1 Tan agawa ed saray agew nen Acaz laki ya anak nen Jotam, say laki ya anak nen Uzias, ari na Juda, a si Rezin, ari na Siria, tan Peca say laki ya anak nen Remalias, ari na Israel, so dinmugpa ed Jerusalem a mibakal sumpa ed sikato, balet ag da agamoran so taluna sumpa ed sikato.

2 Tan saya so asalita ed say kailalakan nen David, a nankuan: Say Siria akinunong ed Efraim. Tan say puso to so ginmiwgiw ed takot, tan say puso na saray totoo to, a siñga saray kakiewan ed takel ya ipapalir na dagem.

3 Dia ed ontan inkuan na Katawan ed kinen Isaias: Onla ka natan tan abet mo si Acaz, sika tan si Searjasub say laki ya anak mo, diman ed sampot na dalan na danum ed tagey na panagtipunan na danum dia ed malapar a karsada na patar na batanero;

4 Tan ikuan mo ed sikato: Manlikas ka, tan mankalna ka; ag ka ontatakot, ni say napunaw so pusom niseñgeg ed saraya a duara a sampot na manasesewek a bislak, lapu ed masebeg a sanok nen Rezin ed Siria, tan dia ed say laki ya anak nen Remalias.

5 Lapu ed say Siria, Efraim tan say laki ya anak nen Remalias, so nannununong ed mauges a simbawa sumpa ed sika, a kuan da:

6 Ontakdang itayo sumpa ed Juda tan sikato so guloen tayo, tan mangawa itayo na sakey a buang ya onkana ed sikatayo, tan mañgipasen itayo na ari ed pegley to, on, say laki ya anak nen Tabeal.

7 Dia ed onia kuan na Katawan a Dios: Saya so ag ontalindeg, ni say saya so nagawa.

8 Makaseñgeg say ulo a baley na Siria say Damasco, tan say manañgipañgulo na Damasco, si Rezin; tan dia ed loob na anemaplo tan lima a taon say Efraim so nabuyak kanian sikara so ag natugyop a sakey a bansa.

9 Tan say ulo a baley na Efraim say Samaria, tan say manañgipañgulo na Samaria so say laki ya anak nen Remalias. No ag ka manisia peteg ag ka makaletneg.

10 Kaaruman to nia, say Katawan nansalita lamet ed si Acaz, a nankuan:

11 Kerew ka na pakapatnagan ed Katawan a Dios mo; kerew mo dia ed kaaraleman, odino dia ed kaatageyan ed tagey.

12 Balet si Acaz inkuan to: Ag ak onkerew, ni say tuksoen ko so Katawan.

13 Tan inkuan to: Talineng mo natan, O kailalakan nen David; sakey a melag a beñgatla ed sika ya ekalen mo so anos na saray totoo, balet ekalen mo met so anos na Dios?

14 Dia ed ontan, say dili a Katawan iter to ed sika so sakey a tanda—Nia, sakey a virgen, so mañgilukon tan mañgianak na sakey a laki, tan tawagen da so ñgaran to ya Immanuel.

15 Mantikilya tan dilo so kanen to, pian amta to ya iwaklit so mauges tan pilien to so maong.

16 Tan kasakbayan say ogaw naamtaan to ya iwaklit so mauges tan pilien to so maong, say dalin a kinabusol mo so napaulyan na duara ya arari to.

17 Say Katawan awiten to ed sika, tan ed saray totoom, tan dia ed kailalakan nen amam, so saray agew ya ag ni sinmabi manlapu ed saman so agew a si Efraim so tinmaynan ed Juda, say ari na Asiria.

18 Tan nagawa ed saman ya agew a say Katawan sutsotan to so apañgat a wala ed sankaarawian a kabiañgan na Egipto, tan say bayaong a wala ed dalin na Asiria.

19 Tan sikara so onsabi, tan sikara ya amin so mampainawa ed saray patar ya ag-napanayaman, tan dia ed abot na saray ankakabaleg a bato, tan dia ed tapew na amin a sabit, tan dia ed amin a karikaan;

20 Dia ed saman lamlamang ya agew say Katawan kiskisan to ed panamegley na sakey a labajas ya inabañgan, so saraman so wala ed basil na ilog, ya ari na Asiria, say ulo, tan bago na saray sali; tan upoten to met pati say balbas.

21 Tan nagawa ed saman ya agew, say sakey a too asikasoen to so sakey a baka a kilaw tan duara a karnero;

22 Tan nagawa, lapu ed dakel so gatas ya iter da sikato so mañgan na mantikilya; tan say mantikilya tan dilo so kanen na balang sakey ed saray atilak ed saman a dalin.

23 Tan nagawa ed saman ya agew, say balang sakey a pasen, a kawalaan na sanlibo a wakal a mambili na sanlibo a pidaso na pilak, a saraya so onkana ed saray dika tan saray sabit.

24 Sankaawit da so pana tan pabekang sikato so pegdaten na saray lalaki, lapu ed amin a dalin so manmaliw a kadikadika tan kasabisabit.

25 Tan amin a pukdol ya abokalkal na asarol, angapo so paga a tuboan na saray dika tan saray sabit; balet saya so pasen a pañgibulosan na baka, tan panaakarakaran na ankelag ya ayayep.