1. Aere akaou atura matou i to matou tere ki roto i te metepara ra, e kua aere ua atura matou na te itinga o te ra, E kua aere matou na roto i te au tumatetenga maata i te metepara; e anau tamariki iora ta matou au vaine i roto i te metepara.

2. E no te maata o te akameitakianga a te Atu ia matou, kua kai ratou i te puaka mata i te metepara, e kua rava te ū a ta matou au vaine no te au tamariki, e kua maroiroi ratou mei te tane rai te tu; e kua aere atura ratou i to ratou tere ma te koumuumu kore.

3. E teianei, te kite nei tatou e, ka tupu te au akaueanga a te Atua e tikai. E mei te mea e akono te tamariki a te tangata nei i te au akaueanga a te Atua, ka tauturu mai aia ia ratou, e ka akamaroiroi aia ia ratou, e ka akatupu i te ravenga e raukaʼi ia ratou te rave i te mea tana i akaue mai ia ratou; i na, kua akatupu aia i te ravenga e oraʼi matou i to matou noo anga ki roto i te metepara ra.

4. E manganui oki to matou mataiti i te aere anga i roto i te metepara ra, koia oki nga mataiti e varu.

5. E tae atura matou ki te enua i tuatuaia ra ko Bounetifula, no te maata o tona kai e te meri oki; e kua akonoia taua au mea ra e te Atua kia kore matou e mate. E kua kite matou i te tai, e kua topa matou i te ingoa ko Irianatuma, koia oki ko te moana maata.

6. Patia iora matou i to matou au puakapa i te pae taatai ra; e no atu e kua maata to matou au tumatetenga e te pekapeka, kare oki e rauka ia matou te tata no te maata; kua mataora maata matou kia tae atura matou ki te pae taatai no te maata o te kai ki reira, kua topa iora matou i te ingoa o taua enua ra ko Bounetifula.

7. E kia noo akera au, ko Niphai, ki te enua ra ko Bounetifula i tetai tautau poto ua, kua tae maira te reo o te Atu kiaku nei, na ko maira, Ka tu, ka aere ki runga i te maunga ra. Kua tu akera au e kua aere atura ki te maunga e kua pure atura ki te Atu.

8. E kua tuatua maira te Atu kiaku, na ko maira, ka maani koe i tetai pai kia tau ki taku ka akakite atu kia koe, kia akatae atu au i toou iti tangata na runga i teianei moana.

9. E kua tuatua atu au ki te Atu, Ka aere au kiea e rauka mai ei iaku te auri, e maani ei au i te au apinga angaanga, kia maani oki au i te pai mei taau i akakite mai ana kiaku?

10. E kua akakite maira te Atu kiaku i te ngai e aere ei au kia rauka mai te auri e maani ei i te au apinga angaanga.

11. Kua maani iora au, ko Niphai, i te pute matangi no te kiri manu, kia akapuangi au i te ai; e kia oti iaku te maani i te pute matangi e akapuangi ei i te ai, e rutu iora au i nga toka e rua tetai ki tetai kia maani au i te ai.

12. Kare oki te Atu i akatika mai kia maata ta matou maani anga ai i to matou aereanga i roto i te metepara ra; no te mea, i nanaʼi ka akavene au i ta kotou kai, kia kore kotou e tunu i te reira.

13. E ka riro katoa au ei marama no kotou i roto i te metepara e ka akateateamamao au i to kotou mataara i mua ia kotou mei te mea e akono kotou i taku au akaueanga; e mei te mea e akono kotou i taku au aka, ueanga ka aratakiia kotou ki te enua i taputouia ra, e ka kite oki kotou e, naku kotou i arataki.

14. E kua tuatua katoa maira te Atu e, kia tae atu kotou ki te enua i taputouia ra, ka kite kotou e, ko au nei, ko te Atu, ko te Atua ïa, e naku, na te Atu kotou i akaora i te mate; e naku oki kotou e arataki mai mei te enua maira mei Ierusalema.

15. Kua tauta iora au, ko Niphai, i te akono i te au akaueanga a te Atu, e kua ako atura oki au ki toku nga tuakana kia akono e kia akamaroiroi.

