Sopun 16
Isaiah a kuna ewe Samon—An Isaiah kewe tipis ra museno—A kokko pwe epwe osini—A osini usun ketiwengawen an Kraist kewe afanafan me ren ekkewe chon Jew—Ew nussun mwicheich epwe niwinsefan—Anonno ngeni Isaiah 6. Arap ngeni 559–545 Ier Mwen Kraist.
1 Non ewe ier nupwen king Uzziah a mano, ua pwan kuna ewe Samon a mwommot won ew nenien mwottun king, tekia me kekita, iwe urosun ufan we a aurano ewe tempel.
2 Asetan a uta ekkewe seraphim; emon me emon a wor wonofoch pour; ren ruofoch poun i a pwonuono mesan, me ren ruofoch poun i a pwonuono pechen, me ren ruofoch i a fen chang.
3 Iwe emon a puchor ngeni ewe pwan emon, me a apasa: Fel, fel, fel, ina ewe Samonun Mwicheichen Aramas; unusen fonufan a ureno ren an ning.
4 Iwe ekkewe nongonongen ewe asam ra mwokut pokiten mongungun i ewe a puchor, iwe ewe imw a ureno ren otuot.
5 Mwirin ua apasa: Riaffou a fis ngeniei! pun ua kiteter; pokiten ngang emon mwan mi nimengaw tunnawei; iwe ua nonnom nein ew aramas mi nimengaw tunnawer; pun mesei a fen kuna ewe King, ewe Samonun Mwicheichen Aramas.
6 Mwirin emon me nein ekkewe seraphim a aasito rei, a wor ew moochen ekkei mi char non poun, minne i a angei me ren ruofoch achipw seni ewe nenien kek asor;
7 Iwe a wata won awei, me a apasa: Nengeni, ei a fen attapa tunnawom; iwe om angangangaw a musono, iwe tipisum a nimochuno.
8 Ua pwan rongorong mongungun ewe Samon, a apasa: Ion upwe tinano, me ion epwe feino fan itach? Mwirin ua apasa: Ngang iei; tinieino.
9 Iwe a apasa: Feino me ereni ekkei aramas—Oupwe ennetin rongorong, nge rese weweiti; me oupwe ennetin kuna, nge rese eteneki.
10 Fori netipen ekkei aramas ar resap memef, me fori seninger repwe pung, me achunnano meser—pwe resap kuna ren meser, me rongorong ren seninger, me weweiti ren netiper, me repwe kun seni mi ngaw me repwe chikar.
11 Mwirin ua apasa: Samon, ifa taman? Iwe a apasa: Tori an ekkewe teninimw repwe tano esap wor masower, me ekkewe imw esap wor aramas non, me ewe fonu epwe unusen ponnuno;
12 Iwe ewe Samon a fen asueno aramas towaw, pun epwe wor ew angangen nikitano mi watte nukanapen ewe fonu.
13 Nge epwe chok wor ew ne engonun, iwe repwe niwinsefan, me repwe anieno, usun efoch ira teil, me usun efoch oak ewe auchean kinikinin mi nom non ir nupwen ra amoratiw cheer kewe; pwe mwirimwirin we mi fel epwe ina auchean kinikinin we.