1. E kua tuatua maira te angela kiaku, na ko maira, akara na! E akara atura au, kite iora au i te au enua e te au basileia e manganui.

2. E kua tuatua maira te angela kiaku, eaa taau e akara nei? E kua tuatua atura au, te kite nei au i te au enua e te au basileia e manganui.

3. E kua tuatua maira aia kiaku, ko te au enua e te au basileia ïa o te au Etene ra.

4. E kite atura au i te akatumuanga o tetai akonoanga maata i rotopu i te au basileia o te Etene ra.

5. E kua tuatua maira te angela kiaku, i na, te akatumuanga o tetai akonoanga viivii rava i to te au akonoanga katoatoa, ko tei ta i te aronga tapu o te Atua, e tei takinga kino ia ratou, e tei tapeka ia ratou ki raro, ka tapeka ia ratou ki te tapeka auri, e te arataki ia ratou ki raro i te tuikaaanga.

6. E kua akara atura au i taua ekalesia maata ra e te viivii ra; e kua kite atura au i te tiaporo, koia oki te tumu o te reira.

7. E kua akara katoa atura au i te auro, e te ario, e te tirika e te kakau muramura e te au tu kakau memeitaki katoatoa; e akara katoa atura au i te au vaine akaturi e manganui.

8. E kua tuatua maira te angela kiaku, na ko maira, E akara i te auro e te ario e te tirika e te kakau muramura e te au tu kakau oko maata, e te au vaine akaturi oki, ko te anoano ïa o taua ekalesia maata ra e te rikarika ra.

9. No te akangateitei a to te ao nei, i tamate ei ratou i te aronga tapu o te Atua, e e arataki atura ia ratou ki raro i te tuikaaanga.

10. Kua akara atura au, kite atura i te moana maata, e kua akataka ke atu te reira i te Etene e te uanga a toku nga tuakana.

11. E kua tuatua maira te angela kiaku, E akara ki te riri o te Atua, tei runga ïa i te uanga a toou ra nga tuakana.

12. E kua akara atura au, kite atura i tetai tangata i rotopu i te Etene tei akataka keia mei te uanga o toku nga tuakana i te moana maata ra; e akara atura au i te Vaerua o te Atua i te ekeanga mai ki raro e te akauru anga iaia; e kua aere atura aia na runga i te moana tae atura ki te uanga a toku nga tuakana i te enua taputou.

13. E kua akara atura au i te Vaerua o te Atua i te to anga ki runga i tetai atu au tangata o te Etene ra, e kua aere atu ratou mei roto atu i te tuikaaanga na runga i te moana maata.

14. E kua akara atura au i tetai au urupu tangata maata o te Etene ki runga i te enua taputou; e kua akara atura au i te riri o te Atua tei runga ïa i te uanga a toku nga tuakana. E kua akapueurikirikiia ratou ki mua i te au Etene, e kua taiaia.

15. E kua akara au i to te Atu Vaerua i runga i te Etene; E kua manuia oki ratou, e kua rauka ia ratou te enua ei ipukarea no ratou; e kua akara atura au e, e iti tangata teatea ratou e te purotu rava e te manea oki, mei toku iti tangata rai i mua ake i to ratou taiaia anga.

16. E kua akara au, ko Niphai, i te au Etene, ko tei aere maira mei roto i te tuikaaanga, e kua taakaaka iora ratou ia ratou uaorai ki mua i te aroaro o te Atu ra.

17. E kua akara atura au e kua akaputuputu te au Etene metua ki runga i te moana ki runga katoa i te enua ei tamaki kia ratou.

18. E kua akara atura au e, tei ia ratou te mana o te Atua, e tei runga oki te riri o te Atua ia ratou tei putuputu e tamaki kia ratou ra.

19. E kua akara atura au, ko Niphai, te au Etene tei aere atu mei roto i te tuikaaanga ra, kua akaoraia ratou e te mana o te Atua i te rima o te au enua katoatoa.

20. E kua akara atura au, ko Niphai, e kua manuia ratou i te enua; e kua akara au i tetai puka, e kua apai aereia te reira ki rotopu ia ratou ra.

