1 Pun nengeni, ewe Samon, ewe Samonun Mwicheichen Aramas, a angeiano seni Jerusalem, me seni Judah, ewe nongonong me apinukunuk, unusen ewe apinukunukun pinewa, me unusen ewe nongonongen konik—

2 Ewe mwan mi napanap, me ewe mwanin maun, ewe sou apung, me ewe soufos, me ewe mi tipachem, me ewe chon nom;

3 Ewe kaptinin nime, me ewe mwan mi sufon, me ewe chon aninis, me ewe chon fana mettoch mi angoch, me ewe sou kapas mi sinenap.

4 Iwe upwe ngeni ir semirit pwe repwe nour kewe prince, me monukon repwe nemenem wor.

5 Iwe ekkewe aramas repwe riaffou, emon me emon meinisin seni pwan emon, iwe emon me emon seni chon orun; ewe semirit epwe anapanapa inisin non namanam tekia ngeni ewe chon nom, iwe ewe ngaw ngeni ewe mi sufon.

6 Nupwen emon mwan epwe kamwochuno pwin we me non imwen seman we, me epwe apasa: En a wor ufom, kopwe nöum chon nemenem, iwe kosap mut ngeni ei tatakis epwe feito fan poum—

7 Non ena ran i epwe akkapon, epwe apasa: Usap emon chon echikar; pun non imwei ese wor pinewa ika uf; kosap foriei ai upwe emon chon nemenemen ekkewe aramas.

8 Pun Jerusalem a tano, me Judah a turutiw, pokiten channawer me ar kewe foffor ra ungeni ewe Samon, ra asonga ekkewe mesen an ning.

9 Ewe nikinikin mesemeser a pwarata usur, me a affatano ar tipis pwe ra usun chok Sodom, iwe rese tongeni opano. Riaffou ngeni ngunur, pun ra niwini ngeni pwisin ir met mi ngaw!

10 Apasa ngeni ekkewe mi tupwon pwe mi öch rer; pun repwe mwongo ewe foun iran ar kewe foffor.

11 Riaffou ngeni ekkewe mi ngaw, pun repwe mano non pekin ngun; pun niwinin pour kewe epwe nonnom wor!

12 Iwe nei aramas, semirit ra nour chon ariaffou, iwe fefin ra wisen nemenem wor. O nei aramas, ir ekkewe ra nemeni kemi ra echimwakemi pwe oupwe mwanino me atai wenewenen ami kewe aan.

13 Ewe Samon a uta pwe epwe tingor, me a foffor pwe epwe apungu ekkewe aramas.

14 Ewe Samon epwe poputa ne kapung fiti ekkewe chon nom seni noun kewe aramas me ekkewe prince seni ikewe; pun oua fen anieno ewe ataken kreip me angeiano ren pochokun pisekin ekkewe mi woungaw non imwemi kewe.

15 Met oua mochen? Oua opuni nei aramas ngeni tatakisitiw, me wusi mesen ekkewe mi woungaw, anon ewe Samon Koten Mwicheich.

16 Soposopono, ewe Samon a apasa: Pokiten ekkewe fopun seni Zion ra sikesik, me fetan fiti awuunen uwer me sikepwachen meser, fetan me nuenuen fetan nupwen ra feino, me fori ew tikitik ren pecher—

17 Iei minne ewe Samon epwe wichir ren ew karakar ne mokuren ekkewe fopun seni Zion, iwe ewe Samon epwe pwarano pekin inisir kewe mi mwonono.

18 Non ena ran ewe Samon epwe angeiano ningen nour ekkewe tikitikin fouten inis, me pwonupwonun mokur, me ekkewe foukukumosun fouten inis usun napanapen ewe maram;

19 Ekkewe senimecha me ekkewe naana, me ekkewe mangakun mokur;

20 Ekkewe akkaw, me ekkewe fouten peche, me ekkewe fofon chamwer, me ekkewe porun nee, me ekkewe iering;

21 Ekkewe ring, me ekkewe enningen pwot;

22 Ekkewe uf mi uf nikkesiwin, me ekkewe pinu, me ekkewe pwonupwonun mokur, me ekkewe arurun mokur;

23 Ekkewe kinassin ourir, me ekkewe mangaku mi pwetete, ekkewe pwonupwonun mokur, me ekkewe nikatupon.

24 Iwe ewe fansoun epwe feito, me nukun pongarangar epwe wor pongaw; iwe me nukun echo noponopa, echo kamwekis; iwe me nukun nikinikochun kokkotun mokur, panneno; iwe me nukun echo fouten neup, echo pwonupwonun mangakun netipeta; kar me nukun nioch.

25 Noum kewe mwan repwe turutiw me ren ewe ketinas me noum kewe mi pochokun non ewe maun.

26 Iwe an kewe tit repwe noninen me netipeta; iwe epwe ponnuno, me epwe mwot won ewe puun.