1 Angaman ontan, say ikukuyep so aliwa a siñga unong na inkair-irap to, sanen dia ed gapo anlemew so impalikna to ed dalin na Zebulon, tan dalin na Neftali, tan kayari to nia sikato so akapañgiter na mapalalo a segsegang dia ed dalan na Ambalañga a Dayat dia ed labas na Jordan ed Galilea na saray bansa.

2 Saray totoo a nanakar ed kabiluñgetan anengneng da so baleg a liwawa; saraman so manaayam ed dalin na anino na patey, dia ed sikara sinminag so liwawa.

3 Pinadakel mo so saray bansa, tan inaruman mo so gayaga—mangayaga ra ed arap mo a siñga gayaga da ed panagani, tan siñga gayaga na saray lalaki sano apagen da so asamsam.

4 Lapu ed pinuter mo so pako na sasakbaten to, tan say tayukor ed takeb to, say baston na saray managpasegsegang ed sikato.

5 Lapu ed balang sakey a laban na managbakal so awalaan na nagulo ya iñgal, tan saray kawes ya abalkot na dala; balet saya so katekep na mandarlang tan sunglor ed apoy.

6 Tan dia ed sikatayo sakey ya ogaw so nianak, dia ed sikatayo sakey ya anak a laki so niiter; tan say oley so wala ed saray takeb to, tan say ñgaran to natawag na Makapakelaw, Managsimbawa, Say Makapanyari a Dios, Say Andi-angaan ya Ama, Say Prinsipe na Kareenan.

7 Nipaakar ed ibaleg na oley tan say kareenan angapo so angaan, dia ed trono nen David, tan dia ed panarian igangan to, tan iletneg to so saya katekep na panañgokom tan katekep na kaptekan manlapu ed natan, anga ed ando la ya ando. Say seet na Katawan na saray Ejercito gawaen to so saya.

8 Say Katawan impawit to so salita to ed kinen Jacob tan saya so añgiter na liwawa ed Israel.

9 Tan say amin a totoo nakabatan da, angan si Efraim tan saray manaayam ed Samaria, a mañgikuan ed kinon tan kabaleg na puso:

10 Saray laryo so nagba, balet ipaalagey mi ed panamegley na adobi a bato; saray kakiewan a sikomoro so abatang, balet salatan mi na kiew a sidro.

11 Dia ed ontan say Katawan italindeg to so saray kabusol nen Rezin ya onsumpa ed sikato, tan pikasakeyan to so saray kabusol to;

12 Saray Sirio so wala ed unaan tan saray Filisteo so manomtumbok; sikara so mañgan ed Israel ed akalokas a sañgi. Angaman onia say amin a pasnok to ag niarawi, balet say lima to siansia ni ya akaunat.

13 Lapu ed saray totoo ag da liñgawen so saman so mamakbak ed sikara, ni say panseetan da ya anapen so Katawan na saray Ejercito.

14 Dia ed ontan say Katawan putoten to manlapu ed Israel so ulo tan ikol, sañga tan puknel ed sakey ya agew.

15 Say kadaanan, sikato so ulo; tan say profeta a managbañgat na tila, sikato so ikol.

16 Lapu ed saray pañgulo na saya a totoo so panseñgegan na kaliñgo ra; tan saray añgiwanwan ed sikara so naderal.

17 Dia ed ontan say Katawan angapo so gayaga ed saray lalaki a malangwer, ni say wala so panañgasi to ed saray ulila ed ama tan bibii a balo; lapu ed say balang sakey ed sikara a managkonkonwari tan managgawa na mauges, tan say balang sañgi a managsalita na tila. Lapu ed saraya ya amin say pasnok to ag onarawi, balet say lima to siansia ni ya akaunat.

18 Lapu ed say karelmeñgan mandarlang a siñga apoy, ya upoten to so saray dika tan sabit, tan padayabdaben to so saray kakdelan na saray katakelan, tan sikara so mamaatagey a siñga itotuldo ed tagey na asewek.

19 Lapu ed sanok na Katawan na saray Ejercito say dalin so ombiluñget, tan saray totoo manmaliw a siñga isosunglor ed apoy; ya angapo so sakey a too ya iligyas to so agi to.

20 Tan sikato so manlegkem ed kawanan a lima to tan sikato so naerasan; tan sikato so mañgan ed kawigi a lima to tan sikara so ag napera; balang sakey a too kanen to so laman na dili a taklay to—

21 Si Manases, Efraim; tan si Efraim, Manases; sikara a dua so manolop ya onsumpa ed Juda. Lapu ed saraya ya amin say pasnok to ag onarawi, balet say lima to siansia ni ya akaunat.