1 Tan agawa a nambaroy kami lamet ed kalawakan; tan nanakar kami ed mamabukig a nanlapu la ed saman a panaon. Tan nankurang tan nanyakyak kami ed dakel a kairapan ed kalawakan; tan saray bibii nanaanak ira ed kalawakan.

2 Tan ontan la so kinabaleg na bendicion na Katawan ed sikami, ya angaman tariwa a karne so impambilay mi ed kalawakan, saray bibii so awalaan ira na dakel ya ipasoso ed saray anak da, tan mabiskeg ira, on, mipara ed saray lalaki; tan ginapoan da ya itepel so impambaroy da ya angapo so ñguroñguro.

3 Tan dia ed onia nanengneng tayo a saray gangan na Dios nakaukolan a nasumpal. Tan no ontan a saray anak na totoo onoren da so saray gangan na Dios iter ed sikara so tagano, tan pakasilen to ra, tan iter to so pakagawa pian nayarian da a sumpalen so beñgatla ya ingangan to ed sikara; dia ed ontan, initer to so pakagawa ya onkana ed sikami legan a nanayam kami ed kalawakan.

4 Tan sikami so nanayam ed loob na abayag a taon, on, angan walora a taon ed kalawakan.

5 Tan akasabi kami ed sakey a dalin a tinawag mi a Bountiful, lapu ed kinadakel na buñga tan ontan met ed atap a dilo; tan amin so saraya a beñgatla so imparaan na Katawan pian komon ag kami ompatey. Tan anengneng mi so dayat a tinawag mi na Irreantum, a, no ipatalus, dakel a danum.

6 Tan agawa ya impaalagey mi so saray abong-abong mi ya abel ed gilig na dayat; tan manwari a nanlikna kami na dakel a doknal tan dakel a kairapan, on, angan ontan la a kinadakel ya ag mi la nayarian ya isulat ya amin, apagayaga kami a mapalalo sanen akasabi kami ed gilig na dayat; tan tinawag mi so pasen a Bountiful, lapu ed kinadakel na saray buñga.

7 Tan agawa a kayari a siak, Nephi, sanen akapanayam ak ed dalin na Bountiful ed dakel ya agew, sinmabi so voces na Katawan, ed siak a nankuan: Alagey ka, tan onla ka ed palandey. Tan agawa ya inmalagey ak tan kinmalab ak ed palandey, tan tinmawag ak ed Katawan.

8 Tan agawa a say Katawan nansalita ed siak, a nankuan: Mangawa ka na sakey a bapor, unong ed kanengneñgan na ipanengneng ko ed sika, pian awiten ko so saray totoom ed basil na saraya a danum.

9 Tan inkuan ko: Katawan, iner so laen ko a pakarumogan na bato a wala so lauk to a balatyang a tunawen ko, pian makagawa ak na saray kagawaan a pangawak na bapor unong ed kanengneñgan ya impanengneng mo ed siak?

10 Tan agawa a say Katawan imbaga to ed siak no iner so laen ko a pakarumogan na bato a wala so lauk to a balatyang, pian makagawa ak na saray kagawaan.

11 Tan agawa a siak, Nephi, nangawa ak na pandayan a pansibok na apoy, a gawa ed katat na saray ayayep; tan kayarik a ginawa so panagsibok, pian wala so pansibok ed apoy, impangasgasan ko so duara a bato pian makagawa ak na apoy.

12 Tan say Katawan insebel to ed sikami so maparanay a pangawa na apoy, legan mi a mambabaroy ed kalawakan; tan inkuan to: Gawaen ko a masamit so saray naakan yo, pian ag yo la nakaukolan ya iluto;

13 Tan siak met so manmaliw a liwawa yo ed kalawakan; tan iparaan ko so arapen yo a dalan, no mansiansia kayo a mañgonor ed saray gangan ko; dia ed ontan, lapu ed saya no onoren yo so saray gangan ko itunton takayo ed dalin a sipan; tan nakabatan yo a siak so añgitunton ed sikayo.

14 On, tan say Katawan inkuan to met: Kayari yo a makasabi ed dalin a sipan, nakabatan yo a siak, so Katawan a Dios; tan siak, a Katawan, so añgilaban ed sikayo ed kaderal; on, tan siak so añgipaway ed sikayo ed dalin na Jerusalem.

15 Dia ed onia, siak, Nephi, nanseetan ko so panañgonor ed saray gangan na Katawan, tan binilin ko so saray agagik a managamil ira na katuoran tan seet.

