1 Tan agawa a kayari na impampilalek ko a nakabatan so saray beñgatla ya anengneng nen amak, tan lapu ed pananisiak a say Katawan ipakabat to so saraya ed siak, sanen manyodyurong ak a manmomotektek ed dili a pusok naawit ak ed arawi dia ed Espiritu na Katawan, on, dia ed mapalalo ya atagey a palandey, a kapiganman ag ko ni anengneng, tan kapiganman ag ko ni agatinan.

2 Tan say Espiritu inkuan to ed siak: Nia, anto so pampilalekan mo?

3 Tan inkuan ko: Pilalek ko a nanengneng so saray beñgatla ya anengneng nen amak.

4 Tan say Espiritu inkuan to ed siak: Manisia ka a si amam anengneng to so kiew a sinalita to?

5 Tan kuan ko: On, kabat mo a manisia ak ed amin a salita nen amak.

6 Tan sanen nibalikas ko so saraya a salita, say Espiritu so inmeyag ed maksil a voces, a nankuan: Hosanna ed Katawan, say sankaatageyan a Dios; lapu ed sikato so Dios ed lapag na amin a dalin, on, iñgen dia ed tagey na amin. Tan mapalar ka, Nephi, lapu ed manisia ka ed Anak na sankaatageyan a Dios; dia ed ontan, nanengneng mo so saray beñgatla a pampilalekan mo.

7 Tan nengneng mo saya a beñgatla so niiter ed sika ya onkana a sakey a tanda, a dia ed kayarim a nanengneng so kiew a nambuñga na saman so atawayan nen amam, nanengneng mo met so sakey a too a mampapaleksab a manlapu ed tawen, tan sikato so tasian mo; tan kayarim a tasian paneknekan mo a sikato so Anak na Dios.

8 Tan agawa a say Espiritu inkuan to ed siak: Nengneng mo! Tan ninengneng ko tan anengneng ko so sakey a kiew; tan saya so kaolibay na kiew ya anengneng nen amak; tan say karakepan to arawi ya angapo so mipara, on, mapalalo ed karakepan; tan say puti to so apalabsanan to so puti na sinursor a nieve.

9 Tan agawa a kayari ya anengneng ko so kiew, inkuan ko ed Espiritu: Amuriak so impanengneng mo ed siak a kiew a saya so sankablian ed amin.

10 Tan inkuan to ed siak: Anto so pilalek mo?

11 Tan inkuan ko ed sikato: Say pakapikabat ko ed kabaliksan to nia—lapu ed akisalita ak ed sikato a siñga sakey a too a mansasalita; tan anengneng ko a say indeñgan to so sakey a too; balet angaman ontan, kabat ko a sikato so Espiritu na Katawan; tan sikato so nansalita ed siak a siñga sakey a too a misasalita ed sananey.

12 Tan agawa ya inkuan to ed siak: Nengneng mo! Tan ninengneng ko a siñga sikato so nenengneñgen ko, tan sikato so ag ko anengneng; lapu ed sikato so naandi ed arapan ko.

13 Tan agawa a ninengneng ko tan amuriak so baleg a ciudad na Jerusalem, tan saray arum ni a ciudad. Tan anengneng ko so ciudad na Nazaret; tan dia ed ciudad na Nazaret anengneng ko so sakey a virgen, tan sikato so mapalalo ed limgas tan puti.

14 Tan agawa ya anengneng ko so katawenan ya alokasan; tan sakey ya angel so linmasor tan nanalagey ed arapan ko; tan inkuan to ed siak: Nephi, anto so nanenengneng mo?

15 Tan inkuan ko ed sikato: Sakey a virgen, a sankaganganaan tan malimgas ed amin na saray virgen.

16 Tan inkuan to ed siak: Kabat mo so panagkawalo na Dios?

17 Tan inkuan ko ed sikato: Kabkabat ko ya inaro to so saray anak to; angaman ontan, ag ko kabat so kabaliksan na saraya ya amin a beñgatla.

18 Tan inkuan to ed siak: Nia, say virgen a sikato so anengneng mo so ina na Anak na Dios, unong ed inkalaman.

19 Tan agawa ya anengneng ko a sikato so iniarawi ed Espiritu; tan kayari a sikato so niarawi ed Espiritu ed baetan na panaon say angel nansalita ed siak a nankuan: Nengneng mo!

20 Tan ninengneng ko tan amuriak so virgen lamet, a sankaawit to so sakey ya ogaw ed saray taklay to.

21 Tan say angel inkuan to ed siak: Nengneng mo so Cordero na Dios, on, angan say Anak na Andi-angaan ya Ama! Kabat mo so kabaliksan na kiew ya anengneng nen amam?

