1. E oti akere toku riro anga atu i te Vaerua, e i te kite anga i taua au mea katoa ra, kua oki au ki te puakapa o toku mteua.

2. Kite akera au i toku nga tuakana i te pekapeka anga tetai ki tetai i te au mea ta toku metua i tuatua atu kia raua ra.

3. I na, e manganui oki te au mea maata tana i tuatua atu kia raua, e kare e kitea ngoie ua, mari ra, kia pati atu te tangata ki te Atua ra; e no te ketaketa o to raua ngakau, kare oki raua i pati atu ki te Atu mei tei tau kia rave.

4. E teianei kua tumatetenga rava au, ko Niphai, no te ketaketa o to raua ngakau, e no te au mea oki taku i kite ra, e kua kite oki au e, ka tupu taua au mea ra e tikai, e no te tuatua tika kore oki a te tamariki a te tangata nei.

5. Kua aue iora au no toku au tumatetenga e no te mea ka pou toku iti tangata, e kua kite au i to ratou ingaanga, i manako ei au e, kua maata roa toku au tumatetenga i to te tangata katoatoa ra.

6. E kia rauka akera toku maroiroi kua tuatua atura au ki toku nga tuakana, kia kite au i te tumu i maro ei raua.

7. E kua na ko maira raua, i na, kare maua i marama i te au tuatua ta to tatou metua i tuatua mai kia maua i te au atava tikai o te pu rakau orive ra, e i te au Etene oki.

8. Kua tuatua atura au kia raua, kua pati ainei korua ki te Atu ra?

9. E kua tuatua maira raua kiaku, kare maua i pati no te mea, kare te Atu e akakite mai ana kia maua i te reira.

10. E i na, kua tuatua atura au kia raua, Eaa te mea i kore ei korua i akono i te akaueanga a te Atu? Ka akapeea korua me mate, no te ketaketa o to korua ngakau?

11. Kare ainei korua i akamaara i te au mea ta te Atu i tuatua maira i te na ko anga mai e, Kia kore kotou e akaketaketa i to kotou ngakau, e kia pati mai kiaku ma te akarongo, ma te manako e, ka rauka mai ta kotou, e ma te akono meitaki i taku ra au akaueanga, e akakiteia mai rai taua au mea kia kotou.

12. I na, e tuatua atu au kia korua, kua akatauia te ngutuare o Iseraela ki tetai pu orive e te vaerua o te Atu, tei roto oki ïa i to tatou au metua; e i na, kare ainei tatou i tipu keia i te ngutuare o Iseraela, e kare ainei oki tatou i tetai atava o te ngutuare o Iseraela ra?

13. E teianei, ko te aiteanga teia i te au mea ta to tatou Metua i tuatua mai no runga i te pau anga i te au atava tikai na roto i te kianga o te au Etene ra, koia oki kia tae ki te au rā openga, e kia ngaro ta tatou uanga i te akarongo kore ra, e kia ope oki te au mataiti e te au uki e manganui i muri ake ka akakiteia mai ei te Mesia i te kopapa ki te tamariki a te tangata nei, ei reira e tae mai ei te kianga o te evangelia a te Mesia ki te au Etene ra, e mei te au Etene ka tae atu ei ki te toenga o ta tatou uanga.

14. E kia tae ki taua rā ra, ka kite te toenga o ta tatou uanga e, no te ngutuare ratou o Iseraela, e e iti tangata taputouia oki ratou e te Atu ra; ei reira e tae atu ei te kite kia ratou i to ratou ai tupuna, e te kite oki i te evangelia a to ratou Akaora, tana i akakite mai ki to ratou au metua; no reira ka kite ratou i to ratou Akaora, e te au tumu tuatua oki o tana evangelia, kia kite ratou i te mataara e aere ei ratou kiaia e oraʼi.

15. Ei taua rā ra, kare ainei ratou e mataora, e e akameitaki atu oki i to ratou Atua mutu kore, to ratou papa mou e to ratou ora? I na, ei taua rā ra, kare ainei e rauka ia ratou te maroiroi e te puapinga no te vine mou? E kare ainei ratou e aere mai ki te anana mou a te Atua ra?

16. I na, te karanga atu nei au kia korua, ka akamaara akaouia ratou i roto i te ngutuare o Iseraela ra; e ka pauia mai ratou ki roto i te au tumu orive ra, no te mea, e atava mou oki ratou no te pu orive mou.

17. Ko te reira te aiteanga o te tuatua a to tatou metua ra, e kare ïa e tupu e tae roa atu ki te tuatau e akapueurikirikiiaʼi ratou e te au Etene ra, e na te au Etene te reira e akatupu; kia tika i te Atu kia akakite mai i tona ra mana ki te au Etene ra, no te mea, ka akarukeia oki aia e te ngati Iuda, koia oki te ngutuare o Iseraela ra.

18. E teianei, kare no ta tatou uanga anake ta to tatou Metua i tuatua ana, i te ngutuare katoatoa ra o Iseraela, i te akakite anga mai i te koreromotu te ka akatupuia o te au rā openga ra; koia oki te koreromotu ta te Atu i papau ki to tatou metua kia Aberahama, i te na ko anga mai e, Ei toou ra uanga e akameitakiiaʼi te au iti tangata o te ao nei.