21. E kua tuatua mai te angela kiaku, kua kite ainei koe i te aiteanga o taua puka ra?

22. E kua tuatua atura au kiaia, kare au i kite.

23. E kua tuatua mai aia, i na, no roto mai ïa i te vaa o te tangata ngati Iuda: E kua akara atura au ko Niphai i te reira; e kua tuatua maira aia kiaku, te puka taau e akara nei ko te papa tuatua ïa a te ngati Iuda, tei roto oki i reira te tataanga o te au koreromotu a te Atua tana i tuatua ki te ngutuare o Iseraela; e kua tataia oki te reira ki te au totou e manganui a te au peroveta tapu ra; e papa tuatua ïa mei tei kotikotiia ki runga i te au papa veo ra, mari ra, kua iti ïa; tei roto ra kua tataia te au koreromotu a te Atu tana i papau ki te ngutuare o Iseraela ra; e ka riro te reira ei puapinga maata ki te au Etene.

24. E kua tuatua maira te angela a te Atu kiaku, I akara ana koe e, no roto mai taua puka i te vaa o te tangata ngati Iuda ra; e kia tae mai te reira mei roto mai i te vaa o te tangata ngati Iuda, kua tataia ki te tuatua maramarama ua o te evangelia o te Mesia ta te au aposetolo tino ngauru ma rua i akakite mai, e kua akakite mai ratou mei tei tau i te tuatua mou i roto i te Punua Mamoe a te Atua ra.

25. I na, kua tae mai teia au mea, mei te ngati Iuda mai, ki te au Etene ma te viivii kore, mei tei tau i te tuatua mou i roto i te Atua.

26. E kia tae mai te reira mei te ngati Iuda ki te au Etene, na te rima o te au aposetolo tino ngauru ma rua a te Punua Mamoe, e akara atu koe ki te akatumuanga o tetai akonoanga maata e te viivii; e kua maata tona viivii i to te au akonoanga katoatoa: i na oki, kua kiriti ke atu ratou i tetai au tuatua marama pu ua e te puapinga maata mei roto mai i te evangelia a te Punua Mamoe; e kua kiriti ke katoa ratou i te au koreromotu e manganui a te Atu ra.

27. E kua pera ratou kia taruri ke i te au mataara tika o te Atua, e kia akaketaketa oki i te ngakau o te au tamariki a te tangata.

28. E teianei, I akara ana koe e, kia tae taua puka ra ki roto i te rima o taua akonoanga maata e te viivii, kua kiriti keia mei roto mai i taua puka ra tetai au mea marama ua e te puapinga maata e manganui; ko te puka oki ïa a te Punua Mamoe a te Atua.

29. E kia kiritiia atu taua au mea marama pu ua ra, e te puapinga maata, tae atura te reira ki te au enua katoatoa o te Etene; e kia tae te reira ki te au enua o te Etene ra na runga i te moana maata taau i akara ana i te au Etene i aere atu mei roto i te tuikaaanga ra; e kua kite atura koe e, no te au mea marama pu ua e te puapinga maata oki e manganui tei kiriti keia no roto i taua puka ra, e au mea marama ua ki te kite o te tamariki a te tangata; mei tei tau oki ki te marama i roto i te Punua Mamoe a te Atua ra; e no taua au mea tei kiriti keia mei roto i te evangelia a te Punua Mamoe ra, i turori ei te au tangata e manganui, e i na, kua mana maata a Satani ki runga ia ratou.

30. Kareka ra, kua kite atura koe e, kua aere atu te au Etene mei roto atu i te tuikaaanga, e kua akateiteiia ratou e te mana o te Atua ki runga i te au basileia katoa ra, i runga i te enua meitaki atu i to te au enua katoatoa ra; ko te enua oki ïa ta te Atua i taputou ki toou metua, i te na ko anga e, ka rauka oki i taau uanga taua enua ei ipukarea no ratou, no reira kua kite koe e, kare te Atu te Atua e akatika kia akakore takiri te au Etene i taau ra uanga tei irokia ki o te uanga a toou nga tuakana.

31. E kare katoa aia e akatika kia akakore te au Etene i te uanga a toou nga tuakana.

32. E kare te Atu te Atua e akatika kia noo ua atu te au Etene ki roto i taua tu matapo rikarika ua mei taau i kite ana ia ratou ra, no te au tuatua marama pu ua e te puapinga maata o te evangelia a te Punua Mamoe i uunaia e taua akonoanga viivii ra, nona te akatumuanga taau e akara ana.

33. E teianei, te tuatua maira te Punua Mamoe a te Atua. Ka aroa au i te au Etene, ka aravei ei au i te toenga o te ngutuare o Iseraela ma te akavaanga maata.

