1 Ny ^aloza mitatao amin’i ^bBabylona araka ny nahitan’i Isaia zanakalahin’i Amoza azy.

2 Manangàna ianareo ^afaneva eo amin’ny tendrombohitra avo, manandrata feo aminy, ^bhofay tanana izy hidirany amin’ny vavahadin’andriana.

3 Izaho efa nandidy ireo ^anohamasiniko, efa niantso koa ireo maheriko Aho, satria ny fahatezerako dia tsy mba amin’ireo izay miravoravo noho ny fahamboniako.

4 Ny horakoraky ny valalabemandry any an-tendrombohitra dia toy ny an’ny vahoaka be, dia horakoraka mirohondrohon’ireo ^afanjakan’ny firenena miara-^btafavory; misafo ny miaramila hiady ny Tompon’ny Maro.

5 Avy any an-tany lavitra ireo, avy any am-paravodilanitra, eny, ny Tompo sy ny fiadian’ny fahatezerany mba handrava ny tany manontolo.

6 Midradradradrà ianareo fa efa antomotra ny andron’ny Tompo; ho tonga toy ny fandravana avy any amin’ny Tsitoha izany.

7 Koa hivalaketraka ny tanana rehetra, ho kivy ny fon’ny olona tsirairay;

8 Ary hatahotra izy; ho azon’ny fanaintainana sy ny alahelo izy; samy ho talanjona izy ka hifampijery; ho toy ny lelafo ny tarehiny.

9 Indro, avy ny andron’ny Tompo, dia fahasiahana sy fahatezerana ary fahavinirana mahamay mba hampanjary ny tany ho aolo; dia ^ahamongotra ny mpanota eo aminy Izy.

10 Fa na ny kintan’ny lanitra na ny telonohorefy dia tsy hanome ny hazavany; ny ^amasoandro hohamaizinina amin’ny fiposahany, ary ny volana tsy hampamiratra ny hazavany.

11 Ary Izaho ^ahanafay izao tontolo izao noho ny faharatsiana ary ny olon-dratsy noho ny helony; Izaho hampitsahatra ny fianjonanjon’ny ^bmpiavonavona ary haetriko ny fanambonian-tenan’ny mpampitahotra.

12 Hataoko sarobidy noho ny volamena voadio ny ^aolona; ho saro-tadiavina noho ny volamena avy any Ofira izy.

13 Koa Izaho hanozongozona ny lanitra, ary ^ahoesorina amin’ny toerany ny tany noho ny fahatezeran’ny Tompon’ny Maro, ary amin’ny andron’ny fahatezerany mahamay izany.

14 Ary ho tahaka ny gazela hazaina izy sy ho tahaka ny ondry tsy misy mpanangona; dia samy hiverina any amin’ny vahoakany avy ny tsirairay ary samy handositra hankany amin’ny taniny avy ny olona tsirairay.

15 Izay rehetra miavonavona dia hotrobarana; eny, ary izay rehetra mikambana amin’ny olon-dratsy dia halavo amin-tsabatra.

16 Homontsamontsanina eo imasony ny zanany; hobaboina ny tranony ary hosavihina ny vadiny.

17 Indro, hamporisihiko hamely azy ny Mediana izay tsy miraika amin’ny volafotsy na volamena sady tsy finaritra amin’ireny.

18 Hanamontsana ny zatovolahiny koa ny tsipikany; ary tsy hamindrany fo izay naloaky ny kibony; tsy hiantran’ny masony ny zaza.

19 Ary Babylona, ilay reharehan’ny fanjakana, ilay ^aravaky ny hatsarana ho an’ny Kaldeana, dia ho tahaka an’i ^bSodoma sy i Gomora izay noravan’ Andriamanitra.

20 ^aTsy honenana mandrakizay izy sady tsy hitoetra aminy ny taranaka fara mandimby: tsy hanangana lay ao ny Arabiana; na hampandry ny ondriny ao ny mpiandry ondry.

21 Fa ny ^abibidia any an’efitra kosa no hitoetra ao; ary ho feno biby manjonitra ny tranony; ka honina ao ny vorondolo, ary hifalihavanja ao ny ^bosidia.

22 Ary hinaonaona ao amin’ny ^atranony aolo ireo bibidian’ny nosy ary ao an-dapany mahafinaritra ny ^bamboadia; ary antomotra ny hahatongavan’ny fotoany ka tsy hohalavaina ny androny. Fa Izaho handrava azy faingana tokoa; eny, hamindra fo amin’ny oloko Aho, fa hofongorana kosa ny olon-dratsy.