1 Ut kik’ulman naq kiqachap wi’chik li qab’e sa’ li yamyookil ch’och’; ut chalen chaq sa’ li kutan a’an koob’eek jo’ sa’ xtiikal li releb’aal saq’e. Ut koob’eek ut koonume’ chiru naab’al li ch’a’ajkilal sa’ li yamyookil ch’och’, ut eb’ li qixaqil ke’alan k’uula’al sa’ li yamyookil ch’och’.

2 Ut k’a’jo’ xnimal li rosob’tesihom li Qaawa’ sa’ qab’een, jo’kan naq us ta kiqatzeka li rax tib’ sa’ li yamyookil ch’och’, eb’ li ixq sa’ qayanq kitz’aqlok xya’aleb’ xtu’ choq’ reheb’ lix kok’al, ut kaweb’ chaq rib’, relik chi yaal, chanchaneb’ ajwi’ li winq; ut ke’ok chixkuyb’al lix b’eenikeb’ chi ink’a’ neke’wech’in.

3 Ut chi jo’kan naqil naq tento te’tz’aqloq ru lix taqlahom li Dios. Ut wi taa’uxq naq eb’ li ralal xk’ajoleb’ li winq neke’xpaab’ lix taqlahom li Dios, a’an naxch’olaniheb’, ut naxk’eheb’ xmetz’ew, ut naxk’e li taak’anjelaq re naq te’ruuq chixb’aanunkil li k’a’ru kixtaqlaheb’ wi’; jo’kan naq kixk’e li nak’anjelak qe naq kookana chiru li yamyookil ch’och’.

4 Ut koowan aran chiru xnumik naab’al chihab’; relik chi yaal, waqxaqib’ chihab’ sa’ li yamyookil ch’och’.

5 Ut koowulak sa’ jun li ch’och’ Naab’alil kiqaye re, sa’ xk’ab’a’ xnaab’alil li ru che’ jo’ ajwi’ xya’al kab’ aran; ut chixjunil li k’a’aq re ru a’in kawresinb’il xb’aan li Qaawa’ re naq ink’a’ too’oso’q. Ut kiqak’e reetal li palaw, a’an Irreantum kiqaye re, ut chi k’utb’il xyaalalil li aatin, a’an k’iila ha’.

6 Ut kik’ulman naq kiqayiib’ li qamuheb’aal t’ikr chire li palaw; ut us ta kiqanumsi k’iila ch’a’ajkilal ut kooch’a’ajkiik chi naab’al, relik chi yaal, chi ink’a’ nokoru chixtz’iib’ankil chixjunil, kichal xsahil qach’ool chi numtajenaq naq koowulak chire li palaw; ut Naab’alil kiqaye re li na’ajej, xb’aan naq naab’al li na’uuchin aran.

7 Ut kik’ulman chirix naq laa’in, aj Nefi, kinwan chaq chiru xnumik k’iila kutan sa’ li ch’och’ Naab’alil, kichal lix yaab’ xkux li Qaawa’ wik’in, ut kixye: Waklin, ut ayu sa’ li tzuul. Ut kik’ulman naq kinwakli ut xkohin sa’ li tzuul, ut kin’elajin chiru li Qaawa’.

8 Ut kik’ulman naq li Qaawa’ kinraatina, ut kixye: Taayiib’ jun li jukub’, jo’ chanru li tink’ut chawu, re naq tink’ameb’ laa tenamit chixjunpak’alileb’ li ha’ a’in.

9 Ut laa’in kinye: At Qaawa’, toj b’ar tinxik re tintaw li pek ch’iich’ xsa’ re tinha’resi, re taaruuq tinyiib’ li k’anjeleb’aal re xyiib’ankil li jukub’ jo’ chanru li xak’ut chiwu?

10 Ut kik’ulman naq li Qaawa’ kixye we b’ar tinxik re xtawb’al li pek ch’iich’ xsa’, re taaruuq tinyiib’ li k’anjeleb’aal.

11 Ut kik’ulman naq laa’in, aj Nefi, kinyiib’ jun li waal re xwaalunkil li xam, rik’in lix tz’uumaleb’ li xul; ut chirix naq kinyiib’ li waal, re taawanq k’a’ru tinwaalu wi’ li xam, kink’otz chirib’ileb’ rib’ wiib’ chi pek re tinloch li xam.

