1 Pea ko ʻeni ko au, Sēkope, ʻoku ou toe lea kiate kimoutolu, ʻe hoku kāinga ʻofeina, ki he ^avaʻa māʻoniʻoni ʻa ia kuó u lau ki aí.

2 He vakai, ko e ngaahi ^atalaʻofa kuo tau maʻú ko e ngaahi talaʻofa ia kiate kitautolu ʻo fakatatau ki he kakanó; ko ia, hangē ko ia kuo fakahā mai kiate aú ʻe ʻauha ʻi he kakanó ʻa e tokolahi ʻo hotau hakó ko e tupu mei he taʻetuí, ka neongo iá, ʻe ʻaloʻofa pē ʻa e ʻOtuá ki he tokolahi; pea ʻe toe fakafoki mai ʻa ʻetau fānaú, koeʻuhi ke nau maʻu ʻa e meʻa ko ia ʻe ʻomi ai kiate kinautolu ʻa e ʻilo moʻoni ki honau Huhuʻí.

3 Ko ia, hangē ko ʻeku tala kiate kimoutolú, ʻoku taau mo Kalaisi—he naʻe tala mai kiate au ʻanepō ʻe he ^aʻāngeló ko hono huafá ia—ke ne ^bhāʻele mai ki he kau Siú, ʻiate kinautolu ʻa ia ko e konga angakovi taha ʻo e kakai ʻo e māmaní; pea te nau ^ckalusefai ia—he naʻe ʻafioʻi ʻe hotau ʻOtuá kuo pau ke hoko ia, pea ʻoku ʻikai mo ha puleʻanga kehe ʻi he māmaní te nau ^dkalusefai ʻa honau ^eʻOtuá.

4 He ka ne fai ʻa e ngaahi ^amana lalahí ʻi ha ngaahi puleʻanga kehe, pehē te nau fakatomala, pea ʻiloʻi ko honau ʻOtua ia.

5 Ka ko e meʻa ʻi he ngaahi ^angāue fakataulaʻeiki kākā mo e ngaahi angahalá ʻa kinautolu ʻoku ʻi Selūsalemá te nau fakakekeva honau kiá ʻo fakaʻikaiʻi ia, pea ʻe kalusefai ai.

6 Ko ia, ko e meʻa ʻi heʻenau ngaahi angahalá, ʻe hoko mai kiate kinautolu ʻa e ngaahi fakaʻauha, mo e ngaahi honge mo e ngaahi mahaki fakaʻauha mo e ngaahi lilingi toto; pea ʻilonga ʻa kinautolu ʻe ʻikai ʻauhá ʻe ^afakamovetevete ʻa kinautolu ʻi he ngaahi puleʻanga kotoa pē.

7 Kae vakai, ʻoku folofola ʻe he ^aʻEiki ko e ʻOtuá: ^bʻO ka hokosia ʻa e ʻaho ʻa ia te nau tui ai kiate au, ko au ko Kalaisi, kuó u fuakava mo ʻenau ngaahi tamaí ke toki fakafoki mai ʻa kinautolu ʻi he kakanó, ʻi he māmaní, ki he ngaahi fonua ʻo honau tofiʻá.

8 Pea ʻe hoko ʻo pehē ʻe ^atānaki mai ʻa kinautolu hili ʻenau nofo movetevete fuoloá, mei he ngaahi ^bmotu ʻo e tahí, pea mei he tapa ʻe fā ʻo e māmaní; pea ʻe lahi ʻi hoku ʻaó ʻa e ngaahi puleʻanga ʻo e kau Senitailé, ʻoku folofola ʻe he ʻOtuá, ko e meʻa ʻi heʻenau ^cʻave ʻa kinautolu ki he ngaahi fonua ʻo honau tofiʻá.

9 ^aʻIo, ʻe hoko ʻa e ngaahi tuʻi ʻo e kau Senitailé ʻo hangē ha ngaahi tamai tauhi kiate kinautolu, pea ʻe hoko ʻa honau ngaahi kuiní ʻo hangē ha ngaahi faʻē tauhi kiate kinautolu; ko ia, ʻoku mahuʻinga ʻa e ngaahi ^btalaʻofa ʻa e ʻEikí ki he kau Senitailé, he kuó ne folofola ʻaki ia, pea ko hai ʻoku lava ʻo fakakikihiʻi ia?

10 Kae vakai, naʻe folofola ʻe he ʻOtuá, ʻe hoko ʻa e fonuá ni ko ha fonua ʻo ho tofiʻa, pea ʻe monūʻia ʻa e kau ^aSenitailé ʻi he funga ʻo e fonuá.

11 Pea ʻe hoko ʻa e fonuá ni ko ha fonua ʻo e ^atauʻatāina ki he kau Senitailé, pea ʻe ʻikai ke ʻi ai ha ngaahi ^btuʻi ʻi he funga ʻo e fonuá, ʻa ia ʻe fokotuʻu hake ki he kau Senitailé.

12 Pea te u ngaohi ʻa e fonuá ni ke mālohi ki he ngaahi puleʻanga kehe kotoa pē.

13 Pea ʻilonga ia ʻoku ^atauʻi ʻa Saioné te ne ^bʻauha, ʻoku folofola ʻe he ʻOtuá.

14 He ʻilonga ia ʻe fokotuʻu hake ha tuʻi kiate aú te ne ʻauha, he ko au ko e ʻEikí, ko e ^atuʻi ʻo e langí, te u hoko ko honau tuʻí, pea te u hoko ko e ^bmaama kiate kinautolu ʻo taʻengata ʻa ia ʻoku nau fanongo ki heʻeku ngaahi leá.

