’aq re ru a’in chiru k’iila chihab’, ut naq li eetalil li k’eeb’il chaq ak k’utk’u; ut ke’ok chi xuwak xb’aan xmaa’usilaleb’ ut xmaak’a’il lix paab’aaleb’.

19 Ut kik’ulman naq maajun aak’ab’ kiwan chiru chixjunil li q’ojyin a’an; kutan b’an kiwan chanchan naq wa’leb’. Ut kik’ulman naq ki’el wi’chik li saq’e eq’la, jo’ chanru tz’aqal xk’anjel; ut ke’xnaw naq a’an li kutan ^ataayo’laaq wi’ li Qaawa’, xb’aan li eetalil li kik’eeman chaq.

20 Ut ak kik’ulman chaq chixjunil, relik chi yaal, chixjunil li k’a’aq re ru, li junjunq raqal, jo’ chanru raatineb’ li profeet.

21 Ut kik’ulman ajwi’ naq kik’utun jun ak’ ^achahim, jo’ chanru li aatin.

22 Ut kik’ulman naq chirix chik li kutan a’in ki’ok chi wank li tik’ti’ taqlanb’il sa’ xyanq li tenamit xb’aan laj Satanas, re xkawob’resinkil li raameb’, re naq ink’a’ te’xpaab’ li eetalil ut li sachb’a-ch’oolej a’an li ke’ril chaq; a’b’an us ta ki’ux li tik’ti’ik ut b’alaq’ik a’in, lix k’ihaleb’ li tenamit ke’paab’an ut ke’jale’ xch’ool choq’ re li Qaawa’.

23 Ut kik’ulman naq laj Nefi xko’o sa’ xyanq li tenamit, ut jo’kan ajwi’ naab’al chik, ut ke’kub’sink ha’ choq’ re li jalb’a-k’a’uxlej, sa’ li kiwan wi’ jun nimla ^arisinkil li maak. Ut chi jo’kan eb’ li tenamit ke’ok wi’chik chi wank sa’ tuqtuukilal sa’ li ch’och’.

24 Ut maak’a’ li wech’ok-ib’ kiwan, ka’ajwi’ naq ke’wan junjunq li ke’ok chi jultikank aatin, ut ke’xyal xq’e chixk’utb’al rik’ineb’ li loq’laj hu naq ink’a’ chik ^ana’ajman ru xpaab’ankil lix chaq’rab’ laj Moises. Anajwan sa’ li na’leb’ a’in ke’sach, xb’aan naq ink’a’ neke’xtaweb’ ru li loq’laj hu.

25 A’b’anan kik’ulman naq sa’ junpaat ke’jale’ xch’ool, ut ke’q’unb’esiik xch’ool chirix li sachk wankeb’ wi’, xb’aan naq kik’ehe’ che’xnaw naq maji’ ^atz’aqlojenaq ru li chaq’rab’, ut naq tento taatz’aqloq ru li junjunq raqal; relik chi yaal, kichal li aatin rik’ineb’ naq tento taatz’aqloq ru, relik chi yaal, naq moko taanume’q ta junaq xtz’iib’ul chi moko junaq xtz’uqil toj taatz’aqloq ru chixjunil; jo’kan naq sa’ li chihab’ ajwi’ a’in, ke’k’ame’ a’an chixnawb’al chirix li sachk wankeb’ wi’, ut ^bke’xch’olob’ lix majelaleb’.

26 Ut chi jo’kan kinume’ li xkab’laju ro’k’aal chihab’, ut kixk’am sahil esilal reheb’ li tenamit xb’aan li eetalil li ke’k’ulman, jo’ chanru li yeeb’il sa’ lix profeetil aatineb’ chixjunileb’ li santil profeet.

27 Ut kik’ulman naq kinume’ ajwi’ li roxlaju ro’k’aal chihab’ sa’ tuqtuukilal, ka’aj b’an wi’ naq ke’wan ^alaj elq’ re laj Gadianton, li ke’wan sa’eb’ li tzuul, li ke’pukan sa’ li ch’och’; xb’aan naq k’a’jo’ xmetz’ew lix kawresinb’il na’ajeb’ ut lix muqmuukil na’ajeb’, jo’kan naq eb’ li tenamit ink’a’ ke’ru chi numtaak sa’ xb’eeneb’; jo’kan naq ke’xkamsi naab’al, ut k’a’jo’ li nimla kamsink ke’xb’aanu sa’ xyanq li tenamit.

28 Ut kik’ulman naq sa’ li xkaalaju ro’k’aal chihab’ ke’ok chi k’ihank chi k’a’jo’ xnimal, xb’aan naq ke’wan naab’al li risihomeb’ chaq rib’ rik’ineb’ laj Nefita li ke’eelelik rik’ineb’, ut rik’in a’an k’a’jo’ naq ke’raho’ xch’ool laj Nefita li ke’kana sa’ li ch’och’.

29 Ut kiwan ajwi’ rajb’al naq k’a’jo’ naq ke’raho’ xch’ooleb’ laj Lamanita, xb’aan naq k’ehomaq reetal, ke’wan naab’al reheb’ li ralal xk’ajol li ke’ok chi nimank ut chi k’ihank xchihab’, jo’kan naq ke’xsik’ chik xyu’am, ut ke’jalb’ehiik xb’aan junjunq xkomoneb’ laj ^aTzoramita, xb’aan lix tik’ti’eb’ ut lix sahil aatineb’, re te’xjunaji rib’ rik’ineb’ laj elq’ a’an re laj Gadianton.

30 Ut chi jo’kan ke’tawasiik ajwi’ laj Lamanita, ut ke’ok chi ka’ch’ino’k chirix xpaab’aaleb’ ut xtiikilaleb’, xb’aan xmaa’usilaleb’ li tasal tenamit li yookeb’ chi nimank.