1 Tan natan pilalek ko a nakabatan yo komon, a kasumpal a si amak, a si Lehi, sinampotan to la so pamprofesiya to nipaakar ed boleg to, agawa a say Katawan nansalita ed sikato lamet, ya inkuan to ya ag manepeg ed sikato, si Lehi, ya awiten to so boleg to ed kalawakan a mambokbukor; balet a saray lalaki ya anak to so nepeg a mañgala ra na anak a bibii ya asawaen da, pian komon naparakel da so boleg da ed Katawan diman ed dalin a sipan.

2 Tan agawa a say Katawan ingangan to ed sikato a siak, Nephi, tan saray agagik, ya ompawil kami lamet ed dalin na Jerusalem, tan awiten mi si Ishmael tan say boleg to dia ed kalawakan.

3 Tan agawa a siak, Nephi, lamet, kaibak so saray agagik, bineltang mi so kalawakan a mamaarap ed Jerusalem.

4 Tan agawa a linma kami ed abong nen Ishmael, tan agamoran mi so maabig ed arap nen Ishmael, makaseñgeg a sinalita mi ed sikato so saray salita na Katawan.

5 Tan agawa a say Katawan pinalemek to so puso nen Ishmael, tan ontan met saray kabobung to, kanian akiolop ira ed sikami a nambaroy ya amaarap ed kalawakan ya ompugta ed abong-abong ya abel nen ama mi.

6 Tan agawa a legan mi a mambabaroy ed kalawakan, nia si Laman tan si Lemuel, tan duara ed saray anak a bibii nen Ishmael, tan duara ed saray anak a lalaki nen Ishmael tan saray boleg da, so inmalsa sumpa ed sikami; on, sumpa ed siak, Nephi, tan si Sam, tan si ama ra, a si Ishmael, tan say asawa to, tan saraman so arum a talora ya anak to a bibii.

7 Tan agawa a dia ed saman a gulo, pilalek da la so ompawil ed dalin na Jerusalem.

8 Tan natan siak, Nephi, lapu ed apaermen ak ed awet na saray puso ra, dia ed onia nansalita ak ed sikara, a nankuan, on, angan dia ed kinen Laman tan si Lemuel: Nia, sikayo so papañguloan ya agagik, tan panon ya ontan la so awet na kapusoan yo, tan mapalalo so inkabulag na kanunotan yo, a nakaukolan ni a siak, a malangwer ya agi yo, so mansalita ed sikayo, on, tan mañgipasen na pañgaligan yo?

9 Panon a sikayo so ag dinmeñgel ed salita na Katawan?

10 Panon a sikayo so akalingwan a sikayo so akanengneng na angel na Katawan?

11 On, tan panon a sikayo so akalingwan ed saray ankakabaleg a beñgatla a ginawa na Katawan ed sikatayo, ed impañgilaban to ed sikatayo ed lima nen Laban, tan ontan met pian nagamoran tayo so kasulatan?

12 On, tan panon a sikayo so akalingwan a say Katawan nayarian to a gawaen so amin a beñgatla unong ed linawa to, ya onkana ed saray anak na totoo, no agamilen da so pananisia ed sikato? Dia ed onia, sikatayo so mansiansia ed sikato.

13 Tan no matolok itayo ed sikato, nagamoran tayo so dalin na sipan; tan nakabatan yo ed saray arapen a panaon a say salita na Katawan nasumpal nipaakar ed kaderal na Jerusalem; lapu ed amin a beñgatla a sinalita na Katawan nipaakar ed kaderal na Jerusalem so andi-saew a nasumpal.

14 Petepeteg, say Espiritu na Katawan ag mambayag so piayam to ed sikara; makapaermen, ag da inawat so saray profeta, tan si Jeremias imbantak da ed pañgawan. Tan nampilalekan da ya ekalen so bilay nen amak, ya akaseñgeg na impanagdag da ed sikato ed paway na saman a dalin.

15 Natan nia, ikuan ko ed sikayo no ompawil kayo ed Jerusalem pati sikayo met so ompatey a siñga sikara. Tan natan, no wala so pampilian yo, onla kayo ed saman a dalin, tan nunoten yo so saray sinalitak ed sikayo, no onla kayo ompatey kayo met; lapu ed onia say Espiritu na Katawan pipiliten to ak pian mansalita ed sikayo.

16 Tan agawa a sanen siak, Nephi, nibalikas ko so saraya a salita ed saray agagik, nampasnok ira ed siak. Tan agawa a nilimaan da ak, tan nia, mapalalo so pasnok da, tan binalor da ak na lubir, a nampilalekan da ya ekalen so bilay ko, pian taynan da ak ed kalawakan a kanen na saray monanakap.

17 Balet agawa a nampikasi ak ed Katawan, a nankuan: O Katawan, unong ed pananisiak a wala ed sika, ilaban mo ak ed lima na saray agagik; on, angan iter mo ed siak so biskeg pian napaksot ko so saraya a lubir ya akabalor ed siak.

18 Tan agawa a sanen nibesñgaw ko so saraya a salita, nia, say taker naokbar ed saray limak tan saray salik, tan tinmalindeg ak ed arapan na saray agagik, tan nansalita ak lamet ed sikara.

19 Tan agawa a nampasnok ira ed siak lamet, tan labay da ak a limaan; balet nia, sakey ed saray bibii ya anak nen Ishmael, on, tan si ina to met, tan sakey ed saray anak a lalaki nen Ishmael, so akikasi ed saray agagik, makaseñgeg ya apalemek da so puso ra; tan sikara so tinmoda ed pilalek da ya ekalen so bilay ko.

20 Tan agawa a nanermen ira, lapu ed saray karelmeñgan da, ya asabi ni a tinmewek ira ed arap ko, tan kinerew da a pirdonaen ko ra ed saray beñgatla a ginawa ra sumpa ed siak.

21 Tan agawa a dia ed arap-arapan pinirdonak ira ed saray ginawa ra, tan imbagak ed sikara a mampikasi ra ed Katawan a Dios da ya onkerew na pirdona. Tan agawa a saya so sinumpal da. Tan kayari ra a nampikasi ed Katawan intuloy mi lamet so nambaroy ya amaarap ed abong-abong ya abel nen amak.

22 Tan agawa ya akasabi kami ed abong-abong ya abel nen amak. Tan kayari a siak tan saray agagik tan amin ya kabobung nen Ishmael so akasabi ed abong-abong ya abel nen amak, sikara so añgiter na pisasalamat ed Katawan a Dios da; tan añgisaklang ira na bagat tan pinoolan a bagat ed sikato.