1 Tan natan agawa a kayari a siak, Nephi, sinampotan ko so pansasalitak ed saray agagik, nia inkuan da ed siak: Imbagam ed sikami so saray mairap a beñgatla, a dakdakel nen say nayarian mi ya itepel.

2 Tan agawa ya inkuan ko ed sikara a kabat ko a nansalita ak na ambelat a beñgatla sumpa ed saray marelmeng, unong ed katuaan; tan saray matunong sikara so sinekderan ko, tan pinaneknekan ko a sikara so nitanduro ed sampot ya agew; dia ed ontan, saray makasalanan ipasen da so katuaan a mairap, lapu ed sikara so nasakitan ya anga ed otel.

3 Tan natan kaagian ko, no sikayo so matunong tan maabubon ya ondeñgel ed katuaan, tan saya so tumboken yo, pian sikayo so mankurang a maptek ed arap na Dios, dia ed ontan ag kayo ñguroñguro makaseñgeg ed katuaan, tan ikuan yo: Sika so mansasalita na saray ambelat a beñgatla sumpa ed sikami.

4 Tan agawa a siak, Nephi, binilin ko so saray kaagian ko ed amin a seet, ya onoren da so saray gangan na Katawan.

5 Tan agawa a nampaabeba ra ed inkasikara a dili ed arap na Katawan; lapu ed saya awalaan ak na gayaga tan baleg ya ilalo ed sikara, a mankurang ira ed dalan na inkamatunong.

6 Natan, amin so saraya a beñgatla so imbalikas tan agawa legan a si amak so nanayam ed abong-abong ya abel ed patar a tinawag to a Lemuel.

7 Tan agawa a siak, Nephi, inalak ya inasawa so sakey ed saray bibii ya anak nen Ishmael; tan ontan met na saray agagik, inala ra ya inasawa so saray bibii ya anak nen Ishmael; tan ontan met nen Zoram inasawa to so sankapañguloan a bii ya anak nen Ishmael.

8 Tan dia ed onia asumpal nen amak so amin a gangan ya initer na Katawan ed sikato. Tan ontan met, siak, Nephi, binendicionan ak na Katawan a mapalalo.

9 Tan agawa a say voces na Katawan nansalita ed si amak nen labi, tan ginangan to a dia ed kaimbuasan ituloy to la so pambaroy to ed kalawakan.

10 Tan agawa a sanen si amak so binmañgon ed kaimbuasan, tan amapaarap ed puerta na abong-abong ya abel, dia ed baleg a pankelaw to anengneng to ed dalin so sakey a malimpek a bola a nidumaroma so inkagawa to; a saya agawa ed atagey ya ori na gansa. Tan dia ed dalem na bola wala so duara a siñga dagom; tan say sakey itoturo to so dalan no iner so arapen mi ed kalawakan.

11 Tan agawa a tinipon mi so amin a beñgatla a nepeg mi ya awiten ed kalawakan, tan amin a nakdaan a napambilay ya initer na Katawan ed sikami; tan inala mi so amin a nengneng na bokel pian naawit mi ed kalawakan.

12 Tan agawa ya inala mi so saray abong-abong mi ya abel tan sinmipot kami ed kalawakan, dia ed basil na ilog na Laman.

13 Tan agawa a nambaroy kami ed loob na apatira ya agew a mampaarap ed mamaabalaten a bokig, tan impaalagey mi lamet so saray abong-abong mi ya abel; tan inñgaran mi so saman a pasen na Shazer.

14 Tan agawa ya inala mi so saray pabekang tan pana mi, tan linma kami ed kalawakan a mañganop na onkana ed saray boleg mi; tan kayari ya akapatey kami na onkana a kanen na saray boleg mi pinmawil kami lamet ed saray boleg mi a wala ed kalawakan, ed pasen na Shazer. Tan amawil kami lamet ed kalawakan, tan tinunton mi met lamlamang so sipor a dinalan mi, ya ag kami sinmian ed pasen a sankabonaan ed kalawakan, a miketeg ed asinger na Ambalañga a Dayat.