34. E kua tuatua maira te angela a te Atu kiaku, na ko maira, i na, te tuatua maira te Punua Mamoe a te Atua, i muri ake i toku araveianga i te toenga o te ngutuare o Iseraela, e ko teia toenga taku e tuatua nei, ko te uanga ïa a toou ra metua; e oti akera iaku te akava ia ratou e te papa oki ia ratou ki te rima o te au Etene; e kia turori oki te Etene no taua au ngai marama ua e te puapinga maata o te evangelia a te Punua Mamoe tei uunaia e taua akonoanga viivii ra, ko te metua vaine ïa o te au vaine akaturi; te na ko maira te Punua Mamoe ra; Ei taua au rā ra, e aroaʼi au i te Etene, e ka akakite oki au, na roto i toku uaorai mana, i te au tuatua e manganui o taku evangelia kia ratou ra, e mea marama ua e te puapinga maata oki te reira, te na ko maira te Punua Mamoe ra.

35. I na oki, te na ko maira te Punua Mamoe: Ka akakite atu au iaku uaorai ki taau uanga, e ka tata ratou i te au mea e manganui taku ka rave kia ratou, e ka riro ïa ei mea maramarama e te puapinga maata. E i muri ake ka akakoreia taau uanga, e ka tupu to ratou akarongo kore, e ka pera katoa te uanga a toou ai taeake, i na, ka uunaia teia au mea nei kia tae atu ki te au Etene na roto i te aroa e te mana o te Punua Mamoe.

36. E ka tataia taku evangelia, toku papaanga e toku akaoraanga ki roto i te reira te tuatua maira te Punua Mamoe.

37. E ao to ratou tei titau kia akatupu i toku Ziona i taua rā ra, no te mea ka rauka te aroa te mana o te Vaerua Tapu ia ratou ra; e mei te mea, ka akakoromaki roa ratou e tae ua atu ki openga ra, ka akateiteiia ratou i te rā openga ra, e ka akaoraia i roto i te basileia mutu kore o te Punua Mamoe; e ko tei akakite i te tuatua no te au, e i na, ko te tuatua mataora maata oki ïa e manea rava atu ei ratou ki runga i te au maunga ra.

38. E kua akara atura au i te toenga o te uanga a toku nga taeake, e te puka oki a te Punua Mamoe a te Atu, tei tae mai no roto i te vaa o te tangata ngati Iuda ra, kua tae mai te reira mei te au Etene mai ki te toenga o te uanga a toku nga tuakana.

39. E tae maira te reira kia ratou, kua akara atura au ki tetai atu au puka ke tei tae mai na roto i te mana o te Punua Mamoe, mei te au Etene mai kia ratou ra, i te akakite papu ki te au Etene, e te toenga o te uanga a toku nga tuakana, e te ngati Iuda katoa i akapueurikirikiia ki te au ngai katoa o te enua nei e, e tuatua mou te au papa tuatua a te au peroveta e te au aposetolo tino ngauru ma rua a te Punua Mamoe ra.

40. E kua tuatua maira te angela kiaku, na ko maira, Ko teia au papa tuatua openga taau i akara i te au Etene ra, ka akatika ïa i te papa tuatua mua ra, ko ta te ua aposetolo tino ngauru ma rua ïa, e ka akakite oki i te reira au mea marama ua e te puapinga maata tei kiritiia mei roto mai i te reira; e ka akakite atu ki te au kopu, e te au reo, e te au iti tangata e, ko te Punua Mamoe a te Atua, ko te Tamaiti ïa a te Atua mutu kore, te Akaora oki o to te ao nei; e kia aere mai oki te au tangata katoatoa kiaia e tikai, me kore ra, kare e rauka ia ratou kia akaoraia.

41. E kia tae ratou kiaia mei tei tau i te au tuatua i akakiteia e te vaa o te Punua Mamoe ra e tikai; e ka akakiteia te au tuatua a te Punua Mamoe ra ki roto i te papa tuatua a taau uanga; e ki roto katoa i te au papa tuatua a te au aposetolo tino ngauru ma rua a te Punua Mamoe, no reira, ka akatikaia raua ei okotai, no te mea e okotai Atua, e okotai Tiaki ki runga i te ao katoa nei.

42. E te vai atura te tuatau e akakite ei aia iaia uaorai ki to te au enua katoatoa, ki te ngati Iuda e ki te au Etene katoa oki; e kia oti iaia te akakite iaia uaorai ki te ngati Iuda e ki te au Etene katoa oki, ei reira aia e akakite mai ei iaia uaorai ki te au Etene e ki te ngati Iuda katoa oki, e ka riro to mua ki muri e to muri ki mua.