1 Dia ed taon na impatey nen ari Uzias, siak, anengneng ko met so Katawan a manyodyurong ed sakey a trono, ya akaatagey tan nitanduro, tan say saloy na kawes to linaknaban to so templo.

2 Dia ed tagey to akaalagey so saray serafin; a balang sakey so walaan na anemira a payak; say duara pansakbong to ed lupa to, say duara pansakbong to ed sali to, tan say duara ikana to ed pantekyab to.

3 Tan say sakey inmakis ed sananey, tan nankuan; Masanto, masanto, masanto so Katawan na saray Ejercito; say lapag a dalin napno na gloria to.

4 Tan saray lusek na puerta so ongalaw lapu ed voces na saman so inmeyag, tan say abong so napno na asewek.

5 Dia ed saman inkuan ko: Abagey so inkasiak! lapu ed ag ak ni asumpal; lapu ed sakey ak a too a walaan na saray marutak a bibil; tan manaayam ak ed limog na saray totoo a walaan na marurutak a bibil; tan saray matak anengneng da so Ari, say Katawan na saray Ejercito.

6 Dia ed saman tinmekyab so sakey ed saray serafin ya amaarap ed siak, a sankaawit to so mandarlang a ñgalab ed lima to, a saya so inala to ed panamegley na sakey a sipit a nanlapu ed altar;

7 Tan inyan to ed sañgik, tan inkuan to: Nia, saya so dinmiwit ed saray bibil mo; tan say karelmeñgan mo so naekal, tan say kasalanan mo naandi la.

8 Ontan met nadñgel ko so voces na Katawan, a nankuan: Siopa so ibakik, tan siopa so onla ya onkana ed sikatayo? Dia ed saman inkuan ko: Nia ak; ibaki mo ak.

9 Tan inkuan to ed siak: Onla ka, tan ibagam ed saya a totoo—Deñgel kayo a peteg, balet ag da atalusan; nengneng yo a peteg, balet ag da atebek.

10 Gawam so puso na saya a totoo a mataba, tan gawam so saray layag da a mairap a makareñgel, tan kapotan mo so saray mata ra—ompano makanengneng ira ed saray mata ra, tan makadñgel ira ed saray layag da, tan makatalus ira ed saray puso ra, tan sikara so nakuyong tan natambal.

11 Dia ed saman inkuan ko: Katawan, panon a kinabayag? Tan inkuan to: Anga ed saray ciudad so naandian na kakanaan ya angapo so manayam, tan saray kaaboñgan ya angapo la so totoo, tan say dalin manmaliw a sigpot ya ataynanan;

12 Tan say Katawan inekal to so saray totoo ed arawi, lapu ed wala so baleg a pamaulyan ed pegley na saya a dalin.

13 Balet wala ni so kakaplo, tan sikara so ompawil, tan sikara so naakan, a siñga kiew a terebinto, tan siñga sakey a kiew a robli a say kawalaan na pambibilay to wala ed sikara sano ipagpag da so saray bolong da; kanian say masanto a bokel saya so manmaliw a pambilayan to nia.