15 Tan agawa a nambaroy kami ed dakel ya agew, tan nampapatas kami na naakan ed dalan, ya inkana mi so saray pabekang tan pana mi tan saray bato tan saray palsot mi.

16 Tan tinumbok mi so pasen ya itoturo na bola, a saya so añgitunton ed sikami ed a sankabonaan a pasen ed kalawakan.

17 Tan kayari impambaroy mi ed loob na dakel ya agew, impaalagey mi so saray abong-abong mi ya abel ed loob na sakey a panaon, pian makapampainawa kami tan makagamor kami na pambilay na saray boleg mi.

18 Tan agawa a sanen siak, Nephi, linma ak a mañganop ya onkana a naakan, nia, apoter so pabekang ko, a saya so ginawa ed atagey ya uri na asiro; tan kayari ya apoter so pabekang ko, nia, saray agagik mamapasnok ira ed siak lapu ed inkaandi na pabekang ko, tan angapo la so napañgala mi na pambilay mi.

19 Tan agawa ya amawil kami ed saray boleg mi ya ag kami akala na pambilay, tan lapu ed mapalalo a banal, makaseñgeg ed impambaroy da, sikara so nanlikna na baleg a pankaukolan na naakan.

20 Tan agawa a si Laman tan si Lemuel tan saray lalaki ya anak nen Ishmael ginapoan da so manñguroñguro a mapalalo, lapu ed saray irap tan doknal ed kalawakan; tan ontan met nen amak ginapoan to la so manñguroñguro sumpa ed Katawan a Dios to; on, tan sikara ya amin mapalalo so ermen da, angan sikara so nanñguroñguro sumpa ed Katawan.

21 Natan agawa a siak, Nephi, lapu ed pati siak so manlilikna met a siñga saray agagik lapu ed inkaandi na pabekang ko, tan saray pabekang da met so naandian la na panagpinatan, ginmapo a mapalalo so irap, on, lapu ed saya ag kami la makaala na kanen mi.

22 Tan agawa a siak, Nephi, nansalita ak na dakel ed saray agagik, lapu ed pinaawet da lamet so saray puso ra, ya anga ed tinmoñgañga ra sumpa ed Katawan a Dios da.

23 Tan agawa a siak, Nephi, nangawa ak na pabekang a kiew, tan sakey a maptek a bislak, a pana; dia ed ontan, saya a pabekang tan pana so inawit ko, a kaiba so palsot tan saray bato. Tan inkuan ko ed si amak: Iner so laen ko a pañgalaan na naakan?

24 Tan agawa ya intepet to ed Katawan, lapu ed sikara so nampaabeba makaseñgeg ed saray salitak; lapu ed dakel a beñgatla so inkuan ko ed sikara ed angaan na pakayari na kamareruak.

25 Tan agawa a say voces na Katawan sinmabi ed si amak; tan sikato so mapalalo ya apampasnokan lapu ed saray impanñguroñguro to sumpa ed Katawan, lapu ed saya sikato so naawit ed kaaraleman na ermen.

26 Tan agawa a say voces na Katawan so nankuan ed sikato: Nengneng mo so bola, tan nengneng mo so saray beñgatla a nisulat.

27 Tan agawa a sanen si amak anengneng to so saray beñgatla a nisulat ed bola, sikato so tinmakot tan ginmiwgiw a mapalalo, tan ontan met ed saray agagik tan saray lalaki ya anak nen Ishmael tan kaasawaan mi.

28 Tan agawa a siak, Nephi, anengneng ko so saray manañgituro a wala ed bola so peteg a mankikimey unong ed pananisia tan seet tan panañgonor ya initer mi ed saraya.

