1 Tan agawa a siak, Nephi, pinmawil ak a nanlapu ya akisalita ed Katawan, diman ed loob na abong-abong ya abel nen amak.

2 Tan agawa a sikato so nansalita ed siak, a nankuan: Nia nankugip ak na sakey a kugip, a dia ed saya say Katawan ingangan to ak a sika tan saray agagim so ompawil ed Jerusalem.

3 Tan nengneng mo, si Laban wala ed sikato so kasulatan na saray Judio tan say listaan na kapolian na saray inmuna ya atateng ko, tan saraya so nitatak ed saray piligo a gansa.

4 Dia ed ontan, say Katawan ingangan to ak a sika tan saray agagim a lalaki so onla ed abong nen Laban, tan anap yo so saray kasulatan, tan awit yo ra dia ed kalawakan.

5 Tan natan, nengneng mo saray agagim a lalaki sikara so ñguroñguro, a kuan da a sakey a mairap a beñgatla so nakaukolan ko ed sikara; balet nia saya so ag ko kinaukolan ed sikara, balet saya so sakey a gangan na Katawan.

6 Dia ed onia, onla ka anak ko, tan sika so palaboan na Katawan, lapu ed sika so ag nanñguroñguro.

7 Tan agawa a siak, Nephi, inkuan ko ed kinen amak: Onla ak tan gawaen ko so saray beñgatla ya ingangan na Katawan, lapu ed kabat ko a say Katawan ag mañgiter na saray gangan ed saray anak na totoo, likud no sikato so mañgiparaan na dalan ya onkana ed sikara ed panumpal da na beñgatla ya ingangan to ed sikara.

8 Tan agawa a sanen si amak nadñgel to so saraya a salita sikato so mapalalo a maliket, lapu ed kabat to a binendicionan ak na Katawan.

9 Tan siak, Nephi, tan saray agagik so nambaroy ed kalawakan, ya awit mi so saray abong-abong mi ya abel, ya onla ed dalin na Jerusalem.

10 Tan agawa sanen akasabi kami ed dalin na Jerusalem, siak tan saray agagik nankokonuan kami ed balang sinansakey.

11 Tan nambabagotan kami na kapalaran—no siopa ed sikami so onla ed abong nen Laban. Tan agawa say naplagan na kapalaran si Laman; tan si Laman so linma ed abong nen Laban, tan sikato so akitungtong nen akayurong ed dalem na abong to.

12 Tan kinaukolan to ed si Laban so saray kasulatan a nitatak ed piligo a gansa, a dia nilugan so listaan na kapolian nen amak.

13 Tan nengneng yo, agawa a nampasnok si Laban, tan sinunson to a pinapaway ed arapan to; tan ag to labay ya iter so saray kasulatan. Dia ed ontan, inkuan to ed sikato: Nengneng mo sakey ka a matakew, tan sika so pateyen ko.

14 Balet si Laman binmatik a tinmaynan ed kawalaan to, tan imbaga to so saray beñgatla a ginawa nen Laban, ed sikami. Tan ginapoan mi so onermen a mapalalo, tan saray agagik ñgalñgali la ra ompawil ed kinen amak diman ed kalawakan.

15 Balet nia inkuan ko ed sikara ya: Unong a mabilay so Katawan, tan sikatayo ni so mambibilay, ag itayo ompawil ed kinen ama tayo ed kalawakan anga ed nasumpal tayo so beñgatla ya ingangan na Katawan ed sikatayo.

16 Dia ed ontan, nepeg a sikatayo so matuor a manumpal ed saray gangan na Katawan; dia ed onia sikatayo so onla ed kawalaan na dalin a tawir nen ama tayo, tan nia intilak to so saray balitok tan pilak, tan amin a nengneng na kayamanan. Tan saya ya amin so ginawa to lapu ed saray gangan na Katawan.

