1 Ma sa oo ina fetalai mai le agelu ia te a’u: Vaai ia, ma tagai i au fanau, ma fanau foi a ou uso. Ma sa ou vaai ma iloa atu le laueleele o le folafolaga; ma sa ou iloa atu motu o tagata, ioe, e peiseai ua tusa lo latou toatele ma oneone o le sami.

2 Ma sa oo ina ou iloa atu ua faapotopoto faatasi motu o tagata e tau, o le tasi e faasaga i le isi; ma sa ou vaai i taua, ma tala o taua, ma faasauaga tele i le pelu i totonu o o’u tagata.

3 Ma sa oo ina ou vaai ua mavae atu tupulaga e tele, e tusa ai ma taua ma finauga i le laueleele; ma sa ou vaai i aai e tele, ioe, sa matuai tele lava, sa ou lē mafai ona faitaulia i latou.

4 Ma sa oo ina ou vaai i se puao o le pogisa i luga o le laueleele o le folafolaga; ma sa ou vaai i uila, ma sa ou faalogo i faititili, ma mafuie, ma ituaiga uma o gogolo eseese; ma sa ou vaai i le eleele ma papa, ua mavaevae i latou; ma sa ou vaai i mauga ua solo ma ua nutililii; ma sa ou vaai i fanua laugatasi o le eleele, ua mavaevae i latou; ma sa ou vaai i aai e tele ua gogoto ifo; ma sa ou vaai i le tele ua mu i le afi; ma sa ou vaai i le tele ua solo ifo i le eleele, ona o lona galulu tele.

5 Ma sa oo ina ua uma ona ou vaai i nei mea, sa ou vaaia le puao o le pogisa, ua alu ese atu mai luga o le lalolagi; ma faauta, sa ou vaaia motu o tagata o e sa le’i pa’u’ū i le tetele ma le mata’utia o faamasinoga a le Alii.

6 Ma sa ou vaai ua avanoa le lagi, ma le Tamai Mamoe a le Atua ua afio ifo mai le lagi; ma sa afio ifo o ia i lalo ma faaali mai o ia lava ia te i latou.

7 Ma sa ou vaai foi ma molimauina sa afio ifo le Agaga Paia i luga o isi e toasefululua; ma sa faauuina i latou e le Atua, ma filifilia.

8 Ma sa fetalai mai le agelu ia te a’u, e faapea: Faauta i soo e toasefululua a le Tamai Mamoe, o e ua filifilia e auauna atu i au fanau.

9 Ma sa fetalai mai o ia ia te a’u: E te manatua aposetolo e toasefululua a le Tamai Mamoe? Faauta o i latou ia o e o le a latou faamasinoina ituaiga e sefululua o Isaraelu; o le mea lea, o auauna e toasefululua o au fanau o le a faamasinoina e i latou; ona o outou o le aiga o Isaraelu.

10 Ma o auauna nei e toasefululua o e o loo e vaai atu i ai o le a faamasinoina au fanau. Ma, faauta, ua amiotonu i latou e faavavau; ma ona o lo latou faatuatua i le Tamai Mamoe a le Atua ua faasinasina ai o latou ofu i lona toto.

11 Ma sa fetalai mai le agelu ia te a’u: Vaai ia! Ma sa ou vaai, ma iloa atu tupulaga e tolu ua mavae atu i le amiotonu; ma sa papa’e o latou ofu e pei lava o le Tamai Mamoe a le Atua. Ma sa fetalai mai le agelu ia te a’u: Ua faasinasinaina i latou nei i le toto o le Tamai Mamoe, ona o lo latou faatuatua ia te ia.

12 Ma o a’u, o Nifae, sa ou vaai foi i le toatele o le tupulaga lona fa o e na mavae atu i le amiotonu.

13 Ma sa oo ina ou vaai i motu o tagata o le lalolagi ua faapotopoto faatasi.

14 Ma sa fetalai mai le agelu ia te a’u: Faauta i au fanau, ma fanau foi a ou uso.

15 Ma sa oo ina ou vaai ma iloa atu tagata o a’u fanau ua faapotopoto faatasi i motu o tagata e faasaga i fanau a o’u uso; ma sa latou faapotopoto faatasi e tau.

16 Ma sa fetalai mai le agelu ia te a’u, e faapea: Faauta i le punavai o vai eleelea sa vaai i ai lou tamā; ioe, le vaitafe lava lea sa ia tautala i ai; ma o ona loloto, o loloto ia o seoli.

17 Ma o puao o le pogisa o faaosoosoga ia a le tiapolo, ia e faatauaso ai mata, ma faamaaa ai loto o le fanauga a tagata, ma taitai ese atu ai i latou i ala lautetele, latou te fano ma sē ai.

18 Ma o le fale tele ma le laolao, lea sa vaai i ai lou tamā, o mafaufauga lē aoga ma le faamaualuluga o le fanauga a tagata. Ma ua vavae ese i latou i se vanu tele ma le mata’utia; ioe, o le afioga lava lea o le faamasinotonu o le Atua Faavavau, ma le Mesia o lē o le Tamai Mamoe a le Atua, o lē ua molimau i ai le Agaga Paia, mai le amataga o le lalolagi seia oo mai i le taimi nei, ma mai i le taimi nei e oo i le faavavau.

19 Ma a’o fetalai mai e le agelu nei upu, sa ou vaai ma iloa atu fanau a o’u uso ua faasagatau mai i a’u fanau, e tusa ma le fetalaiga a le agelu; ma ona o le faamaualuluga o a’u fanau, ma faaosoosoga a le tiapolo, na ou vaai ua manumalo ai le fanau a o’u uso ia i latou o a’u fanau.

20 Ma sa oo ina ou vaai, ma iloa atu tagata o le fanau a o’u uso ua latou faatoilalo i a’u fanau; ma ua latou o atu o ni motu o tagata i luga o le laueleele.

21 Ma sa ou vaai atu ia te i latou ua faapotopoto faatasi i motu o tagata; ma sa ou vaai i taua ma tala o taua i totonu o i latou; ma sa ou vaai i le tele o tupulaga ua mavae atu mai taua ma tala o taua.

22 Ma sa fetalai mai le agelu ia te a’u: Faauta o i latou nei o le a faaitiitia i le lē talitonu.

23 Ma sa oo ina ou iloa atu, ina ua mavae ona faaitiitia o i latou i le lē talitonu, ua avea i latou ma tagata uli, ma inosia, ma eleelea, ua tutumu i le paie ma ituaiga uma o mea inosia.