Say Unaan a Libro nen Nephi
Say Impanoley tan Impampulong to
Say awaran nen Lehi tan si asawa to a Sariah, tan apatira ya anak to a lalaki, ya atawag na, (manlapu ed sankapañguloanan) Laman, Lemuel, Sam, tan Nephi. Say Katawan pinasakbayan to si Lehi ya ontaynan ed dalin na Jerusalem, lapu ed sikato so namprofesiya ed saray totoo nipaakar ed saray karelmeñgan da tan pilalek da a deralen so bilay to. Sikato so nambaroy a talora ya agew ed kalawakan a kaiba to so boleg to. Si Nephi intarok to so saray agagi to ya ompawil ed dalin na Jerusalem pian alaen da so kasulatan na saray Judio. Saray awaran na saray irap da. Inala ra so saray anak a bibii nen Ishmael tan inasawa da ira. Inala ra so saray boleg da tan sinmipot la ra ya amaarap ed kalawakan. Saray irap da tan segsegang da ed kalawakan. Say tinunton da ed impambaroy da. Akasabi ra ed baleg a danum. Saray agagi nen Nephi inmalsa ra sumpa ed sikato. Sikara so kinewkew to, tan nangawa na baleg a bapor. Tinawag da so saman a pasen na Daakan. Binaliw da so baleg a danum ya anga ed dalin na sipan, tan arum ni ra. Saya so unong ed saray kasulatan nen Nephi; odino dia ed sananey a salita, siak, Nephi, so nansulat ed saya a kasulatan.
Tekap 1
Si Nephi ginapoan to so kasulatan na saray totoo to—Si Lehi anengneng to ed payawar so lusek ya apoy tan nambasa ed libro na profesiya—Indayew to so Dios, impasakbay to so isabi na Mesias, tan improfesiya to so kaderal na Jerusalem—Sikato so pinasegsegang na saray Judio. Ñgalñgali 600 S.C.
1 Siak, Nephi, lapu ed nianak ak ed saray maong ya ateng, kanian nibañgat ak ed amin ya aral nen amak; tan lapu ed anengneng ko so saray dakel a kasegsegañgan legan na saray agew ko, angaman ontan, lapu ed apalaboan ak na Katawan ed amin na saray agew ko; on, awalaan ak na baleg a kakabatan ed kaabigan tan ed misterio na Dios, dia ed ontan gawaen ko so saya a kasulatan na saray agawgawa ed saray agew ko.
2 On, gawaen ko so kasulatan ed salita nen amak, a saya so tugyop na aral na saray Judio tan salita na saray Egipto.
3 Tan kabat ko a saray kasulatan a gawaen ko so tua; tan gawaen ko so saraya ed dili a limak; tan gawaen ko so saraya unong ed kakabatan ko.
4 Tan agawa ed gapo na unaan a taon ed impanoley nen Sedekias, ari na Juda (si amak, a si Lehi, lapu ed nanayam nen saman ed Jerusalem ed amin ya agew to); tan dia ed saman lamlamang a taon dakel so saray sinmabi a profeta, a sikara namprofesiya ed saray totoo a kaukolan a sikara so mambabawi, odino say baleg a ciudad na Jerusalem nepeg a naderal.
5 Lapu ed ontan agawa a si amak, Lehi, dia ed impankurang to nampikasi ed Katawan, on, angan dia ed amin a puso to, ya onkana ed saray totoo to.
6 Tan agawa legan to a mampipikasi ed Katawan, wala so sinmabi a siñga lusek ya apoy tan nanayam ed tapew na sakey a baleg a bato ed arap to; tan anengneng to tan nadñgel to so dakel; tan lapu ed saray beñgatla ya anengneng to tan nadñgel to sikato so pinmayegpeg tan nangiwgiw a mapalalo.
7 Tan agawa a sikato so pinmawil ed dili ya abong to ed Jerusalem; tan sikato so dinmokol ed dukolan to, lapu ed tinalo na Espiritu tan saray beñgatla ya anengneng to.
8 Tan lapu ed tinalo na Espiritu, anengneng to ed payawar, anga ed anengneng to ya alokasan so saray katawenan, tan dia ed nunot to anengneng to so Dios a manyodyurong ed trono to, ya aliber na ag-nabilang ya olop na saray angeles ya awawey da so mañgacancion tan mandadayew ed Dios da.
