1. E tatau atura au, ko Niphai, i taua au mea i kotikotiia ki rungao i te au papa veo ra, kua aere maira toku nga tuakana kiaku, e kua na ko maira kiaku, Eaa te aiteanga o te au mea taau i tatau akenei? I na, e kitea ainei te reira na roto i te au mea o te Vaerua ra, ko te ka tupu oki na roto i te Vaerua, e kare na roto i ta te kopapa nei?

2. Kua karanga atura au, ko Niphai, kia raua, i na, kua akakiteia ki te peroveta na roto i te reo o te Vaerua ra; na roto oki i te Vaerua i akakiteia mai ei ki te au peroveta i te au mea katoatoa te ka tae mai ki runga i te tamariki a te tangata i te kopapa nei.

3. No reira, te au mea taku i tatau akenei, ko te au mea ïa no te pae kopapa e no te pae vaerua katoa oki; i te akaraanga, te vai atura te tuatau e akapueurikirikiiaʼi te ngutuare o Iseraela ki runga i te au enua katoa, e ki roto i te au basileia katoatoa.

4. E i na, e manganui te aronga tei ngaro to ratou kite i te aronga tei noo ki Ierusalema. I na, kua aratakiia atu te pae maata o te au kopu katoatoa, e kua pararauare ratou ki te au enua o te moana; e te ngai i nooia e ratou, kare oki tatou i kite; kua kite ua tatou e, kua arataki keia atu ratou.

5. E i muri ake i to ratou ra aratakiangaia atu, kua totouia ana teianei au mea kia ratou, e ki te tangata katoatoa oki te ka aratakiia atu e ngaro atu no Tei Tapu i Iseraela nei, e ka akaketaketa oki ratou i to ratou ngakau iaia; e ka akapueurikirikiia ratou ki roto i te au enua katoatoa, e ka makitakitaia oki e te au tangata ravarai.

6. Kareka ra, kia oti ratou i te utuutuia e te au Etene, e kia akatika mai te Atu i tona rima ki runga i te au Etene ra, e kia akariro aia ia ratou ei reva, e kia apainaia ta ratou au tamariki ki roto i to ratou rima, e kia apainaia oki te au tamaine ki runga i to ratou ra pakuivi, i na, ko to te pae kopapa teia au mea e tuatuaia nei; ko te reira ïa te koreromotu a te Atu ki to tatou ra au metua, e kia tatou no te au rā ki mua, e no to tatou au taeake oki no te ngutuare o Iseraela.

7. E ko teia te aiteanga, te tae maira te rā e akapueurikirikiiaʼi, e taakamaiaʼi te ngutuare katoa o Iseraela ra; ei reira e akatupu ei te Atu ra ko te Atua i tetai iti tangata mana maata i rotopu i te au Etene ra, e ki runga oki i teianei enua, e na ratou oki e akapueurikiriki i to tatou ra uanga.

8. E kia akapueurikirikiia ta tatou ra uanga e akatupu ei te Atu ra ko te Atua i tetai angaanga umere maata i rotopu i te au Etene ra, e ka riro ïa ei puapinga maata ki to tatou ra uanga; e no reira kua akatauia te reira ki to ratou utuutu angaia e te au Etene ra, e i te apai angaia ki roto i to ratou rima e ki runga i to ratou pakuivi ra.

9. E riro katoa te reira ei puapinga no te au Etene ra, e kare ra no te au Etene anake, no te ngutuare katoatoa o Iseraela, i te akakite anga atu i te au koreromotu a te Metua o te rangi kia Aberahama, i te na ko anga, Ei koe e meitaki ei te au iti tangata katoatoa o te ao nei.

10. E kua inangaro au, e toku nga tuakana, kia kite korua e, kare te au kopu tangata katoatoa o te ao nei e akameitakiia, mari ra, kia akakite ua mai aia i tona rima ki mua i te aroaro o te au enua katoatoa ra.

11. No reira i akamataʼi te Atu ra ko te Atua, i te akakite ua mai i tona rima ki mua i te aroaro o to te au enua katoatoa, i te akatupuanga i tana au koreromotou e tana evangelia ki te ngutuare o Iseraela ra.

12. Ka arataki akaou mai aia ia ratou mei te tuikaaanga mai, e ka akaputuputuia ratou ki to ratou enua ipukarea ra; ka aratakiia mai ratou mei roto i te ngai manako koreia e mei roto mai i te poiri; e ka kite ratou e, ko te Atu, ko to ratou Akaora e to ratou Ora ïa, ko Tei Mana Maata i Iseraela ra.

13. Ka iri oki te toto o taua ekalesia maata e te viivii ra ki runga i tona uaorai upoko; e tamaki oki ratou ia ratou uaorai; e ka topa oki te koke i to ratou uaorai rima ki runga i to ratou uaorai upoko, e ka kona oki ratou i to ratou uaorai toto.

14. E te au enua katoa e tamaki mai ia koe ra, e te ngutuare o Iseraela e, ka ariu mai ia ratou tetai ki tetai, e ka topa ratou ki raro i te vaarua ta ratou i ko ei puereere no te au tangata o te Atu ra. E te tangata katoatoa e tamaki mai ia Ziona ra, ka pou ia ratou, e taua vaine akaturi maata ra tei taruri ke i te au ravenga tika o te Atu ra, koia oki, taua ekalesia maata e te viivii ra, ka turori aia e ka topa ki raro i te one e ka pueurikiriki rava ïa.