12 Xb’aan naq li Qaawa’ toj aran ink’a’ kixkanab’ naq taqaloch li xam chi naab’al, naq toj koob’eek sa’ li yamyookil ch’och’; xb’aan naq kixye: Tink’e xki’al lee tzakemq, re naq ink’a’ teechiq;

13 Ut laa’inaq ajwi’ lee saqen sa’ li yamyookil ch’och’; ut tinkawresi li b’e cheru, wi taa’uxq naq teepaab’ lin taqlahom; jo’kan ut, a’ yaal jo’ chanru nekepaab’ lin taqlahom taak’ame’q eeb’e sa’ li yeechi’inb’il ch’och’; ut teenaw naq inb’aan laa’in naq k’amb’il eeb’e.

14 Relik chi yaal, ut li Qaawa’ kixye ajwi’ naq: Chirix naq xexwulak sa’ li yeechi’inb’il ch’och’, teenaw naq laa’in, li Qaawa’, Diosin; ut naq laa’in, li Qaawa’, kinkolok eere chiru li sache’k; relik chi yaal, naq kexink’am chaq sa’ li ch’och’ Jerusalen.

15 Jo’kan ut, laa’in, aj Nefi, kinyal inq’e chixpaab’ankileb’ lix taqlahom li Qaawa’, ut kinwaklesi xch’ooleb’ li was re naq tiikaqeb’ chi paab’ank ut yalb’ilaqeb’ xq’e.

16 Ut kik’ulman naq kinyiib’eb’ li k’anjeleb’aal rik’in li ch’iich’ li kiwisi chaq chi ha’resinb’il sa’ li pek.

17 Ut naq eb’ li was ke’ril naq ok we chixyiib’ankil jun li jukub’, ke’ok chixwech’inkil wix, ut ke’xye: Maak’a’ xna’leb’ li qiitz’in, xb’aan naq naxk’oxla naq naru chixyiib’ankil jun li jukub’; relik chi yaal, ut naxk’oxla ajwi’ naq naru chixq’axb’al li ninqi ha’ a’in.

18 Ut jo’ka’in naq eb’ li was ke’wech’ok chiwix, ut ke’raj naq ink’a’ te’k’anjelaq, xb’aan naq ink’a’ neke’xpaab’ naq ninru chixyiib’ankil jun li jukub’, chi moko ke’raj xpaab’ankil naq tzolb’ilin xb’aan li Qaawa’.

19 Ut anajwan kik’ulman naq laa’in, aj Nefi, kiraho’ inch’ool chi numtajenaq xb’aan xkawileb’ li raam; ut anajwan naq ke’ril naq ki’ok chi raho’k inch’ool, ke’saho’ sa’ raam, jo’kan naq ke’saho’ xch’ool sa’ inb’een, ut ke’xye: Xqanaw naq moko tatruuq ta chixyiib’ankil jun li jukub’, xb’aan naq xqanaw naq moko tz’aqal ta aanawom; jo’kan ut, ink’a’ tatruuq chixb’aanunkil xnimal a’ k’anjel a’an.

20 Ut laa’at chanchanat li qayuwa’, jalb’ehinb’il xb’aan xmajelal lix k’oxlahom xch’ool; relik chi yaal, a’an xk’am qab’e chi elk chaq sa’ li ch’och’ Jerusalen, ut koob’eek chiru li yamyookil ch’och’ chiru li k’iila chihab’ a’in; ut ke’k’anjelak li qixqilal, chi wankeb’ sa’ yu’am; ut ke’alan k’uula’al sa’ li yamyookil ch’och’ ut ke’xnumsi chixjunil li k’a’aq re ru, ka’aj chik li kamk ink’a’; ut us raj wi’chik choq’ reheb’ naq ke’kam chi maji’ neke’el chaq Jerusalen, chiru naq ke’xnumsi li ch’a’ajkilal a’in.

21 K’e reetal, chiru li k’iila chihab’ a’in kiqanumsi rahilal sa’ li yamyookil ch’och’, ut kooru raj sa’ li kutan a’an chixyalb’al xsahil li k’a’aq re ru qe sa’ xch’och’il li qeechanihom; relik chi yaal, kiru raj kisaho’ sa’ qach’ool.

22 Ut naqanaw naq li tenamit li ke’wan sa’ li ch’och’ Jerusalen a’aneb’ jun tenamit tiik xch’ool; xb’aan naq ke’xpaab’ lix k’uub’anb’il aatin ut lix raqb’a-aatin li Qaawa’, ut chixjunil lix taqlahom, jo’ chanru lix chaq’rab’ laj Moises; jo’kan ut, naqanaw naq a’aneb’ jun li tenamit tiik xch’ool; ut li qayuwa’ kiraqok aatin chirixeb’, ut kixk’am qab’e chi elk xb’aan naq koo’ab’in chiru li raatin; relik chi yaal, ut li qiitz’in chanchan ajwi’ a’an. Ut jo’ka’in li raatineb’ li was naq ke’xwech’i qix ut koohe’xjit.

