1 Ma sa oo ina laua ifo atu i le Alii, ma o atu faatasi ma a’u; ma sa matou galuea’iina laau i gaosiga uiga ese. Ma sa faaali mai e le Alii ia te a’u i lea taimi ma lea taimi le ala e tatau ona ou galueaina ai laau o le vaa.

2 O lenei, o a’u o Nifae, sa ou lē taina laau i le ala sa a’oa’oina e tagata, pe sa ou fauina le vaa i ala a tagata; ae sa ou fauina i le ala na faaali mai e le Alii ia te a’u; o le mea lea, sa lei tusa ai ma le ala a tagata.

3 Ma o a’u, o Nifae, sa ou alu soo i le mauga, ma sa ou ^atatalo soo atu i le Alii; o le mea lea na ^efaaali mai ai e le Alii ia te a’u mea sili.

4 Ma sa oo ina ua uma ona ou fausia le vaa, e tusa ma le afioga a le Alii, sa vaai o’u uso ua lelei, ma o lona gaosiga sa matagofie tele lava; o le mea lea, sa laua toe ^afaamaualalalo ai i laua lava i luma o le Alii.

5 Ma sa oo ina oo mai le siufofoga o le Alii i lo’u tamā, ia matou tutulai ma o ifo i totonu o le vaa.

6 Ma sa oo i le aso na sosoo ai, ina ua uma ona matou saunia o mea uma, o fualaau ’aina e tele ma ^aaano o manu mai le vao, ma le meli e tele, ma mea manaomia e tusa ma mea na poloaiina ai i matou e le Alii, sa matou o ifo i le vaa, ma a matou uta uma ma a matou fatulaau, ma mea uma na matou aumai faatasi ma i matou, e taitoatasi e tusa ma lona tausaga; o le mea lea, sa matou o ifo uma i totonu o le vaa, faatasi ma a matou ava ma a matou fanau.

7 Ma o lenei, sa fanaua e lo’u tamā i le vao ni atalii e toalua; o le matua sa faaigoa o ^aIakopo a’o le itiiti o ^eIosefa.

8 Ma sa oo ina ua uma ona matou o ifo uma i totonu o le vaa, ma ua ave faatasi ma i matou a matou mea manaomia ma mea sa poloaiina ai i matou, sa matou tuuvaa atu loa i le ^asami ma tulei atu i luma o le matagi agai i le ^elaueleele na folafolaina.

9 Ma ina ua mavae ona tuleia o i matou i le ala o le matagi mo aso e tele, faauta, sa amata e o’u uso ma atalii o Isamaeli ma a latou avā foi ona faafiafia i latou lava, sa oo ina amata ona latou sisiva, ma pepese, ma tautatala ma le lē migao tele, ioe, sa oo lava ina galo ia te i latou le mana na aumai ai i latou iina; ioe, sa faaosofia lava i latou i luga o le lē migao tele.

10 Ma o a’u, o Nifae, sa amata ona ou mata’u tele ne’i toatamai le Alii ia te i matou, ma taia ai i matou ona o lo matou amioletonu, ma tofatumoanaina ai i matou i le loloto o le sami; o le mea lea, o a’u, o Nifae, sa amata ona ou tautala atu ia te i latou ma le faamamalu tele; ae faauta sa latou ^afeita mai ia te a’u, ua faapea mai: Matou te lē mananao ia avea lo ma uso laitiiti o se ^epule ia i matou.

11 Ma sa oo ina ave a’u e Lamana ma Lemuelu ma saisai a’u i maea, ma sa la faia ia te a’u ma le saua tele; ae ui i lea, sa ^atuu lava e le Alii ina ia mafai ona ia faaali mai ai lona mana, e faataunuu ai lana fetalaiga na ia fetalai mai ai e uiga i e amioleaga.

12 Ma sa oo ina ua uma ona laua noatia o a’u seia lē mafai ona ou gaoioi, o le ^atapasā, lea sa saunia e le Alii, ua le ola.

13 O le mea lea, sa latou le iloa ai le mea e uli i ai le vaa, sa oo ina oso mai se timuga tele, ioe, o se afa tele lava ma mata’utia, ma sa toe ^atuleia ai i matou i tua i luga o le vasa i le va o aso e tolu; ma sa amata ona latou matata’u tele ne’i o latou malelemo i le sami; ae ui i lea sa latou le tatalaina lava a’u.