16. E kua maani iora au i tetai au apinga angaanga i te auri tei rauka iaku mei roto mai i te enua ra.

17. E kia kite maira toku nga tuakana e, te vaitata nei au i te maani i tetai pai kua koumuumu maira raua kiaku, na ko maira, E tangata neneva to taua teina, no te mea kua manako aia e, ka rauka iaia i te maani i tetai pai, e kua manako katoa aia e, ka tae atu aia ki tera pae o teia moana maata.

18. Kua pera toku nga tuakana i te amuamu mai iaku, e kare oki raua i inangaro kia rave i te angaanga, no te mea, kua manako raua e, kare e rauka iaku i te maani i te pai; e kare raua i irinaki e, kua apiiia au e te Atu.

19. E kua tumatetenga maata au no te ketaketa o to raua ngakau; e kia kite raua i toku tumatetenga ia raua, rekareka iora to raua ngakau e kua matoara raua iaku, i te na ko anga e, kua kite maua e, kare e rauka ia koe kia maani i tetai pai, no te mea kua kite maua kua ngere koe i te kite, e no reira kare e rauka ia koe i te rave i te angaanga maata mei te reira.

20. Kua aite koe mei to tatou metua i te tu i te aru i te au manako neneva o te ngakau, kua arataki mai aia ia tatou mei te enua maira mei Ierusalema, e kua aere ua tatou i roto i te metepara i te au mataiti e manganui, e kua angaanga ua ta tatou au vaine ka vaitataʼi ratou i te anau; kua anau oki ratou i te tamariki i roto i te metepara nei, e kua aere ratou na roto i te au tumatetenga katoatoa mari ra te mate takiri; e ngari ake oki ratou te mate i Ierusalema i te rokoia i teia au tumatetenga nei.

21. I na, kua aue tatou i te au mataiti e manganui i roto i te metepara nei, ka tika ravaʼi ia tatou kia noo atu i to tatou uaorai enua, i te enua o to tatou ipukarea, ma te mataora e kua mataora oki tatou i reira.

22. E kua kite oki maua e, e iti tangata tuatua tika to Ierusalema ra; no te mea kua akono ratou i te ture e te au tuatua a te Atu ra, e tana au akaueanga katoa, mei tei tau i te ture a Mose ra; e teianei, kua kite maua e, e iti tangata tuatua tika ratou; kua akaapa ra to tatou metua ia ratou e kua arataki mai aia ia tatou ki ko nei, no te mea kua akarongo tatou i tana au tuatua, e kua aite katoa oki to taua teina mei iaia. Kua pera toku nga tuakana i te amuamu e te koumuumu mai ia maua ra.

23. E kua tuatua atura au ko Niphai kia raua na ko atura, kua irinaki ainei korua e naringa kare to tatou au metua, ko ratou oki ko te tamariki a Iseraela, i akarongo i te tuatua a te Atu ra, kua aratakiia ainei ratou mei roto mai i te rima o to Aiphiti?

24. Kua manako ainei oki korua e, ka rauka ia Mose te arataki ia ratou mei roto mai i te tuikaaanga, naringa kare te Atu i akaue iaia kia akapera.

25. Kua kite korua e, tei roto te au tamariki a Iseraela i te tuikaaanga; e kua kite katoa korua e, kua tapekaia ratou ki te au apinga teimaa rava; no reira, kua kite korua e, e mea meitaki kia aratakiia ratou mei roto mai i taua tuikaaanga ra.

26. Kua kite oki korua e, kua akaueia a Mose e te Atu kia rave i taua angaanga maata ra; e kua kite oki korua e, na tana tuatua i akataka ke i te Tai Muramura ki tera pae ki tera pae, e kua aere maira ratou na runga i te one maro.

27. E kua kite korua e, kua maremoia to Aiphiti, koia oki te au nuku o Pharao, kua maremoia i roto i te Tai Muramura.

28. Kua kite katoa korua e, kua angaiia ratou ki te mānā i te metepara.

29. Kua kite oki korua e, na tana tuatua kia tau ki te mana o te Atua i roto iaia, kua papa a Mose i te mato, e tae ua maira te vai kia kore te tamariki o Iseraela e kaki vai.

30. E no atu e kua arataki uaia ratou, tei mua ia ratou te Atu, to ratou Atua, to ratou Akaora, i te arataki anga ia ratou i te ao, e te oronga i te marama i te po, e i te rave anga i te au mea katoatoa e tika kia orongaia atu ki te tangata, i na, kua akaketaketa iora ratou i to ratou ngakau e kua akapoiri ratou i to ratou manako, e kua taitoito ia Mose e i te Atua mou ra.

