1 Cunan quiquinguna yachachun munaiman, ñuca taita, Lehi, paipaj cati aillucunamanda achil villachicunata tucuchishca jipa, yalishca jipa Apunchijca paiman cutin parlarca, nishpa, cai paipa na ali carca, Lehi paipaj aillucunata paicunatalla jichushca pambaman pushai; ashtahuangari paipaj churicuna huarmicunata japina carca cazarangapa, paicuna paicunapaj cati aillucunata jatarichichun Apunchijman chai cushapacha nishca alpapi.

2 Yalishca jipa Apunchijca paita mandarca ñuca, Nefi, ñuca huauquicunahuan, Jerusalénpaj alpaman cutin tigrachun, Ismaelta paipa aillucunandi jichushca pambaman urai apamungapa.

3 Yalishca jipa ñuca, Nefi, ñuca huauquicunahuan, cutin purircanchi, rircanchi jichushca pambata Jerusalénman vichai ringapa.

4 Yalishca jipa ñucanchi Ismaelpaj huasiman vichai rircanchi, ñucanchi Ismaelpa ñavipi alicachi tucurcanchi shinaca ñucanchica Apunchijpaj shimicunata paiman parlarcanchi.

5 Yalishca jipa Apunchijca Ismaelpaj shunguta amujyachirca, paipaj huasiucupuracunatapash, shinaca paicuna ñucanchihuan jichushca pambaman ñucanchi taitapaj facha huasiman urai rirca.

6 Yalishca jipa ñucanchi jichushca pambata rinajujpica, riqui Lamán, Lemuel, Ismaelpaj ishcai ushicuna, Ismaelpaj ishcai churicuna paicunapaj aillucunapash, ñucanchita na cazurca; ari, ñucata Nefi, Samta, paipaj taita, Ismaelta, paipaj huarmitapash, paipaj cutishuj quimsa ushicunatapash.

7 Yalishca jipa chai na cazuipi, paicuna Jerusalénpaj alpaman tigrangapa munarca.

8 Cunan ñuca, Nefi, paicunapaj shinlli shungucunamanda llaquiyarcani, caimanda paicunaman parlarcani, nishpa, ari, Lamánda, Lemuelta: riqui canguna ñuca rucu huauquicuna canguichu, imashpata canguna shinllipacha shungu canguichi, ñausapacha cangunapaj entendimientocunapi, cangunaca minishtishcanguichi ñuca, cangunapaj jipa huauqui, cangunaman parlachun, ari, cangunapaj shuj ejemplo cachun?

9 Imashpata canguna Apunchijpaj shimita na cazushcanguichi?

10 Imashpata canguna cungashcanguichi canguna Apunchijpaj shuj ángelta ricushcata?

11 Ari, imashpata canguna Apunchij jatun cuzascunata cangunamanda rurashcata cungashcanguichi, Labánpaj maquicunamanda ñucanchita cacharishcata, ñucanchi tandachishca quilcashcacunata apamushcatapash?

12 Ari, imashpata canguna cungashcanguichi Apunchijca tucui cuzascunata rurai ushan paipaj munashcahuan, runacunapaj huahuacunaman, shina paipi feta churashpaca? Chaimanda, paipilla fielcuna cashunchi.

13 Shina ñucanchi paipilla fielcuna cashpaca, cushapacha nishca alpata ñucanchi chasquishunchi; canguna yachanguichi shuj shamuj punllapi Apunchijpaj shimica Jerusalénda tucuchinamanda pactachishca canga; tucui cuzascuna Apunchij parlashcata Jerusalén tucuchinamanda pactachishcapacha canga.

14 Riqui, Apunchijpaj espíritu ñalla saquinga paicunahuan macanajunshna catinata; riqui, paicuna achil villachijcunata na cazurca, Jeremíasta cárcelman shitarca. Ñuca taitata paicuna causaita quichungapa munarca, paicuna llactamanda llujchingacaman.

15 Cunan riqui, ñuca cangunaman nini Jerusalénman tigrashpaca cangunapash paicunahuan huañunguichiman carca. Cunan, canguna llactaman vichai rinata munashpaca, ñuca parlashca shimicunata yarichi, rishpaca cangunapash huañunguichi; Apunchijpaj espíritu ñucata caita cangunaman parlachun tangahuarca.

16 Yalishca jipa, imaura ñuca, Nefi, ñuca huauquicunaman cai shimicunata parlajpica, paicuna ñucata fiñarca. Yalishca jipa paicuna ñucata japingapa munarca, riqui, paicuna ninandapacha fiñashca carca, cabiacunahuan huatahuarca, paicuna ñuca causaita quichungapa munarca, jichushca pambapi ñucata saquishpa sacha animalcuna micuhuachun.

17 Ashtahuangari yalishca jipa Apunchijta achil mañarcani, nishpa: Oh Apunchij, ñuca fe quiquinbi caimanda, ñuca huauquicunapaj maquicunamanda cacharichihuai, ari, ñucaman shinllicaita cuhuai cai huatashcacunata fitingapa maijan ñucata charinajun.

18 Yalishca jipa imaura cai shimicunata nishca cajpi, riqui, ñuca maquicunata chaquicunatapash huatashcacuna fitirimurca, ñuca huauquicunapaj ñaupapi shayarircani, paicunaman cutin parlarcani.

19 Yalishca jipa paicuna cutin fiñahuarca, japingapa munarca; riqui ashtahuangari shuj Ismaelpaj ushicunamanda, ari, paipaj mamapash, shuj Ismaelpaj churicunamandapash, ñuca huauquicunata ninanda mañarca, shinaca paicunapaj shungucuna amujyarca; paicuna ñuca causaita quichungapa munaita saquirca.

20 Yalishca jipa paicuna llaquiyashcacuna carca, paicunapaj na ali ruraicunamanda, shinaca paicuna ñuca ñaupapi cungurishpa ninanda mañahuarca ñuca paicunata perdonachun paicuna ñucata imata rurashcamanda.

21 Yalishca jipa ñuca paicunata tucui shungu perdonarcani tucui paicuna ñucata rurashcamanda, paicunata cutin yarichircani paicuna perdónmanda achil mañachun Apunchij paicunapaj Diosta. Yalishca jipa paicuna rurarca. Paicuna Apunchijta mañashca jipa ñucanchi cutin ri callarircanchi ñucanchi taitapa facha huasiman.

22 Yalishca jipa ñucanchica ñucanchi taitapa facha huasiman urai shamurcanchi. Jipaman ñuca ñucapaj huauquicuna Ismaelpaj tucui huasimandapash ñuca taitapa facha huasiman urai shamujpica, paicunapaj Apunchij Diosta pagui nirca; paicuna sacrificiota curca paiman ofrendacunata rupachircapash.