1 Iwe iei nengeni, pwi achengicheng, upwe kapas ngenikemi; pun ngang, Nifai, usap mut ngenikemi pwe oupwe ekieki pwe oua tupwon mwen ekkewe chon Gentile repwe tongeni tupwon. Pun nengeni, tiwenon chok ika oupwe aneasochisi ekkewe annukun Kot oupwe pwan fokkun mano non ngun; iwe pokiten ekkewe kapas minne ra fen wesino ami ousap ekieki pwe ekkewe chon Gentile ra unusen ninnino.

2 Pun nengeni, ua apasa ngenikemi pwe usun chommongun ekkewe chon Gentile repwe aier ir ekkewe aramas pwon noun ewe Samon; iwe usun chommongun ekkewe chon Jew resap aier repwe katuruno; pun ewe Samon ese fori ew pwon mi pin ngeni emon tiwenon chok ika epwe ngeni ir ekkewe ra aier me nuku non Noun we, i ewe Emon mi Fel re Israel.

3 Iwe iei, upwe osini pwan ekis usun ekkewe chon Jew me ekkewe chon Gentile. Pun mwirin ewe puk usun minne ua fen kapas usun epwe feito, me epwe makkeno ngeni ekkewe chon Gentile, ra eppunguno sefan ngeni ewe Samon, epwe chommong ekkewe repwe nuku ekkewe kapas minne ra makkeno; iwe repwe uweiareno ngeni nussun mwirimwirich kewe.

4 Iwe mwirin ewe nussun mwirimwirich kewe repwe sinei usuch, pwe sia feito seni Jerusalem, me pwan ir ra mwirimwirin ekkewe chon Jew.

5 Iwe ewe kapas allimen Jises Kraist epwe fateno me neir; ina minne, repwe niwinsefan ngeni miritin semer kewe, me pwan ewe miritin Jises Kraist, minne mi nom me nein semer kewe.

6 Iwe atun ena fansoun repwene pwapwa; pun repwe sinei pwe a ew feioch ngeni ir seni poun Kot; iwe ekkewe unuchen rochopwak epwe poputa ne turutiw seni meser; iwe chommong tappin aramas resap mano me neir, tiwenon chok ika repwe ew aramas mi nimenimoch me murino.

7 Iwe ewe fansoun epwe feito pwe ekkewe chon Jew minne ra toropas fetan repwe pwan poputa ne nuku non Kraist; iwe repwe poputa ne ionfengen won unusen ewe fonu; iwe usun meinisin repwe nuku non Kraist repwe pwan winiti ew aramas mi murino.

8 Iwe ewe fansoun epwe feito pwe ewe Samon Kot epwe poputani an angang me nein ekkewe muu meinisin, einang, sokopaten kapas, me aramas, epwe aniwinato feiochun noun kewe aramas won fonufan.

9 Iwe ren wenechar ewe Samon Kot epwe apungu ekkewe mi woungaw, me kapung ren pungoch fan iten ekkewe mi tipetekison seni fonufan. Iwe i epwe wichi ewe fonufan ren kapasen awan, me ren ngasangasen tunnawan i epwe nieno ekkewe aramas mi ngaw.

10 Pun ewe fansoun a mwitir feito nupwen ewe Samon Kot epwe fori ew keimufesen mi napanap me nein ekkewe aramas, iwe ekkewe aramas mi ngaw i epwe nireno; iwe i epwe amanaua noun kewe aramas, ewer, ika mwo pwe i epwe nieno ekkewe aramas mi ngaw ren ekkei.

11 Iwe wenechar epwe achawaren nukanapan, me nikitu epwe achawaren nepekin.

12 Iwe mwirin ewe wonif epwe nom ren ewe appanen siip; iwe ewe leopard epwe konetiw ren ewe semirit, me ewe appanen kou, me ewe kukkun naion, me kitinupun man, repwe nomefengen; iwe emon kukkun semirit epwe emmwenir.

13 Iwe ewe kou me ewe bear repwe mwongo; nour kewe kukkun repwe konetiw fengen; iwe ewe naion epwe mwongo fetin mi pwas usun ewe oks.

14 Iwe ewe semirit mi chok oup epwe kukkunou won pwangen kukkunun serepenit mi poison, iwe ewe semirit a keran wes seni oup epwe wata poun won ewe nenien serepenit mi poison.

15 Resap feiengaw ika tano me non chukui kewe meinisin mi fel, pun ewe fonufan epwe ureno ren miritin ewe Samon usun ekkewe konik ra ponueno ewe sat.

16 Ina minne, ekkewe mettochun ekkewe muu meinisin repwe pwano; ewer, mettoch meinisin repwe pwano ngeni ekkewe noun aramas.

17 Ese wor mettoch minne mi monomon minne esap pwano; ese wor angangen rochopwak minne resap pwarano non ewe saram; iwe ese wor mettoch minne mi eppunguno won fonufan minne esap pichino.

18 Ina minne, mettoch meinisin minne ra fen pwano ngeni ekkewe noun aramas repwe pwano atun ena ran; me esap chiwen wor an Setan pochokun won netipen ekkewe noun aramas, non ew fansoun nangatam. Iwe iei, ami pwi achengicheng, ua osopwano ai kapas.