23 Ut kik’ulman naq laa’in, aj Nefi, kiwaatinaheb’, ut kinye: Ma nekepaab’ tab’i’ naq eb’ li qayuwa’, a’eb’ li ralal xk’ajol laj Israel, ke’k’ame’ raj xb’e chi elk chaq sa’ ruq’eb’ laj Egipcio wi ta ink’a’ ke’ab’in chiru li raatin li Qaawa’?

24 Relik chi yaal, ma nekek’oxla tab’i’ naq ke’k’ame’ raj xb’e chi elk chaq chi moosil, wi ta li Qaawa’ ink’a’ kixtaqla laj Moises naq tixk’ameb’ xb’e chi elk chaq chi moosil?

25 Anajwan nekenaw naq eb’ li ralal xk’ajol laj Israel ke’wan chaq chi moosil, ut nekenaw naq ke’teneb’aak li k’anjel sa’ xb’eeneb’, li ra chaq xnumsinkil; jo’kan naq nekenaw naq tento naq us choq’ reheb’ naq ke’k’ame’ chaq chi moosil.

26 Anajwan nekenaw naq laj Moises kitaqlaak xb’aan li Qaawa’ chixb’aanunkil li nimla k’anjel a’an; ut nekenaw naq rik’in li raatin kijache’ ru lix ha’il li Kaqi Palaw chixka’pak’alil, ut ke’nume’ chiru chaqi b’e.

27 A’b’anan nekenaw naq ke’ok laj Egipcio chi ha’ sa’ li Kaqi Palaw, a’aneb’ ut li teep aj pleet re laj Farahon.

28 Ut nekenaw naq ke’k’ehe’ chi tzekank rik’in mana sa’ li yamyookil ch’och’.

29 Relik chi yaal, ut nekenaw ajwi’ naq laj Moises, rik’in li raatin jo’ chanru lix wankil li Dios li kiwan rik’in, kixsak’ li pek, ut ki’el chaq ha’, re naq eb’ li ralal xk’ajol laj Israel te’xkub’si xchaqi-eel.

30 Ut us ta k’amb’ileb’ xb’e, ut yoo li Qaawa’ lix Dios, laj Tojoleb’ rix, chi xik chiruheb’, ut chixk’amb’aleb’ xb’e chi kutan ut chixk’eeb’aleb’ xsaqen chi q’eq, ut chixb’aanunkil chixjunil li k’a’aq re ru choq’ reheb’ li aajel ru choq’ reheb’ li winq xk’ulb’al, eb’ a’an ke’xkawob’resi li raameb’ ut ke’xmutz’ob’resi lix k’a’uxleb’, ut ke’xhob’ laj Moises jo’ ajwi’ li tz’aqal ut li yo’yookil Dios.

31 Ut kik’ulman naq jo’ chanru li raatin kixsacheb’; ut jo’ chanru li raatin kixk’ameb’ xb’e; ut jo’ chanru li raatin kixb’aanu chixjunil li k’a’aq re ru choq’ reheb’; ut maak’a’ k’a’ru kib’aanuman, ka’ajwi’ xb’aan li raatin.

32 Ut chirix naq ke’xq’ax li nima’ Jordan kixk’e xkawileb’ xmetz’ew choq’ re ralinasinkileb’ chaq li ralal xk’ajol li ch’och’, relik chi yaal, re xjek’inkileb’ choq’ re li sache’k.

33 Anajwan ut, ma nekek’oxla tab’i’ naq eb’ li ralal xk’ajol li ch’och’ a’in, li ke’wan sa’ li ch’och’ li yeechi’inb’il, li ke’alinasiik chaq xb’aaneb’ li qayuwa’, ma nekek’oxla naq tiikeb’ ta chaq xch’ool? K’ehomaq reetal, ninye eere naq ink’a’.

34 Ma nekek’oxla tab’i’ naq eb’ li qayuwa’ q’axal usilanb’ilaqeb’ ta raj ru chiruheb’ wi ta tiikeb’ chaq xch’ool a’an? Ninye eere naq ink’a’.

35 K’ehomaq reetal, li Qaawa’ naril sa’ junajil chixjunil li tz’ejwalej; li ani tiik xch’ool usilanb’il xb’aan li Dios. A’b’an k’ehomaq reetal, li tenamit a’in ke’xtz’eqtaana chaq chixjunqal li raatin li Dios, ut q’ano’jenaqeb’ chaq sa’ li maa’usilal; ut kiwan xtz’aqalil lix josq’il li Dios sa’ xb’eeneb’; ut li Qaawa’ kixmajewa li ch’och’ choq’ reheb’, ut kirosob’tesi choq’ reheb’ li qayuwa’; relik chi yaal, kixmajewa choq’ reheb’ a’an re te’sache’q, ut kirosob’tesi choq’ reheb’ li qayuwa’ re te’xk’ul xwankil sa’ xb’een.