29 Tan wala met so nisulat ed saraya a balo a kasulatan, a malinew a basaen, ya añgiter ed sikami na pakatalus nipaakar ed dalan na Katawan; tan saya so nisulat tan mansasalat ed panapanaon, unong ed pananisia tan seet ya initer mi ed saya. Tan dia ed onia nanengneng tayo a lapu ed melag a pamaakaran say Katawan nayarian to a paletawen so baleg a beñgatla.

30 Tan agawa a siak, Nephi, linma ak ed tuktok na palandey, unong ed itoturo na bola.

31 Tan agawa a dakel so naanopan ko ya atap ya ayayep, lapu ed saya akala ak na magenap a naakan ya onkana ed saray boleg mi.

32 Tan agawa a pinmawil ak ed saray abong-abong mi ya abel, a sankaawit ko so saray ayayep ya apatey ko; tan sanen anengneng da ak ya akaala na napambilay, agay la so kabaleg na gayaga da! Tan agawa a sikara so nampaabeba ed arapan na Katawan, tan añgiter ira na pisasalamat ed sikato.

33 Tan agawa ya intuloy mi so pambabaroy mi, tan nanakar kami a nampatuloy a siñga sanen gapo; tan kayari impambaroy mi ed dakel ya agew impaalagey mi lamet so saray abong-abong mi ya abel, pian ontonda kami ed loob na sakey a panaon.

34 Tan agawa ya inatey si Ishmael tan impumpon ed sakey a pasen a tatawagen a Nahom.

35 Tan agawa a saray bibii ya anak nen Ishmael so nanermen ira a mapalalo, lapu ed inkaandi na ama ra, tan lapu ed saray nilikna ra a kairapan ed kalawakan; tan sikara so nanñguroñguro sumpa ed si amak, lapu ed inawit to ra a nanlapu ed dalin na Jerusalem, tan inkuan da: Si ama mi so inatey la; on, tan dakel la so impanakar-akar mi ed kalawakan, tan dakel a kairapan so intepel mi, eras, inkapgaan, tan banal; tan kayari na saraya ya amin ya intepel mi sikami so ompatey ed kalawakan lapu ed eras.

36 Tan dia ed onia sikara so nanñguroñguro sumpa ed kinen amak, tan sumpa met ed siak; tan pilalek da la lamet so ompawil ed Jerusalem.

37 Tan si Laman inkuan to ed si Lemuel tan ontan met ed saray lalaki ya anak nen Ishmael; Nia, pateyen tayo si ama mi, tan ontan met nen agi mi a Nephi, a ginawa to a sikato so manañgoley tan bomabañgat tayo, lapu ed amta to sikatayo so pañguloan ya agagi to.

38 Natan, inkuan to a say Katawan akitungtong ed sikato, tan ontan met a saray angeles so nantalima ed sikato. Balet nia, kabat tayo a sikato so mantitila ed sikatayo; tan ibabaga to ed sikatayo so saraya a beñgatla, tan mankikimey na dakel a beñgatla ed panamegley na kasiliban to, pian napalikdo to so saray mata tayo, kanunotan tayo, ag la piga, ya nitunton to tayo ya iarawi ed ag-kabkabat a kalawakan; tan kayari ya itunton to tayo a niarawi, ninunot to a panmaliwen to so sikato a dili ya ari tan sakey a manañgoley ed sikatayo, pian nagawaan to ed sikatayo so unong ed linawa to tan panliketan to. Tan onia a kanengneñgan so ginawa nen agik a Laman a pamagalaw ed saray puso ra ed pasnok.

39 Tan agawa a say Katawan wala ed sikami, on, angan say voces na Katawan so sinmabi tan nansalita na dakel a salita ed sikara, tan nampasnok ed sikara na mapalalo; tan kayari a sikara so nampasnokan ed panamegley na voces na Katawan binmetel so pasnok da, tan nambabawi ra ed saray kasalanan da, makaseñgeg ed saya say Katawan pinalaboan to kami lamet na napambilay, kanian ag kami inatey.