17 Lapu ed kabat to a say Jerusalem so naderal, makaseñgeg ed inkarelmeng na saray totoo.

18 Tan nia, ag da inawat so salita na saray profeta. Dia ed ontan, no si amak so manayam ed saman a dalin kayari a sikato so nigangan ya ontaynan ed saman a dalin, nia, sikato met so ompatey. Dia ed ontan, nakaukolan a sikato so ontaynan ed saman a dalin.

19 Tan nia, kakabatan ed Dios a nakaukolan a nagamoran tayo so saraya a kasulatan, pian komon magnayon ya onkana ed saray anak mi so salita na saray ama mi;

20 Tan ontan met pian komon magnayon ed sikara so saray salita a nibalikas a nanlapu ed sañgi na saray masanto a profeta, a saraya so niawat ed sikara a nanlapu ed Espiritu tan pakapanyari na Dios, manlapu ed ingapo na mundo, ya anga ed saraya a panaon.

21 Tan agawa ya unong ed saya a pananalita akuyong ko so saray agagik, pian manmaliw ira komon a matuor ed panumpal ed saray gangan na Dios.

22 Tan agawa a sikami so linma ed dalin a tawir mi, tan tinipon mi so saray balitok mi, tan pilak mi, tan saray ankabli a beñgatla ed sikami.

23 Tan kayari mi a tinipon so saraya a beñgatla, linma kami lamet ed abong nen Laban.

24 Tan agawa a sikami so linma ed kinen Laban, tan kinaukolan mi ed sikato ya iter to ed sikami so saray kasulatan a saraya so nitatak ed piligo a gansa, dia ed onia iter mi ed sikato so saray balitok mi, tan pilak mi, tan amin ya ankabli a beñgatla ed sikami.

25 Tan agawa a sanen anengneng nen Laban so saray kayarian mi, tan saraya so mapalalo a dakel, sinmabi ibeg to ed saraya, a lapu ed saya sikami so sinunson to a pinapaway tan imbaki to so saray igagangan to a mamatey ed sikami, pian komon nagamoran to so saray kayarian mi.

26 Tan agawa a sikami so binmatik ed arap na saray igagangan nen Laban, tan apasuotan kami ya intilak mi so saray kayarian mi, tan saraya so naplag ed saray lima nen Laban.

27 Tan agawa a sikami so binmatik ed kalawakan, tan ag kami la naabot na saray igagangan nen Laban, tan sikami so inmamot ed uñgib na sakey a baleg a bato.

28 Tan agawa a si Laman nampasnok ed siak, tan ontan met ed kinen amak; tan ontan met si Lemuel, lapu ed dineñgel to so saray salita nen Laman. Dia ed ontan si Laman tan si Lemuel so nansalita ra na saray ansakit a salita ed sikami, a malangwer ya agagi da a lalaki, tan sikami so binakbak da na sakey a baston.

29 Tan agawa a sanen binakbak da kami na sakey a baston, bigla, sakey ya angel na Katawan so sinmabi tan tinmalindeg ed arap da, a nansalita ed sikara; a kuan to: Akin kasi bakbaken yo so malangwer ya agi yo a laki na sakey a baston? Ag yo kasi kabat a say Katawan sikato so pinili to a manañgoley ed sikayo, tan saya lapu ed saray karelmeñgan yo? Deñgel yo onla kayo lamet ed Jerusalem, tan say Katawan iawat to si Laban ed saray lima yo.

30 Tan kayari a nansalita so angel ed sikami, sikato so tinmaynan.

31 Tan kayari a say angel so tinmaynan, si Laman tan si Lemuel ginapoan da lamet so manñguroñguro, ya inkuan da: Panon a say Katawan iawat to si Laban ed saray lima tayo? Nengneng yo, sikato so sakey a mabiskeg a too, tan nayarian to ya igangan so limamplo, on, angan sarag to a pateyen so limamplo; dia ed ontan akin ya ag pati sikatayo?