16 Tan agawa a nangawa ak na saray kagawaan a nanlapu ed tinunaw ko a balatyang a wala ed saray bato.

17 Tan sanen saray agagik so anengneng da a ñgalñgali ak la mangawa na sakey a bapor, ginapoan da so manñguroñguro sumpa ed siak, a kuan da: Say agi tayo so sakey a luko, lapu ed say nunot to makagawa na sakey a bapor; on, tan nunot to met a nayarian to a baliwen so saraya a baleg a danum.

18 Tan dia ed onia so impansalita na saray agagik sumpa ed siak, tan pilalek da ya ag ira mansagpot, lapu ed ag ira manisia a makagawa ak na sakey a bapor; ni say manisia ra ya imbañgat ak na Katawan.

19 Tan natan agawa a siak, Nephi, mapalalo so ermen ko lapu ed awet na saray puso ra; tan natan sanen anengneng da a gagapoan ko so onermen sikara so nanliket ed saray puso ra, lapu ed saya sikara so nangayaga lapu ed siak, a kuan da: Kabat mi ya ag mo nayarian so mangawa na sakey a bapor, lapu ed kabat mi a kulang ka a tuloy ed talino a kanunotan; dia ed ontan, ag mo nayarian a gawaen so ontan la a kinabaleg a kimey.

20 Tan kaparpara ka nen ama tayo, a niarawi na makulang-kulang a kanunotan na puso to; on, intunton to itayo a pinmaway ed dalin na Jerusalem, tan nanakar-akar itayo ed kalawakan legan na saraya a dakel a taon; tan nairapan so saray bibii, lapu ed impanlukon da ed saray ugogaw; tan inanak da so saray anak ed kalawakan tan nantepel ira na amin a beñgatla, likud ed patey; tan maong ni iñgen no inatey la ra sakbay na impaway da ed Jerusalem nen say nantepel ira na onia a kairapan.

21 Nengneng mo, dia ed saraya a dakel a taon a nantepel tayo ed kalawakan, a saraya a panaon komon nikana tayo a magayaga so saray kayarian tayo tan saray dalin tayo a tawir; on, tan komon sikatayo so maliket.

22 Tan kabat tayo a saray totoo a wala ed dalin na Jerusalem so matunong a totoo; lapu ed oonoren da so saray tutuntonen tan kaptekan na Katawan, tan amin a gangan to, unong ed gangan nen Moises; dia ed ontan, kabat tayo a sikara so matunong a totoo; tan si ama tayo so inokom to ra, tan intunton to tayo ya onarawi lapu ed dineñgel tayo so saray salita to; on, tan say agi tayo a laki kaparpara to met. Tan onia a kanengneñgan na panagsalita so impanñguroñguro tan impandalem na agagik sumpa ed sikami.

23 Tan agawa a siak, Nephi, nansalita ak ed sikara, a nankuan: Manisia kayo kasi a kaamaan tayo, a sikara so anak na Israel, a nitunton ira a pinmaway a niarawi ed lima na saray taga-Egipto no ag ira dinmeñgel ed salita na Katawan?

24 On, ipasen yo kasi a sikara so nitunton a niarawi ed inkaaripen, no say Katawan ag to ginangan si Moises ya ipañgulo to ra ya ompaway ed inkaaripen?

25 Natan sikakabat kayo a saray anak na Israel so wala ed inkaaripen; tan sikakabat kayo met a sikara so apapairap ed kimey, a peteg makapaermen a sakbaten; dia ed ontan, sikakabat kayo a nakaukolan a saya so maong a beñgatla ya onkana ed sikara, a sikara so naawit ed paway na inkaaripen.

26 Natan kabat yo a si Moises so ginangan na Katawan a manumpal ed saman a baleg a kimey; tan kabat yo a dia ed panamegley na salita to say danum na Ambalañga a Dayat so abelsay dia tan diman, sikara so dinmalan ed amaga a dalin.

27 Balet sikakabat kayo a nalner so saray taga-Egipto ed Ambalañga a Dayat, a sikara so ñgayew nen Paraon.

28 Tan kabat yo met a sikara so pinakan na mana ed kalawakan.

29 On, tan kabat yo met a si Moises, dia ed panamegley na salita to unong ed pakapanyari na Dios a wala ed sikato, pinekpek to so bato, tan pinmaway so danum, pian saray anak na Israel naekal so inkapgaan da.

