1. I akaputuputu ana oki matou i te au tu ua katoatoa, te au tu ua sitona e to te au tu ua rakau katoa.

2. I te noo anga o toku metua ki te metepara, kua tuatua aia kia matou, na ko maira; i na, kua moe au i tetai moemoeā, koia oki, kua kite au i tetai orama.

3. E i na, no te au mea taku i kite, i raukaʼi iaku te mataora i te Atu ia Niphai raua ko Samu, no te mea, te manako nei au e, ka akaoraia raua e tetai pae o ta raua uanga.

4. Ina ra, e mataku maata toku ia korua, e Lamana, e Lemuela, no te mea, i manako ana au e, kua kite au i roto i taku moemoea i tetai metepara poiri e te rikarika ra.

5. E kua kite akera au i tetai tangata e kakau teatea oki tona, kua aere mai aia e kua tu ki mua i toku aroaro.

6. Kua tuatua maira aia kiaku, e kua akaue mai oki kia aru atu au iaia.

7. Te aru ra au iaia kite akera au e, tei roto au i te ngai poiri e te rikarika maata ra.

8. E kia roa au i te aere anga i roto i te poiri, e kua pou te au ora e manganui, kua akamata iora au i te pure ki te Atu kia aroa mai aia iaku i tona aroa akaperepere maata ra.

9. E oti akera au i te pure, kite iora au i tetai aua maata e te aano.

10. E kua kite katoa atura au i tetai pu rakau; e e mea inangaroia oki te ua o te reira, kia rauka te mataora i te tangata.

11. Aere atura au e kua rave maira i te kai no runga mai i te reira, e kite iora au e, e mea reka rava atu te reira i to te au mea taku i tongi ana. E kua kite katoa au e, e teatea ake oki te ua o taua rakau ra i to te au mea taku i kite ana.

12. E i toku kai anga i taua ua ra, kua ki rava toku ngakau i te rekareka maata, inangaro iora au kia kai katoa toku kopu tangata i to te reira kai; kua kite oki au e, e meitaki ake to te reira i to te au kai katoatoa ra.

13. I toku akara aere anga atu kia kite me ka kite paa au i toku kopu tangata, kua kite au i tetai kauvai; i te tae anga na te pae i taua pu rakau taku i kai ana.

14. Akara atura au, kia kite au i te ngai no reira mai taua vai ra; e akara atura au i te akamataanga o taua kauvai ra i tetai ngai i te pae ua ake; e kite atura au i to kotou metua vaine ia Saraia, e Samu, e Niphai oki, i te tu ua anga, kare ratou i kite i te ngai ta ratou ka aere.

15. Kua kamo atura au ia ratou, e kua kapiki atura au kia ratou i te reo maata kia aere mai ratou kiaku, e kia kai i te ua ra, ko te ua reka rava i te au ua katoatoa ra.

16. Kua aere maira ratou, kai iora i taua ua ra.

17. Kua inangaro katoa oki au kia aere katoa mai a Lamana raua ko Lemuela kia kai i taua ua ra, e kua akara atura toku mata i te akamataanga o taua kauvai ra kia kite katoa au ia raua.

18. E kua kite atura au ia raua, kare ra raua i aere mai kiaku kia kai i te ua ra.

19. Kite akera au i tetai auri na te pae i te kauvai e tae rava mai ki te pu rakau, te ngai i tu ei au.

20. Kua kite katoa atura au i tetai mataara meangiti e te tika na te pae oki i te auri ra, e tae ua mai ki te pu rakau e ki te ngai i tu ei au, e kua aere katoa atura te reira na te pupuianga mai o te kauvai e tae rava atu ki roto i tetai aua maata e te aano, mei te mea ra e, e ao ïa.

21. Kua kite atura au i te au pupu tangata e manganui e maata ratou tei tauta kia rauka ia ratou te mataara e tae mai ei ki pu rakau te ngai i tu ei au.

22. I aere maira ratou, e kua akamata ratou i te aere na te mataara e tae mai ei ki te pu rakau.

23. Tupu akera te poiri tangotango ra, e te au tangata i te tamata anga i te aere na taua mataara ra, kua ngaro te mataara ia ratou, e kua oripu ua ratou, e ngaro rava atura.

24. E kua kite atura au i tetai au tangata i te aere anga mai ma te tauta pakari kia mou i te ope o taua auri ra, na roto mai oki ratou i te poiri i te tauta anga kia mou tikai ki te auri, e tae rava maira ratou ki te pu rakau, kai iora i te ua no runga i te pu rakau.

25. E kai akera ratou i te ua o taua pu rakau ra, kua akarakara to ratou mata, mei te mea, kua akama ratou.

26. Akara katoa atura toku mata ki tetai tua mai o te kauvai, e kua kite atura au i tetai are maatamaata e te aano, e kua tu taua are ra mei te mea e, tei roto ïa i te mareva teitei ki runga i te enua.

27. E kua ki i te tangata, te tangata pakari e te aronga mapu, te tane e te vaine, e mea manea rava oki to ratou kakau; e te aviri maira, e te toutou maira oki ratou i te mangamanga rima ki te au tangata tei aere mai e tei kai i taua ua ra.

28. E kia kai ratou i taua ua ra, kua akama ratou, no te tangata i te aviri mai ia ratou ra, e kua aere atura ratou ki te au mataara tau kore e ngaro atura.

29. E teianei, kare oki au, ko Niphai, e tuatua i te au tuatua katoa a toku metua.

30. Kia akapoto ra i te tata anga, i na, kua kite aia i tetai atu au pupu tangata i te tauta anga mai e kia aere mai ratou ki te ope o taua auri ra; e kua aere maira ratou ma te mou meitaki ki taua auri ra, e kia tae rava maira ratou ki te pu rakau kua inga iora ratou ki raro, kai iora i te ua o te pu rakau.

31. E kua kite atu aia i tetai urupu maata i te kimikimi anga i te mataara e tae atu ei ratou ki taua are maata e te aano ra.

32. E manganui tei maremo i roto i te vai puipui e e manganui oki tei ngaro ke atu iaia i te aere anga atu i te au mataara tukeke.

33. E manganui oki te tangata tei tomo ki roto i taua are tuke ra. E tomo akera ratou ki roto i taua are ra, kua aviri maira ratou i te tangata katoatoa oki tei kai i taua ua ra, kare ra matou i akono ua atu ia ratou ra.

34. Te tuatua teia a toku metua: Ko te aronga katoa tei akono ia ratou kua ngaro atu.

35. E kare ra a Lamana raua ko Lemuela i kai i taua ua ra, i na toku metuaʼi.

36. E oti akera toku metua i te akakite mai i te au tuatua o tana moemoeā, koia oki tana orama, no te mea e maata oki te reira, kua na ko maira aia kia matou, no te au mea tana i kite i roto i tana orama ra, kua tangi rava aia ia Lamana e ia Lemuela; kua mataku oki aia ko te tipuia aea raua mei mua atu i te aroaro o te Atu ra.

37. Kua apii atura aia ia raua ma aroa katoa o te metua akaperepere kia akono raua i tana tuatua, e peneiake ka aroa mai te Atu ia raua, e kare oki aia e tuaru ia raua ki vao; i na, kua ako atura toku metua ia raua.

38. E oti akera iaia te ako atu ia raua e te totou oki kia raua i te au mea e manganui, kua akaue atura aia ia raua kia akono i te au akaueanga a te Atu ra; e kua akaoti iora aia i reira i te tuatua anga kia raua ra.