31. E mei tana i tuatua ra, kua akapou aia ia ratou; e mei tana i tuatua ra, kua arataki aia ia ratou; e mei tana oki i tuatua ra, kua rave aia i te au mea katoa no ratou ra; e kare oki tetai mea i raveia, mari ra na tana ra tuatua.

32. E kia tae akera ratou ki tetai tua mai i Ioridana, kua akariro iora aia ia ratou ei iti tangata maroiroi i te tuaru anga atu i te au tamariki o te enua ra, e i te akapueurikiriki anga ia ratou kia pou.

33. E teianei, kua manako ainei korua e, e iti tangata tuatua tika te tamariki o taua enua ra, ko tei noo ki te enua i taputouia ra, e ko tei tuaruia oki e to tatou au metua ra? I na, e tuatua atu au kia korua, kare.

34. Kua manako ainei korua e, e maata to tatou au metua ia ratou i te meitaki, naringa e iti tangata tuatua tika ratou? E tuatua atu au kia korua. Kare.

35. I na, okotai rai tu i to te Atua inangaro ki te au tangata katoatoa; ko tei tika ra, ko ta te Atua ïa e inangaro. Ina ra, kua akaruke teia iti tangata i te au tuatua katoatoa a te Atua e kua rave ratou i te kino, e tei runga ia ratou te kikianga o te riri o te Atua, e kua taumaa iora te Atua i te enua no ratou, kareka ra kua akameitakiia ïa no to tatou au metua ra; koia ia, kua taumaa aia i te enua no ratou kia pou rava ratou; e nana oki ïa i aka meitaki no to tatou au metua kia rauka ia ratou te mana ki runga i te reira.

36. I na, kua anga te Atu i te enua kia nooia e te tangata, e nana oki taua au tamariki i anga kia noo ratou ki runga i te reira.

37. E te akatupu nei rai aia i te iti tangata tuatua tika ra, e te akapou ua nei aia i te iti tangata tuatua tika kore.

38. Te arataki nei aia i te aronga tuatua tika ki te au enua memeitaki ra; e te akapou ua nei rai aia i te tuatua tika kore, e te akakino ua nei rai aia i te enua no ratou.

39. Te tutara nei aia ki runga i te rangi teitei ra, no te mea ko tona terono oki ïa, e ki runga i teianei ao, ko tona ïa takainga vaevae.

40. Nana oki e aroa mai i tei ariki iaia ei Atua no ratou. I na, i aroa mai ana aia i to tatou au metua, e kua koreromotu aia kia ratou, koia oki kia Aberahama, e kia Isaaka, e kia Iakoba, e kua maara oki iaia tana ra koreromotu; e no reira kua arataki mai aia ia ratou mei te enua maira mei Aiphiti.

41. Nana oki ratou i papa i roto te metepara ki tana rakau ra, no te mea kua akaketaketa ratou i to ratou ngakau mei ia korua katoa oki, e kua papa te Atu ia ratou no to ratou kino. Kua tuku mai aia i te ovi ai rere ki rotopu ia ratou; e kia kakatiia akera ratou, kua akatupu aia i tetai ravenga e oraʼi ratou; e te angaanga ta ratou e rave, ko te akara ua ïa, e no te ravenga mama e te rave ngoie, e manganui tei mate.

42. Kua akaketaketa iora ratou i to ratou ngakau i tera tuatau i tera tuatau, e kua koumuumu maira ratou kia Mose, e ki te Atua ra oki; kua kite ra korua e, kua aratakiia ratou e tona mana maata ki te enua i taputouia ra.

43. I teianei, i muri ake i taua au mea ra, kua tae mai te tuatau, e riro ei ratou ei aronga tuatua tika kore, i na, kua vaitata ratou ki te ope o te kino, e kare au i kite mari ra kua vaitata ratou i te pou i teianei; I kite ana rai au e, ka tae mai te rā e pou ei ratou e tikai, mari ra tetai pae meangiti ua, ko te ka aratakiia ki te tuikaaanga ra.

44. E no reira i akaue mai ei te Atu i toku metua ra kia aere atu ki te metepara; E kua titau te ngati Iuda iaia e ta; e kua titau katoa oki korua iaia e ta; e no reira e tangata ta tangata korua i roto i to korua ngakau, e kua aite oki korua mei ia ratou.