36 K’ehomaq reetal, li Qaawa’ kixyo’ob’tesi li ruchich’och’ re naq wanq ani taawanq chi sa’; ut kixyo’ob’tesiheb’ li ralal xk’ajol re te’reechani.

37 Ut a’an naxwaklesi jun li tenamit tiik xch’ool, ut naxsacheb’ lix tenamiteb’ laj maak.

38 Ut a’an naxk’ameb’ xb’e li tiikeb’ xch’ool sa’eb’ li chaab’il ch’och’, ut eb’ laj maak naxsacheb’, ut naxmajewa choq’ reheb’ li ch’och’, sa’ xk’ab’a’eb’.

39 A’an nataqlan chi taqenaq sa’ choxa, xb’aan naq a’an xk’ojarib’aal, ut li ruchich’och’ a’in, a’an xxaqleb’aal li roq.

40 Ut a’an naxraheb’ li te’k’uluq re choq’ xDios. K’ehomaq reetal, a’an kixraheb’ li qayuwa’, ut ki’ok sa’ sumwank rik’ineb’, relik chi yaal, rik’in laj Abraham, laj Isaak, ut laj Jakob; ut kijultiko’ re li sumwank li kixk’uub’ chaq; jo’kan naq kixk’ameb’ chaq sa’ li ch’och’ Egipto.

41 Ut kixq’useb’ sa’ li yamyookil ch’och’ rik’in lix xuq’; xb’aan naq ke’xkawob’resi li raameb’, jo’ xeb’aanu ajwi’ laa’ex; ut li Qaawa’ kixq’useb’ sa’ xk’ab’a’ lix maa’usilaleb’. Kixtaqla li xik’anel k’anti’ wankeb’ xxamlel sa’ xyanqeb’; ut chirix naq ke’tiwe’, kixk’uub’ jun li b’e re te’k’irtesiiq; ut li k’anjel li tento te’xb’aanu, a’an ilok; ut rik’in naq saqen ru li b’e a’an, malaj naq moko ch’a’aj ta, ke’wan naab’al li ke’oso’.

42 Ut ke’xkawob’resi li raameb’ chi jo’q’ehaq, ut ke’xhob’ laj Moises, ut jo’kan ajwi’ li Dios; a’b’anan nekenaw naq ke’k’ame’ xb’e xb’aan lix wankilal maak’a’ xjuntaq’eetankil, sa’ li ch’och’ li yeechi’inb’il.

43 Ut anajwan, chirix chixjunil li k’a’aq re ru a’in, xchal xq’ehil naq ke’ok chi aj maak, relik chi yaal, ka’ch’in chik ma neke’q’ano’ rik’in; ut ink’a’ ninnaw ma okeb’ ta re chi sache’k sa’ li kutan a’in; xb’aan naq ninnaw naq tento taachalq chi yaal xkutankil naq te’sache’q; ka’ajwi’ junjunq ink’a’, li te’k’ame’q b’an chi preexil.

44 Jo’kan ut, li Qaawa’ kixtaqla lin yuwa’ naq taaxik chiru li yamyookil ch’och’; ut eb’ laj Judio ke’xsik’ ajwi’ risinkil lix yu’am; relik chi yaal, ut laa’ex ajwi’ kesik’ risinkil lix yu’am; jo’kan ut, laa’ex aj kamsinelex sa’ eech’ool, ut chanchanex ajwi’ jo’ eb’ a’an.

45 Laa’ex seeb’ex chixb’aanunkil li maa’usilal, a’ut timilex chi jultiko’k eere li Qaawa’ lee Dios. Eerilom jun li anjel, ut a’an kexraatina; relik chi yaal, xerab’i lix yaab’ xkux chi yalaq jo’q’e; ut a’an kexraatina rik’in jun li ch’ina xyaab’ kuxej q’un na’aatinak, a’b’anan laa’ex numenaq eereek’ahom, chi ink’a’ kexru chireek’ankil li raatin; jo’kan naq kexraatina chanchan xyaab’ li kaaq, li kixk’e chi chiq’ok li ch’och’ chanchan naq ok raj re chixjachb’al rib’ sa’ xyi.