22 Tan siak so inmebat ed sikato, a nankuan: On, saya so aro na Dios, a nitayak ed puso na saray anak na totoo; dia ed ontan, saya so nepeg a pampilalekan ed amin a beñgatla.

23 Tan sikato so nansalita ed siak, a nankuan: On, tan saya so sankagayagaan ed kamarerua.

24 Tan kayari to a sinalita so saraya a beñgatla, inkuan to ed siak: Nengneng mo! Tan ninengneng ko, tan amuriak so Anak na Dios a linma ya akilimog ed saray anak na totoo; tan anengneng ko a dakel so dinmakmumo ed sali to tan sikara so añgigalang ed sikato.

25 Tan agawa ya anengneng ko a say tibukel a balatyang, ya anengneng nen amak, sikato so salita na Dios, ya ompugta ed subol na mabilay a danum, odino dia ed kiew na bilay; a saraya a danum say kabaliksan to so say aro na Dios; tan anengneng ko met so kiew na bilay a say kabaliksan to aro na Dios.

26 Tan say angel inkuan to lamet ed siak: Nengneng mo tan muriam so panagkawalo na Dios!

27 Tan ninengneng ko tan amuriak so Mananundon na mundo, a sikato so sinalita nen amak; tan amuriak met so profeta a mañgiparaan na dalan sakbay ed sikato. Tan say Cordero na Dios so linma tan nampabiniag ed sikato; tan kayari to ya abiniagan, anengneng ko ya alokasan so tawen, tan say Espiritu Santo so linmeksab a nanlapu ed tawen tan nanayam ed sikato ed nengneng na sakey a malapati.

28 Tan anengneng ko a sikato so linma a nampupulong ed saray totoo, ed pakapanyari tan baleg a gloria; tan saray karaklan so atiptipon a nankakasakey ya ondeñgel ed sikato; tan anengneng ko a sikato so imbantak da ed paway manlapu ed limog da.

29 Tan anengneng ko met so labindua a manomtumbok ed sikato. Tan agawa a sikara so naawit a niarawi ed Espiritu manlapu ed arapan ko, tan sikara so ag ko la anengneng.

30 Tan agawa a say angel akisalita lamet ed siak a nankuan: Nengneng mo! Tan ninengneng ko, tan amuriak so saray katawenan a linmukas lamet, tan anengneng ko so saray angeles ya onlalasur ed saray anak na totoo; tan nantalima ed sikara.

31 Tan sikato so nansalita lamet ed siak, a nankuan: Nengneng mo! Tan ninengneng ko, tan amuriak so Cordero na Dios a manliliber ed limog na saray anak na totoo. Tan anengneng ko so baleg a karaklan na totoo a mansasakit, tan saray manlilikna na amin a nengneng na sakit, tan saray awalaan na demonyo tan mauges ya espiritu; tan say angel nansalita tan impanengneng to ya amin so saraya a beñgatla ed siak. Tan sikara so apaabig ed panamegley na pakapanyari na Cordero na Dios; tan saray demonyo tan saray mauges ya espiritu so apapaway ira.

32 Tan agawa a say angel nansalita lamet ed siak, a nankuan: Nengneng mo! Tan ninengneng ko tan amuriak so Cordero na Dios, a sikato so inala na saray totoo; on, say Anak na angapo so angaan a Dios so inokom na mundo; tan anengneng ko tan paneknekan ko.

33 Tan siak, Nephi, anengneng ko a sikato so nibayubay ed krus tan inatey lapu ed saray kasalanan na mundo.

34 Tan kayari a sikato so pinatey anengneng ko so karaklan ed dalin, so atiptipon a nankakasakey ya onlaban sumpa ed saray apostoles na Cordero; tan onia so impantawag na angel na Katawan ed saray labindua.

35 Tan say karaklan ed dalin so nantitipon a nankakasakey; tan anengneng ko a sikara so wala ed loob na baleg tan maawang a paalagey, a siñga saman so paalagey ya anengneng nen amak. Tan say angel na Katawan so nansalita lamet ed siak, a nankuan: Nengneng mo so mundo tan say kakabatan to; on, nia say kailalakan na Israel so atiptipon a nankakasakey ya onlaban sumpa ed saray labindua ya apostoles na Cordero.

36 Tan agawa a saya so anengneng ko tan paneknekan ko, a say baleg tan maawang a paalagey so kinon na mundo; tan saya so atumba, tan say inkatumba to mapalalo ed kinakasil. Tan say angel na Katawan so nansalita lamet ed siak, a nankuan: Onia so kaderal na amin a bansa, sankakanayon, salita, tan totoo, ya onlaban sumpa ed saray labindua ya apostoles na Cordero.