1 Tan kayari a si Cristo so inmoli la ed bilay a manlapu ed saray inaatey ipanengneng to so inkasikato ed sikayo, anak ko, tan inararok a kaagian; tan saray salita ya ibalikas to ed sikayo saya so gangan a sumpalen yo.

2 Tan nia, ikuan ko ed sikayo, anengneng ko a dakel a kailalakan so ompatey, tan wala so makapataktakot a bakal, tan baliñgaan ed limog na saray totook.

3 Tan dia ed kasumpal na isabi na Mesias wala so tanda a niiter ed saray totook nipaakar ed kianak to, tan ontan met ed ipatey to tan say kioli to ed bilay; tan makana tan makapataktakot so saman ya agew ed saray marelmeng, lapu ed sikara so ompatey; tan ompatey ira lapu ed pinapaway da so saray profeta, tan saray sasantos, tan tinutopak da ra na bato, tan pinatey da ra; kanian say nañgis na dala na saray sasantos so onsegep ed Dios a manlapu ed dalin sumpa ed sikara.

4 Dia ed ontan, amin na saray mapasirayew, tan saray managgawa na karelmeñgan, say agew ya onsabi so mamool ed sikara, inkuan na Katawan na saray Ejercito, tan manmaliw ira a siñga ñgapos.

5 Tan saraman so mamatey ed saray profeta, tan saray sasantos, say kaaraleman na dalin mañgakmon ed sikara, inkuan na Katawan na saray Ejercito; tan saray kapalandeyan tabonan to ra, tan saray alimbosabos libiten to ra ed arawi, tan saray paalagey so ongeba ed sikara tan mekmeken to ra ya ankekelag tan giliñgen to ra a pulbos.

6 Tan sikara so dalawen na saray karul, tan saray kirmat, tan saray yegyeg, tan amin a kanengneñgan na kadederal, lapu ed say apoy na sanok na Katawan so ondayabdab sumpa ed sikara, tan sikara so manmaliw a siñga ñgapos, tan say agew ya onsabi so mañgupot ed sikara, inkuan na Katawan na saray Ejercito.

7 O say sakit, tan dageyem na kamareruak lapu ed kabalang na inaatey ed saray totook! Tan siak, Nephi, anengneng ko, tan ñgalñgali tunawen to ak ed arapan na Katawan; balet iyakis ko ed Dios ko: Saray kagagawam so maptek.

8 Balet nengneng yo, saray matunong a dinmeñgel ed salita na saray profeta, tan sikara so ag aderal, balet sikara so ag-nagiing ya mantalaran ed si Cristo nipaakar ed saray tanda a niiter, ya ag da iimanoen so amin a panagpasegsegang—nia, sikara so ag ompatey.

9 Balet say Anak na inkamatunong so ompatnag ed sikara; tan sikara so tambalen to, tan sikara so nawalaan na kareenan a kaiba to, anga ed ilabas na talora a kailalakan, tan dakel ed saray komapat a kailalakan so onlabas ed inkamatunong.

10 Tan sano saraya a beñgatla so linmabas sakey a masiglat a kadederal so onsabi ed saray totook; tan, manwari ya ontan so saray sakit na kamareruak, saya so anengneng ko; dia ed ontan, kabat ko a saya so onsabi a nagawa; tan ilako da so inkasikara ed andi-kakanaan; tan, onkana ed gungona na saray inkakinon da tan saray kalokuan da anien da so kaderal; lapu ed inmabuloy ira ed demonyo tan pinili da so saray kimey na kabiluñgetan nen say liwawa, dia ed ontan napelag ira ed dalem na infierno.

11 Tan say Espiritu na Katawan ag lawas mansiansia ed too. Tan sano say Espiritu so tinmonda la a miayam ed too saman la so isabi na masiglat a kadederal, tan saya so amaermen ed kamareruak.

12 Tan siñga unong ed saman so asalitak nipaakar ed pañgoyong ed saray Judio, a si Jesus so Cristo a petepeteg, nakaukolan a saray Gentiles so nakuyong met a si Jesus so Cristo, say Andi-angaan a Dios;

13 Tan ipanengneng to so inkasikato ed saray manisia ed sikato, ed panamegley na pakapanyari na Espiritu Santo, on, dia ed balang sakey a bansa, sankakanayon, salita, tan totoo, a mankimey na ankakabaleg a milagro, tanda, tan pakelaw, ed limog na saray anak na totoo unong ed pananisia ra.

14 Balet nengneng yo, iprofesiyak ed sikayo so nipaakar ed saray kaunoran ya agew; nipaakar ed saray agew sano say Dios a Katawan gawaen to so saraya a beñgatla onkana ed saray anak na totoo.

15 Kayari a saray boleg ko tan saray boleg na agagik so linmasay ed ag-pananisia, tan sikara so abakbak na saray Gentiles; on, kayari a say Katawan a Dios so niliber to ra a tinalimpukok, tan bañgenan to ra ed panamegley na atagey a pukdol, tan añgipaalagey na salimbeng sumpa ed sikara; tan kayari a sikara so naawit a mampaabeba ed sapok, angan sikara so andi ni, iñgen saray salita na saman so matunong so nisulat, tan saray pikakasi na saray matuor so nareñgel, tan saraman so amin a linmasay ed ag-pananisia so ag nalingwanan.

16 Tan saraman so naderal sikara so mansalita manlapu ed dalem na dalin, tan say abeba a voces da so manlapu ed sapok, tan say voces da so siñga voces na sakey ya awalaan a kabkabat ya espiritu; tan say Katawan a Dios iter to ed sikato so pakapanyari, pian iyesaes to so nipaakar ed sikara, angano siñga saya so nanlapu ed dalem na dalin; tan say salita ra ya esaes a manlapu ed sapok.