45. Kua viviki korua i te rave i te kino, e marie ra i te akamaara i te Atu, to korua Atua. Kua kite korua i tetai angela e kua tuatua maira aia kia korua, e kua akarongo korua i tona reo i tera rā e tera rā; e kua tuatua maira oki aia ma te reo meangiti e te maru, kare ra e rauka ia korua te akarongo i tana tuatua; no reira kua tuatua mai aia ma te reo mei te mangungu i akangaueue i te enua, mei te mea ka ngaa ïa i rotopu.

46. E kua kite katoa korua e, na roto i te mana o tana tuatua mana ʼkatoatoa, e raukaʼi iaia kia akangaueue i te enua nei; e kua kite katoa korua e, na roto i tana tuatua ka rauka iaia kia akatika i te au ngai pukupuku, e kia akapukupuku i te au ngai paraa. No reira, eaa te tumu i ketaketaʼi to korua ngakau?

47. I na, kua otooto toku vaerua i te aue, e kua mamae toku ngakau. E mataku au ko te akarukeia aea korua e tuatau ua atu. I na, kua ki roa au i te vaerua o te Atua, e kua kore toku maroiroi i te kopapa nei.

48. E kia tuatua atura au i taua au tuatua ra, riri maata akera raua iaku, e kua inangaro raua i te titiri iaku ki roto i te moana ra, e kia aere maira raua e rave mai iaku, kua tuatua atura au kia raua, na ko atura, na roto i te ingoa o te Atua mana katoatoa, te akaue atu nei au ia korua, auraka e akatukia mai kiaku nei, no tei ki au i te mana o te Atua i paruparu ravaʼi toku nei kopapa; e ko tei rave mai tona rima iaku, ka mae aia mei te rakau maro ra; ka kore aia i te mana o te Atua, e ka papa oki te Atua iaia.

49. E kua tuatua atura au, ko Niphai, kia raua, Eiaa raua e koumuumu akaou i to ratou metua, e eiaa oki raua e akaruke i te tauturu mai iaku, no te mea kua akaue mai te Atua iaku kia maani i te pai.

50. E kua tuatua atura au kia raua e, mei te mea kua akaue mai te Atua iaku kia rave i te au mea katoatoa, ka rauka iaku i te rave. E naringa aia e akaue mai iaku e tuatua atu ki teianei tai e, kia riro ei enua, kua riro ïa ei enua; e naringa au e tuatua, kua akaperaia ïa.

51. E teianei, mei te mea e mana maata to te Atua mei te reira te tu, e kua rave i te au semeio e manganui i rotopu i te tamariki a te tangata nei, eaa i kore ei e rauka iaia te apii mai iaku kia maani au i tetai pai?

52. E e manganui atu rai te au mea taku, ta Niphai, i tuatua atu ki toku nga tuakana, akama iora raua, e kare i tika ia raua te patoi mai iaku; e kua mataku iora raua i te rave mai iaku, e i te akatukia mai iaku ki to ratou rima i te au ra e manganui i muri ake. Kua mataku iora raua i te pera mai ko te mae aea raua i mua iaku, no te maroiroi o te Vaerua o te Atua; e kua peraia raua e ïa ra.

53. E kua tuatua maira te Atu kiaku, E akatika akaou i toou rima ki toou ra nga tuakana, kia kore raua e mae i mua ia koe, ka akangaueue ra au ia raua, te na ko maira te Atu; e ka pera au kia kite raua e, ko au nei, ko te Atu, to ratou Atua.

54. E kua akatika atura au i toku rima ki toku nga tuakana e kare raua i mae ki mua iaku; kua akangaueue ra te Atu ia raua kia tau ki te tuatua tana i tuatua maira.

55. E kua tuatua maira raua, kua kite papu maua e, tei roto te Atua ia koe, no te mea, kua kite maua e, ko te mana o te Atua tei akangaueue mai ia maua. Tipapa iora raua ki raro i mua iaku, kua vaitata raua i te akamori mai iaku, kare ra au i akatika kia akapera raua; kua karanga au e, Ko au rai to korua taeake, to korua teina; e teianei e akamori i te Atu i to korua Atua, e e akangateitei atu i to korua metua tane e to korua metua vaine, kia akaroaia to korua puke ra i te enua ta te Atu ra ka oronga kia korua ra.