15 Ko ia, koeʻuhi ko ʻeni, ke fakahoko ʻa ʻeku ngaahi ^afuakava ʻa ia kuó u fai ki he fānau ʻa e tangatá, ʻa ia te u fai maʻanautolu lolotonga ʻa ʻenau ʻi he kakanó, ko ia ʻoku totonu ai ke u fakaʻauha ʻa e ngaahi ngāue ^bfufū ʻo e ^cfakapoʻulí, mo e ngaahi fakapoó, pea mo e ngaahi meʻa fakalieliá.

16 Ko ia, ʻilonga ia ʻoku tauʻi ʻa ^aSaioné, ʻa e Siú mo e Senitailé fakatouʻosi, ʻa e pōpulá mo e tauʻatāiná fakatouʻosi, ʻa e tangatá mo e fefiné fakatouʻosi, ʻe ʻauha ia; he ko ^bkinautolu ko e kau feʻauaki ia ʻo e māmaní kotoa pē; he ʻilonga ʻa ^ckinautolu ʻoku ^dʻikai kau mo aú ʻoku nau ^efakafili kiate au, ʻoku folofola ʻe hotau ʻOtuá.

17 He te u ^afakahoko ʻeku ngaahi talaʻofa ʻa ia kuó u fai ki he fānau ʻa e tangatá, ʻa ia te u fai maʻanautolu lolotonga ʻa ʻenau ʻi he kakanó—

18 Ko ia, ʻe hoku kāinga ʻofeina, ʻoku folofola peheni ʻe hotau ʻOtuá: Te u fakamamahiʻi ho hakó ʻi he nima ʻo e kau Senitailé; ka neongo iá, te u fakamolū ʻa e loto ʻo e kau ^aSenitailé, koeʻuhi ke nau hangē ko ha tamai kiate kinautolu; ko ia, ʻe ^btāpuakiʻi ai ʻa e kau Senitailé, pea ^clau fakataha ʻa kinautolu mo e fale ʻo ʻIsilelí.

19 Ko ia, te u ^afakatapui ʻa e fonuá ni maʻa ho hakó, mo kinautolu ʻe kau fakataha mo ho hakó, ʻo taʻengata, ke hoko ko e fonua ʻo honau tofiʻá; he ko ha fonua kuo fili ia, ʻoku folofola ʻe he ʻOtuá, ʻo mahuʻinga ange ʻi he ngaahi fonua kehe kotoa pē; ko ia ʻoku ou loto ke hū kiate au ʻa e kakai fulipē ʻa ia ʻe nofo ʻi he fonuá, ʻoku folofola ʻe he ʻOtuá.

20 Pea ko ʻeni, ʻe hoku kāinga ʻofeina, ko e meʻa ʻi he foaki mai kiate kitautolu ʻe hotau ʻOtua ʻaloʻofá ʻa e fuʻu ʻilo lahi pehē ki he ngaahi meʻa ní, ko ia tau manatu kiate ia, pea liʻaki ʻa ʻetau ngaahi angahalá, pea ʻikai punou hifo hotau ʻulú, he kuo ʻikai ke liʻaki ʻa kitautolu; neongo iá kuo ^akapusi atu ʻa kitautolu mei he fonua ʻo hotau tofiʻá; kā kuo tataki ʻa kitautolu ki ha fonua ^blelei ange, he kuo ngaohi ʻe he ʻEikí ʻa e tahí ko hotau ^chala, pea ʻoku tau ʻi ha ^dmotu ʻo e tahí.

21 Kā ʻoku lalahi ʻa e ngaahi talaʻofa ʻa e ʻEikí kiate kinautolu ʻa ia ʻoku nau ʻi he ngaahi ^amotu ʻo e tahí; ko ia, koeʻuhi ʻoku lau ia ki he ngaahi motu, ʻoku pau ʻoku toe ʻi ai mo ha ngaahi motu kehe, pea ʻoku nofoʻi foki ia ʻe hotau kāinga.

22 He vakai, kuo ^atataki atu ʻe he ʻEiki ko e ʻOtuá mei he taimi ki he taimi ha niʻihi mei he fale ʻo ʻIsilelí ʻo fakatatau ki hono finangaló mo ʻene faʻitelihá. Pea ko ʻeni, vakai, ʻoku manatuʻi ʻe he ʻEikí ʻa kinautolu kotoa pē kuo fakamavahe atú, ko ia ʻokú ne manatuʻi mo kitautolu foki.

23 Ko ia, fakafiefiaʻi homou lotó, pea manatu ʻoku mou ^atauʻatāina ke ^bngāue maʻamoutolu pē—ke ^cfili ʻa e hala ʻo e mate taʻengatá pe ko e hala ʻo e moʻui taʻengatá.

24 Ko ia, ʻe hoku kāinga ʻofeina, fakalelei ʻa kimoutolu ki he finangalo ʻo e ʻOtuá, kae ʻikai ki he loto ʻo e tēvoló pea mo e kakanó; pea manatu, ʻo ka ʻosi hoʻomou fakalelei ʻa kimoutolu ki he finangalo ʻo e ʻOtuá, ʻoku ngata pea fou ʻi he ^aʻaloʻofa pē ʻa e ʻOtuá ʻa homou ^bfakamoʻuí.

25 Ko ia, ʻofa ke fokotuʻu hake ʻa kimoutolu ʻe he ʻOtuá mei he maté ʻi he mālohi ʻo e toetuʻú, kae ʻumaʻā mei he mate taʻengatá ʻi he mālohi ʻo e ^afakaleleí, koeʻuhi ke maʻu ʻa kimoutolu ʻi he puleʻanga taʻengata ʻo e ʻOtuá, koeʻuhi ke mou fakaongoongoleleiʻi ia tuʻunga ʻi he ʻaloʻofa fakalangí. ʻĒmeni.