Nefipaj Callari Quilcashca
Paipaj Reinado Achil Yachachishcapash
Lehipaj shuj tandachishpa quilcashca paipaj huarmi Saríahpajpash, paipaj chuscu churicunapash, shutichishca, (rucumanda callarishpa) Lamán, Lemuel, Sam, Nefipash. Apunchijca Lehiman Jerusalénpaj alpamanda llujshi nishpa villan, imashpa pai runacunaman paicunapaj na ali ruraicunamanda achil villarca paicuna huañuchingapa munan. Pai quimsa punllacunata jichushca pambapi paipa aillucunahuan purirca. Nefi paipaj huauquicuna cumbajpi Jerusalénpaj alpaman judíocunapaj quilcashcacunamanda tigran. Paicunapaj llaquiricunamanda tandachishpa quilcashca. Paicuna Ismaelpaj ushicunahuan cazaran. Paicuna aillucunata pushashpa jichushca pambaman rin. Paicunapaj llaquiricuna llaquicunapash jichushca pambapi. Paicunapa maita purishcacuna. Paicuna jatun yacucunaman shamun. Nefipaj huauquicuna paita na cazun. Pai paicunata pandachirca, shuj barcota rurarca. Paicuna chai pushtuta Ashtacapacha Tiaj nishpa shutichirca. Paicuna jatun yacucunata cushapacha nishca alpaman yalirca, ashtahuanbash. Cai can Nefipaj tandachishpa quilcashcamanda; shuj shimipica, ñuca Nefi cai tandachishca quilcashcacunata quilcarcani.
1 Capítulo
Nefi paipa llacta tandachishpa quilcashcacunata callarin—Lehi achil muscuipi ricun shuj nina pilarta shuj achil villana quilcashcamanda liin—Pai Diosta alicachin, Mesías shamunata villan, Jerusalén tucurinatapash achil villachin—Pai Judíocunahuan na ricunayachishpa cati tucurca. Nara 600 C.Ñ.
1 Ñuca, Nefi, ali taitacunamanda nacirimushcani, caimanda ñuca taitapa tucui yachajushcacunata yachachihuarca; ñuca causai punllacunapi ashtaca llaquicunata ricushcani, shina cajpipash Apunchijca tucui ñuca causai punllacunapi ashtacapacha shinllichihuashca; ari, shuj jatun yachajushcacunata alicaita Diospaj na villashcacunapash yachaj chayashcani, caimanda ñucapaj imashna causashcacunata tandachishpa quilcashcacunata rurani.
2 Ari, ñuca taitapaj shimirimaipi quilcani shuj tandachishca quilcashcacunata rurani, chaicunaca Judíocunapaj yachajushcacunami, egipciocunapaj shimirimaipash.
3 Ñuca cai tandachishca quilcashca ñuca rurashca na llulla cajta yachanimi; caitaca ñuca maquihuanbacha rurani; caita ñuca yachajushcacunahuan rurani.
4 Caimanda yalishca jipa chaira callaripi Sedequíaspaj reinado callari huata, Judápaj jatun mandaj, (ñuca taita, Lehi, tucui paipaj causana punllacunata Jerusalénpi causarcami); chai huatapillata shamurca tauca achil villachijcuna, runacunaman arrepentirinatapacha villachishpa, nacashpaca cai jatun llacta Jerusalénca tucuchishca canga.
5 Chaimanda yalishca jipa ñuca taita, Lehi, purishpa rijushpa achil mañarca Apunchijta, ari, tucui shunguhuanbacha, paipaj llactapuracunamanda.
6 Yalishca jipa pai Apunchijta achil mañajujpica, shuj nina pilar shamurca shuj rumi jahuapi paipa ñaupapi ricurirca; pai ashtacata ricurca uyarcapash; cuzascunata pai ricuimanda uyaimandapash manllashpa chujchurcapachami.
7 Yalishca jipa Jerusalénpi paipaj huasiman tigrarca; paipaj samana pushtupi paillata urmarca, espírituhuan apai tucushpa cuzascunata pai ricushca caimanda.
8 Espírituhuan apai tucushca caimanda, pai shuj achil muscuipi pushai tucurca, chaipica jahua pacha pascarijta ricurca, pai ricurcapashmi Dios paipa jatun tiarinapi tiajujta, mashna cajta na yachai ángelcunahuan muyushca paicunapa Diosta cantashpa adorashpa layapi.
