1. E teianei, e akarongo, e kotou e te ngutuare o Iseraela e, ko kotou tei tipu keia e tei tuaruia, no te au angaanga tika kore a te au tiaki o toku ra iti tangata; Koia ia, e kotou ravarai tei tipu keia, e tei akapueurikiriki keia, e kotou no toku iti tangata, e te ngutuare o Iseraela. E akarongo mai iaku e te au enua moana ra e akono mai, e te au tangata i te atea ke ra; kua kapiki te Atu iaku mei te kopu maira; kua taiku aia i toku ingoa mei toku anauanga maira.

2. Kua akariro aia i toku vaa ei koke kokoi; kua uuna aia iaku ki roto i te māru o tona rima; e kua akariro aia iaku ei kakao kanapanapa, kua uuna aia iaku ki roto i tona pia kakao.

3. E kua tuatua mai aia kiaku, ko koe toku tavini, noou i ʼakameitakiiaʼi au nei.

4. Kua karanga atura au, kua roiroi puapinga kore au, kua akapou puapinga kore ua au i toku maroiroi, tei te Atu ra taku tuatua, e taku angaanga, tei te Atua ïa.

5. E teianei te tuatua maira te Atu, ko tei akatapu mai iaku mei te kopu maira ei tavini nona, kia akaoki mai ia Iakoba kiaia ra, no atu e kare a Iseraela e akaputuputuia mai ka manea ua rai au i te mata o te Atu, e ka riro toku Atua ei maroiroi noku.

6. Kua tuatua maira aia kiaku, e meangiti tena ia koe, kia riro koe ei tavini noku, ei akatupu i te au kopu o Iakoba, e ei akaoki mai i tei akatoeia i Iseraela; e oronga katoa au ia koe ei turama no te Etene, ei ora naku e tae ua atu ki te openga mai o te enua nei.

7. Te na ko maira te Atu, te Akaora o Iseraela, Tei Tapu, kiaia ra, i tei akavaavaaia e te tangata ra, e tei akaviiviiia e te au enua ra, kia tavini i te tutara ra. E kite akera te au ariki e ka tu mai oki, e ka akamori katoa te au tamariki a te ariki, no te mea, e tuatua mou ta te Atu ra.

8. Te na ko maira te Atu, kua akarongo au ia koe i te tuatau tau ra, E te au enua o te moana ra, kua tauturu au ia koe i te rā e oraʼi ra; e naku e akaora ia koe, e oronga au i toku tavini noou ei koreromotu na te au tangata nei; kia tinamou te enua, kia akonooia te au kainga ipukarea i akaruke uaia ra;

9. Ka tuatua koe ki te aronga i tapekaia ra, ka aere ki vao; ki tei noo ki roto i te poiri, ka akakite mai ia kotou. E angai ia ratou i te arataa ra, e ta ratou tanu anga kai ra, ei te au ngai teitei ïa.

10. Kare ratou e pongi, kare oki e kaki vai; kare oki ratou e taia e te veravera, o te rā: na tei aroa ia ratou e arataki, e nana e taki aere ia ratou ki te au punavai puipui ua ra.

11. E anga oki au i te au arataa na runga i te au maunga ravarai noku ra, e e akateiteiia toku au mataara.

12. Ei reira, E te ngutuare o Iseraela, i na, e aere mai ei ratou no te ngai mamao mai; i na, no apatokerau e no te opunga o te rā; e no te enua maira no Sinimi.

13. Ka imene, e to te rangi e, ka mataora e to te enua e, kua akatikaia te vaevae o tei noo ki te itinga o te rā ra; kia puroro ua mai te imene e te au maunga; kare oki ratou e ta akaouia, no te mea, kua akapumaana te Atu i tona ra iti tangata, e tona aronga i tumatetenga ra, kua aroa mai aia ia ratou.

14. E i na, kua tuatua ana a Ziona e, kua akaruke te Atu iaku, e kua akangaropoina toku Atu iaku nei, E akakite ra aia e, kare aia i akapera ana.

15. E tika ainei i te vaine kia akangaropoina i tana tamaiti kai ū, e kare atura e tangi ki te tamaiti a tona uaorai kopu? Ae, e tika ïa ia ratou, kare rai au e akangaropoina ia koe, e te ngutuare o Iseraela.

16. I na, kua tata au ia koe ki runga i oku kapu rima; e te vai ua maira to au patu ki mua iaku nei.

17. E rapurapu ua mai taau tamariki ki te aronga tei papa ia koe, e tei akatanea ia koe, no roto atu ïa ia koe.

18. Ka nānā ana to mata, ka akara aere e pini ua ake; kua akaputuputu anake mai teianei aronga, e aere mai kia koe ra. Te na ko maira te Atu, Te ora nei au, e akakakau ia koe e ia ratou ravarai ra mei te apinga akamanea ra, e ka akamou aereia ratou kia koe, mei te vaine akaipoipo ou ra.

19. Toou oki au ngai tanea, e tei akarukeia ra, e te enua i pou ra, ka meangiti rava ïa i teianei no te maata o te tangata; e te aronga i opu ia koe ra ka akamamao keia ïa.

20. Te au tamariki e rauka ia koe, ka mate atu ei te mua, e tuatua akaou mai ki to taringa e, Kua riro teianei ngai ei ngai piripiri iaku, e akaatea ana iaku kia noo au.

21. Ei reira koe e tuatuaʼi ki toou ngakau, naai i akaanau mai i teianei aronga naku? Kua ngere oki au i te tamariki, e kua tanea, ei tuikaa, ei tuaru aereia atu? E naai teia i akono? I na, toe iora ko au anake; noea ua akera teianei aronga?

22. Te na ko maira te Atu ra ko te Atua, i na, e akatika au i toku rima ki runga i te au Etene, e uti au i taku reva ki runga i te au tangata ra, e e apai ratou i to au tamariki tamaroa ki to ratou rima, e to au tamariki tamaine na runga i to ratou pakuivi i te apai anga mai.

23. E te au ariki e riro ei metua angai noou, e to ratou au ariki vaine ei metua vaine angai noou: e tupou ratou ki raro i to ratou mata ki te enua ia koe ra, e kite oki kotou e, ko te Atu au, kare oki ratou e akama tei tatari mai iaku nei.

24. E riro atu ainei te apinga keia mei te tangata ririnui, e ka akaoraia ainei tei riro tikai ei tuikaa?

25. Te na ko maira te Atu, te au tuikaa i riro ki te tangata ririnui, e riro atu ïa; e te apinga keia i rauka i te tangata taae ra, e riro atu ïa, ko te aronga oki e māro mai ia koe ra, naku e maro atu; e naku e akaora i taau au tamariki.

26. E naku e akaangai i tei takinga kino ia koe ki to ratou uaorai kiko; e kona ratou i to ratou uaorai toto mei te kona wina ou ra; e e kite oki te tangata katoatoa e, ko au te Atu to kotou Akaora, e te Mana Maata o Iakoba kia akaora ia koe ra.