1 Tan natan nia, inararok a kaagian, mansalita ak ed sikayo; lapu ed siak, Nephi, ag ko nitepel ya ipasen yo a sikayo so mas matunong nen saray Gentiles. Tan nengneng yo, likud no sumpalen yo so saray gangan na Dios sikayo ya amin met so nabalang; tan makaseñgeg ed saray salita a nibalikas la ag yo nepeg ya ipasen a saray Gentiles so sigpot la ya aderal.

2 Tan nia, ikuan ko ed sikayo a no kaonoñgan so karakel na saray Gentiles a mambabawi sikara so manmaliw a paknaan a totoo na Katawan; tan no kaonoñgan ed saray Judio so ag mambabawi sikara so nipulisay; lapu ed say Katawan angapo so siopaman ya akipaknaan to likud ed saray mambabawi tan manisia ed Anak to, a sikato so Masanto a Bugtong na Israel.

3 Tan natan, mamprofesiya ak na siñga arum ni a nipaakar ed saray Judio tan saray Gentiles. Tan kayari ipaway na libro a saya so asalitak tan saya so nisulat ya onkana ed saray Gentiles, tan saya so nakapotan lamet ed Katawan, wala so dakel a manisia ed saray salita a nisulat; tan saya so awiten da ed saray nakdaan ed saray boleg tayo.

4 Tan dia ed saman saray nakdaan ed boleg tayo nakabatan da so nipaakar ed sikatayo, no panon so impaway tayo ed Jerusalem, tan sikara so kapolian na saray Judio.

5 Tan say evangelio nen Jesu Cristo so nibawag ed limog da; lapu ed ontan, sikara so nipawil ed pikakabat nipaakar ed saray ama ra, tan ontan met ed pikakabat ed si Jesu Cristo, a saya so wala la ed limog na saray ama ra.

6 Tan dia ed saman sikara so mangayaga; lapu ed nakabatan da a saya so sakey a bendicion ed sikara a nanlapu ed lima na Dios; tan saray siksik na biluñget ed sikara so ongapo a napaktak ed kamataan da; tan dakel a kailalakan so ag onlabas ed limog da, likud no sikara so sakey a dalisay tan makapalikliket a totoo.

7 Tan nagawa a saray Judio ya ataytayak ongapo met ira a manisia ed si Cristo; tan sikara so ongapo a mantitipon ed tapew na dalin; tan no kaonoñgan so kinarakel na saray manisia ed si Cristo sikara met so manmaliw a makapalikliket a totoo.

8 Tan nagawa a say Katawan a Dios gapoan to so kimey to ed limog na saray bansa, sankakanayon, salita, tan totoo, pian nagawa so kipawil na saray totoo to ed tapew na dalin.

9 Tan dia ed inkamatunong say Katawan a Dios okomen to so saray duka, tan mambilin katekep na pampapara onkana ed saray maoyamo ed dalin. Tan bakbaken to so dalin ed panamegley na baston na sañgi to; tan dia ed sibok na saray bibil to pateyen to so saray mauges.

10 Tan say panaon masiglat ya onsabi a say Katawan a Dios gawaen to so baleg ya inkaapag-apag ed limog na saray totoo, tan saray makasalanan so deralen to; tan ag to ilanor so saray totoo to, on, angan no bilang nakaukolan a deralen to so saray marelmeng ed panamegley na apoy.

11 Tan say inkamatunong so balkes na banel to, tan say inkamatuor so balkes na awak to.

12 Tan dia ed saman say lubo miayam ed saray kilaw a karnero; tan say leopardo so midukol ed kilaw a kanding, tan kilaw a baka, tan say malangwer a leon, tan say pinataba ya ayep, so manoolop; tan say melag ya ogaw so mampastol ed sikara.

13 Tan say baka tan say oso so man-iba a mankabkab; saray kilaw da so man-iba ya ondukol a manoolop; tan say leon dayami so kanen to a siñga say baka.

14 Tan say mansuso ya ogaw so mangalaw ed abot na kamuntok, tan say apakso ya ogaw iyan to so lima to ed balaong na tadioco.

15 Sikara so ag mankabil odino manderal ed amin a masanto a palandey ko; tan say dalin napano na pikakabat nipaakar ed Katawan a siñga say danum so sinakbuñgan to so dayat.

16 Dia ed ontan, saray beñgatla ed amin a bansa so nakabatan; on, amin a beñgatla so nakabatan na saray anak na totoo.

17 Angapo so beñgatla a maamot likud no saya so niparungtal; angapo so kimey na kabiluñgetan likud no saya so nipanengneng ed liwawa; tan angapo so beñgatla ya akapotan ed tapew na dalin likud no saya so nalukasan.

18 Dia ed ontan, amin a beñgatla a niparungtal ed saray anak na totoo dia ed saman ya agew so niparungtal; tan say pakapanyari nen Satanas a mañgoley ed puso na saray anak na totoo so angapo la, ed andukey a panaon. Tan natan, inararok a kaagian, sampotan ko la so saray salitak.