1 Tan natan, nengneng yo, inararok a kaagian, ipasen ko a saya so siñga momotekteken yo ed saray puso yo no anto so gawaen yo kayari na inloob yo ed dalan. Balet, nia, akin momotekteken yo so saraya a beñgatla ed saray puso yo?

2 Ag yo kasi nanunotan so inkuan ko ed sikayo a kayari yo ya inawat so Espiritu Santo sikayo so makapansalita ed salita na saray angeles? Tan natan, panon a sikayo so makapansalita ed salita na saray angeles likud no sikayo so wala ed panamegley na Espiritu Santo?

3 Saray angeles so mansasalita ed leksab na pakapanyari na Espiritu Santo; dia ed ontan, mansasalita ra na salita nen Cristo. Dia ed ontan, inkuan ko ed sikayo, mampenek kayo ed saray salita nen Cristo; tan nengneng yo, saray salita nen Cristo so mañgibaga ed sikayo na amin a beñgatla a nepeg a gawaen yo.

4 Dia ed ontan, natan kayarik a sinalita so saraya a salita, no saraya so ag yo natalusan say makaseñgeg ed ag yo nitepet, ni say sikayo so tinmuktok; dia ed ontan, sikayo so ag niakar ed liwawa, kanian nabalang kayo ed biluñget.

5 Tan nengneng yo, ikuan ko lamet ed sikayo, sano onloob kayo ed dalan, tan awaten yo so Espiritu Santo, ipanengneng to ed sikayo so amin a beñgatla a gawaen yo.

6 Nengneng yo, saya so doctrina nen Cristo, tan angapo la so sananey ni a doctrina a niiter anga ed kayari to ya omparungtal ed laman ed sikayo. Tan sano iparungtal to so inkasikato ed sikayo ed laman, saray beñgatla ya ibaga to ed sikayo saraya so imanoen yo a gawaen.

7 Tan natan siak, Nephi, angapo la so arum ni a nibagak; say Espiritu pinatonda to so pambesñgaw ko, tan atilak ak a manermen lapu ed say ag-pananisia, tan say karelmeñgan, tan say ag-pikakabat, tan say inkatalker na teñger na saray totoo; lapu ed ag da sukaiten so kakabatan, odino talusan so baleg a kakabatan, sano saya so niiter ed sikara a malinlinew a siñga unong ed linew na salita.

8 Tan natan, inararok a kaagian, naimanok a manmomotektek kayo ni ed saray puso yo; tan apaermen ak lapu ed nakaukolan a salitaen ko so saraya a beñgatla. Tan no ondeñgel kayo ed Espiritu a mambabañgat ed too a mampikasi, nakabatan yo a nakaukolan yo so mampikasi; lapu ed say mauges ya espiritu ag to ibañgat so too a mampikasi, no ag iñgen ibañgat to ya ag mampikasi.

9 Balet nia, ikuan ko ed sikayo nakaukolan a mampikasi kayo a naynay, tan ag kayo onkakapoy; ya ag yo gagawaen so beñgatla ed Katawan likud no dia ed unona a kipapasen mampikasi kayo ed Ama ed ñgaran nen Cristo, pian pasantoen to so saray ginagawa yo ya onkana ed sikayo, pian saray ginagawa yo so onkana ed pankaabigan na kamarerua yo.