1 Yalishca jipa ñuca, Nefi, Apunchijhuan parlashca jipa tigrarcani, ñuca taitapa facha huasiman.

2 Yalishca jipa pai parlahuarca, nishpa: riqui ñuca shuj muscuita muscushcani, chaipimi Apunchijca ñucata mandahuarca quiquin quiquinbaj huauquicunahuan Jerusalénman tigrana canguichi.

3 Caimanda riqui, Labán Judíocunapaj quilcashcacunata charin ñuca punda taitacunapaj genealogíacunatapash, chaicunaca bronce jirru fangacunapimi quilcashca.

4 Caimanda, Apunchijca mandahuarca quiquin quiquinbaj huauquicunapash Labánpaj huasiman rina canguichi, quilcashcacunata mascaichi, chaicunata cai jichushca pambaman apamuichi.

5 Cunan, riqui quiquinbaj huauquicuna huashariman, nishpa caica shuj shinlli cuzasmi maijan paicunamanda ñuca minishtishcani; shinapash riqui ñuca paicunamanda na minishtishcanichu, ashtahuangari Apunchijpaj rurachunbacha saquishcacunacami.

6 Caimanda ri, ñuca churi, quiquinga Apunchijhuan shinllichi tucushca cangui, quiquin na huasharimashcamanda.

7 Yalishca jipa ñuca, Nefi, ñuca taitata nircani: Ñuca risha rurashapash Apunchijpaj cuzascunata rurachunbacha mandashcata, caitaca ñuca yachani Apunchijca rurachunbacha saquishcacunataca na cunllu runacunapaj huahuacunamanga, pai shuj ñanda paicunaman nara alichishpaca paicunata mandashca cuzascunataca pactachi ushachun.

8 Yalishca jipa imaura ñuca taita uyashca carca cai shimicunata pai ninandapacha cushijurca, pai yachaimanda Apunchijpaj achilyachishca ñuca cajta.

9 Ñuca, Nefi, ñuca huauquicunapash jichushca pambata ri callarircanchi, ñucanchipaj facha huasicunahuan, jahua Jerusalénpaj alpaman ringapa.

10 Yalishca jipa imaura ñucanchi jahua Jerusalénpaj alpaman rishpaca, ñuca, ñuca huauquicunapash caishuhuan chaishuhua tapurircanchi.

11 Ñucanchi ricurcanchi maijanmi Labánpaj huasiman rinata. Yalishca jipa suertita Lamánpa urmarca; Lamánca Labánpaj huasiman rishpa yaicurca, paica parlarca paihuan paipa huasipi tiajujpi.

12 Pai Labánpaj fangacunata mañarca chaicunaca bronce jirru fangacunapi quilcashca carca, chaicunaca ñuca taitapaj genealogíata charirca.

13 Riqui, yalishca jipa Labánga millayarca, paipaj ñaupamanda llujchishpa calpachirca; paica quilcashcacunata pai na charichun munarca. Chaimanda, paita nirca: Riqui quiquinga shuj shuhua cangui, ñuca quiquinda huañuchigrini.

14 Ashtahuangari Lamán pacajushpa paipaj ñaupamanda calparca, Labán ima cuzascunata rurashcata, ñucanchiman nirca. Ñucanchi ninanda llaquiyai callarircanchi, ñuca huauquicuna ña ñuca taitapaman jichushca pambapi tigragrinajurca.

15 Ashtahuangari riqui ñuca paicunata nircani: imashna Apunchij causan, imashna ñucanchipash causanchi, ñucanchi ñucanchipaj taitapaman jichushca pambapi na urai rishunchichu imaura pactachingacaman Apunchij imata ñucanchita mandashcata.

16 Chaimanda, fielcuna cashunchi Apunchijpaj rurachunbacha saquishcacunata alichishpa; caimanda ñucanchi taitapaj chasquina alpaman urai jacuchi, riqui pai curita culquitapash saquirca, tucui laya charishcacunatapash. Apunchijpaj rurachunbacha saquishcacunamanda pai tucui caicunata rurarca.