30 Tan manwari a sikara so intunton, na say Katawan a Dios da, tan Mananundon da, wala ed unaan da, a sikato so mañgipapañgulo ed agew tan mañgiiter na liwawa ed sikara no labi, tan gagawaen to so amin a beñgatla ya onkana ed sikara a nakaukolan na too ya awaten, pinaawet da so saray puso ra tan pinereñgan da so saray kanunotan da, tan sinmumlang ira sumpa ed si Moises tan sumpa ed tua tan mabilay a Dios.

31 Tan agawa ya unong ed salita to sikara so dineral to; tan unong ed salita to sikato so añgipañgulo ed sikara; tan unong ed salita to sikato so nangawa ed amin a beñgatla ya onkana ed sikara; tan angapo so saray beñgatla ya asumpal no ag lapu ed salita to.

32 Tan kayari ra a binaliw so ilog na Jordan ginawa to ra a makapanyari anga ed sinunson da so saray totoo ya ompaway ed saya a dalin, on, anga ed inkitaytayak da ed kadederal.

33 Tan natan, ipasen yo a saray totoo na saya a dalin, a wala ed dalin na sipan, a sikara so sinunson a pinapaway na saray ama tayo, ipasen yo kasi a sikara so matunong? Nia, ikuan ed sikayo, Andi.

34 Ipapasen yo kasi a saray ama tayo so lalo ya apili nen say sikara no sikara so matunong? Ikuan ko ed sikayo, Andi.

35 Nia nengneng yo, say Katawan pinabli to ya amin so laman a siñga saksakey; siopaman a matunong sikato so palaboan na Dios. Balet nengneng yo, saraya a totoo ag añgawat na balang sakey a salita na Dios, tan sikara so nagnap ed inkauges; tan say nagnap a sanok na Dios so wala ed sikara; tan say Katawan inayew to so dalin sumpa ed sikara, tan saya so binendicionan to ya onkana ed saray ama tayo; on, inayew to sumpa ed sikara ya onkana ed kadederal da, tan binendicionan to ya onkana ed saray ama tayo pian naala ra so pakayari ed tapew to nia.

36 Nengneng yo, say Katawan, pinalsa to so dalin pian napanayaman; tan pinalsa to so saray anak to pian kayarianen da so saya.

37 Tan ipatalindeg to so bansa a matunong, tan deralen to so saray bansa a marelmeng.

38 Tan ipañgulo to so saray matunong ed apili-pili a dalin, tan saray marelmeng sikara so dineral to, tan ayewen to so dalin makaseñgeg ed sikara.

39 Sikato so mañguoley ed tagey na katawenan, lapu ed saya so trono to, tan saya a dalin so toonan na saray sali to.

40 Tan aroen to so saray mañgawat a sikato so Dios da. Nia, inaro to so saray ama tayo, tan akipaknaan ed sikara, on, angan si Abraham, si Isaac, tan si Jacob; tan sinonunot ed saray paknaan a ginawa to; dia ed ontan, inawit to ra ya impaway ed dalin na Egipto.

41 Tan pinetek to ra ed kalawakan ed panamegley na tayukor to; lapu ed pinaawet da so saray puso ra, a siñga unong ed sikayo; tan say Katawan pinetek to ra lapu ed saray kaugesan da. Añgibaki na mandarlang tan mantekyab ya oleg ed limog da; tan kayari a sikara so akalat imparaan to so dalan pian natambal ira; tan say kimey a gawaen da so ontañgay ya onnengneng; tan lapu ed simpli na pananumpal odino inomay to nia, dakel so inaatey.

42 Tan pinaawet da so saray puso ra ed panapanaon, tan sinmumlang ira sumpa ed si Moises, tan sumpa met ed Dios; angaman ontan, sikakabat kayo a sikara so intunton na angapo a kapara a pakapanyari to anga ed dalin na sipan.

43 Tan natan, kayari na saraya ya amin a beñgatla, sinmabi so panaon a nanmaliw ira a marelmeng, on, dia ed ñgalñgali la ya inkagnap; tan ag ko kabat balet sikara ed saya ya agew ñgalñgali la ra naderal; lapu ed kabat ko ya onsabi so agew a sikara so naderal, likud ed pigara labat, a sikara so nitunton a niarawi ed inkadakep.

44 Dia ed ontan, say Katawan ginangan to si amak a nakaukolan to so ontaynan a mamaarap ed kalawakan; tan saray Judio pilalek da met ya ekalen so bilay to; on, tan sikayo met pilalek yo ya ekalen so bilay to; dia ed ontan, sikayo so managpatey ed saray puso yo tan sikayo so siñga sikara.