46 Ut nekenaw ajwi’ naq rik’in lix wankil lix nimajwal aatin naru naxtaqla li ruchich’och’ naq taa’oso’q; relik chi yaal, ut nekenaw naq rik’in li raatin naru naxkanab’ chi helho li buq’ux aj na’ajej, ut chi joroxinb’il li helhookil na’ajej. K’a’ put b’i’ naq nekexru chi kawuk chi jo’kan sa’ lee raam?

47 K’ehomaq reetal, naxjach rib’ li waam rik’in yot’e’k eeb’aan, ut naraho’ lin ch’ool; ninxuwak maare anchal textz’eqe’q chi junajwa. K’ehomaq reetal, nujenaqin rik’in lix Musiq’ li Dios, jo’kan naq maak’a’ xmetz’ew lin xaqalil.

48 Ut anajwan kik’ulman naq chirix naq kinye li aatin a’in ke’josq’o’ wik’in, ut ke’raj raj inkutb’al sa’ xchamal li palaw; ut naq ke’chal chixk’eeb’al li ruq’ sa’ inb’een kiwaatinaheb’, ut kinye: Sa’ lix k’ab’a’ li nimajwal Dios, nekexintaqla naq ink’a’ tineech’e’, xb’aan naq nujenaqin rik’in lix wankil li Dios, toj reetal natawa intib’el xb’aan; ut ani tixk’e li ruq’ sa’ inb’een taachaqiq jo’ chanchan ajwi’ jun li chaqi pach’aya’; ut taawanq jo’ raj maak’a’ chiru lix wankilal li Dios, xb’aan naq li Dios tixsak’.

49 Ut kik’ulman naq laa’in, aj Nefi, kinye reheb’ naq ink’a’ chik te’xwech’i rix lix yuwa’, chi moko chik te’xkanab’ k’anjelak wik’in, xb’aan naq li Dios kinixtaqla naq tinyiib’ jun li jukub’.

50 Ut kinye reheb’: Wi ta li Dios tinixtaqla chixb’aanunkil chixjunil li k’a’aq re ru tinruuq raj chixb’aanunkil. Wi ta a’an tinixtaqla naq tinye re li ha’ a’in, chat-ok choq’ ch’och’, taa’ok raj choq’ ch’och’, ut wi ta tinye, taa’uxmanq raj.

51 Ut anajwan, wi li Qaawa’ wan xnimal lix wankilal a’in, ut kixk’anjela xk’ihal li sachb’a-ch’oolej a’in sa’ xyanqeb’ li ralal xk’ajoleb’ li winq, k’a’ put ru naq ink’a’ naru chintzolb’al, re tinyiib’ jun li jukub’?

52 Ut kik’ulman naq laa’in, aj Nefi, kinye k’iila na’leb’ reheb’ li was, jo’kan naq ke’sache’ xna’leb’ ut ink’a’ ke’ru chinwech’b’al; chi moko ke’chal xch’ool chixk’eeb’al li ruq’ sa’ inb’een, chi moko chinch’e’b’al rik’in li ru’ujeb’ li ruq’, chiru xnumik k’iila kutan. Anajwan, ink’a’ ke’chal xch’ool chixb’aanunkil a’in, maare anchal te’chaqiq chiwu, xb’aan naq q’axal nim xkawilal lix Musiq’ li Dios, ut jo’kan kik’anjelak chaq rik’ineb’.

53 Ut kik’ulman naq li Qaawa’ kixye we: Ye’ wi’chik laa wuq’ reheb’ laa was, ut ink’a’ te’chaqiq chawu, a’b’an laa’in tinchiq’eb’, chan li Qaawa’, ut a’in tinb’aanu, re te’xnaw naq laa’in li Qaawa’ lix Dios.

54 Ut kik’ulman naq laa’in kinye’ li wuq’ reheb’ li was, ut ink’a’ ke’chaqik chiwu; a’b’an li Qaawa’ kixchiq’eb’, jo’ chanru ajwi’ li aatin li kixye chaq’.

55 Ut anajwan, eb’ a’an ke’xye: Naqanaw chi ch’olch’o naq li Qaawa’ wan aawik’in, xb’aan naq naqanaw naq a’an lix wankil li Qaawa’ li xchiq’ok qe. Ut ke’xkut rib’ chi ch’och’ chiwu, ut okeb’ raj re chinloq’oninkil, a’b’an ink’a’ kinkanab’eb’, ut kinye: Laa’in lee riitz’in, relik chi yaal, iitz’inb’ejin cheru; jo’kan ut, cheloq’oni li Qaawa’ lee Dios, ut cheroxloq’i lee na’ lee yuwa’, re naq te’najto’q ru lee kutan sa’ li ch’och’ tixk’e eere li Qaawa’ lee Dios.