17 Pai yachaimanda Jerusalénca tucuchishca cana cajpi, runacunapaj na ali ruraicunamanda.

18 Riqui, paicuna Achil villachijpa shimicunata na chasquirca. Chaimanda, imashpapash ñuca taita chai alpapillata cashpaca paita chai alpamanda llujshichun mandashca jipa, riqui, pai huañunmanbash carca. Chaimanda, pai chai alpamanda llujchi tucui minishtirishcapacha carca.

19 Riqui, Diospi jatun yachaimi ñucanchi cai quilcashcacunata apamuna, ñucanchi ñucanchipaj huahuacunaman ñucanchipaj taitacunapaj shimi rimaicunata alchishpa charingapa;

20 Ashtahuangari ñucanchi paicunaman alchishpa chari ushangapa shimicunata imatami parlashca carca tucuilla achil villachijcunapa shimicunahuan, chaicuna cushca carca Diospa espírituhuan ushaihuanbash, imaura cai pacha callarishcamanda, cunan punllacaman.

21 Yalishca jipa cashna laya shimi rimaicunahuan ñuca huauquicunata yarichircani, paicunaca fielcuna cachun Diospa rurachunbacha saquishcacunata alichishpa.

22 Yalishca jipa ñucanchi ñucanchipaj chasquina alpaman urai rircanchi, ñucanchi curi culquita juyailla cuzascunatapash tandachircanchi.

23 Cai cuzascunata tandachishca jipa, ñucanchi cutin Labánpaj huasiman rircanchi.

24 Yalishca jipa ñucanchi Labánpaman yaicurcanchi, paita mañarcanchi ñucanchiman cuchun quilcashcacunata chaicuna bronce jirru fangacunapi quilcashca carca, chaicunamanda ñucanchipa curi, culqui, tucui juyailla cuzascunatapash paiman cuna carcanchi.

25 Yalishca jipa Labán ñucanchipa charishcacunata ricurca, caicunaca alipacha carca, pai ninanda munarca, shinashpa ñucanchita canllaman calpachirca, paipa runacunata ñucanchita huañuchichun cachamurca, shinashpa pai ñucanchipa charishcacunahuan quidangapa.

26 Yalishca jipa ñucanchi Labánpaj runacunamanda ñaupashpa llujshircanchi, ñucanchi munai na munai churai tucurcanchi ñucanchipaj charishcacunata huashaman saquingapa, chaicuna Labánpaj maquipi urmarca.

27 Yalishca jipa ñucanchica jichushca pambaman calparcanchi, Labánpaj runacuna ama ñucanchita japichun, ñucanchi shuj rumi ucupi pacajurcanchi.

28 Yalishca jipa Lamán ñucahuan millai carca, shinallata ñuca taitahuanbash; Lemuelpash shinallata carca, pai Lamánpaj shimicunata uyaimanda. Chaimanda Lamán Lemuelpash ñucanchita shinlli shimicunata rimarca, paicunapaj jipa huauquicunata, paicuna shuj varahuan huajtarcapashmi.

29 Yalishca jipa imashna paicuna ñucanchita shuj varahuan huajtajujpi, riqui Apunchijpaj shuj ángel shamushpa paicunapa ñaupapi shayarirca, pai paicunata parlarca, nishpa: imashpata quiquinba jipa huauquita shuj varahuan huajtanguichi? Nachu yachanguichi Apunchijca paita ajllashca cangunapa mandaj cachun, caicuna cangunapa na ali ruraicunamanda? Riqui canguna Jerusalénman cutin rina canguichi, Apunchijca Labánda cangunapaj maquipi cunga.

30 Ángelca ñucanchita parlashca jipa, rirca.

31 Ángel rishca jipa, Lamán Lemuelpash cutin huasharimai callarirca, nishpa: imashnashi Apunchijca Labánda ñucanchipaj maquipi cunga? Riqui, paica shuj shinlli runami, paica pichachungata mandaita ushan, ari, pichachungatapash paica huañuchita ushan; shinashpa imashpa na ñucanchita?