9 Yalishca jipapash pai ricurca Shuj chaupi jahua pachamanda uriajumujta, pai ricurcapashmi paipa punchapamba caica chaupi punlla inditapash yali punchapamba carca.
10 Paica cutishuj chunga ishcaicunatapash paita catinajujta ricurca, paicunapaj punchalla caica jahua pachapi lucerocunatapash yalishca carca.
11 Paicuna uriajumushpa rirca alpa jahuallapi; callarijca shamushpa ñuca taitapa ñaupapi shayarirca, paiman shuj quilcashcata curca, paita liichun mandarca.
12 Yalishca jipa pai liijujpica, paica Apunchijpaj espírituhuan junda carca.
13 Pai liirca, nishpa: ay, ay quiquin Jerusalén, ñuca quiquinba millanayaicunata ricumurcani! Ari, ñuca taita tauca cuzascunapash Jerusalénmanda liirca—caica tucuchishca cagrijtapash, chaipi causajcunapash; tauca huañuchi tucunga espadahuan, taucacuna Babiloniaman huatai tucushcashna apai tucunatapash.
14 Yalishca jipa imaura ñuca taita liimanda tauca jatun juyaillapacha cuzascunata ricuimanda, pai tauca cuzascunata Apunchijman caparirca; cashna laya: Jatun juyaillapachami quiquinba rurashcacunaca, Oh Tucui Ushaita Charij Apunchij Dios! Quiquinba jatun tiarinaca caru jahua pachacunapimi, quiquinba ushaipash, alicaipash, llaquinapash tucui cai pachapi causajcuna jahuapimi can; quiquin llaquij caimanda, quiquinga maijan quiquinbaman shamujcunataca na tucurichun saquinguichu!
15 Cashna laya ñuca taitapaj shimi rimaica carca paipaj Diosta alabajuipi; paipaj alma ninanda cushijuimanda, paipaj tucuilla shungu jundashca carca, cuzascunata imata pai ricushca caimanda, ari, imata paiman Apunchij ricuchishca caimanda.
16 Cunan ñuca, Nefi, mana ruranichu shuj tucuilla tandachishpa quilcashcata cuzascunamanda imata ñuca taita quilcashcata, pai quilcarca tauca cuzascunata imata pai achil ricuicunapi muscuicunapipash imata ricushcata; imata pai achil villachishcata rimashcatapash paipaj huahuacunaman, chaicunataca ñuca tucuilla tandachishpa quilcashcata mana rurashachu.
17 Ashtahuangari shuj tandachishpa quilcashcata ñuca causai punllacunapi rurashcacunata ñuca rurasha. Riqui, Ñuca shuj tandachishcata ñuca taitapaj tandachishca quilcashcacunamanda rurani, jirru fangacunapi imatami ñuca maquihuanbacha rurashcani; chaimanda, ñuca taitapaj quilcashcacunata tandachishca jipa shuj tandachishpa quilcashcata ñucapaj causaimanda rurashami.
18 Chaimanda, ñuca munani quiquinguna yachachun, Apunchijca ñuca taita Lehiman tauca juyaillapacha cuzascunata ricuchishca jipa, ari, Jerusalénda tucuchinamanda, riqui paica runacunaman llujshishpa, paicunaman ima cuzascunata imata pai ricushcata uyashcatapash achil villana yachachitapash callarirca.
19 Yalishca jipa Judíocunaca paita na cazushpa asirca, cuzascunamanda imata paicunamanda testificarca, pai ciertopacha paicunapaj na ali ruraicunamanda millanayaicunamandapash testificarca; pai ima cuzascunata imata pai quilcashcapi liirca, shuj Mesías shamunata punchalla ricuchishcapash, cai pachapaj jatun causachinatapashmi testificarca.
20 Judíocuna imaura cai cuzascunata uyashpa paicuna paita fiñarca; ari, imashna punda achil villachijcunatashna, picunatami paicuna llujchishpa cacharca, rumihuan pigashpa, huañuchishpapash; paicuna paipaj causaita quichungapa munarca, ashtahuangari riqui, ñuca Nefi, quiquingunaman ricuchigrini Apunchijpaj shungumanda llaquinaca tucui picunapata pai ajllashcacuna can, paicunapa femanda, paicunata shinllichingapa cacharirina ushaita charingacaman.