14 Ma i le aso lona fa, lea na toe tuleia ai i matou i tua, sa amata ona matua faateteleina o le afa.

15 Ma sa oo ina toetoe a tofatumoanaina i matou i le loloto o le sami. Ma ina ua mavae ona toe tuleia o i matou i tua i luga o le vasa mo le va o aso e fa, sa amata ona ^avaai o’u uso ua oo mai i o latou luga le faamasinoga a le Atua, ma o le a latou fano vagana ai ua latou salamo ia latou amioletonu; o le mea lea, na la o mai ai ia te a’u, ma tatala fusi sa fusifusia ai o’u tapulima, ma faauta, sa fulafula tele lava; ma sa faapea foi ona fulafula tele o o’u tapuvae, ma sa matua tiga tele lava.

16 Ae ui i lea, sa ou tepa taulai a’e i lo’u Atua, ma sa ou ^aviia o ia i le aso atoa; ma sa ou lē faaseā e faasaga i le Alii ona o o’u puapuaga.

17 O lenei o lo’u tamā, o Liae, sa tele mea sa ia fai atu ia te i laua, ma i atalii foi o ^aIsamaeli; peitai, faauta, sa laua manava mai le taufaamata’u tele e faasaga i soo se tasi e tautala atu mo a’u; ma o o’u matua, ona sa mafatia i le tele o o laua tausaga, ma ona sa mafatia foi i le faanoanoa tele ona o a laua fanau, sa ave ifo i laua, ioe, e faapea lava i luga o o laua tofaga-gasegase.

18 Ona o lo laua faavauvau ma le faanoanoa tele, ma le amioletonu o o’u uso, sa toetoe ina a aumai i laua e auina atu i lea lava taimi e fetaia’i ma lo laua Atua; ioe, sa toetoe ina a tuuina ifo i lalo o laua lauulu sinasina e faataooto maualalo ifo i le eleele; ioe, sa toetoe lava foi a lafoaiina i laua ma le faanoanoa i totonu o se tuugamau e le elia.

19 Ma o Iakopo ma Iosefa foi, ona sa laiti, ma ona sa laua mananaomia se tausiga tele, sa faanoanoa i puapuaga o lo laua tinā; ma o ^ala’u ava foi ma ona loimata ma ana talosaga, ma la’u fanau foi, sa le faamaluluina ai lava loto o o’u uso ina ia la tatalaina a’u.

20 Ma sa leai se mea vagana ai le mana o le Atua, lea sa faamata’uina ai i laua i le faafanoga, sa mafai ona faamaluluina ai o laua loto; o le mea lea, ina ua laua vaai ua tauau ina tofatumoanaina i latou i le loloto o le sami, sa la salamo ai i le mea na laua faia, sa oo ina laua tatalaina a’u.

21 Ma sa oo ina ua uma ona laua tatalaina o a’u, faauta, sa ou ave le tapasā, ma sa ola e pei ona ou manao i ai. Ma sa oo ina ou tatalo atu i le Alii; ma ina ua uma ona ou tatalo atu sa pe le matagi, ma sa tea atu afā, ma sa oo mai se malū tele.

22 Ma sa oo ina o a’u, o Nifae, sa faatautaia le vaa, sa oo ina matou toe folau agai atu i le laueleele na folafolaina.

23 Ma sa oo ina ua mavae ona matou folau mo le va o aso e tele, sa matou taunuu i le ^alaueleele na folafolaina; ma sa matou o atu i luga o le laueleele, ma faatutu o matou faleie; ma sa matou ta’ua lea, o le laueleele na folafolaina.

24 Ma sa oo ina amata ona matou galueaiina le eleele, ma amata ona matou totō fatulaau; ioe, sa matou tuuina i le eleele a matou fatulaau uma, ia sa matou aumai mai le laueleele o Ierusalema. Ma sa oo ina tutupu tetele i latou; o le mea lea, sa faamanuiaina ai i matou i le mau tele.

25 Ma sa oo ina matou maua i luga o le laueleele o le folafolaga, a’o matou malaga i le vao, sa i ai i le vao ituaiga o manu eseese, o le povi fafine ma le povi poa, ma le asini ma le solofanua, o le ’oti ma le ’oti vao, ma ituaiga uma o manu aivao, ia sa i ai mo le faaaogaina e tagata. Ma sa matou maua ituaiga uma o minerale u’amea, o le auro, ma le ario, ma le apamemea.