1 Tan agawa a say angel inkuan to ed siak: Nengneng mo, tan muriam so boleg mo, tan ontan met ed boleg na saray agagim. Tan siak so ninmengneng tan amuriak so dalin na sipan; tan anengneng ko so karaklan na totoo, on, angan siñga karakel na bilang na buer ed dayat.

2 Tan agawa ya anengneng ko so karaklan ya atiptipon a nankakasakey pian milaban, ed sakey sumpa ed sananey; tan anengneng ko so saray bakal, tan saray dalamurom na bakal, tan dakel a pampapateyan ed panamegley na espada ed limog na saray totook.

3 Tan agawa ya anengneng ko a dakel a kailalakan so inatey, unong ed kanengneñgan na saray bakal tan baliñgaan ed dalin; tan anengneng ko so dakel a ciudad, on, angan ag ko la abilang.

4 Tan agawa ya anengneng ko so sakey a kelpa na kabiluñgetan ed tapew na dalin na sipan; tan anengneng ko so saray kirmat, tan nadñgel ko so saray karul, tan yegyeg, tan amin a nengneng na magulo a tanol; tan anengneng ko so dalin tan saray baleg a bato, so apaldua; tan anengneng ko so saray kapalandeyan ya atomtumba ya apisaypisay; tan anengneng ko so saray patar na dalin so linmeletak; tan anengneng ko so dakel a ciudad so linmereg; tan anengneng ko so dakel ya apoolan na apoy; tan anengneng ko so dakel ya atomtumba ed dalin, lapu ed yegyeg.

5 Tan agawa kayari ya anengneng ko so saraya a beñgatla, anengneng ko so kelpa na biluñget, so linmabas a naekal ed tapew na dalin, tan nia, anengneng ko so karaklan ya ag niparukol lapu ed baleg tan makapataktakot a panañgokom na Katawan.

6 Tan anengneng ko so katawenan a linmukas, tan say Cordero na Dios ya onleleksab manlapu ed tawen; tan sikato so linmasor tan impanengneng to so inkasikato ed sikara.

7 Tan anengneng ko met tan paneknekan ko a say Espiritu Santo so dinmapo ed saray labindua ya arum; tan sikara so inordinan na Dios, tan apili.

8 Tan say angel nansalita ed siak, a nankuan: Nengneng mo so labindua a disipulos na Cordero, a sikara so apili a mantalima ed boleg mo.

9 Tan inkuan to ed siak: Nanunotan mo so labindua ya apostoles na Cordero? Nia sikara so mañgokom ed labindua a tribo na Israel; dia ed ontan, saray labindua a managtalima ed saray boleg mo so mañgokom ed sikara; lapu ed sika so wala ed kailalakan na Israel.

10 Tan saraya a labindua a managtalima a nanenengneng mo so mañgokom ed boleg mo. Tan, nia, sikara so matunong ed ando la ya ando; lapu ed pananisia ra ed Cordero na Dios say kawes da so pinmuti ed dala to.

11 Tan say angel inkuan to ed siak: Nengneng mo! Tan ninengneng ko, tan amuriak so talora a kailalakan so linmabas ed inkamatunong; tan say kawes da so amputi angan siñga say wala ed Cordero na Dios. Tan say angel inkuan to ed siak: Saraya so apaputi ed dala na Cordero, lapu ed pananisia ra ed sikato.

12 Tan siak, Nephi, anengneng ko met so dakel ed say komapat a kailalakan so linmabas ed inkamatunong.

13 Tan agawa ya anengneng ko so karaklan na dalin so atiptipon a nankakasakey.

14 Tan say angel inkuan to ed siak: Nengneng mo so boleg mo, tan ontan met ed say boleg na agagim.

15 Tan agawa ya anengneng ko tan amuriak so totoo na boleg ko ya atiptipon a nankakasakey sumpa ed boleg na saray agagik, tan sikara so atiptipon a nankakasakey pian milaban.

16 Tan say angel nansalita ed siak, a nankuan: Nengneng mo so subol na marutak a danum ya anengneng nen amam; on, angan say ilog ya asalita to; tan say kaaralem to nia so kaaralem na infierno.

17 Tan say kelpa na biluñget so saray tukso na demonyo, a mamulag ed saray mata, tan mamaawet ed puso na saray anak na totoo, tan itunton to ra ya iarawi ed saray maawang a dalan, pian sikara so naayew tan nabalang.

18 Tan say baleg tan maawang a paalagey, ya anengneng nen amam, so say andi-kana a kanunotan tan say kinon na saray anak na totoo. Tan sakey a baleg tan makapataktakot a kaaraleman so nambaetan da; on, angan say salita ed kaptekan na Andi-angaan a Dios, tan say Mesias a sikato so Cordero na Dios, a sikato so pinaneknekan na Espiritu Santo, nanlapu ed gapo na mundo anga ed saya a panaon, tan manlapu ed saya a panaon anga ed arapen tan anga ed ando la ya ando.

19 Tan legan a say angel so mansasalita na saraya a salita, amuriak tan anengneng ko a say boleg na agagik so sinmaluñgat sumpa ed boleg ko, unong ed salita na angel; tan lapu ed kinon na boleg ko, tan saray tukso na demonyo, anengneng ko a say boleg na agagik tinalo da so totoo na boleg ko.

20 Tan agawa ya amuriak, tan anengneng ko so totoo na boleg na agagik a tinalo ra so boleg ko; tan sikara so linma ed dakel a karaklan ed tapew na dalin.

21 Tan anengneng ko a sikara so atiptipon a nankakasakey ed karaklan; tan anengneng ko so bakal tan dalamurom na bakal ed limog da; tan dia ed bakal tan dalamurom na bakal anengneng ko a dakel a kailalakan so inatey.

22 Tan say angel inkuan to ed siak: Nengneng mo sikara so onlasay ed ag-pananisia.

23 Tan agawa ya anengneng ko, kayari a sikara so linmasay ed ag-pananisia nanmaliw ya andeket so baog da, tan makadimla, tan sakey a marutak a totoo, a napno na kañgirasan tan amin a nengneng na karumsisan.