Pukfel
2 Nifai 14


Sopun 14

Zion me noun kewe fopun repwe ngaseno me nimenimoch non ewe ranin menenium—Anonno ngeni Isaiah 4. Arap ngeni 559–545 Ier Mwen Kraist.

1 Iwe non ena ran, fumon fefin repwe kamwochuno emon mwan, repwe apasa: Am aupwe ani pwisin anem pinewa, me ufouf pwisin ufem; nge mut ngenikem am aupwe eiteit ngeni itom pwe epwe awesano am assaw.

2 Non ena ran ewe panen ewe Samon epwene ningoch me amwarar; foun iran ewe puun epwe echipwer me ning ngeni ir ekkewe ra tiweno seni Israel.

3 Iwe ewe fansoun epwe feito, ir ekkewe ra nometiw non Zion me nonnom non Jerusalem repwe fel, emon me emon a mak me nein ekkewe mi manau non Jerusalem—

4 Nupwen ewe Samon epwe tonueno nimengawen ekkewe fopun seni Zion, me epwe enimochuono chan Jerusalem seni nukanapan we me ren ewe ngunun kapung me pwan ren ewe ngunun kar.

5 Iwe ewe Samon epwe forata won meinisin nenien nonnom non chukun Zion, me won an kewe mwicheichen aramas, ew kuchu me otuot fansoun ran me ewe saramen ew ekkei mi ngetenget fansoun pwin; pun won ningen Zion meinisin epwe ew eppet.

6 Iwe epwe wor ew imw pwe epwe ew chuno non fansoun ran seni ewe pwichikar, me epwe ew nenien tumun, me ew nenien asoso seni monumon me seni pungun ran.