9 Tan agawa ya anengneng to so Sakey ya onleleksab a nanlapu ed pegley na tawen, tan anengneng to a say sinag to so mapalalo nen say agew ed kaaguan.
10 Tan anengneng to met so sananey a labindua a manomtumbok ed sikato, tan say dalang na sinag da apalabsanan to so dalang na saray bitewen ed liwang.
11 Tan sikara so linmasor a linma ed tapew na dalin; tan say unaan sinmabi tan tinmalindeg ed arapan nen amak, tan initer to so sakey a libro, tan ingangan to ed sikato a basaen to.
12 Tan agawa a dia ed impambasa to, sikato so napno na Espiritu na Katawan.
13 Tan binasa to, a nankuan: Abagey, abagey, so Jerusalem, lapu ed anengneng ko so saray karumsisan mo! On, tan dakel ni a beñgatla so abasa nen amak nipaakar ed Jerusalem—a sikato so kaukolan a naderal, tan saray manaayam diman; dakel so saray ompatey ed panamegley na espada, tan dakel so saray nadakep ya awiten da ya ipañgaw ed loob na Babilonia.
14 Tan agawa a sanen si amak abasa to tan anengneng to so saray ankakabaleg tan makapakelkelaw a beñgatla, imbelyaw to so dakel a beñgatla ed Katawan; a siñga: Ankakabaleg tan makapakelkelaw so saray kimey mo, O Katawan a Dios a Makapanyari ed amin! Say tronom so wala ed tagey na saray katawenan, tan say pakapanyarim tan say kaabigan mo, tan panañgasim so wala ed amin a manaayam ed tapew na dalin; tan, lapu ed mapañgasi ka, ag mo nitepel so saray ondago ed sika a sikara so nabalang!
15 Tan onia so kanengneñgan na salita na impandadayew nen amak ed Dios to; lapu ed say kamarerua to so nangayaga, tan say tibukel a puso to so napno, lapu ed saray beñgatla ya anengneng to, on, saray impanengneng na Katawan ed sikato.
16 Tan natan siak, Nephi, ag ko la dia insulat so saray amin a beñgatla ya insulat nen amak, lapu ed dakel ed saray insulsulat to a saraya so anengneng to ed payawar tan dia ed kugip; tan insulat to met so dakel a beñgatla ya improfesiya to tan sinalita to ed saray ilalak to, a saraya ag ko la isulat dia ya amin.
17 Balet gawaen ko so awaran na saray dinmadalan ya agawgawa legan na saray agew ko. Nia, gawaen ko so pamatikey ed saray kasulatan nen amak, ed tapew na saray piligo a saraya so ginawak ed saray dili a limak; dia ed onia, kayari pamatikey ko ed saray insulat nen amak dia ed ontan gawaen ko met so kasulatan na dili a bilay ko.
18 Dia ed ontan pilalek ko a nakabatan yo, a kayari a say Katawan impanengneng to so saray dakel a makapakelaw a beñgatla ed kinen amak, a Lehi, on, nipaakar ed kaderal na Jerusalem, nia sikato so linma ed limog na saray totoo, tan ginapoan to so namprofesiya tan imbawag to ed sikara so nipaakar ed beñgatla ya anengneng tan nadñgel to.
19 Tan agawa a sikato so binalaw-balaw na saray Judio lapu ed saray beñgatla a pinaneknekan to ed sikara; tan peteg a pinaneknekan to so karelmeñgan nipaakar ed saray karelmeñgan tan karumsisan da; tan pinaneknekan to so saray beñgatla ya anengneng tan nadñgel to, tan ontan met ed saray beñgatla ya abasa to ed libro, a mañgipanengneng a malinlinew nipaakar ed isabi na Mesias, tan ontan met ed pakadundon na mundo.
20 Tan sanen nadñgel na saray Judio so saraya a beñgatla sikara so sinmanok ed sikato; on, angan unong ed saray agawa ed saray profeta nen inmuna, a sikara so imbantak da ed paway, tan tinopak da ra, tan pinatey da ra; tan sikara met so nampilalek ed bilay to, pian saya so naekal da. Balet nia, siak, Nephi, ipanengneng ko ed sikayo a say maamuyot a panañgasi na Katawan wala ed saray pinili to, lapu ed say pananisia ra, a sikara so gawaen to a makapanyari anga ed pakayari na kilalaban.