45 Sikayo so masiglat a mangawa na kaugesan balet matantan a makanunot ed Katawan a Dios yo. Anengneng yo la so sakey ya angel, tan akisalita la ed sikayo; on, nadñgel yo so voces to ed panapanaon; tan sikato so nansalita ed sikayo ed makalna a melag a voces, balet sikayo so ag makalikna, kanian ag yo alikna so saray salita to; dia ed ontan, sikato so nansalita ed sikayo ed siñga voces na karul, ya akaseñgeg na inmayegmeg na dalin a siñga ñgalñgali napaldua.

46 Tan kabat yo met a lapu ed makapanyari a salita to nayarian to a gawaen a say dalin so naandi; on, tan kabat yo a lapu ed salita to nayarian to a panmaliwen so pinmupukdol a pasen a mapalanas, tan saray mapalanas a pasen so paletaken to. O, sirin, akin nayarian yo ni a paaweten so saray puso yo?

47 Nengneng yo, say kamareruak so maermen ed irap na linawa lapu ed sikayo, tan say pusok manlilikna na sulit; mapaga ak ag la piga sikayo so nibantak ed ando la ya ando. Nia, napno ak ed Espiritu na Dios, tan say laman ko angapo la so biskeg to.

48 Tan natan agawa a sanen asalitak so saraya a salita sinmanok ira ed siak, tan pilalek da ya ibantak da ak ed kaaraleman na dayat; tan sanen inasingeran da ak a degkeman nansalita ak ed sikara, a nankuan: Dia ed ñgaran na Makapanyari a Dios, igangan ko ed sikayo ya ag yo ak didiwiten, lapu ed napno ak na pakapanyari na Dios, angan dia ed kaupot na laman ko; tan siopaman a mañgidapo na lima to ed siak so namagaan a siñga amagaan a boter; tan sikato so siñga angapo ed arapan na pakapanyari na Dios, lapu ed say Dios so mamakbak ed sikato.

49 Tan agawa a siak, Nephi, inkuan ko ed sikara ya ag la ra manñguroñguro sumpa ed si ama ra; ni say isiblet da ed siak so sagpot da, lapu ed say Dios ginangan to ak a mangawa na sakey a bapor.

50 Tan inkuan ko ed sikara: No say Dios so añgigangan ed siak a mangawa na amin a beñgatla nagawaan ko so saraya. No igangan to ed siak ya ibagak ed saya a danum, sika so ongawa a dalin, saya so manmaliw a dalin; tan no ibagak so saya so nagawa.

51 Tan natan, no say Katawan wala so ontan la kabaleg a pakapanyari, tan ginawa to so dakel a milagro ed limog na saray anak na totoo, panon sirin ya ag to ak nibañgat, pian makagawa ak na sakey a bapor?

52 Tan agawa a siak, Nephi, so nankuan na dakel a beñgatla ed saray agagik, lapu ed saya a sikara so akewkew tan ag ira makapibaliñgaan sumpa ed siak; ni say nitepel da a dapoan ak na lima da odino diwiten da ak ed saray gamet da, ed loob na dakel ya agew. Natan ag da nitepel a gawaen so saya ag la piga namagaan ira ed arapan ko, ontan la so pakapanyari na Espiritu na Dios; tan onia so agawa ed sikara.

53 Tan agawa a say Katawan inkuan to ed siak: Iunat mo so limam lamet ed saray agagim, tan ag ira namagaan ed arap mo, balet kigtoten ko ra, inkuan na Katawan, tan saya so gawaen ko, pian nakabatan da a siak so Katawan a Dios da.

54 Tan agawa ya iniunat ko so limak ed saray agagik, tan ag ira amagaan ed arap ko, balet say Katawan pinagiwgiw to ra unong ed salita ya imbalikas to.

55 Tan natan, inkuan da: Kabat mi a petepeteg a say Katawan wala ed sika, lapu ed kabat mi a say pakapanyari na Katawan so amagiwgiw ed sikami. Tan sikara so niparukol ed arapan ko, tan siak la lawari so igalang da, balet ag ko nitepel, ya inkuan ko: Siak so agi yo a laki, on, angan say agi yo a laki a yugtan; dia ed ontan, igalang yo so Katawan a Dios yo, tan pagalañgan yo so ama tan ina yo, pian ondukey so saray agew yo ed dalin ya iter na Katawan a Dios yo.