1. Kua oki maira au, ko Niphai, mei te tuatua anga ki te Atu ra, ki te are puakapa o toku metua.

2. E kua tuatua maira aia kiaku, na ko maira, i na, kua moe au i tetai moemoeā e kua akaue mai te Atu kiaku, kia oki koe e toou nga tuakana ki Ierusalema.

3. I na oki, tei ia Labana te akapapaanga tuatua no te ngati Iuda, e te akapapaanga anauanga o toou ai tupuna, e kua kotikitiia te reira ki runga i tetai au papa veo.

4. Kua akaue maira te Atu iaku, kia aere atu koe e toou nga tuakana ki te are o Labana, e kimi i te au akapapaanga tuatua, e apai mai i te reira ki te metepara.

5. E teianei, i na, te koumuumu nei toou nga tuakana i te na ko anga e, e mea rave ngatā taku i pati kia ratou; ina ra, kare naku i pati ana i te reira kia ratou; ko te akaueanga ra ïa a te Atu ra.

6. No reira e aere, e taku tamaiti, e ka akaperepereia koe e te Atu, no te mea, kare koe i koumuumu mai.

7. E kua tuatua atura au ki toku metua, ka aere atu au, e ka rave oki au i te au mea ta te Atu i akaue maira, kua kite oki au e, kare te Atu e tuku mai i tetai akaueanga ki te tamariki a te tangata, mari ra, ka akateateamamao aia i tetai ravenga no ratou, e raukaʼi ia ratou i te rave i te mea tana i akaue mai kia ratou.

8. Kia akarongo toku metua i teia au tuatua nei, kua rekareka maata aia kua kite oki aia e, kua akameitakiia au e te Atu.

9. Kua aere oki au, ko Niphai, e toku nga tuakana katoa ki roto i te metepara, ma to matou au puakapa, kia aere ki runga ki te enua ia Ierusalema.

10. E tae atura matou ki te enua ko Ierusalema, kua uriuri matou ia matou uaorai.

11. E kua tuku matou i te kelero kia kitea e, koai te ka aere ki te are o Labana. E kua peke atura te kelero ia Lamana, no reira kua aere atura Lamana ki te are o Labana, e i noo iora raua i tona are, e kua tuatua raua.

12. E kua anoano aia ia Labana no te au akapapaanga tuatua i kotikotiia ki runga i te au papa veo ra, kua tataia oki te papaanga anau o toku nga metua ki runga i te reira.

13. E i na, kua riri rava a Labana, tuaru atura iaia mei mua i tona aroaro, e kare aia i akatika kia rauka atu te au akapapaanga tuatua kiaia. No reira, kua tuatua atu aia kiaia, i na, e tangata keia koe, ka ta au ia koe.

14. Oro ke atura a Lamana mei tona aroaro, e kua akakite maira aia kia matou i te au mea ta Labana i rave. Tumatetenga akera to matou ngakau i reira, e kua vaitata toku nga tuakana i te oki atu ki toku metua i te metepara.

15. Ina ra, kua tuatua atu au kia ratou, Te ora nei te Atu, e te ora nei oki tatou, kare oki tatou e aere ki raro ki to tatou metua i te metepara, mari ra kia oti rava ia tatou i te rave i te mea ta te Atu i akaue mai kia tatou kia rave.

16. E tenana, kia maroiroi tatou i te akono anga i te au akaueanga a te Atu; e teianei, kia aere tatou ki raro ki te enua ipukarea o to tatou metua, i na oki, kua akaruke aia i te auro, e te ario, e te au tu apinga oko maata ki reira. No te au akaueanga a te Atu i peraʼi aia.

17. I kite ana oki aia e, ka akakoreia Ierusalema e tikai, no te angaanga kino a te au tangata.

18. I na oki, kua kopae ke atu ratou i te au tuatua a te au peroveta ra. No reira, naringa toku metua i noo ki te enua i muri ake i tona akaue angaia mai kia akaruke i te reira enua kua mate katoa aia; no reira ka akaruke atu aia i te enua e tikai.

19. I na, e ravenga pakari ta te Atua kia rauka teia nei au akapapaanga tuatua ia tatou nei, kia rauka ia tatou te akakite atu i te reo o to tatou ai tupuna ki ta tatou au tamariki;

20. E kia tika oki ia tatou i te akakite atu kia ratou i te au tuatua i tuatuaia maira e te vaa o te au peroveta tapu katoa ra, mei tei orongaia mai kia ratou e te Vaerua e te mana o te Atua, mei muatangana maira o te ao nei e teia noaʼi.

21. I akapera au i te akoanga atu ki toku nga tuakana kia maroiroi ratou i te akono i te au akaueanga a te Atua.

22. E kua aere atura matou ki raro i to matou enua ipukarea, e kua akaputuptu maira matou i ta matou auro, e ta matou ario, e ta matou au apinga oko maata.

23. E kia oti ia matou teia au apinga i te akaputuputu, kua, aere akaou atura matou ki te are o Labana.

24. E kua aere atura matou ki roto ki ko ia Labana, e kua anoano matou kia oronga mai kia matou i te au akapapaanga tuatua i kotikotiia ki runga i te au papa veo, e me ka pera aia, ka oronga matou i ta matou auro, e ta matou ario, e te au apinga oko maata nana.

25. E kite akera Labana e, e au apinga oko maata ta matou, noinoi iora aia i te reira, kua tuaru atu aia ia matou ki vao, e kua tono maira i tona au tavini kia ta ia matou kia rauka ta matou au apinga oko maata iaia ra.

26. Kua oro atura matou mei mua atu i te au tavini a Labana, e kua akaruke matou i ta matou au apinga oko maata, e kua riro atu te reira ki te rima o Labana.

27. E kua oro atura matou ki roto i te metepara, e kare matou i rokonaia e te au tavini o Labana, e kua pipini iora matou ki roto i te va o tetai toka.

28. E kua riri maira Lamana kiaku, e ki toku metua katoa oki, e kua riri katoa Lemuela e kua akarongo aia i te tuatua a Lamana. No reira kua tuatua mai a Lamana raua ko Lemuela i te au tuatua kikino kia maua, ki to raua nga teina, e kua papa raua ia maua ki te rakau.

29. I to raua papa anga mai ia maua ki te rakau ra, I na, kua mama maira tetai angela a te Atu, e kua tu ki mua ia raua, e kua tuatua maira aia kia raua, na ko maira, Eaa korua i papaʼi i to korua teina ki te rakau? Kare ainei korua i kite e, kua iki te Atu iaia kia riro aia ei tutara no korua, e no ta korua ara i peraʼi. I na, e aere akaou kotou ki Ierusalema, e ka tuku mai te Atu ia Labana ki roto i to kotou rima.

30. E akaoti akera te angela i tana tuatua kia matou, aere atura aia.

31. E aere atura te angela, kua koumuumu akaou maira Lamana raua ko Lemuela na ko maira, naea tikai te Atu e tuku mai ei ia Labana ki roto i to tatou rima? I na, e tangata ririnui maata aia, e e tika iaia kia akaue i te rima ngauru, i na, e tika oki iaia kia ta i te rima ngauru, eaa ka kore ei aia e pera ia tatou?