15. E i na oki, te na ko maira te peroveta, te vaitata rava nei te tuatau e akakoreiaʼi to Satani mana ki runga i te ngakau o te tamariki a te tangata nei; te vaitata mai nei oki te tuatau e riro ei te aronga akaparau e tei rave i te tuatua tika kore ra, mei te teita; e ka tae mai oki te rā e kā ei ratou i te ai.

16. Te vaitata mai nei oki te tuatau e riringiia mai ei te ki o te riri o te Atua ki runga i te au tamariki katoa a te tangata nei, no te mea kare aia e akatika kia akapouia te aronga tuatua tika e te aronga tuatua tika kore ra.

17. E akaora ra aia i te aronga tuatua tika ki tona ra mana, e ka tika oki iaia i te riringi atu i te ki o tona ra riri, kia akaoraia te aronga tuatua tika, e pou ra oki to ratou au enemi i te ai. E tenana, Eiaa te aronga tuatua tika e mataku, te na ko maira te peroveta, ka akaoraia ratou mei te mea e na roto ïa i te ai.

18. I na, e toku nga tuakana, e tuatua atu au kia korua, te vaitata mai nei teianei au mea i te tupu e tikai; i na, ka tae mai te toto, e te ai, e te poiri e tikai, e ka tae mai oki ki runga i te tua o teianei enua, e ka tae mai oki ki runga i te tangata i te kopapa nei, mei te mea, ka akaketaketa ratou i to ratou ngakau ki Tei Tapu i Iseraela nei.

19. I na oki, kare e mate te aronga tuatua tika; ka tae mai oki te tuatau e tipu keia atu ei te aronga katoatoa tei tamaki mai ia Ziona ra.

20. Ka akateateamamao ra te Atu i tetai ravenga no tona ra iti tangata, i te akatikaanga mai i te au tuatua a te peroveta ra ko Mose, i te na ko anga mai e, E akatupu te Atu ra, to kotou Atua, i tetai peroveta no kotou mei iaku nei te tu; E akarongo oki kotou kiaia i te au mea katoatoa tana ka tuatua mai kia kotou, e te au tangata tei kore e akarongo i taua peroveta ra, ka tipu keia ia ratou mei te tangata nei.

21. E teianei, te akakite atu nei au, ko Niphai, kia korua e, ko taua peroveta ra i tuatuaia e Mose, ko Tei Tapu ïa i Iseraela nei; e no reira ka akava aia ma te tuatua tika.

22. E te aronga tuatua tika, kare o ratou tumu kia mataku, kare oki ratou e akautungaia; ko te basileia ra o te tiaporo, ko tei akatuia ki rotopu i te au tamariki a te tangata nei; e kua akatuia taua basileia ra ki rotopu i te au tangata i te kopapa nei.

23. I na te vaitata roa mai nei te tuatau e ko te au akonoanga e akatupuia kia rauka mai te moni, e tei akatupuia kia rauka te mana ki runga i te tangata nei, e tei akatupuia kia riro ei mea rongonui i mua i te mata o te ao nei, e tei kimi i te au inangaro tau kore o te kopapa nei, e te au mea o teianei ao, e tei rave oki i te au ara katoatoa, i na, ko ratou katoatoa, tei roto oki ratou i te basileia o te tiaporo ra, e tau ia ratou kia mataku, e kia ruketekete e kia ngaueue; ko ratou oki, te ka taakaakaia ki raro i te one pueu, e ko ratou oki te ka pou mei te teita ra; mei ta te peroveta i tuatua maira.

24. Te vaitata nei te tuatau e aratakiiaʼi te aronga tuatua tika ki runga mei te punua puakatoro e aratakiia ra, kia tutara oki Tei Tapu i Iseraela nei ma te au, e te mana, e te maroiroi e te kaka maata e tikai.

25. E ka akaputuputu mai aia i tana ra au tamariki mei ko mai i nga ope e ā o te ao nei; e nana oki e tatau i tana au mamoe, kua kite oki ratou iaia; e ka riro oki ei anana okotai e e tiaki okotai; e nana rai oki tana au mamoe e angai; e na roto oki iaia e raukaʼi te kai.

26. E no te tuatua tika a tona ra iti tangata, kua kore te mana o Satani, e no reira i kore ei aia e tukuia e ope ua atu te au mataiti e manganui; kare oki ona mana ki runga i te ngakau o te au tangata ra; te noo ra oki ratou ma te tuatua tika, e ka tutara oki Tei Tapu i Iseraela nei.

27. E teianei, i na, e tuatua atu au, ko Niphai, kia korua, ka tupu mai teianei au mea mei tei tau i ta te kopapa nei.

28. Ina ra, ka noo to te au enua katoatoa e to te au reo, e to te au kopu, e to te au iti tangata ma te au i roto i Tei Tapu ia Iseraela nei, mei te mea, e tataraara ratou.

29. E teianei, te akaoti nei au, ko Niphai, no te mea, kare e tika iaku kia tuatua ua atu rai i teianei no runga i teia au mea.

30. E tenana, e toku nga tuakana, ka inangaro au kia akamanako korua e, e tuatua mou te au mea i tataia ki rungao i te au papa veo ra; e te akakite mai nei te reira e, kia akono te tangata i te au akaueanga a te Atua ra e tikai.

31. No reira, auraka korua e manako e, ko au e ko toku metua, ko maua anake tei akakite mai e tei apii mai oki i te reira. Kia akono korua i te au akaueanga e tae ua atu ki te openga ra, ka ora korua i te rā openga ra. Koia ia. Amene.