17 Tan onia so inkuan na Katawan a Dios: Isulat da so saray beñgatla a nagawa ed limog da, tan saraya so nisulat tan nakapotan ed sakey a libro, tan saraman so linmasay ed ag pananisia ag da naala so saraya, lapu ed say anapen da say panderal da ed saray beñgatla a kayarian na Dios.

18 Dia ed ontan, lapu ed saraman so aderal la masiglat so inkaderal da; tan karaklan ed saray makapataktakot ed sikara so siñga taep ya onlabas ya onarawi—on, saya so inkuan na Katawan a Dios: Saya so nagawa ed sakey a bekta, a bigla—

19 Tan nagawa, a saray linmasay ed ag-pananisia so nabakbak ed panamegley na lima na saray Gentiles.

20 Tan saray Gentiles so nipaatagey ed kinon na saray mata ra, tan sikara so napatakba, makaseñgeg ed kinabaleg na atiloran da, kanian sikara so nampaalagey na dakel a simbaan; manwari ya ontan, inleksab da so pakapanyari tan milagro na Dios, tan impulong da ed inkasikara a dili so kakabatan da tan saray dili ya aral da, pian makaala ra na gungona, tan sikara so mangiling ed lupa na saray duka.

21 Tan dakel so simbaan ya impaalagey da a saraya so panlalapuan na ibegan, tan kolkulan, tan palikdoan.

22 Tan wala met so maamot a pannununoñgan, angan siñga nen kadaanan a panaon, unong ed pannununoñgan na demonyo, lapu ed sikato so añgiletneg na amin na saraya a beñgatla; on, say añgiletneg na panagpatey, tan saray kimey na kabiluñgetan; on, tan gugoyoren to ra ed beklew ed panamegley na matalker a lubir, anga ed sikara so abalor to na mabiskeg a lubir ed ando la ya ando.

23 Tan nia, inararok ya agagi, ikuan ko ed sikayo a say Katawan a Dios ag mankikimey ed kabiluñgetan.

24 Ag to gawaen so sakey a beñgatla likud no saya so onkana ed pankaabigan na mundo; lapu ed inararo to so mundo, angan imbagat to so dili a bilay to pian kupkopen to so amin a too ed sikato. Dia ed ontan, angapo so ingangan to ya ag mibiang ed kilalaban to.

25 Nengneng yo, sikato kasi so añgibaga ed siopaman, a nankuan: Arawi kayo ed siak? Nia, ikuan to ed sikayo, Andi; balet inkuan to: Dago kayo ed siak sikayo a wala ed saray kasampotan na dalin, manaliw kayo na gatas tan dilo ya angapo so kuarta tan angapo so bili to.

26 Nengneng yo, Wala kasi so angan sakey a ginangan to ya ompaway ed saray sinagogas, odino ompaway ed saray abong na panagpikasian? Nia, ikuan ko ed sikayo, Angapo.

27 Wala kasi so angan sakey a ginangan to ya ag mibiang ed panañgilaban to? Nia, ikuan ko ed sikayo, Angapo: Balet saya so initer to ya angapo so bayar ed amin a too; tan ingangan to so totoo to a kuyoñgen da ya amin so totoo a mambabawi.

28 Nia, say Katawan wala kasi so angan sakey a ginangan to ya ag mibiang ed kaabigan to? Nia, ikuan ko ed sikayo, Angapo; balet initer to ed amin a too so sakey a pankanawnawa a siñga met ed say sananey, tan angapo so asebelan.

29 Ingangan to ya angapo so saray kasiliban na sacerdote; tan, nia, say kasiliban na saray sacerdote, so totoo a managpulong tan impasen da so inkasikara so liwawa na mundo, pian sikara so makagamor na gungona tan dayew na mundo; balet ag da anapen so panakaabigan na Sion.

30 Nengneng yo, say Katawan insebel to so saya a beñgatla; lapu ed onia, say Katawan a Dios initer to so sakey a gangan ya amin a too agamilen da so panañgasi, a saya a panañgasi so panañgaro. Tan likud no sikara so nawalaan na panañgasi sikara so andi-kana. Dia ed onia, no wala ed sikara so panañgasi ag da nitepel so managkimey ed Sion ya ompatey.

31 Balet say managkimey ed Sion so mansagpot onkana ed Sion; tan no mansagpot lapu ed kuarta sikara so nabalang.

32 Tan lamet, say Katawan a Dios ingangan to a saray totoo ag ira mamatey; a sikara so ag mantila; a sikara so ag mantakew; ya ag da ikana so ñgaran na Katawan a Dios da ed andi-kakanaan; tan ag ira onibeg; a sikara so ag mangawa na palikdo; a sikara so ag mambabaliñgaan ed sakey tan sakey; ya ag ira mangawa na inkabalangkantis; tan ag ira mangawa ed dinan man ed saraya a beñgatla; lapu ed siopaman a mangawa ed saraya so nabalang.

33 Tan angapo so onia a karelmeñgan a manlapu ed Katawan; lapu ed gawaen to labat so maong ed pankaabigan na saray anak na totoo; tan angapo so beñgatla a gawaen to likud no saya so malinew ed saray anak na totoo; tan babagaan to ra ya amin ya ondago ed sikato tan minabang ed kaabigan to; tan angapo so ag to awaten ed saray ondago ed sikato, andeket tan amputi, aripen tan saray bulos, laki tan bii, tan nodnunoten to so saray pagano; tan amin so nampapara ed Dios, mandapag a Judio tan Gentiles.