19. E maata oki taku tuatua, ta Niphai, kia raua i teia au mea nei; e i na, kua akakite au kia raua i te akaokianga mai o te ngati Iuda i te au rā openga ra.

20. E kua apii au i te tuatua a Isaia ra, ko tei tuatua i te akaokianga o te ngati Iuda ra, koia oki te ngutuare o Iseraela, e kia akaokiia mai ratou, kare ratou e akama akaou, e kare oki e akapueurikiriki akaouia. E manganui atu te tuatua taku i tuatua ki toku ra nga tuakana, e kua mataora raua e kua taakaaka raua ia raua uaorai ki mua i te aroaro o te Atu ra.

21. E tuatua akaou maira raua kiaku, na ko maira, Eaa te aiteanga i te mea ta to tatou Metua i kite i roto i te moe ra? Eaa oki te aiteanga i te pu rakau tana i kite ra?

22. E kua akakite atura au kia raua, E akatauanga te reira i te pu rakau ora.

23. E kua tuatua maira raua kiaku, Eaa te aiteanga i te auri e tae atu ei ki te pu rakau ta to tatou Metua i kite ra.

24. Kua akakite atura au kia raua, ko te tuatua ïa a te Atua ra, e te tangata katoa ka akono i te tuatua a te Atua, e mou meitaki ki te reira, kare rava ratou e mate, e kare oki te au timataanga a te enemi ra e akapoiri ia ratou kia arataki ia ratou ki te mate.

25. No reira, kua ako au, ko Niphai, ia raua kia akono raua i te tuatua a te Atu, i na, kua ako atura au ia raua ma te ririnui katoa o toku vaerua, e ma toku kite katoa kia akono raua i te tuatua a te Atua, e kia akamaara oki i te akono i tana au akaueanga i te au mea katoatoa.

26. E kua tuatua maira raua iaku, Eaa te aiteanga i te kauvai ta to tatou metua i akara ra?

27. E kua akakite au kia raua, Ko te vai ta to tatou Metua i akara, ko te viivii ïa; e no tei tamou aia i tona manako ki runga i tetai atu au mea, i kore ei aia i kite i te repo maata o taua vai ra.

28. E kua akakite au kia raua, ko te mareva maata ïa tei akataka ke i te aronga tuatua tika kore i te pu rakau ora ra, e i te aronga tapu oki o te Atua ra.

29. Kua tuatua atura au kia raua, e akatauanga te reira i taua ade rikarika ra ta te angela i tuatua mai kiaku ra i te na ko anga mai e, Kua akateateamamaoia ïa no te aronga tuatua tika kore ra.

30. Kua tuatua atura au kia raua, Kua kite katoa to tatou Metua i te tuatua tika a te Atua tei akataka ke i te aronga tuatua tika kore ra e te aronga tuatua tika; e kua tau oki te kaka o te reira ki te ai mura ra, tei tae roa atu ki runga i te Atua ra e tuatau ua atu, e kare oki e openga o te reira.

31. E kua tuatua maira raua kiaku, E tau ainei te reira i te mamae o te kopapa i te au ra e vai ei te tangata teianei ao? Me ko te tuatua ainei ïa no runga i te turanga openga o te vaerua i muri ake i te matenga o te kopapa nei, me e tuatua anake ainei no te au mea o te kopapa nei?

32. E kua tuatua au kia raua, E akatauanga te reira i te au mea o te kopapa e te au mea katoa o te vaerua; ka tae mai oki te rā e akavaiaʼi ratou i ta ratou au angaanga e tikai, koia oki te au angaanga ta ratou i rave i te kopapa nei i te au rā i noo ei ratou i te ao nei.

33. E mei te mea e mate ratou i ta ratou au mea viivii ra, e tipuia ratou i te au mea o te vaerua, koia oki te au mea tuatua tika ra; e no reira ka tu ratou ki mua i te aroaro o te Atua e tikai, kia akavaia ki ta ratou angaanga. E mei te mea kua viivii ta ratou angaanga, e viivii ua atu rai oki ratou, e mei te mea e viivii ratou, kare rava ratou e noo ki te basileia o te Atua; naringa e tika ia ratou kia noo ki reira, ka viivii katoa te basileia o te Atua.

34. Ina ra, te tuatua atu nei au kia korua, kare e viivii i te basileia o te Atua e kare oki te mea viivii e o ki roto i te basileia o te Atua, no reira, kua akateateamamaoia tetai ngai viivii no te au mea viivii e tikai.

35. E kua akateateamamaoia oki tetai ngai, koia oki taua ade rikarika taku i tuatua ra, e ko te tiaporo oki te tumu; E no reira, ei te openga ra, ka noo te au vaerua o te tangata ki te basileia o te Atua ra, me kore ra, ka uriia ïa ki vao kia tau ki te tuatua tika taku e tuatua nei.

36. E no reira, ka akataka keia te aronga tuatua tika kore e te aronga tuatua tika, e mei te pu rakau ora katoa, e ko tona ua, e mea meitaki e te mea inangaro maata ravaia atu ïa i te ua rakau katoatoa, e ko te apinga aroa maata ïa a te Atua. Kua pera atura au i te tuatua ki toku ra nga tuakana. Amene.